Букро (Айво Иви)
| Букро Автор: Айво Иви |
| Поттэмын: 1928. Источник: Векшин И. Букро // Удмурт дунне : газет. — 2018. — № 86. — 16-тӥ бам• Нырысьсэ Ивидай Иви ватэмнимын печатламын |
Одӥг бусые одӥг ана вылэ сезьы пӧлы букро[1] потэм. Тро-о-ос букроёс. Одӥгез чурыт куко, уло-ваё, шальтыр-шальтыр йыро букро ана вылысь сезьылэсь но ӝужыт будэм. Будэм но лапег сезьыёс азьын ушъяське:
— Эк тӥ, чик кулэтэм макеёс, шунды сутыса быдтон люкетъёс! Марлы тӥ яраськоды! Модосъёсты но тӥляд сӥньыс кадесь гинэ, йыръёсты но быжтэм атаслэн быжыз кадесь гинэ, гуриёсты но ӧвӧл, жагтурын тӥ, милемлы гинэ будыны люкетыса, улӥськоды. Адями но тӥледыз уг яраты. Милемыз ке шуид, милемыз адями юри кизе, юри, кырыменыз кырмыса, ана вылаз пазя, юри со милемлы музъем гыре, сое небыт каре. Тӥ номырлы но уд яраське, тӧл турын тӥ, мынам кылы зэм…
Букролэсь озьы ушъяськемзэ лызсяська[2] кылӥз. Тро-о-ос лызсяськаёс… Одӥгез лызсяська, кӧтыз ӝож луса, лыз синьёссэ иньме ӝутыса, букролы вера:
— Чик юнме ушъяськиськод тон, «сьӧд букро». Тодӥськод ке, тон ачид номырлы но уд яраськы. Кинь понна адями музъем гыре, кинь понна со сое усъя, кыеда, уен-нуналэн сюлмаське? Ми понна, ми — лызсяськаёс понна. Тон адямилэн тушмонэз. Ми понна со юри музъем гыре, юри со милемыз, лызсяськаёсыз, сезьы пӧлаз вордэ… Кыӵе со милемлы шумпотэ! Ана вылаз лыктэ ке, милемыз — лызсяськаёсыз — адӟыса, вань кайгуоссэ вунэтэ: «У-у, кыӵе чебер мынам сезьые, мар мында „дыдыксинъёс“ потэмын, араны но тае туж шулдыр но, туж капчи но луоз инӥ», — шуэ. Нылпиёс нош милемлы кыӵе шумпото. Соёс милемыз, лызсяськаёсыз, «дыдыксинь» шуса бичаса, тугоко[3] лэсьто, йыр котыразы керттыса, нулло, укноязы поно… Эн ушъяськы тон, букро, чик юнме! Ми пон на адями музъем гыре, ми понна ик государстволы налог но со тыре. Мынам кылы зэм…
Букроен лызсяськалэсь озьы вераськемзэс йыран[4] дурысь вожпот[5] кылӥз. Троо-ос вожпотъёс. Одӥгез вожпот, пужым быдча ик маке, йырзэ урдӥз но, бусы трос кесиськыса, вера:
— Эк, шузиёс, шузиёс! Кыкнады но тӥ: букро но, лызсяська но — кыкнады но тӥ визьтэмгес на али. Али, туэ гинэ, ворскемын тӥ. Мон инӥ та ана вылын, та йыран дурын сизьымдон но сизьыметӥ арме улӥсько: одӥг пол но адями мыным вожзэ ӧз потты на, одӥг пол но со мыным кизэ ӧз йӧтты на, одӥг пол но со мынэсьтым выжыме аслаз герыеныз ӧз на ванды на. Адями монэ котькинлэсь но трос яратэ. Тужгем ик ярато монэ куанеръёс. Тани та мынам анае гуртысь самой куанер муртлэн анаез луэ. Со юри, монэ жаляса, аназэ котьку герыен гыре, плуг уг басьты… Плуген гырисьёсыз мон уг яратӥськы. Плуг со милесьтым выжымес сокы ик кучымак гинэ вандэ, вандэ но йырынымы улэпкын сюе соге. Плуг — со милям самой урод тушмонмы дунне вылын. Соин ик куанер кресьянъёс плуг уг басьяло, соёс жаляло угой милемыз. Гырыкызы соёс юри паськыт йыран кельто милемлы будыны. Ми, вожпотъёс, адямилы сионлы но яраськомы: тол ке вуэ, куанеръёс, вожпотэз вожмаськыса бичаса, нянь каро; адямиез ми, вожпотъёс, сюдыса возиськомы, пудо сионлы но ми умой. Тӥ марлы яраськоды? Тани адямиёс лыктозы но ваньдэс, сюрлоен вандылыса, куялозы. Адями, тодӥськоды ке, ми понна музъем гыре, тӥ понна ӧвӧл. Тӥ — букро но, лызсяська но — огды но номырлы но уд яраське, милемлы гинэ будыны люкетыса, улӥськоды, мынам кылы зэм…
Макмыр йӧтыса висись муртлэн бамыз кадь, кӧс кӧсэктӥз сезьы аналэн бамыз, вожпотлэсь та верамзэ кылыса, йырзы кур луиз сезьы йыръёслэн, лулскылыса кадь, каллен гинэ чш-ш-ш карыса, куспазы вераськыны кутскизы… Одӥгез сезьы кыедо иньтые шедем, ӝужыт, вольыт будэм, йырзэ ӝутыса, тазьы вера:
— Тон но, букро — сьӧд букро, тон но, дыдыксинь — лыз сяська, тон но, вожпот — вожпот, тӥлесьтыд верамдэс ми кылзӥм — кылзэ али мынэсьтым верамме: тӥляд, букролэн но, лызсяськалэн но, вожпотлэн но, верамды одӥгез но зэм ӧвӧл. Тӥляд верамдылы ми ум оскиське. Тӥ — жагтурынъёс. Тӥ — адямилэн тушмонъёсыз. Тӥ, милесьтым вирмес юыса, улӥсь коды, вир юись нумыръёс тӥ. Тӥледыз быдтон понна, адями ёс табере огзы бӧрсьы огзы плугъёс басьяло, кидыс шертон машинаёс шедьтыло, йыранъёсыз выжытэм быдтыло, музъемзэс валче ужаны кутскыло, тӥляд даурды быре инӥ. Мед быроз! Тӥ — номырлы ярасьтэм жагтурынъёс. Кине адями яратэ, кинь понна со музъем гыре, кинь понна со музъемзэ кыеда, кинь понна? Букро понна но ӧвӧл, лызсяська понна но ӧвӧл, вожпот понна но ӧвӧл, сезьы нянь понна со музъем гыре, сезьыез араса, со пизь каре, собере ческыт табань пыже. Тӥ ке нош пудо сионлы но уд яраське, милемлы гинэ будыны люкетыса, улӥськоды, вирюисьёс тӥ. Мынам кылы зэм, уд ке оскиське, ойдолэ, тӥни кенер вӧзын искал вань, ойдолэ солэсь юаломе…
Искал инӥ кемалась отын, кенер висэттӥ учкыса, улэ: сезьы йыръёслэсь ӵашетэмзэс кылыса, солэн кӧт пушказ сюлъёсыз ик ветлыны кутскизы инӥ, кенер вамен гинэ потэмез уг луы. Сезьы йырлэсь верамзэ кылыса, со шумпотӥз, шумпотыса бер пыдъёсыныз музъем вылэ пыкиськиз но, быжзэ сэзъялтӥз но, вань кужмысьтыз сюрыныз кенерез бералтӥз но, кенер шылтыр-шалтыр ёмыраса кошкиз, искал синь куспын сезьы ана вылэ вуиз: ӵаж-ӵаж сие сезьы йыръёсыз… Озьы, кӧтыз барабан кадь луымон, сииз-сииз вож сезьыез но, букроез пыд улаз лёгаса, лызсяська вылэ таш-таш топлёкъёссэ куяса, каллен гинэ гуртаз кошкиз.
Йыран дурысь вожпот отчияз ик, чорк гинэ сылыса, кылиз, ушъяське ас понназ: «Верай веть, мынам кылы зэм: адями но милемыз уг иса, адямилэн искалэз но… Тазьы ке луиз, мон али нош ик сизьымдон но сизьым ар ӵоже, адямиез сюдыса, уло на. Йыранъёсыз гинэ медаз быдтэ вал…»