Бом, бом, бом, бом...
Бом, бом, бом, бом!
Звӧнӧн тырӧ кывтыд пом...
Петук лэптіс сорссӧ,
Курӧгъяслы горзӧ:
«Ӧзйис каньлӧн шоныд чом!
Он кӧ кусӧд, лоас шом!
Отсалыштам каньлы,
Шыльыд юра аньлы».
Бом, бом, бом, бом!
Звӧнӧн тырӧ кывтыд пом...
Курӧг котыр шызис,
Ывла тырнас гызис:
«Биыд, зонмӧ, абу теш!
Кӧні ведра? Кӧні кӧш?
Ӧдйӧ ваям васӧ,
Вала лэччам дасӧн».
Бом, бом, бом, бом!
Звӧнӧн тырӧ кывтыд пом...
Курӧгъяс оз узьны,
Кок йылысь оз усьны.
Коді босьтӧ ведра гоз,
Коді мукӧд пӧлӧс доз.
Котӧртӧны вала.
Каньыс жалькодь налы.
Бом, бом, бом, бом!
Звӧнӧн тырӧ кывтыд пом...
Петук горзӧ бара
Курӧгъяслы яра:
«Ванад зіля локтӧй ті!
Ватӧг дурны кутіс би,
Кӧсйӧ сотны ставсӧ.
Каньыд, кылад, нявзӧ».
Бом, бом, бом, бом!
Звӧнӧн тырӧ кывтыд пом...
«Мый тэ равзан, Петра?
Тыр нин миян ведра.
Васӧ ваям пырысь-пыр,
Огӧ нюжмасьӧй ми дыр,
Катӧдам да збоя
Би вылас и коям».
Бом, бом, бом, бом!
Звӧнӧн тырӧ кывтыд пом...
Курӧг котыр кашкӧ:
«Кусӧдам на, гашкӧ».
Чомйысь петӧ курыд тшын,
Сёйӧ курӧгъяслысь син.
Биыс ортсӧ письтӧ.
Каньыс синва кисьтӧ.
Бом, бом, бом, бом!
Звӧнӧн тырӧ кывтыд пом...
Курӧг котыр мырсьӧ,
Бикӧд вензьӧ, зырсьӧ.
Ӧтик курӧг сотіс кок,
Мӧдлӧн чишкасьӧма бок,
Петук пиньсӧ йирӧ:
«Биад энӧ пырӧ!»
Бом, бом, бом, бом!
Звӧнӧн тырӧ кывтыд пом...
Биыс чомсӧ ӧвтӧ,
Кутчысьӧ лыс вевтӧ.
Трачкакылӧ-сотчӧ лыс.
Петук сэтчӧ васӧ — быз!
Кисьтіс дас кык ведра
Курӧгъяскӧд Петра.
Бом, бом, бом, бом!
Звӧнӧн тырӧ кывтыд пом...
Петук индӧд кузя
Кусӧдчӧны сюся.
Пӧдтіс бисӧ кӧдзыд ва.
Петра равӧстіс: ура!
Дзоньӧн коли стеныс.
Позьӧ овны сэні.
Бом, бом, бом, бом!
Со и звӧнлы воис пом...
Каньыс чомйӧ пырӧ,
Долыдлунӧн тырӧ.
Клопкӧ курӧгъяслӧн борд.
Тшапа ветлӧ петук ёрт,
Юрсӧ лэптӧ вылӧ,
«Кикуруллю» сьылӧ.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator didn't fight or work for Soviet Union victory during the Great Patriotic War — so the 70-year protection term is applied;
- and the creator died before January 1, 1954 (more than 70 years ago), and has been not posthumously rehabilitated since that date;
- and this work was first published before January 1, 1954 (more than 70 years ago).
The author died in 1951, so this work is also in the public domain in other countries and areas where the copyright term is the author's life plus 72 years or less (if applicable), or the copyright term is 83 years or less since publication (if applicable).
Public domainPublic domainfalsefalse