ЙОФКС, КОНА УЛЬСЬ
„Мес тячи, атяй,
Тон аф весялат,
Йофкс аф азондат,
Морот аф морат?
Мес тячи, атяй,
Улоце нолдаф,
Кода акша лов
Шамаце олаф?
Или од пингце
Тонь мялезот лядсь?
Или седицень
Токазе илядсь?..”
Тяфта кизефнихть
Кузь атянь эса
Эсь уноконза —
Йомла иднянза,
Конатненди сон
Эрь шиня корхнесь,
Йофкскят, моронят
Эрь илять йофнесь.
Азонкшнезе сон,
Кода мокшетне
Эрьсесть инголе,
Сире пингоне;
Кода моданкса
Баярхнень каршес
Мокшетне, эрзятне, русне
Тюренькшнесть марса.
Мокшетнень колга
Корхтама кармай,
[ 92 ]
Вайгялец трнай,
Нльне аварди...
Ялгай, авардят,
Кда мокшетнень
Эряфснон колга
Содама кармат.
— „Эх, иднят, иднят, —
Корхтазевсь атясь, —
Мес вексь нюрьхкяне!
Аф од пингозе
Монь мялезон лядсь,
Сон кунара ни,
Иднят, эздон кяшсь.
Аф весяла и сяс: —
Векозе йотни,
Иднят, седизе
Шавомда лоткси.
Эх, лама нужат
Мон вдь няендень,
Лама векозон
Лов, ведь кялендень.
Комсь кизоняста
Кодгемонь кизос
Макссень виезень
Баяронь пизос.
Цебярь цьоралень...
Эряме ошксса,
Ламоксть утцекшнень
Шава паксяса.
Аф эсь мяль вельде
Одста урьвяянь,
Кода корхнекшнихть,
Иднят урмаень, —
Кармасть шачема
Монцень идене...
Синьге ашу шись
Нужас кильдезне, —
[ 93 ]
Эсь лацон яксесть
Плотонь панема,
Конат сивотькшнесть
Стадань ванома.
Кулеви кайги
Мушконь локшесна
Оцю вирь ваксса,
Кели паксяса.
Токави седись —
Авардемась сай,
А козясь морай,
Рахси: ха, ха, хай!
Стака эряфта
Степька, Сибирьга
Срадсть-каладсть эздон
Оцю идене
Эстонь пингоне...
Вов кода, иднят,
Эряфть кялине.
Йомла идезе
Кувать мархтон ульсь,
Кода брадонза
Эряфть мархта тюрсь.
Марса покаме,
Коза вийсь саты,
Стане кочксеме
Эсьтейнек парши...
Ламоксть лов прашендсь
И пизепт пизсесть,
Народть сатозе
14-це кизось. —
Коневсть атять
Сире сельмонза,
Путердезь шудесть
Сельме веденза.
Авардезь иттне
Атянять кардасть,
[ 94 ]
Ожа пенясост
Сельме ветть нардасть.
— „Лямботольхть эста
Тундань шинятне,
Ляйхненди шудесть
Паксянь веднятне.
Лопаясь вирьнясь
Пиже лопаса,
Кармасть йотама
Паксяв сокама
Велень сокайхне —
Сьора видихне,
Кели лафтусост
Стакань кандыхне.
Моньге цьоразе
Кармась сокама,
Тундань шиса эжтьф
Модань токама.
Молян мельганза —
Мялезе касы:
Кода цьоразе
Модать сокасы...”
. . . . . . . . . .
„Ну, тяддень кизоть
Дацязень панца,
Монць старостати
Аф пелезь кандса...”
Тяфта думсекшнень
Пиже паксяса,
Монць пиже розьнять
Кядьсон капшаса.
А пиже розьнясь
Волнат кеподи,
Кода морянясь
Вишке вармати.
Эх, унась розьнясь,
Морась нармоннясь,
[ 95 ]
Паксять уфсезе
Сетьме варманясь.
Вай, ся кизоне
Лама думть думсень,
Лама сьорода
Сьоксети учсень.
Эряфс эсть йота,
Мезе ульсь думаф.
Вов мезенкса монь
Шамазе олаф.
Сюдуф кизотнень,
Идьнят, шачеме,
Сянкса цебярьда
Кржа няеме.
Лангсонк арнекшнесть
Оцю азорхне,
Вердонк симонькшнесть
Козя баярхне.
Вов ся кизотнень,
Мзярда думсекшнень,
Шавозь идезень
Симозь верозень.
* * *
— „Аф маниль шинясь, —
Корхтай Кузь атя, —
Шудезьня шудесть
Вельхкска туцятне;
Стирьнек, аванек
Сокай алянек
Сембе паксясольхть,
Паксянь тев лангсольхть.
Велети лядондсть
Сире атятне,
Сире бабатне,
Йомла шабатне.
Эрязда народсь
[ 96 ]
Покодсь паксяса,
Тюже розьнятнень
Веляфтсть тарвазса.
Ванан, ош пяльде
Арды алаша,
Лангсонза ломанть
Пиндолдсь палажоц.
Лафту лангсонза
Ульсть пагононза,
Кедень кяскавса
Ульсть кагодонза.
Кармась церькавста
Пайгонь шавома,
Тяфта эряскодсь
Кулянь азома.
Кода фкя ломань,
Пряснон кеподезь
Паксяса нуйхне,
Модань сокайхне.
Ваныхть велети, —
Мезьгя аф няеви —
Мезенкса пайгонь
Вайгяль маряви?
Мярьголеть пожар
Велеть фатязе, —
Качамонц народсь
Вай, аш няезе.
Сембонь сельмоста
Кяшевсь, юмась шись,
Ласьки ломаньда
Пяшкодсь паксянь кись.
Ласькихть алятне,
Ласькихть аватне,
Сяда пяк ласькихть
Стирьхне, цьоратне.
Пуромсть велети,
Пайгонь шавить ваксс,
[ 97 ]
Кона кяжденза
Кулять содамс макссь.
„Ой! Война! Война!”
Кулезь пилене, —
Сельме ведьняса
Пяшкодсть сельмоне.
Вай, сяка шитнень
Сяка недялятнень,
Кармасть панема
Войнав алятнень.
Кармасть шамома
Ошне, велетне,
Явсть сокай вийда
Кели паксятне.
Моньге, идьняне,
Колазь седизень —
Веры войнати
Панезь идезень.
Вярьга вайгяльса
Пишкодсть аватне,
Кармасть кулсема
Ризфти бабатне.
Колма кизот мольсь
Тя оцю войнась,
Верса валондовсь
Сокаень модась;
Лоткасть касомда
Паксяв сьоротне,
Видиснон плхтазь
Равжа порохне.
Кармасть лядома
Ошне кшифтема,
Кармасть ащема
Завоттне тевфтема.
Эста трудяйхне
Нолдазь вайгяльснон,
Инь азорхнень лангс
[ 98 ]
Венептезь кядьснон.
Кармасть зрнама
Модать краенза,
Кармасть шерьхкома
Уськса стаенза.
Эста лиссть лангти
Сембе трудяйхне,
Пряснон лангс пяярсть
Веры баярхне.
Трудяйхне тюрезь
Войнать лоткафтозь,
Кафта пря орелть
Прянзон комафтозь.
Коммунисттне мярьгсть:
„Минць азорхтама,
Лиякс эряма
Минь карматама:
Модать сокайти,
Заводть покайти.
Властть советтненди,
Трудендайхненди.”
* * *
Кода нармоттне
Тундань шинятнень
Лиихть ширезнок,
Вири, паксязнок,
Стане солдаттне
Аеркс войнаста,
Эряскодсть куду
Ломань бойняста.
Кажнайть мялецоль
Кудса покодемс,
Эсь ломань мархта
Корхтамс топодемс.
Фкя ков потмоста
Пяшкодсь веленьке
[ 99 ]
Алянь вийняса,
Солдат лемняса.
Кармасть корхтама:
Кода явомат
Нелькф парашитне,
Козянь паксятне.
Эрь шиня пуромксс
Марса пуромкшнесть,
Модань тевть колга
Спорязь корхнекшнесть.
Мяляфтса, пшкядсь
Велень козяньке:
— „Осал, атянят...
Цёлак, воляньте.
Содамс эряви,
Вельхксса шкай ули,
Сембонь, атянят,
Грехоньке улихть.
Тяфта аф пара:
Козятнень обжамс,
Анцема идьснон
Йорасасть нолдамс.
Эряви эрямс,
Кода атяньке,
Топодьстат улихть
Сембонь пеконьке.
Сире валмуворкссь
Вов мезе корхтай:
Осалонь арьсись
Сонць осалс токай.”
Эста Семанясь
Комотсь кяжденза,
Козять мяштенцты
Кундасть кяденза.
— Лоткак, инекуй,
Пантк кели куркцень!
Саты нолякшнить
[ 100 ]
Пинень вайгяльцень.
Кода атяньте
Эрямс йоратад,
А тейнек эряф
Тинь аф нолятад.
Сявсаськ модантень,
Явсаськ паршинтень,
Нельксаськ эрьхконтень —
Калу ведентень.”
„Видеце, Сема!” —
Ивадсть ашуфне,
Йотаф кизотнень
Стакань кандыхне.
Тяфта велеса
Срафнезь козятнень,
Инь азоронь пингть
Веронь потяйхнень.
. . . . . . . . . .
Вай, лиякс шинясь
Эждема кармась,
Лия кожфкаса
Уфазевсь вармась.
Яфодевсть вельхксста
Равжа туцятне,
Мазылгодсть, иднят,
Велень ульцятне.
Аньцек монь, атять,
Шава седизе:
Войнаста изь са
Ляды идезе.
Кемвете киза
Тядде топодсь ни
Тя инь азоронь
Веры войнати.
Вов тянкса тячи
Мон думазевонь,
Сире седисон
[ 101 ]
Эх, ризназевонь...
А тяни дайте,
Иднят, маттама,
Йофксозень эзда
Вандыс яфтама.
Йотка-пинге сай,
Пенц аделаса,
Вай, лия эряфть
Моразь мораса.
1929 к.
|
|
