Колхозонь эряф/1939/08/А. П. Чеховсь

From Wikisource
(Redirected from А. П. Чеховсь)
Jump to navigation Jump to search
Колхозонь эряф (1939), № 8 Август edited by Руськин Ф. С., Чумаков И. Ф.
А. П. Чеховсь by
авторсь: Максим Горький, мокшекс ётафтозе: Аф содаф (аноним)
Колхозонь эряф (Колхозная жизнь). Литературно-художественнай и общественно-политическяй журнал. Мордовскяй АССР-нь советскяй писателень союзонь правлениять органоц. Лисенди кемгафтувоце кизось, ковти весть. — № 8 Август 1939 киза. — с. (3)5—16
 

[3]

Колхозонь эряф 1939-08 05стр изобр1.jpg
 
[5]
М. Горький.
А.  П.  ЧЕХОВСЬ

Весть сон тердемань монь эсь ширезонза Кучук-Кой веленяти, коса ульсь сонь аф оцю мода пакшкац и кафта этажса акша кудняц. Тоса, тейнь эсь „имениянц“ няфнемста, сон кармась мяль вельде корхтама:

— Кда ба монь улельхть лама ярмактон, мон ба сей тиелень санатория велень сяряди учительхненди. Содасак, мон ба тиелень стама валда здания — пяк валда, оцю вальмя мархта и сери потолок мархта. Монь улель ба пяк цебярь библиотеказе, разнай музыкальнай инструментоне, нешке перезе, перезе, фруктовай садозе; можналь ба лувомс лекцият агрономиять колга, метеорологиять колга, учительти сембось эряви содамс, алякай, сембось!

Сон вдрук лоткась, козкстась, ширде варжакстсь монь лангозон и пеетькстсь эсь седивакскань, кельгови пеетькстома мархта, конац фалу тонь малатьфнензе тейнза и кепсезе пяк оцю мяльцень сонь валонзонды.

— Тонь мяльце моленди монь фантазиянень кулхцондомста? А мон пяк кельгса тянь колга корхтакшнемазень. Кда ба тон содалить, конашкава эряви русскяй велети цебярь, йону, образованнай учительсь миньцонк Россияса — сонь эряви путомс кодама бди лия условияс, и тянь эряви тиемс куроконя, кда минь шарьхкодьсаськ, што народть образованиянц оцюста касфтомафтома государствась срады, кода кальдявста плхтаф кирпицьста вачкаф кудсь. Учительсь должен улемс артистокс, художникокс, пяконя кельгольхце эсь тевонц, а минцонк — тя чернорабочай, кальдявста образованнай ломань, конац вели моли иттнень тонафтома стама жа охота мархта, кодамса туль ба ссылкас. Сон вачеда, кржа содай, эвфтьф сянь мархта, што мяньцы кши сускомть. А эряви, штоба велеса сон улель васенце ломанькс, штоба сон маштоль отвечамс мужикти сембе сонь кизефксонзонды, штоба мужикне сонь эздонза няельхть вий, конац достойнай, штоба сонь ширезонза шарфтомс мяль и кельгомс, штоба кивок афоль сменда сонь лангозонза иватькшнемс... машфнемс сонь личностенц, коданя миньцонк тийндихть сембе: урядниксь, козя лавочниксь, попсь, становойсь, школать попечителец, старшинась, и ся чиновниксь, конац каннесы школань инспекторонь лемть, но заботендай аф образованиять цебярняста ладяманц инкса, а аньцек округть циркуляронзон песта-пряс пяшкодемаснон инкса. Аф пара жа пандомс трьошникт ломанти, конац путф народть воспитывандама, — тон шарьхкодьсак? — народть воспитывандама! Нельзя же нолямс сянь, штоба ся ломанць якаль нефнефста, трнатоль начка, варяв школатнень эса кельмоть эзда, сярятькснель пряц, кельмо-сель, колмоньгемонь кизонзон самс сярятькснель лярингитса, ревматизмаса, туберкулезса... вдь тянкса визькс тейнек! Минь учителеньке кизоньберьф кафкса-вехкса кофнень пингста эряй кода паньф ломань, тейнза аш кинди валня азомс, сон тупойготкшни ськамонза эрямать эзда, книгафтома, развлеченияфтома. А тердьсыне сон эсь ширезонза ялганзон — сонь кармайхть лувондомонза муворувонди, неблагонадежностенкса, — глупай вал, конанц мархта хитрай ломаттне эвфнесазь дуракнень!.. Сембе тя [6]отвратительна... кодама бди издевательства ломанть лангса, конац тиенди оцю, пяк важнай работа. Содасак, — мзярда мон няйса учительть, сонь инголенза тейнь арси аф лад и сонь пелеманц инкса, и сянкса, што сон калдявста щаф, тейнь арам, учительть тя убожестванц инкса и мон монцке мезенксонга муворуван... афкукс!

Сон лоткась, кармась арьсема, яфодезе кяденц и сетьмоста азозе:

— Тяфтама нелепай, афуклюжай странась — тя минь Россияньке.

Оцю грустень цильфсь вельхтязень сонь славнай сельмонзон, срмамань тяйня китькскятне кружазь синь, сяда крхкалгофнезь сонь варжафксонц. Сон варжакстсь перьфпяли и пеетькстсь эсь лангозонза:

— Няйсак, — мон тейть азондонь либеральнай газетаста целай передовой статья. Адя — симття чайда, сянкса, што тонь ули тяшкава кирдемшкаце...

Тяфта сонь мархтонза ульсь сидеста: — корхтай тяшкава седивакска, серьезна, искренняйста и вдруг пеетьксты эсь лангозонза и эсь корхтаманц лангс, и тя ляпе, грустнай пеедемать эзда марявсь ломанть цють няеви скептицизмац, ломанть, конац содасыне валхнень питнеснон, арьсематнень питнеснон. И тя пеедемать эзда нингя марявсь кельгома скромностсь, чуткай деликатностсь.

Минь сетьмоняста и апак корхтак туме куду. Эста шись маниель, псиель; жалнасть волнатне, синь лангсост налхксесь шинясь; пандала ласковайста сувсь пинесь, конац мес бди довольнай. Чеховсь сявомань монь кядьта и, козкснезь, сетьмоняста кармас корхтама:

Тяфта визькс и грустна, а виде: улихть лама ломатть, конат сельме каяйхть пинетнень лангс...

И эстакигя рахазевсь и поладозе:

— Мон тячи корхтан эхярь дряхлай валхт... значит — сиретькшнян!

 

 

Тейнь пяк сидеста сашендовсь кулемс сонь эздонза:

— Сей, содасак ли, сась фкя учитель... сяряди, урьвяяфтф, — тонь аш тейнза лездомшкаце? Мзярс мон тейнза лездонь...

Или:

— Кулхцонтт, Горький, — тяса фкя учитель йорай знакомондамс тонь мархтот. Сон аф лисенди, сяряди. Тон ба молелеть ширезонза, — пара?

Или:

— Вов, учительницатне эняльдихть кучемс книгат.

Лияста мон ширесонза сатнине тона „учительть“: обыкновеннай учительсь, конац якстерь эсь афловкостенц шарьхкодеманц эзда, ащесь озада стулть крайняса и шаманц ливськодомс кочксесь валхт, старандась корхтамс сяда валазяста и „образованнайста“, или пяк визди ломанень развязность мархта, марнек мяленц шарфнезе сянь шири, штоба аф няфтемс пря глупайкс писательть инголе и Антон Павловиченди макссесь пефтома кизефкст, конат едва ли сашендсть сонь прязонза ся пингта инголе.

Антон Павловичсь оцю мяльса кулхцондозе афскладнай корхтамать, сонь грустнай сельмонзон эса няевсь пеедеманясь, тарсть срмафне сельмонзон вельксса — конясонза, и вов эсь пара, ляпе, кода матовай вайгяльса сон сонць ушеткшнесь простой, шарьхкодеви, эряфти маластонь валхт, — валхт, конат эстакиге кода бди простойкс тиендезь мархтонза корхтайть, сон лоткась старандамда улемс йонукс, конань эзда эстакиге арсесь и сяда йонукс, и сяда интереснайкс...

Мяляфтса, фкя учительсь — серись, осалсь, вачедоннекс ащиень тюжя шамась и кувака горбун шалхксь, конац меланхолически мянтьф улонц шири, ащесь озада Антон Павловичень каршеса и, сонь шамазонза равжасельмоса апак тархт ванозь, угрюмайста эчке вайгяльса корхтась:

— Эрямань тяфтама впечатлениятнень эзда педагогическяй сезонть пингста тиеви тяфтама психическяй конгломерат, конац аосолютна машфнесы перьфпяле ащи мирти объективнай отношениянь всякай возможностть. Конешна мирсь аф мезевок лия, кода аньцек минь арьсеманьке сонь колганза...

Тоса сон валгсь философиянь областти и кармась молема сонь [7]эзганза, кода эйть лангса ирецтось.

— А азк тейнь, — аф кайгиста и ласкавста кизефтезе Чеховсь, — кие тяфта тинь уездсонт пикссекшнесыне иттнень?

Учительсь комотсь стулть лангста и возмущеннайста кармась кядензон яфиема.

— Месть тон? Мон? Вестевок! Пикссемс?

И обижафста кармась уфкснема.

— Тон тят комотне, — сяда тов корхтась Антон Павловичсь, успокоительнайста пеедезь, — дряй мон корхтан тонь колгат? Но мон мяляфтса — лувине газетаста — кие бди пиксси, именна тинь уездсонт...

Учительсь озась, нардазе ливськотф конянц и, тьождяста ваймонц таргамда меле, глухой басса корхтазевсь:

— Виде! Ульсь фкя случай. Ся — Макаровсь. Содасак — дивандамс аф сави! Дикайста тись, — но ули туфтал. Сон урьвяяфтф, ниле иденза, урьвац — сяряди, сонць станя жа — сяряди чахоткаса, жалованьяц — 20 цалковай... а школась — похарям и учительти — фкя комната. Тяфтама условиятнень эса — шкаень ангелть пикссесак аш мезенксонга, а тонафнихне — синь ламода аф ангелхт, верондамак!

И тя ломанць, конац аньцек вов тяни безжалостна дивандафнезе Чеховонь йону валонь эсь запасонц мархта, вдруг, горбун шалхконц кяжиста люкафтозь, корхтазевсь простой, стака, кода кефт, валса, ся эряфть, конань эса эряй русскяй велесь, проклятай, грознай правдань яркайста няфнезь...

Азорть мархта прощандамста, учительсь кафцьке кядензон мархта сявозе сонь шуване сур мархта афоцю, коське кяденц и, сонь тарфтозь, азозе:

— Молень мон ширезт, кода начальствань шири, — пелезь и трнатозь, прязень тиине важнайкс, кода индейскяй атякшсь, йорайне няфтемс тейть, што, кля, и монга аф ленгаса кодафан... а вот туян — кода цебярь, маластонь ломанть ширеста, конац сембонь шарьхкодьсы. Оцю тя тевсь — сембонь шарьхкодемс! Спасиба тейть! Туян. Эсь мархтон сяван цебярь, пара мяль: крупнай ломаттне вдь сяда простойхть и сяда шарьхкодихть, и седиснон мархта сяда маласот минь ялганьконди, сембе ня мизерхнень коряс, конатнень йоткса минь эрятама. Прощай! Вестевок мон аф юкстате тонь...

Сонь шалхкоц тарозевсь, трванза пуромсть пара пеедеманди и сон апак учсек поладозе:

— А видеть азомс, и подлецневок: — станя жа несчастнай ломатть, — шяйтанць сявольхцень!

Мзярда сон тусь, Антон Павловичсь варжакстсь сонь мельганза, пеедезевсь и азозе:

— Цебярь ломанць. Аф кувать шабань тонафнема кармай...

— Мес?

— Кармайхть лангозонза молема... айдясазь...

Мзярс думандамда меле сон поладозе аф кайгиста и ляпста:

— Россияса честнай ломанць — кода бди трубань ароптыть лаца, конань мархта идень ваннихне эвфнесазь иттнень...

 

 

Тейнь арам, што всякай ломанць Антон Павловичень пингста аф эсь мяль вельде марязе эсь эсонза желаниять улемс сяда простойкс, правдивайкс, улемс сяда пяк эсь лацонза, и мон аф весть няендине, кода ломаттне йорязь эсь лангстост книжнай фразань, моднай валонь сьормав наряттнень и сембе лия уцес штучкатнень, конатнень мархта рузонь ломанць, арьсемок улемс европеецонь лаца, мазепнесы эсь прянц, кода дикарсь раковинатнень и калонь пейхнень мархта. Антон Павловичсь ашезень кельгонде калонь пейхнень и атякшень долгатнень; сембе сьормавсь, кальдердись и чужойсь, конатнень ломанць эсь лангозонза щафтозень „сяда важнайкс“ улеманкса, сонь эсонза кепсесь смущения, и мон няйндине, што эрь разня, мзярда сон эсь инголенза няйсь стама сьормав валса наряжаф ломань, сонь фатнезе желаниясь каяфтомс сонь лангстонза сембе тя аф эрявиксть, конац колсезе мархтонза корхнить настоящай шаманц и живой ваймонц. А. П. Чеховсь сембе эсь [8]эряфонц эрязе эсь ваймонц средстванзон лангс, фалу сон ульсь эсь лацонза, потма ширде ульсь свободнай и вестевок ашезе лувонда сталмонди сянь, мезе финцне — учсесть Антон Чеховонь эзда, омбонцне, сяда грубайхне, вешендсть. Сон ашезень кельгонде корхнематнень „оцю“ тематнень колга, — корхнематнень, конатнень мархта тя милай русскяй ломанць тяшкава усерднайста озафнесы эсь ваймонц, но юкснесы, што аф цебярь, но йофси аф остроумна корхнемс сай пингонь бархатнай костюпнень колга, кда тяниень пингоня тонь аш нльня приличнай штанатне.

Мазиста — простойсь, сон кельгондезе сембе простойть, настоящайть, седи ваксстоннеть, и сонь ульсь своеобразнай манерац ломаттнень тиендемс простойкс.

Весть сонь ширесонза ульсть пяк лац щаф колма ават; синь сонь комнатанц пяшкодезь шелковай юбкань шумса и кеме духонь шинеса и чиннайста озасть азорть каршес, тисть пря, бта синь пяк интересовандасыне политикась, и — кармасть „кизефксонь макссема“.

— Антон Павлович! А кода тон арьсят, мезьса аделави войнась?

Антон Павловичсь козкснесь, арьсесь и ляпоняста, серьезнай, ласковай тонца отвечась:

— Улема, — мирса...

— Ну, да, конешна! — Но кие ина сяськи? Грекне или туркатне?

— Тейнь арам, сяськихть сят, конат сяда виюфт...

— А конат, тонь койсот, сяда виюфт? — фкя-фкянь йотазь кизефнезь даматне.

— Сят, конат сяда цебярьста ярхцсихть и сяда образованнайхть.

— Ах, конашкава тя йонуста азф! — ивадсь фкясь.

— А кинь тон сяда пяк кельгсайть — грекнень или туркатнень? — кизефтезе омбоцесь.

Антон Павловичсь ласковайста варжакстсь лангозонза и отвечась кроткай, кельгови пеедеманц мархта:

— Мон кельгса — мармеладть... а тинь — кельгсасть?

— Пяк! — кайгиста азозе дамась.

— Сон тяфтама ароматнай! — солиднайста кемокстазень валонзон омбоцесь.

И сембе колмоцьке корхтазевсть оживленнайста, мармеладть колга кизефксса няфтезь прекраснай эрудицияснон и предметть цебярьста содаманц. Няйфоль — синь пяк довольнайхтельхть сянь мархта, што аф эряви напрягандамс йонцнон и тиендемс пря туркатнень и грекнень мархта серьезнайста заинтересованнайста, конатнень колга тядынголе и ашестеля думанда.

Тумста синь Антон Павловиченди весяласта макссть вал:

— Минь тейть кучтама мармелад!

— Тон пяк цебярьста корхнеть мархтост! — азыне мон, мзярда тусть синь.

Антон Павловичсь сетьмоняста рахазевсь и азозе:

— Эряви, штоба эрь ломанць корхталь эсь кяльсонза...

Омбоцеда мон ширесонза сатыне прокурорть од, мази товарищанц. Сон ащесь Чеховонь инголе и, кудрявай прянц шукаманц пингста, бойкаста корхтась:

— „Злоумышленник“ азксцень мархта тон, Антон Павлович, монь инголен путнят пяк сложнай кизефкс. Кда Денис Григорьевть эзда мон няян кяжи воля, конац действондась сознательна, мон должнан, мезеньгя лангс апак ватт, пякстамс Денисонь тюрьмав, кода тянь вешендьсазь обществать интересонза. Но сон дикарь, сон ашезе шарьхкотькшне тиф тевонц преступнай ширенц, тейнь сон ужяль! Кда жа мон сонь лангозонза карман ванома кода субъектонь лангс, конац тевть тиезе апак шарьхкодть, и пован ужяльдемань чувствать кядьс — мезьса мон гарантировандаса обществать, што Дениссь оду аф орадсы рельсатнень эзда гайкать и аф тии крушения? Вов кизефкссь! Кода ина тиемс?

Сон корхтамода лоткась, пондонц мяндезе фталу и Антон Павловичень шамас кармась ванома кизефтиень варжафксса. Сонь лангсонза мундирняц ульсь од, и мяштьсонза пунятне пиндолдсть станя жа самоувереннайста и тупойста, коданя правосудиять од кельгиенц сельмонянза.

— Кда ба мон улелень судья, — серьезнайста азозе Антон Павловичсь, — мон ба оправдандалине Денисонь...

[9]— Мезень коряс?

— Мон азолине ба тейнза: тон, Денис, нинге ашеть кенерь сознательнай преступниконь типти молемс, архт и кенерьхть!

Юристсь рахазевсь, но эстакигя жа оду арась торжественна серьезнайкс и сяда тов корхтась:

— Аф, кельгома Антон Павлович, — кизефкссь, конань путыть тон, может улемс разрешиндаф аньцек обществать интересса, конань эряфонц и собственностенц ванома мон путфан. Дениссь — дикарь, да, но сон — преступник, — вов истинась!

— Тон кельгсак граммофонть? — вдрук ласковайста кизефтезе Антон Павловичсь.

— О, да! Пяк! Аф азомшка цебярь изобретения! — весяласта азозе од ломанць.

— А мон афолине няй граммофоттнень! — грустнайста видендась Антон Павловичсь.

— Мес?

— Да синь жа корхтайхть и морайхть мезеньгя апак маряк и сембонь синь азондсазь карикатурнайста, кулофста... А фотографияса тон аф занимандат?

Няевсь, што юристсь пяк кельгсы фотографиять; сон эстакигя жа увлечения мархта корхтазевсь сонь колганза, йофси ашезь интересованда граммофонть мархта, хоть сон пяк похожаель тя „афазомшка цебярь изобретениять“ лангс, конань тонкайста и видеста няезе Чеховсь. Оду мон няине, коданя мундирть эзда варжакстсь живой и сатомшка забавнай ломанць, конац мзярс эсь прянц эряфть эса марязе кода охотаса пинелефкскясь.

Од ломанть ильхтемода меле Антон Павловичсь угрюмайста азозе:

— Вов правосудиять... фталонц эса тяфтама прыщне — распоряжандайхть ломаттнень павазснон лангса.

И, мзярс аф корхтамода меле, поладозе:

— Прокурорхне пяк кельгсазь калонь ульмамаснон. Сембода пяк — ёршень!

 

 

Сон маштсь сембе вастова мушендомс и лифнемс пошлостть, — сонь ульсь маштомац, конац доступнай аньцек эряфти оцю требования мархта ломанти, конац тиендеви аньцек оцю желаниять мархта ломаттнень няемс простойкс, мазикс, гармоничнайкс. Пошлостсь сонь эздонза фалу мушендсь жестокай и строгай судья.

Кие бди сонь пингстонза азондозе, што популярнай журналонь издательсь — ломаттнень кельгомаснон и ширезост мялень шарфнемать колга фалу корхни ломанць — йофси аш мезенксонга оскорбиндазе машинакинь кондукторть, и што вообще ся ломанць пяк грубайста вятнезе эсь прянц ломаттнень мархта, конат зависимайхть эздонза.

— Ну, месть ни корхтамс, — хмурайста пеедезь азозе Антон Павловичсь, — вдь сон жа аристократ, образованнай... сон жа семинарияса тонафнесь! Сонь аляц карьса якась, а сон канни лаковай ботинкат...

И ня валхнень тонцнон эса ульсь мезе бди стама, конац эстакиге „аристократть“ тиендезе ничтожнайкс и рахсема вастокс.

— Пяк талантливай ломанць, — корхтась сон фкя журналистонь колга. — Сьормады фалу тяфта благороднайста, гуманнайста... лимонаднайста. Эсь урьванц ломань пингста сюцекшнесы дуракс. Прислуганди сонь комнатац сырой, и горничнайхне постоянна сярятькснихть ревматизмаса...

— Тонь мялезт, Антон Павлович, N N—ць?

— Да... пяк. Приятнай ломанць, — козкснезь согласиндакшни Антон Павловичсь. — Семботь содасы. Морафни лама. Монь колма книганень морафтозень. Рассеяннай сон, тячи тейть азсы, што тон чудеснай ломанят, а ванды киндингя азсы, што тон салайть любовницацень мирденц шелковай носоконзон, конат равчт, сенем китькскя мархта...

Кие бди сонь пингстонза пеняндась эчке журналхнень „серьезнай“ отделснон скучнайшиснон и стакаста лувомаснон лангс.

— А тон тяйть морафне сят статьятнень, — убежденнайста макссь совет Антон Павловичсь. — Тя вдь ялгань [10]литература... приятелень литература. Сонь сочиняндакшнесазь Краснов, Чернов, Белов господатне. Фкясь сьормады статья, омбоцесь корхтай сонь каршезонза, а колмоцесь мирендафнесыне васенцетнень противоречияснон. Похожай, што синь болван мархта винтса налхкихть. А мезенди сембе тя эряви морафтыти, — синь эздост кивок эсь прянц аф кизефнесы.

Весть сонь ширезонза мольсь кодама бди эчке дама, таза, мази, мазиста щаф-каряф и кармась корхтама „Чеховонь коряс“.

— Скучна эрямс, Антон Павлович! Сембось серай: ломаттне, менельсь, морясь, нльня панчфневок тейнь няевихть серайкс. И аш желаният... ваймозе тоскаса. Кода бта кодама бди урма...

— Тя — урма! — убежденнайста азозе Антон Павловичсь. — Тя урма. Латынскяйсь тейнза мярьгихть morbus pritvorialis.

Дамась, сонь павазозонза, улема, ашезе сода латынть, а пади сьопозе, што содасы.

— Критикне похожайхть пуропнень лангс, конат шоряйхть алашати модань сокамс, — корхтась сон, эсь йону пеедеманц мархта. — Алашась работай, сембе мускуланза натянутайхть, кода контрабасса струнатне, и вдрук фталонц лангс шятни пуромсь и котьфти, и бзнай. Эряви шукиемс кедьцень и яфиемс пулоцень. Мезень колга сон бзнай? Едва ли тя содаф тейнза. Проста — беспокойнай сонь характероц и мялец азомс эсь колганза, — кля, монга масторть лангса эрян! Вов няйсасть, — нльня маштан бзнама, семботь колга маштан бзнама! Мон комсь ветие кизот морафнеса монь рассказнень лангс критикать, а фкявок ценнай указания аф мяляфтан, фкявок цебярь совет ашень куль. Аньцек весть Скабичевскяйсь шарфтозе монь мялезень, сон сьормадсь, што мон кулан ирецтоста забор алу...

Сонь серай, грустнай сельмонзон эса пцтай фалу цифтордсь пеедемась, но лияста ня сельмотне арсесть кельмокс, оржакс и жестокайкс; стама минутатнень сонь гибкай, седивакскань вайгялец кайгсь сяда кемоста, и эста — тейнь няевсь, што тя скромнай, ляпе ломанць, кда сон лувсы эрявиксонди, сонь каршесонза враждебнай вийть каршес может арамс кемоста, тазаста и аф максы тейнза пря.

Лияста жа тейнь арам, — што ломаттненди сонь отношениясонза ульсь кодама бди афнадиямань чувства, конац маласа ащи кельме, сетьме отчаянияти.

— Страннай существась — русскяй ломанць! — весть азозе сон. — Сон эсонза, кода сюфтемса, мезевок аф кирневи. Откс пингстонза сон жаднайста ваймонц пяшкотькшнесы сембоса, мезе пови кядь алу, а колмоньгемонь кизода меле сонь эсонза лядонды кодама бди серай хлам. Штоба цебярьста эрямс, ломанькс — эряви вдь работамс! Работамс кельгома мархта, верондама мархта. А миньцонк тянь тиема аф маштыхть. Архитекторсь, кафта-колма приличнай кудонь строямда меле, кармай картаса налхкома, налхки сембе эряфонц йотамс, или жа нюрьгси театрать кулисонзон фтала. Докторсь, кда сонь ули практикац, лоткси наукать меле ваномда, мезевок, „Терапиянь од куляда“ башка, аф морафни и ниленьгемонь кизоса серьезнайста убежденнай, што сембе урматне шачендыхть кельмомать эзда. Мон ашень васьфне фкявок чиновник, конац хоть цютькяня шарьхкодельхце эсь работанц значениянц: обыкновенна сон ащи столицаса или губернскяй ошса, сочиняндакшни каготт и кучсесыне синь Змиеву и Сморгани синь исполненияснон инкса. А ся каготтне кинь лишандасазь движениянь свободанц Змиевса и Сморганьца, — тянь колга чиновниксь арьси станя жа кржа, кода атеистсь адть мучениянц колга. Удачнай защитать вельде эсь лемонц кеподемда меле адвокатсь лоткси ни правдать араламанц инкса заботендамда, а аралакшнесы аньцек собственностень правать, налхкси ластя арнемаса, ярхцай устрицада, и эсь прянц лувондсы сембе искусствань содайкс. Актерсь, конац цебярьста налхксь кафта-колма рольхть, сяда меле аф тонафнесыне ни ролензон, а щафни цилиндр и арьси, што сон — гений. Сембе Россиясь — кодама бди жаднай и нола ломанень страна: синь пяк лама ярхцайхть, [11]симихть, кельгсазь шить удомаснон и удомбачк крнайхть. Урьвяйсихть синь кудса порядканкса, а любовницат мушендыхть обществаса оцю вастонь сатоманкса. Синь психологиясна — пинень: пикссихть эсост, синь сетьмоняста мзнайхть и кяшендихть эсь пизоваст, ласкандасазь — синь мадыхть копснон лангс, лапаняснон вяри и яфиесазь пулоняснон...

Тоскливай и кельме презрения марявсь ня валхнень эзда. Но презирандамок, сон ужяльдсь, и мзярда, мяляфтса, сонь пингстонза киньге сюцесак, Антон Павловичсь эстакигя жа арай ширезонза:

— Ну, мезенди тон? Сон ни атя, тейнза вдь сизьгемонь кизот...

Или:

— Сон вдь нинге од, тянь вдь тиезе аф маштоманц сюнеда...

И мзярда сон корхтась тяфта, — мон шамастонза ашень няй брезговондома...

 

 

Откс пингста пошлостсь няеви аньцек забавнайкс и ничтожнайкс, но афламнянь-афламнянь сон кружсесы ломанть, эсь серай туманонц мархта сон сувсесы сонь пряуенц и веронц, кода ядсь и угарсь, и ломанць арси похожайкс сире вывескать лаца, конанц сивозе шямонць: кода бта мезе бди азф эсонза, а мезе? — аф шарьхкодьсак.

Антон Чеховсь нинге эсь васень азксонзон эса ни маштсь пошлостень тусклай морять эса мушендомс сонь трагически-мрачнай шутканзон: кда аньцек оцю мяльса морафтомс сонь „юмористическяй“ азксонзон, штоба няемс, коданя лама — рахафты валхнень и положениятнень эшксса — жестокайда и противнайда скорбнайста няйсь и виздезь кяшендсь авторсь.

Сон кода бди целомудреннайста ульсь скромнай, сон ашезе азонда видеста и кайгиста ломаттненди:

— Да уледа жа тинь... сяда порядочнайхть! — тщетнайста надиясь, што синь синць шарьхкодихть порядочнайкс улемать эрявикс шинц колга. Сембе йотай пингоннеть и урдазуть аф келгозь, сон эряфонь мерзосттнень няфнезень поэтонь благороднай кяльса, юмористонь ляпе пеедема мархта, и сонь азксонзон пяк цебярь внешностьснон эшксста кржа няевсь синь потма ширень смысласна, конац пяшксе горькай апрякамада.

Почтеннейшай публикась, мзярда морафтсы „Альбиононь стиренц“, рахай и едва ли няйсы тя азксть эзда топоцта баринть гнуснейшай издевательстванзон одинокай ломанть лангса, конац семботи и сембонди чужой. И Антон Павловичень эсь юмористическяй азксонц эзда мон маряса чистай, истинна ломанень седить сетьме, кувакаста ваймонь таргаманц, ужяльдемань надиямафтома ваймонь таргаманц ломаттнень инкса, конат аф маштыхть эсь ломанень достоинстваснон кельгома и, сопротивленияфтома грубай вийти подчиняндазь, эряйхть, кода рапт, мезска аф верондайхть, эрь шиня сяда куя лямда ярхцамать эрявиксшида башка, и мезевок аф маряйхть, пелемада башка, кода ба кивок виюсь и наглайсь афольхцень пикссе синь.

Кивок тяфтама цебярьста и лац ашезе шарьхкотькшне мелочнай эряфть трагизманц, кода Антон Чеховсь, кивок сондедонза инголе ашезь машта тяфтаня беспощадна видеста няфтемс ломаттненди мещанскяй обыденщинать тусклай хаосонц эса синь эряфснон позорнай и тоскливай картинанц.

Тейнза врагокс ульсь пошлостсь: сон сембе эряфонц пингста тюрсь сонь каршезонза, сонь рахсезе сон и няфнезе сонь бесстрастнай, оржа пераса, маштсь мушендомс пошлостень куштаф нльня тоста, коса васенда варжакстозь, бта, сембось ащи пяк цебярьста, удобнайста, нльня — пиндолдозь... И пошлостсь тейнза сянкса пандсь кяж пяк сквернай выходканяса — путозе сонь ловажанц, поэтть ловажанц, „устрицань“ усксема вагонц.

Тя вагонть равжаза пиже тюсса пятнац тейнь няеви именна сизеф врагть лангса пошлостень торжествующай пеедемакс, а уличнай газетатнень пефтома „лятфнемасна“ — лицемернай грустекс, конань эшксста мон маряса кельме, яфоди шиненц сембе сяка жа [12]пошлостть, конац эсь пачканза довольнай эсь врагонц куломанц мархта.

 

 

Чехов Антонть азксонзон морафтомста эсь пряцень марясак кода позна сьоксеть грустнай шистонза, мзярда кожфсь пяк валда и сонь эсонза лац няевихть штада шуфттне, теснай куттне, серенькай ломаннятне. Сембось пяк странна — ськамост, ащихть фкя вастса и вийфтема. Крхкакс няеви ичкоздень сенем васттне шавот и, бледнай менельть мархта шоворезь, яфотькшнихть эендаф, урдазса вельхтяф модать лангс тоскливай кельме. Авторть йоноц, кода сьоксень шись, жестокай ясность мархта няфнесыне лотку-латку китнень, кривой ульцятнень, теснай и урдазу куттнень, конатнень эса скукать и нолашить эзда эряйхть афоцю жалкай ломатть, эсь кудснон синь пяшкотькшнесазь афшарьхкотьф, пялесудомань суетаса. Вов пелезь, кода тюжя шеерсь, шашни „Душечкась“, — кельгови, кулхцонды авась, конац пяк рабски, пяк ламос и лац может кельгомс. Сонь можна эрьхтемс щьока ланга и сон нльня кайгиста авардемонга аф машты, кулхцонды рабась. Сонь вакссонза грустнайста ащи „Колма сестратнень“ эзда Ольгась: сон станя жа пяк кельги и аф пеняндазь кулхцонкшнесыне эсь нола брадонц развратнай и пошлай урьванц капризонзон, сонь сельминголенза нолсеви сонь сестранзон эряфсна, а сон аварди и киндингя мезсовок не может лездомс, и сонь мяштьсонза аф протестонь фкявок живой, вию вал пошлостть каршес.

Вов сельмеведю Раневскаясь и „Вишневай садть“ ингольтень лия азоронза, — эгоистичнайхть, кода иттне, и дряблайхть, кода сиретне. Синь поздазь эсь пингстост куломаснон и морняйхть, мезевок аф няихть эсь перьфкаст, мезевок аф шарьхкодихть, — паразитт, конатнень аш ни вийсна оду сускомс эряфти. Дрянненькай студентсь Трофимовсь мазиста корхтай работать эрявиксонц колга и — мезевок аф тиенди, мялень молемать эзда развлекандай бездельникнень благополучияснон инкса апак лотксек работай Варять лангса.

Вершининць арьси сянь колга, кодама цебярь ули эряфсь колма сятт кизода меле, и эряй, сянь аф няезе, што сонь перьфканза сембось сраткшни, што сонь сельминголенза Соленайсь мялень молемать и глупостть эзда анок шавомс жалкай баронть Тузенбахть.

Сельмингольнок йотнихть эсь кельгомаснон, эсь глупостьснон и нолашиснон, модать козяшинзонды жадностьснон пефтома рабсна, молихть эряфть инголе оцю пелемань рапне, молихть оцю пелемаса и пяшкотькшнесазь эряфть ковонга аф кондясти корхнемаса сайпингонь эряфть колга, сянь марязь, што тя пингонь эряфса — тейст васта аш...

Лияста синь серай массаснон эса маряви выстрел, тяфта Ивановсь или Треплевсь шарьхкодсть, мезе эряви тейст тиемс и кулость.

Синь эздост ламотне мазиста арьсихть сянь колга, кодама цебярь ули эряфсь кафта сятт кизода меле, и киньгя пряс аф сашенды простой кизефкссь: да кие ина тисы сонь цебярькс, кда минь аньцек карматама арьсема?

Вийфтема ломанень скучнай, серай ломанень сембе тя толпать вакска йотась оцю, йону, семботи мялень шарфни ломанць, варжакстсь сон эсь родинанц ня скучнай эряензон лангс и грустнайста пеедезь ляпе, но оцю упреконстонца, шамасонза и мяштьсонза надиямафтома тоска мархта, искренняй мазы вайгяльса азозе:

— Сквернайста тинь эрятада, господат!

 

 

Ветеце шись касф температуразе, матфста ащемс аш мялезе. Финскяй серай пиземнясь модать лангс сифонды мелкай пулькс. Инно фортса бухиняхть пушкатне, ванондсазь, кода синь ляцендихть. Веть-веть туцятнень нолсесыне прожекторть кувака кялец, отвратительнай зрелищась, сяс мес аф кадондсы юкстамс дьявольскяй тевть — [13]войнать колга.

Морафтонь Чеховонь эса. Кда ба сон афоль кула кемонь кизода инголе, войнась, улема, шавольхце ба сонь, а васенда отравиндальхце ба ломаттненди ненавистьса. Лятфтайне сонь калмаманц.

Писательть, конань „пяк нежнайста“ кельгозе Москусь, лазксоц ульсь ускф кодама бди пиже тюсса вагонца, конанц кенькшензонды оцю букваса сьорматфоль: „Устрицанди“. Аф оцю толпать пяльксоц, конац вокзалу пуромсь писательть васьфтема, тусь Манчжурияста ускф Келлер генералть лазксонц мельгя и пяк дивандакшнесь сянди, што Чеховонь калмасазь военнай музыкань оркестраса. Мзярда шарьхкодевсь эльбятькссь, кой-кона веселай ломаттне кармасть пеетькшнема и рахсема. Чеховонь лазксонц меле мольсть сядошка ломань, аф сяда лама, пяк мяляфтовихть кафта адвокаттне, кафцьке од ботинкаса и сьормав галстукса — женихт. Синь фталост молемста мон кулине, што фкясь, В. А. Маклаковсь, корхтай пинетнень йонцнон колга. Омбоцесь, конань мон аф содаса, шнакшнезень эсь дачанц удобстванзон и сонь _ейсонза пейзажть мазишинц. А вакскост моли якстерь платьяса кодама бди дамась, конац мольсь кружевнай зонтик ала, корхтась роговой очкаса атяти.

— Ах, сон ульсь пяк цебярь и остроумнай...

Атясь аф верондазь козкснесь. Шись псиель, пулюволь. Процессиять инголе величественнайста мольсь эчке акша алаша лангса ластя эчке околодочнайсь. Сембе тя и нингя ламось ульсь пяк пошлай и ашель кода шовордамс марс оцю и тонкай художникть памятенц мархта.

 

 

А. С. Суворин атяти фкя сьормасонза Чеховсь азозе:

„Мезевок аш сяда скучнай и афпоэтичнай, кода мярьгомс, кода эряманкса прозаическяй тюремась, конац салсесы эряфть радостенц и колсесы мяльцень“.

Ня валхнень мархта азф пяк русскяй настроения, конац вообще, монь койсон, аф свойственнай А. П-ти. Россияса, коса сембода лама, но ломаттнень аш кельгомасна трудти, тяфта арси большинствось.

Русскяйсь касфнесы мяленц энергиянц лангс, но — кальдявста верондай тейнза. Активнай настроениянь писательсь кода, кепотьксонди, Джек Лондонць — аф возможнай Россияса. Хотя Лондононь книганзон миньцонок морафнесазь охотнайста, но мон аф няйса, штоба синь кепселезь русскяй ломанть волянц тевонь тиемати, синь аньцек раздражандасазь воображениять. Но Чеховсь аф пяк русскяй, кда ваномс лангозонза тя ширде. Тейнза нингя откс пингть „эряманкса тюремась“ эсь прянц няфтезе аф аньцек эсь инксонза кши сускомонкса, — оцю кши сускомонкса эрь шинь, мелкай аф пара, мяльс аф туф заботатнень мархта. Ня заботатненди, конатнень эса аш кодамовок радость, сон максозень откс пингонь сембе виензон, и эряви дивандамс: кода сон мог ванфтомс эсь юморонц? Сон эряфть няезе аньцек кода ломаттнень скучнай стремленияснон топоцта эряфти, покойти; эряфонь оцю драматне и трагедиятне тейнза ульсть кяшфт обыденнайть эчке слоенц алу. И аньцек мзярда сон цютькяня освободиндазе эсь прянц заботать эзда няемс эсь перьфканза топотцта ломатть, сон оржа сельмоса варжакстсь сят драматнень сущностьс.

Мон ашень няй ломань, конац няельхце ба трудть значениянц, кода культурать основаниянц, тяшкава лац и сембе ширде, кода А. П-сь. Тянь сон няфнезе куд йотконь тевонзон сембе мелочензон эса, паршиензон кочкамаснон мархта и паршиензонды ся благороднай кельгомать мархта, конац, йофси кадондомок шири стремлениять накопляндамс синь, аф сизси синь кельгондемаснон эзда, кода ломанень духть творчествань продуктанц. Сон кельгозе строяманц, садонь озафнеманц, масторть мазепнеманц, сон марязе трудть поэзиянц. Конашка седивакскань забота мархта ванондсь сон, кода сонь садсонза касыхть плодовой шуфттне и декоративнай кустарникне, конатнень [14]озафнезень сон! Ауткаса кудонь строямань хлопочаманзон пингста сон корхтась:

— Кда ба эрь ломанць эсь модань пакшенц лангса тиельхце семботь, мезе сон может, кодама прекраснай улель ба минь мастороньке.

Мзярда мон ушедонь „Васька Буслаев“ пьесать сьормадома, мон тейнза морафтыне Васькань прянь шнафтома монологонц:

 

Эх-ма, кда максомс тейнь вийда ламоня!
Кургстон кожф уфалень пси — лофне солальхть ба,
Тулень масторть келес — сокалине сонь,
Век ба якалень — ошт ба тиелень,
Эхярь церькафт тиелень, озафтолень сатт,
Масторть ба мазептелине стирь лаца,
Кода невестазень — палалине сонь,
Масторть кеподелине эсь мяштензон,
Кеподелине, шкайти кандолине:
— Варжаксттка тон, шкабавас, масторть кодама, —
Кодама пяк мазикс Васькась тиезе!
Тон, кода кевонь, менельти сонь нолдайть,
А мон, ватт, тиине сонь питни изумрудкс!
Варжаксттка, тон шкабавас, кенянтька
Кода пиже лангонц, сонь валдопнесы шись!
Максолине мон тейть ба сонь казненди
Да — пяк лама ни — сон эстейнь эряви!

 

Тя монологсь тусь Чеховонь мяльс, взволнованнайста козкснезь, сон корхтась тейнь и доктор А. Н. Алексинонди:

— Тя цебярь... Пяк настоящай, человеческяй! Именна тянь эса „сембе философиять смыслац“. Ломанць масторть тиезе эряманди кондястикс, сон тисы сонь эстейнза и уютнайкс. — Упрямайста яфодезе прянц и тага азозе:

— Тисы!

Васькань фалендаманц мярьгсь лувомс нинге весть, кулохцондозе, вальмяти ванозь, и макссь совет:

— Кафта мекольдень строчкатне — аф эрявихть, тя озорства. Лишнай...

 

 

Эсь литературнай работанзон колга сон корхтась кржа, аф охотнайста; йораса азомс — целомудреннайста и стама жа, пожалуй, осторожность мархта, кодамса корхтась Лев Толстоень колга. Аньцек кой-коста весяла частста, пеедезь, азонды тема, фалу — юмористическяй.

— Содасак, — карман сьормадома учительницань колга, сон атеистка, кельгсы Дарвинонь, увереннай сянди, што эряви тюремс народть предрассудканзон и суевериянзон каршес, а сонць кемгафтува частста веть, баняса пиди равжа ката, штоба сатомс „дуганя“ — пакарьня, конац малатьфтьсы алять, эсонза кеподи кельгома, — ули тяфтама пакарня... — Эсь пьесанзон колга сон корхтась кода „веселай“ пьесань колга и тейнь арам, искренняйста верондась, што сьормады именна „веселай пьесат“. Улема, сон валонзон коряс Савва Морозовсь упрямайста корхнесь:

„Чеховонь пьесанзон эрявихть путнемс кода лирическяй комедиянь“.

Но вообще литературать лангс сон ванць пяк оцю мяльса, сембода седивакска — „ушеткшни писательхненди“. Сон пяк оцю терпения мархта морафнезень Б. Лазаревскяень, Н. Олигеронь и ламотнень лиятнень обильнай рукописьснон.

— Тейнек ламоня эряви писательда, — корхнесь сон. — Минь эряфсонок литературась нинге сембе од тев и „избрннай ломаттненди“. Норвегияса населениянь эрь 226 ломаттненди — фкя [15]писатель, а миньцонок — фкя писатель миллионти...

 

 

Сярядемась лияста сонь эсонза кепотькшнесь ипохондриконь и нльня мизантропонь настроения. Тяфтама шитнень сон ульсь капризнай эсь суждениянзон эса и стака ульсь ломаттнень мархта отношениянзон эса.

Весть, диванца матфста ашезь, коськста козкснезь, термометрть мархта налхксезь, сон азозе:

— Эрямс сянкса, штоба куломс, вообще аф забавна, но эрямс, сянь содазь, што кулат пингта инголе — тя йофси ни глупа.

Омбоцеда, панжада вальмять тейса озада ащезь и ичкизи, моряти ванозь — апак учсек, кяжиста корхтазевсь:

— Минь тонадоме эрямс надияматнень мархта, што ули цебярь погода, урожай, цебярь роман, надияматнень мархта козякодомс или получамс полицейместеронь васта, а вов йоныяманди надияма мон ломаттнень эзда аф няендян. Думандатама: од оцязорть пингста ули сяда цебярь, а кафта сятт кизода меле — нинге сяда цебярь, и кивок аф заботендай, штоба тя цебярсь саль ванды. Лиякс мярьгомс — эрь шиня эряфсь арси сяда сложнайкс и моли ков бди эсезонза, а ломаттне — няевиста арсихть глупайкс и сяда лама ломаньда лядондыхть шири эряфть эзда.

Думандась и, конянь срмазь, прибавазе:

— Кода нищай калекат шкайса якамать пингста.

Сон ульсь врач, а врачть урмац фалу сяда стака пациентонзон урмаснон коряс; пациенттне аньцек марясазь, а врачсь нинге и кой мезе содай сянь колга, кода сраткшни сонь организмац. Тя фкя случай, мзярда содамашить можна лувомс куломань малатфтыкс.

 

 

Цебярьхтельхть сонь сельмонза, мзярда сон рахась, — кодапт бди аваннекс ласковайхть и нежнайста ляпт. И сонь пцтай аф маряви рахамац ульсь кода бди пяк цебярь. Рахамста сон именна касфнезе мяленц рахамать лангс, кенярькшнесь: мон аф содаса, кие нинге тяфта маштсь рахама — азса — „духовна“.

Грубай анекдоттнень лангс сон вестевок изь раха.

Пяк кельговиста седивакска рахазь, сон тейнь азондсь:

— Содасак, мес Толстойсь тонь лангозт ваны тяшкава аф равнайста? Сон ревнует, сон арьси, што Сулержицкяйсь тонь кельктянза сяда пяк, чем сонь. Да, да. Исяк сон тейнь корхтась: не могу Горькаень мархта эрямс искренняйста, монць аф содаса мес, а не могу. Тейнь нльня аф пара, што Сулерсь эряй мархтонза. Сулеронди тя вредна. Горькайсь — кяжи ломань. Сон похожай семинарист лангс, конанц насильно наразь монахокс и тянь мархта сонь кяжияфтозь семботь лангс. Сонь ваймоц казяма, сон сась коста бди тейнза чужой, Ханаанскяй масторть лангс, семботь лангс варжаксни, сембонь ванондсы и сембонь колга пачфни кулят кодама бди эсь шкаенцты. А сонь шкаец — урод, кодама велень аватнень лешайсна или шяйтанцна.

Азондомста Чеховсь рахась сельмеведензон тумс и сельмеведень нарнезь корхтась сяда тов:

— Мон корхтан: Горькайсь цебярь. А сон: аф, аф, мон содаса. Сонь уткань шалхкоц, тяфтапт шалхксна эряйхть аньцек павазфтопнень и кяжихнень. И аватневок аф кельгсазь сонь; а аватнень, кода пинетнень, ули чутьясна цебярь ломанти. Вов Сулерсь — сонь ули афкукс пяк пара маштомац ломаттнень седивакска кельгомаснон колга. Тянь колга — сон гениальнай. Маштомс кельгома, значит — семботь маштомс...

Ваймамода меле Чеховсь корхтась:

— Да, атясь ревнует... Кодама удивительнай...

 

 

Толстоень колга сон фалу корхнесь: сельмонзон эса кодама бди особеннай, цють няеви, нежнай и смущеннай пеедема мархта, корхтась, вайгяленц кирьфнезь, кода мезень бди призрачнаень, [16]таинственнаень колга, конац веши осторожнай, ляпе валхт.

Аф весть пеняндась, што Толстоень тейса аш Эккерманць, ломанць, конац ба песта-пряс сьоматкшнельхцень сире мудрецть оржа, апак учсек и, сидеста, противоречивай, мыслянзон.

— Вов ба тон тя тевти кундалеть, — корхтась сон Сулержицкяенди. — Толстойсь пяк кельгтянза тонь, пяк лама и цебярьста корхтай тонь мархтот.

Сулеронь колга Чеховсь тейнь азозе:

— Тя — мудрай идня...

Пяк лац азозе.

 

 

Кода бди весть Толстойсь кепотьф мяльса корхтась Чеховонь азксонц, тейнь арам, „Душенькать“ колга. Сон корхтась:

— Тя — кода кружева, конанц кодазе целомудреннай стирнясь; инголи ульсть тяфтама стирнят — кружевань кодайхть, „Вековщицат“, синь сембе эряфснон, павазть колга сембе арьсемаснон сьорматкшнезь узорти. Узорхнень мархта арьсесть сембода кельговить колга, сембе эсь аф яснай, чистай кельгомаснон котцезь кружевати. — Толстойсь корхтась пяк волновандазь, сельмонзон эса сельмеведь мархта. А Чеховонь ся шиня касфоль температурац, сон ащесь озада, щёканзон эса якстерь пятнатольхть, прянц комафнезе, тщательнайста нарнезе пенснэть. Кувать изь корхта, тоса, куфкстазь, азозе сетьмоста и смутяфста:

— Тоса — улихть опечаткат...

 

 

Чеховонь колга можна сьормадомс лама, но сонь колганза эряви сьормадомс пяк мелкайста и четкайста, коданя мон аф маштан! Пара ба улель сонь колганза сьормадомс станя, кода сонць сьормадозе „Степть“, ароматнай, тьождя тяфтама, рузкс азомс, задумчива-грустнай азксть. Азкссь — эськсонза.

Пара лятфтамс тяфтама ломанть колга, эстакигя эряфозт мрдай бодростсь, эстакигя эряфценди сувай яснай смысла.

Ломанць — мирть осец.

А — азсазь — порокне, а ломанть афсатыксонза?

Сембе минь вачеттама ломанти кельгоманть мархта, а вачста и кальдявста пидеф кшись — топоттьфтянза танцтиста.

 

 
This is a translation and has a separate copyright status from the original text. The license for the translation applies to this edition only.
Original:
PD-icon.svg This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
  • its creator didn't fight or work for Soviet Union victory during the Great Patriotic War — so the 70-year protection term is applied;
  • and the creator died before January 1, 1951 (more than 70 years ago), and has been not posthumously rehabilitated since that date;
  • and this work was first published before January 1, 1951 (more than 70 years ago).

This work is in the public domain in the United States because it was published before January 1, 1926 (more than 95 years ago).


The author died in 1936, so this work is also in the public domain in other countries and areas where the copyright term is the author's life plus 84 years or less (if applicable), or the copyright term is 97 years or less since publication (if applicable).

Flag of Russia.svg
Translation:
PD-icon.svg This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
  • it was anonymously published before January 1, 1951 (more than 70 years ago).

This work is in the public domain in the United States because it was first published outside the United States (and not published in the U.S. within 30 days), and it was first published before 1989 without complying with U.S. copyright formalities (renewal and/or copyright notice) and it was in the public domain in its home country on the URAA date (January 1, 1996 for most countries).
This work was in the public domain in Russia on the URAA date January 1, 1996, according to the Law 09.07.1993 No 5351-1 which was enacted on that date:

  • it was anonymously published before January 1, 1946 (more than 50 years ago from 1/1/1996).

This anonymous or pseudonymous work is also in the public domain in other countries and areas where the copyright term of anonymous or pseudonymous works is 81 years or less since publication.

Flag of Russia.svg