Арся мелодия
Дзебсис лун тӧв
Шепта саридз пытшкын,
Дзебсис лун тӧв,
Шы ни джын оз шу.
Сӧмын тӧда:
Ыджыд, ыджыд тышкын
Ассьыс лӧньсӧ
Босьтіс тайӧ му.
Шепта саридз
Водіс яг йӧр помӧдз;
Вӧзйӧ козин —
Ыджыд урожай.
Мылва дорын
Быдмӧ уна ӧмидз,
Алӧй войтӧн
Ворсӧ яг йӧр сай.
Лӧня вашкӧ
Мылва вылын визув,
Быттьӧ сылысь
Мойдсӧ лов оз кыв.
Ӧмидз вотӧс
Юлысь вашкӧм кывзӧ,
Кывзӧ юлысь
Сюся сьыланкыв.
Важӧн, важӧн.
Уна во нин коли...
Яг му йӧрын
Дзоридзавліс сю.
Войвыв муӧ
Еджыд банда воліс,
Порок тшынӧн
Шебрасьлывліс му.
Визув лӧня
Мылва вылын вашкис.
Сиктладорсянь
Кывсис третшкан шы.
Ӧти том морт
Татчӧ пышйӧ, кашкӧ,
Шогсян синмын
Овны кӧсъян би.
Мыссис кӧдза
Шонді югӧр бордйӧн,
Гыӧн ветліс
Шепъяс вывті тӧв.
Лӧзов синма,
Ёна мудзӧм мортӧс
Дзебис кӧдза,
Сэсся лӧнис чӧв.
Садьмис сынӧд.
Вӧвъяс кок шы улын
Шаракылӧ
Кӧйдысасян сю.
Зарни кӧдза
Сорсис рудов муӧн.
Важмоз лӧня
Вашкис Мылва ю.
Кыліс лыйӧм
Ӧмидз кустъяс дорын...
Валӧн ӧдйӧ
Ӧтлаасис сер...
Сыысь ӧдйӧ
Рудов яг йӧр вомӧн
Бандит чукӧр
Лэбис сиктӧ бӧр.
Рытъя кадӧ
Ӧтнас нывка лоас,
Потшӧс дорӧ
Том морт оз нин пет,
Визув вашкӧм
Пельӧдз кӧть и воас —
Мылва некор
Жертва бӧр оз сет.
...................................
...................................
Шувгис вой тӧв,
Керка вевтӧ шковгис,
Енэж гудыр,
Пемыд войся кад.
Посводз дорын
Кылӧ гуся сёрни...
Лӧвтӧ ӧдзӧс...
Грымӧдӧ приклад.
Муртса дзуртӧ
Керкасайса ӧшинь...
Мылва дорӧ
Нуӧ тувччӧм след.
Кыптыв, вой тӧв,
Медым следыс воши,
Медым еджыд киӧ
Партизан эз шед!
Гудыр кымӧр
Лымнас мусӧ эжӧ,
Мылва сайын
Уна ворсӧ би...
Коркӧ дыр мысьт
Мылва ыджыд кӧджысь
Вой тӧв вайис
Кыкысь лыйӧм шы.
Важӧн, важӧн,
Уна во нин коли.
Яг му йӧрын
Шептасьӧма ид.
Яг му йӧрӧ
Талун том йӧз воис,
Гажа уджын
Найӧс суис рыт.
Нолтӧ, босьтлам!
Выльмӧм мулӧн вотӧс,
Срокӧдз вундам
Паськыд яг му выв,
Нолтӧ босьтлам, —
Медым сынӧд потас,
Сьылам уджлы
Вына сьыланкыв.
Дзебсис лун тӧв
Шепта саридз пытшкын.
Дзебсис лун тӧв,
Шы ни джын оз шу.
Сӧмын тӧда:
Ыджыд, ыджыд тышкын
Ассьыс лӧньсӧ
Босьтіс паськыд му.
1933 во.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator fought or worked for Soviet Union victory during the Great Patriotic War — so the 74-year protection term is applied;
- and the creator died before January 1, 1950 (more than 74 years ago), and has been not posthumously rehabilitated since that date;
- and this work was first published before January 1, 1950 (more than 74 years ago).
Expression error: Unexpected < operator.
The author died in 1942, so this work is also in the public domain in other countries and areas where the copyright term is the author's life plus 81 years or less (if applicable), or the copyright term is 2004.7 years or less since publicationExpression error: Unexpected > operator. (if applicable).
Public domainPublic domainfalsefalse
[[Category:PD-old-80-Expression error: Unexpected < operator.]]