Лыз бусэн шобырске гурт урам,
Вож садъёс ӵоктасько ӝомалэ.
Нап омыр веттаське, ӟечыра,
Жадем мурт кадь, льӧмпу нырулэ.
Гурт изе. Но мӧзмыт вужерен
Анныкей песянай вамышъя.
Шыпыртэ ас понназ, собере
Лулӟылэ но лушкем викышъя.
Со дугдэ из солдат пыл азе,
Лулӟыса му вылэ лэзиське,
Оскыса-оскытэк вуж вӧсен
Ӝужанпал инбаме вӧсяське.
Собере шыпыртэ солдатлы:
— Ёргие, тани нош ик лыктӥ.
Сюлмаськон ке тонэ кекатӥз,
Со сярысь вералод бен кинлы?
Коркамы но тани сисьмемын,
Малпасько пуктыны выль юртъер.
Уж секыт. Но вордскем колхозмы
Кӧня ке но сётоз, дыр, юрттэт.
Только кытчы сое пуктоно?
Я вужаз, я выляз ураме?
Ёргие, валэктод, оло, тон,
Визьмалод та кыдтэм йырвизьме?
Собере тани скал басьтыны
Малпасько — пудотэк-а улод?
Мон лыктӥ визь-кенеш курыны:
Со сярысь, пие, ма вералод?
Ох, пие, ох, пие! Ёргие!
Пурысьтай мон, тонэ возьмаса.
Кытын тон?! Шайвылдэ сяськаен,
Лыз но горд сяськаен мерттысал…
Кытын ке но пуны сюлворе,
Дырдыын ошмес ву викышъя.
Гурт изе. Лапкаськем вужерен
Анныкей дор палаз вамышъя.