Амалын улӥсь (Дядюков)

From Wikisource
Jump to navigation Jump to search
Амалын улӥсь
Автор: Иван Тихонович Дядюков
Источник: Гудыри : газет. — 1924. — № 149. — 2-тӥ бам.

«Толя—Воля» нимо лавкалэн кузёез лавка ӝӧк сьӧраз сылэ:

— Вуз басьтыны ми доры гинэ ветло… Ми вуз басьтӥсьёсмес кырым пыдэсамы кырмыса возиськом. Казна лавкаослэн вуззы милесьтым оло дунтэм но дыр но, вуз кулэ карисьёс озьы но ми доры гинэ лыкто. Малы бен со озьы? Тани малы, эрекчаськытэк верало.

Вуз карись кымысаз чапкылыса:

— Татын пӧзе… Йыр ужа… Кыл пумысь кредитование нимо югдурез вералом… Казна лавка вуззэ долыген ке вуза, ми но долг вузаськом. Казна магазин вуз кулэ карисьёсыз дораз каньылэн пыртыны турттэ; ми озьы ум турттӥське, ми киосмес возиськом. Казна магазинъёс но кизэс возьыны кутскизы ке, ми чаен сектаны кутском.

Кулэ ке луиз, ми… ми соослы сапегзэс сузялом.

Вераськемзэ кылзӥсь валаз югдурзэ.

— Озьы ке со озьы но, али гинэ со озьы. Казна магазинъёс но йыртэк уг ужало, соослэн но йырзы вань… Дышизы ини… Дышетскемлэн уродэз ӧвӧл. Амал…

— Амалэн улыны, амалтэк улэмлэсь умойгем лыктэ. Озьы ке но быгатыны кулэ. Лавкаям музъем ужась лыктӥз шуса вералом… Музъем ужась — ме тыныд вуз, милем али ик коньдон потты — шуэмез уг яраты. Музъем ужась ушъямез яратэ. Солэн синмаз тузонэн пазьгыны туж умой. Музъем ужась улон-вылон сярысь вераськыны яратэ. Ми соку сое шузи муртэз кадь уллань-валлань ӝутъяськом.

«Толя—Воля» лавкае тёп музъем ужась пырны кемдӥз. Лавка пушкытӥ котырак оскалтӥз.

— Адӟиськод-а?.. — Лавка кузё эшезлы вера, — эскеры али, адӟод…

— Кинлэн-о та лавкаез, казналэн-а, куӟолэн-а?.. Мыным казна лавка кулэ вал.

— Та лавкалэн нимыз «Толя—Воля» луоз. Кузёез «Эштос» нимаське… Казённой лавка нерге… Милям лавкамы казна лавкаен одӥг кадь. Жадид дыр, пуксьы пукон вылэ. Кин понна басьяськыны лыктӥд, ас поннад-а, кооператив понна-а?

Музъем ужась быльк гинэ вуз карись шоры учкыны кутскиз.

— Ас поннам… Мыным басма кулэ вал, лавка куӟо.

— Басма! Вань басма… Юн… Атласной… Алача… Вамен пужыёэз но вань. Али ик возьмато, пук.

Вуз карись ӝажыосысьтыз кӧня ке кесэг басма коп но коп гинэ ӝӧк вылаз куяз.

— Мыным геры пужыёэз кулэ вал. Герыос бусы кузя пуктылэмын мед луозы вал. Кутэс пужыёэз мыным кулэ ӧвӧл…

— Кудӥз-о кутэс пужы? Тынад валамед сыӵе, — та кутэс пужы ӧвӧл, геры пужы со.

Музъем ужась басмазэ ӧжыт киыныз посӥз.

— Укыр шер… Мар со медло! Шер басмаез ми ум яратӥське.

— Та басма шер-а? Та басма дэралэсь но ӵем, юн. Басма ик ӧвӧл та, пустол. Таӵе басмаез ачим но дэрем вурса нуллысал но, коньдон кулэ. Та басмаез басьтон понна кышноме заложить кари. Тон ке нош шер, урод шуиськод.

Музъем ужась оске но, уг но.

— Инмар понна пуке! Та басма бордын мынам уже ик ӧвӧл. Ушъям поннам дун ке тырсалзы, соку оло пӧян понна ушъясал но, — ушъям поннам нокин но дун уг тыры, — малы эрекчаськод! Кышноед сяна пылыд-пиед но вань дыр?

— Вань.

— Та басма туж яралоз соослы. Туж тау карозы. Та басма вылымтэ, пустол вылэм шуозы. Таӵе-таӵе басмаез адӟеммы ик ӧй вал на шуозы… Кышноед уг вись-а?

— Маро луоз солы, уг…

— Висьымтэ кышномурт котьку но таӵе басмаез ушъялоз. Туэ няньды кыӵе вал? Йӧ мар ӧз шуккы-а?.. Инмар медаз кушты.

Вуз кулэ карись таӵе кылъёссэ кылса, пукон вылэ шумпотса пуксиз. Собере малы ке туж мур лулӟиськиз.

— Ӧжыт шуккиз ик но… Укыр сокем туж ӧз… Мукет палтӥ кошкиз. Немыр ӧвӧл туэ няньмы, огшоры.

— Озьыен малы коньдонэз басма басьтыны жалялод? Одӥг но жаляны кулэ ӧвӧл. Кӧня дэремлы кулэ кадь? Ньыль-вить дэремлы мерталом-а?

— Одӥг дэремлы гинэ кулэ вал но, оломар таӵе кароно, басмаез уг яра мыным.

— Яратны кулэ, уром, таӵе басмаез ке ӧд яратнӥ, собере кыӵезэ пе яратод-на… Таза-а вал йӧ зор?

— Векчи шумон укыр векчи ӧй вал, ог шоры вал.

— О-о… Кык дэремлы коть мерталом-а?

— Трос луоз, одӥглы гинэ мерта.

«Мерта» шуэмзэ кылса, вуз карись урибери гинэ одӥг дэрем тыр урод басмазэ мертаз.

— Дэремед туж юн луоз… Монэ верам шуод али берло. Лыктэмедлы быдэ ми доры пыра басьяськыны… Ми долг но вузаськом… Туннэ коньдонэн, ӵуказе долг лэзём… Пыра…

— Пырало, пырало.

Музъем ужась ӧжыт йӧ зор сярысь вераськиз на но, басмазэ кунулаз пачкатыса пырс потса кошкиз.

— Адӟид-а? — Вераськись эшезлэсь юа. — Тон сямен кызьы-о?

— Алданы уг ик яра но…

— Малы пе нош уз яра? — Ӝожкыса юаз. Ми басьтӥсьёсмес яратӥськом ук! Кызьы пе эрекчалод вуз кулэ карисез. Тон сямен таӵе югдур алдам ке луэ, казна магазинэ мынса басьяськы. Тон бен маро басьтысал кадь? — Вераськисезлэсь юн-юн юаз.

— Мыным номыр но кулэ ӧвӧл. Мон юри гинэ лавкаяд пыри. Монэ кооператив лавкае заведушшое понӥзы…

Дышетскыны лыктӥ… Кызьы вуз каркоды шуса, учкеме потӥз… Тӥляд дышетскемды капчи вылэм… Алданы чебер ӧвӧл…

— Кинлы кызьы, мыным чебер потэ.