Колхозонь эряф/1941/03/Авань международнай коммунистическяй шись

From Wikisource
Jump to navigation Jump to search
Колхозонь эряф (1941), № 3 Март edited by Игнатьев Г. А.
Авань международнай коммунистическяй шись
Колхозонь эряф. Эрь ковонь литературно-художественнай и общественно-политическяй журнал. Мордовскяй Советскяй писателень союзть органоц. — № 3 Март 1941. — с. 51—52
 
[51]
Авань  международнай  коммунистическяй шись

Авань международнай шить эрь кизоня ётафнеманц колга решениясь ульсь примаф германскяй коммунисткать Клара Цеткинонь предложениянц коряс 1910 кизоня Социалисттнень омбоце международнай конференциясост, конац мольсь Копенгагенца (Данияса).

Мартть 8-це шистонза капиталистическяй странань правафтома, порабощеннай аватне лисендихть ульцятненди революционнай лозунг мархта, воляшинь и равноправиянь требовазь, империалистическяй войнать каршес, сон крьвястиензон и зачинщиконзон каршес, капитализмать каршес, мирть инкса, социализмать инкса тюремань лозунг мархта.

СССР-са мартть 8-це шиц — раскрепощеннай аватнень, сембе народть радостнай праздниксна, свободнай советскяй аватнень сатфксснон ваномаснон шиц.

Великай Октябрьскяй социалистическяй революциясь кандсь минь странастонк аватненди воляши. Советскяй властсь эсь существованиянц васенце шинзон пингстокиге машфтозень закоттнень, конат принижандакшнезь и порабощандакшнезь авать.

Великай Сталинскяй Конституциясь кемокстась СССР-са авать мельге хозяйственнай, государственнай, культурнай и общественно-политическяй эряфонь сембе областтнень эса стама жа равнай прават, кодапт аляти.

Радостнайкс арась крестьянкать эряфоц колхозса.

«Трудошитнень мархта колхозсь освободиндазе авать и тиезе сонь самостоятельнайкс. Сон стирькс пингстонза тяни работай ни аф алянцты, рьвакс тумдонза меле аф мирденцты, а васендакиге работай эстейнза. Вов тя и значит авать-крестьянкать освобожденияц, тя и значит колхознай строй, конац тиендьсы трудовой авать равнайкс всякай трудовой аляти» (Сталин).

Аф кржа авада паксяста высокай урожайнь сявонди мастярхнень ингольдень рядсост. Алтайскяй колхозницась Сергеева получась эрь гектарста 100 центнерда лама тозер. Юткина колхозницась сатсь мировой рекорд модамарень урожайса — 1217 центнер эрь гектарста. Украинскяй колхозницась Заглада получась 33,09 центнер иляназ мушка эрь гектарста.

Сталинскяй Конституциясь аф аньцек максси авати прават — сон обеспечендакшнесыне сембе условиятнень сянкса, штоба авати [52]улельхть кода использовандамс синь тевса. СССР-са авать—тядять инкса государствась особенна заботендай. Пяшксса аватне нолявихть отпускс, аватнень услугазост улихть лама родильнай кутт, идень яслят, консультацият, идень сатт.

Партиясь и правительствась, лична Сталин ялгась сиземань аф содазь фалу заботендайхть работницатнень, крестьянкатнень и интеллигенткатнень политическяй касомаснон кувалма, социалистическяй строительствань сембе участкатнень эса авань кадратнень касфтомаснон кувалма.

Тяни марса минь странастонк сембе аватнень мархта радостна праздновакшнесазь мартонь 8-це шить капитализмань игаста освобожденнай Украинань и Белоруссиянь западнай областень, Бессарабиянь и Севернай Буковинань, Эстониянь, Латвиянь и Литвань миллиотт ава. И синь ётксостка, кода и сембе СССР-са, касыхть аватнень — коммунизмать инкса борецнень рядсна.