ʻAlekoki

by Kalākaua, Lunalilo

ʻAlekoki Kalākaua, Lunalilo

ʻAʻole i piliwi ʻia
Kahi wai aʻo ʻAlekoki
Ua hoʻokohu ka ua i uka
Noho maila i Nuʻuanu

Anuanu makehewa au
Ke kali ʻana i laila
Kai nō paha ua paʻa
Kou manaʻo i ʻaneʻi

I ʻō i ʻaneʻi au
Ka piʻina aʻo Maʻemaʻe
He ʻala onaona kou
Ka i hiki mai i ʻaneʻi

Ua malu nēia kino
Ma muli aʻo kou leo
Kau nui aku ka manaʻo
Kahi wai aʻo Kapena

Pania paʻa ʻia mai
Nā mana wai aʻo uka
Ma luna aʻe nō au
Ma nā lumi liʻiliʻi

Ma waho aʻo Māmala
Hao mai nei ehuehu
Pulu au i ka hunakai
Kai heʻaheʻa i ka ʻili

Hoʻokahi nō koa nui
Nāna e ʻalo ia ʻino
ʻInoʻino mai nei luna
I ka hao a ka makani

He makani ʻāhaʻilono
Lohe ka luna i Pelekane
A ʻo ia pouli nui
Mea ʻole i kuʻu manaʻo

E kilohi au i ka nani
Nā pua o Maunaʻala
Haʻina mai ka puana
Kahi wai aʻo ʻAlekoki