Što je Serbow wótcny kraj?

nadpis	Što je Serbow wótcny kraj?
awtor	Handrij Zejler
lěto
žórło	texty.citanka.cz
licenca	public domain
nota	stary prawopis

    Ha, što je Serbow wótcny kraj,
    Je Saksonska, je Bramborska?
    Hdźež Łobjo šumi dudławi,
    A Sprewja z nim so jednoći?

    O ně, o ně,
    Naš wótcny kraj ma wjetši być!
    Ha, što je Serbow wótcny kraj?
    Je Pomorska, je Litwjanska?
    Hdźež julinske su spadanki,
    Wineta tež so ponuri.
    O ně, o ně, Naš wótcny kraj ma wjetši być!

    Ha, što je Serbow wótcny kraj?
    Je morawski, je čěski kraj?
    Ach, Čechow móc je wotkćěła,
    Jich swobodnosć je spadnyła.
    O ně, o ně,
    Naš wótcny kraj ma wjetši być!

    Ha, što je Serbow wótcny kraj?
    Snadź Pólska je ta ryćeřska,
    Tak horliwa za swobodu
    A njespěšna za jednotu?
    O ně, o ně,
    Naš wótcny kraj ma wjetši być!

    Ha, što je Serbow wótcny kraj?
    Iliriska, Dalmatiska?
    Je to Ragusa znajomna,
    Toh' morja stara kralowna?
    O ně, o ně,
    Naš wótcny kraj ma wjetši być!

    Ha, što je Serbow wótcny kraj?
    Je Serbiska, Slawoniska?
    Hdźež mjeno a rěč towařšna,
    Hdźež kralowski stoł Miloš ma?
    O ně, o ně,
    Naš wótcny kraj ma wjetši być!

    Ha, što je Serbow wótcny kraj?
    Je Rusowska ta njeskónčna,
    Kiž třećina wšej' zemje je,
    We kotrejž słónčko njezańdźe?
    O ně, o ně,
    Naš wótcny kraj ma wjetši być!

    Duž powěz mi tón wulki kraj!
    Wot Łobja dźe hač k Dunaju ,
    Wot čornoh' morja k lodowom',
    Wot baltiskoh' hač k kamčatskom',
    To je, to je
    Nas Serbow wulki wótcny kraj!