Èl sgner Pirein/Arriva la Madôna!
ARRIVA LA MADÔNA
[edit]
— Ecco èl dòppi a S. Pavel... a momenti l'è que... Ergia, vein sù
pr'i pirù di Zelestein, guarda quanta zèint, che fess ch'as fa. Ergia,
bada que, cum t'î distratta... fala finè ed guardar qla schivèzza ed
ql'umarein.
— Mo ch' la staga mo bona... che non guardo a nessuno...
— S' l'è tùtt incû ch' t'en fa che filar... chi êl? me al vrev savèir.
— Mo nessuno...
— Un bolettari ed zert, se al foss un sgnòur an guardarev megga a te ch' t'î una povra ragazza...
— Insomma, sa che è una bella noia lei con queste storie..
— An importa che a dscurradi in tuscan per dirum del j insulèinz, che av dagh dû smataflon in bulgnèis... que in mèzz a la strà... impertinèinta d'una sfazzà!
Perchè l'è stà alle scuole ormali, l'as crèdd d'èsser chissà cossa... da' n rispettar più sô mader... e po t' vû tor marè con quèl caratter, pover omen! an vrè gnanch èsser int el sòu zavatt... A ecco i tambur, ecco la banda... l'è que, l'è que la vèira mader di Dio. Vein pur sù pr'i pirû, acsè a vdèin benone sèinz'èsser asquizzà.
— Ci sarà poco da vedere.
— Zò! perchè as tratta d'una cossa religiòusa, quand as trattava d'andar al còurs a fars infarinar, allòura a j era quâl da vèdder... qui bî baccî ed qui carr... qui grazius... dl'_Ehi! ch'al scusa..._ che im ficcon una spaluzzà ed zèss propri int èl cappèl che al n'è mai più andà vî... allòura tùtt andava bèin... Fèinla finè, che a j è que la prozessiòn. Ecco la banda, j ein quî dal pipî zal.
— Mamma, che dici? Kepì... e non...
— L'è l'istèss, dutturèssa ed santa mader cisa... guarda che fess, tùtt drî alla banda, in mèzz ai sunadur, sèinza rèigla... guarda i pover Sabadein armistià alla zèint... guarda èl sgner Luvigien che al s' saluta... cheini bèin la tèsta, hât pora ed cumprumetter la nubiltà, a salutar un Sabadein?... _Beata me dicent_... arspònd bèin: Santa _Maria mater Dei_...
— Ecco dòn Ignente èl fiol dla furnara... Ehi, a degh con te, bada che se t' seguit a filar con quèl ghignòus... a in fazz ùna del mî... Ecco l'inno, st'ann al l'ha fatt pader Capanna... almanch che j èl cantassen adèss! Guarda èl sgner Luvigein Bartolomasi... ch'al coj... quèl lè in abit, eh! almanch che am vdess... che am darè una Madôna... ohi! cminzeppia èl clero... ai voi cuntar: dû e dû quatter... Dòn Angiolini, e dû sî... _ora pro nobis_... arspònd bèin anca te, t'en seint ch'i disen el tani... _ora pro nobis_... e dû trèintadû... _ora pro nobis_, Dòn Sberli... _ora pro nobis_... Però! j ein quasi un zintunar... Bazzurlòuna! Tirar un tremlot perchè i liven èl dòppi ai Zelestein?! Hât pora che at vegna in tèsta èl campanel?! Ecco i seminari... guarda èl fiol dla sgnera Sùnta com al dvèinta grand... l'è ùn ed quî della redità Pallotti... Eh! la vol èsser furtouna... sè, basta, lassèinla lè... _Santa Maria mater Dei_...
— Ecco i curat; guarda èl noster! sta bèin cmod va... l'è zò èl più bèl... che bèla stola, al fu èl regal dla rettòura l'ann passà, l'è un arcam del sòr del Sacro Cuore... Auh! guarda èl guardian, al par un cavalir.
— Cussa j è in quèl fagott vèird...
— Èl tabar e èl capèl dèl sgner curat... ohi, ohi; al guarda; dè bèin del j uraziòn...
— Quèl zuvnein la, êl èl curat nov di Zelestein?
— Ah, quèl lè l'è dòn Carpanèl quèl dl'Eternità... lo que, quèl di Zelestein, an pôl megga gnanch èsser in prozessiòn al n'ha gnanch avò l'_exequatur_ da Ròmma.
— Cuss'êl po l'exequ...
— L'è èl bòl, che sèinza ed quèl lè, in polen entrar in pussèss...
Ecco èl Capetol ed S. Ptroni... dòn Tunein, quèl ch'ha qla gran vòus...
— Acsè cinein...
— Sè, ohi! cum'êla che an j è brisa monsgnòur Gulfir?!... Puvrètt, guarda lè monsgnòur Bedetti, un sant omen... a j in vrev dimondi ed qui lè...
— Ecco S. Pir, dòn Zarri, dòn Uless Parisein...
— È parente del maestro di musica che si veniva a insegnare le arie dei motivi nelle scuole normali?
— Sô fradèl, e anca lù l'è un brav mèster ed musica... Ecco la Madôna! Mettet in znocc e pregla ed cor che ti provvedda per l'avvenire, che ti facci capitare un buon partitino... brisa quèl dsgrazià là... sta bèin raccolta, _Ave Maria_... Guarda che fadiga ch' fa qui puver prit a purtarla... _gratia plena_... guarda quanti gioj... _dominus tecum_... tein zò qui ucc... _tu in mulieribus_... Ecco èl cardinal, guarda che cô... puvreina, la nostra Madôna, anch per st'ann...
— Chi è quell'altro vicino all'Arcivescovo?...
— L'è èl vèscov Ratta che l'è vescov int'ùn ed qui sit dov j è i gatt maimon, j omen salvadgh... Ecco tùtt i servitur con el torz... Casa Bevilacqua, Marselli, Guidott, la Davî cun el solit livrè vèirdi, ecco i fedeli... ohi! a j è anch la sgnera Claudia con èl sô candlott, eh! è meglio tardi che mai, puvrètta: una volta l'aveva alter da pinsar che alla prozessiòn... basta, lassèinla lè che an voi dir mal dèl prossum... Oh che brùtta prozessiòn prèss'a una volta che a j era èl senatòur, tùtt i professur d' l'università... e po la trùppa... la guardia d'unòur ed qui ed Palazz... che i biricchein i la ciamaven po la guardia tuccheina... a j era anch tô pader...
Seint èl dòppi ed S. Pir... che blèzza, adèss a stèin asptar ch' daga zò la zèint e po a s' l'avvièin in cisa.
— Oh... voglio andare a spasso...
— Ergia, en me seccar... a mumenti cun quèl tstimoni lè impalà, a la finess me... Andèin vein vî...
— Ma non l'abbiam già pregata la Madonna?
— Sè pulidein... ch' t'êr sèimper distratta... e po t' m'ha sèimper fatt ciaccarar che a n'ho dett niente pr'èl drett, vein pur vî gaiarda...
Eccoci, avsein a San Pir, seint te che sgumbei!
— _Povr'urbein, sgnòura_...
— A n'ho nient, puvrètt...
— _La Madôna e l'uraziòn, la panira e tùtt pr'un bagaròn_...
— Ohi! Valeri...[2]
— _Èl pover stroppi... quaranta al baiocch el caramèl... frische e bona... gelata frische_...
— Che tèsta ch'i fan vgnir...
Seint Ergia che bèl dòppi, al dà consulaziòn!
_Bel, bal, bel, boon!_
LA MUJER DÈL SGNER PIREIN