Çin sabaalen

Todur Zanet
Çin sabaalen

Hıyar gibi sörpermiş suratı
Çimçirlik gibi bakışı
Tırmık gibi siirek dişlär
İşlär mi bu insan? İşlär

İşlär - zerä yok, bezbelli
Para yaşamaa
Zerä geçirkän gençlii
Yoktu vakıt düşünmää ihtärlii

Yoktu vakıt : Aydın gelecää
Lääzımdı düzmää
İhtarlıktäsa ölä da
Kolay olacek yaşamaa

Genç kuvedi bitkiyädän süzdü
Aydın çalışmak
Kaç sıra beki o düşündü.
Raatsız gecedä : Of ahmak!

Aydın aslılar kof çıktılar,
Makar üstündän görünärdı dolu!
Da şindi işleer o genç ihtärlär...
Ya bak, te geçer birisi bu yolu :

Kambur arkası,
Sörpermiş suratı
Titirer elleri,
Pek yorgun bu genç bakışı.