«Портной»
Вурсьысь мортлӧн удж оз быр, —
Оз тӧд праздникъясӧ грек...
Шӧрасьӧ да вурсьӧ пыр,
Лун кӧть, вой кӧть, ноксьӧ век.
Оз кӧ вурсьы лун и вой,
Эз и шулыны: «портной».
Вурсьысь уна нырлас мел,
Колӧ-д шӧравны пинжак...
Бура вурсьысь этша зэв —
Тшӧктан этак, вурас так...
Уна тшыкӧдласны ной,
Сійӧн нимныс и «портной».
Ӧтчыд вурны сеті гач,
Мися, лӧсьыдджыка вур...
«Тэд пӧ гачтӧ вурам тадз,
Ӧнъя мода — самӧй бур».
Ми пӧ тӧдам... Тӧвар ной...
Сы вылӧ пӧ и «портной».
Гачтӧ вурис. Видлі ме:
Кыкнан бокас ыджыд шмак...
Эг и пӧртчыв «галифе», —
Кокын гожӧмбыд башмак...
Сералісны жӧ, ой-ой...
Аттӧ, сё морӧ «портной»...
Мӧдысь, сідз жӧ, локтіс тӧв —
Колӧ шоныд паськӧм сэк.
Вурим ватнӧй. Нимкодь зэв,
Сӧмын кынтӧ вӧлі век...
Вӧлӧм пуктӧма «портной»
Вата пыдди... коз пу рой...
Ӧтчыд чойлы ковмис сак
(Паськӧм вылӧ сійӧ чиг)...
Вурисны не кое-как —
Помас ыж ку воротник...
Сэки ёна видіс чой:
«Тэ пӧ омӧлик „портной“».
Коркӧ вурӧдліс жӧ пась
Менам сусед Митрей дядь...
Регыд паськаліс пусь-пась...
Бӧрас уна-й лэдзис «мать»...
Вӧлӧм сотӧма портной
Дон утюгӧн дона ной...
Мукӧд мортыд овлӧ тшап —
Вурас праздник кежлӧ «френч»...
Тшыкӧдасны ной кӧть драп —
Артмас паськыд, мый кӧть тэч...
Оз кӧ портитавны ной,
Эз и шулыны «портной»...
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator didn't fight or work for Soviet Union victory during the Great Patriotic War — so the 70-year protection term is applied;
- and the creator died before January 1, 1954 (more than 70 years ago), and has been not posthumously rehabilitated since that date;
- and this work was first published before January 1, 1954 (more than 70 years ago).
This work is in the public domain in the United States because it was published before January 1, 1929 (more than 95 years ago).
The author died in 1935, so this work is also in the public domain in other countries and areas where the copyright term is the author's life plus 88 years or less (if applicable), or the copyright term is 98 years or less since publication (if applicable).
Public domainPublic domainfalsefalse