Эрзянь Мастор/2006/15/"Пургаз" минек ютксо

From Wikisource
Jump to navigation Jump to search
Эрзянь Мастор, № 15 (239), 17 августа 2006 edited by Нуянь Видяз, Кшуманцянь Пиргуж
«Пургаз» минек ютксо by Нуянь Видяз
Статья на сайте газеты: № 239, 17.08.2006, «Пургаз» минек ютксо
 
«Пургаз» минек ютксо

Нурькинестэ картинанть автордонзо, Петр Сергеевич Малышевде

///////////////////////////////////////////////////////

Уцясканть а мезть вашнемс — сонсь мутанзат. Ды сайдянзат ков мелезэ. Истя лиссь Кочкуронь буень Од Турдак велень эрицянть Петр Сергеевич Малышев мартояк. Эзь арсекшнэ: сави саемс ружия. Савсь саемс. «Оёвась» эрзянь церась Украинань 1-це фронтсо. Савсь улемс «смертникекскак» (кадновсь орудия марто ятонь а нолдамо). Винница ошонть маласо недявкссонть (бойсэнть) ялганзо ютксто кадовкшнось ськамонзо. Контузия марто сась кудов. Церанть покшоль мелезэ улемс артыцякс — художникекс. Прядызе Пензань Савицкий лемсэ художествань училищанть.

Важодсь оформителекс ТЭЦ-2-сэ, театрасо, тонавтсь чачома велесэнзэ эйкакшт. Ютко шкасто сермадсь картинат. Кадокшнызе те тевенть. Паряк, эзть максо поладомс сонзэ апаротне, конат килькштясть оймензэ, эрямосонть авидечитне, художниктнень ютксо амазый тевтне. Виде, маряви, теяк: кацтакшнызе вечкевикс тевдензэ велесэ эрямось, певтеме мелявкстнэ, пень асодыця кудонь-кардазонь тевтне. Ниле эйкакшт. Эрявсь сынст трямс-кастомс. Нейгак, иензэ лангс апак вано, котьми кудосо-пиресэ, кирди кемкавтово нешкть.

Вельмевтизе ды сыремтизе сермадомань ёжонть Абрамов Владимир книгасонзо «По следу времени». Книгась, косо ёвтневи эрзянь ламо ине ломантнеде: Пургаз, Тюштя, Алабуга, Воркадин Москов, Боляень Акай, Эрзямасонь Олена... Сындест ловнозь сельмензэ одс панжовсть. Курок чачсь картинась «Пургаз», мельганзо «Аввакум», «Акай Боляень куловтомазо», «Несмеян Васильевень куловтомазо», «Чапаевской атака», «Онава»...

Художникесь ней арси «Эрзямасонь Олена» картинанть сермадомадонзо. Паз, чангодть Петр Сергеевичнень!

Эрзянь историядонть сермадыцятнеде вейке кедень сурдо аволь ламо. Пелить художниктне те темадонть толдо пек. Сюкпря Петя покштянень, сон эзь пеле, эзь тандадо, кундась те кардавикс темантень.

Меельце трешникенек каинек, раминек «Пургаз» картинанть ды муинек тензэ тарка Фондонь нупальнесэ. Садо, варштадо, неинк, кодамоль Пургаз.

Nujanj Vidjaz


RU: Данная работа создана сотрудниками газеты Эрзянь Мастор и распространяется по лицензии Creative Commons Attribution 4.0 International. См. пояснение внизу заглавной страницы газеты.
EN: This work is licensed under the Creative Commons Attribution 4.0 International License as a work by Erzyan Mastor journal employee(s). See the disclaimer on the bottom of the front page of the journal.