Эрзянь Мастор/2004/10/"Масторава" лавкась учи тынк, ловныцят!

←Скульптор. Николай Филатов

Эрзянь Мастор, № 10 (185), 27 мая 2004 edited by Нуянь Видяз, Кшуманцянь Пиргуж "Масторава" лавкась учи тынк, ловныцят! by Нуянь Видяз

Кой-кить кискаст мартояк кортыть рузокс→

Статья на сайте газеты: № 185, 27.05.2004, "Масторава" лавкась учи тынк, ловныцят!

 

"Масторава" лавкась учи тынк, ловныцят!

Рузонь музыкань культурасонть ёвксонь кондямо тевекс ловови сёрмань кучнемась Чайковский композиторонть ды Надежда фон Мек сюпав аванть ютксо. Вейкест-вейкест туртов кучозельть тёжадо ламо сёрмат. Малав истямо сёрмалема, сёрмань сэдне, таргавсь Сарансо эрицянть Маризь Кемаль поэтэссанть ды Киевсэ эриця Орест Ткаченко, ламо келень содыцянть, ютксо. Украинань Академиянь член-корреспондентэсь, филологиянь докторось, профессорось, эрзянь келень содыцясь Орест Ткаченко кучсь Маризь Кемальнень 27 сёрмат-арсемат. Зяронь туро тусть Киевев. Украинань прявтошсто авторось каршо эзь моле — печатамс сынст башка книгасо. Чадыковсто сон лиссь. Лемезэ — «Письма далёкого друга» («Васолъялгань сёрмат»).

«Письматне» — мелявкст-арсемат «сэредиця» кельтнень икелень чидест. Эйсэст ёвтневи кие, кода ды зярдо пачтинзе сынст шумбрань арасьчинтень. Ванновить тувталтнэ, максовить превть, кода менстемс эйстэст орматнень ды лисемс те кажосонть. Те эли тона келенть уцясказо невтеви историянь уличитнень (событиятнень) марто сюлмазь. Анокстызь сёрматнень печатамс Маризь Кемаль ды Нуянь Видяз.

Сёрмадозь книгась эрьванень чарькодевикс, мазый, мельс туиця рузонь кельсэ. Ловнови интерес марто. Нолдыцязо «Красный Октябрь» типографиясь. Тиражозо 2000 экземплярт.

Книганть лисемадонзо икеле сёрматнень ловнызь В. С. Брыжинский профессорось ды А. М. Шаронов филологиянь докторось. Сынст рецензияст максовить нолдавкссонть меельце ёнкстнэсэ.

«Письма далёкого друга книгась микшневи «Масторава» книгань лавкасонть (Саран Ош, Ленин лемсэ проспектэсь, 18 кудось).

Нуянь Видяз