Un Cacete
Ua nuite an que l Siqueira saía de l Lhírico, biu de lhoinge l Rubion, ne l Ancho de la Carioca, i quijo fugir, mas nun tubo tiempo:
L Rubion abistou-lo i correu para el.
— L Siqueira! Ben acá! Nun fujas! Que diabo! Nó te beijo hai un seclo!
— Adius, Rubíon; cumo bai esso?
— Parece que fugies de mi!
— You?! Que lhembrança!
— Nó, que, para te falar cun franqueza, ando mui ressabiado: l outro die... quando fui?... terça-feira... oura, spera! fui quarta-feira... nó!... anfin, terça, ó quarta-feira, l Honorato biu-me i fugiu!
— Fugiu?!
— Cumo l diabo de la cruç! I tomou un bonde que passaba! Vien sei porque esso i... stou pobre... nun tenho más bintén.
L Siqueira tubo ímpetos de le dezir: "Nó, nun ye porque steias pobre; ye porque sós mui cacete", mas cuntebe-se.
— Mas tu, Siqueira, tu, nun creio que fujas de mi pul mesmo motibo. .
— Mas you nun fugi!
— Antes assi. De adonde benes?
— De l Lhírico.
— Sós un home feliç.
— Porquei?
— Porque puodes ir al Lhírico. Tu sabes cumo you sou doido por música; pus bien: zde 1871... nó! Oura, spera!.. zde 1872... ó 1873... anfin, hai trinta i tantos anhos, nunca más oubi ua ópera!
— Que stás dezindo?
— La berdade. Nun sei l que ye Tamagno, nin Gayarre, nin Caruso, nin nada! La redadeira ópera que oubi, inda ne l Probisório, ne l Campo de Sant'Ana, fui la Fuorça de l Çtino.
L Siqueira stendiu a mano para çpedir-se, mas l Rubion agarrou-lo por un boton de l subretodo, i cuntinou:
— Ah! naquel tiempo you nun solo iba al triato, cumo era amigo de l artistas... Fiç muita amisade cun un deilhes, justamente naquel tiempo... 1871 ó 1872... era un baixo, mas que baixo! Nun creio que boltasse nunca al Riu de Janeiro un baixo cun ua boç daquelas! Era de primo cartelo!
— Cumo se chamaba?
— Chamaba-se... oura spera... Chamaba-se...
I l Rubion meditou durante dous minutos, a percurar l nome de l cantor siempre agarrado al boton de l Siqueira.
— Bien! depuis me dezirás... Adius, Rubion!
— Spera, home de Dius! Tenho l nome ambaixo de la lhéngua! Oura, senhor!, un artista cun quien you ceaba todas las nuites! Por falar an cear: nun te apetece agora un choclate?
— L que me apetece ye drumir.
— Inda ye cedo. Bamos eilhi al Paris.
L Siqueira nun tubo remédio senó ir tomar choclate cul Rubion.
— Oura, que cousa squisita! - dezie l maçador anquanto bubia. - Nun me puodo lhembrar de l nome de l baixo!
— Deixa alhá l baixo i anda cun esso, que son horas.
— Adonde stás morando?
— Na Rue de la Amperatriç.
— Inda ne l mesmo sobradinho?
— Inda.
Quando acabórun de tomar l choclate, que l Siqueira pagou, benirun ambos de nuobo para l Ancho de la Carioca.
— Buono! Agora adius, Rubion!
— Que diabo!, you nun querie apartar-me de ti antes de me lhembrar de l nome de l baixo. Nã0 eimaginas la afliçon que esto me causa!
I quijo de nuobo agarrar l outro pul boton, mas desta beç l Siqueira protestou:
— Deixa l boton!
— Sabes que más? La nuite stá fresca... bou lhebar-te até la puorta de casa... Talbeç que an camino you me lhembre de l nome de l baixo.
Siqueira quijo eibitar que el rializasse la amenaça, mas nun houbiste meio, i l pobre rapaç fui cruelmente caceteado até a la Rue de la Amperatriç.
A la puorta de casa, yá l trinco staba na fechadura, i l Rubion percuraba lhembrar-se d0 nome de l cantor.
— You desespero! Anfin, manhana mando-te l nome del nun carton postal... Adius, Siqueira!
— Adius, Rubion!.
— Mira!
— Nó! adius!.
I la puorta batiu cun fuorça.
L Siqueira suspirou, subiu la scaleira i fui para l sou quarto, çpindo-se, deitou-se, i adrumeciu lhougo, pus staba rialmente cun sono; mas nun se tenie passado talbeç meia hora, que çpertou subressaltado cul barulho que fazien, batendo a la puorta de la rue.
— Ó Siqueira! Ó Siqueira! Chega a la jinela!... gritaba ua boç.
L Siqueira dou un pulo de la cama, ambrulhou-se nun cobertor, abriu la jinela i biu ne l meio de la rue l Rubion, que dixe:
— Mira, l nome de l baixo era Ourdinás! Buona nuite.