Tru muntili di Zmolca
Nsusu tru muntili di Zmolca
Tutâ noaptea-alatrâ Polca,
Polca, bealişi câţauâ,
Di tuţ câńil’i cama-arauâ;
Latrâ singurâ, pi lunâ,
Di pâdurili arâsunâ.
– Polcă lele, Polcă vrută,
Ţi-ai di-alatri noaptea tutâ?
Ţi-ai di-alatri nvirinatâ,
Polcă ńicâ şi-alâvdatâ?
Naca furil’i yinu s-nâ furâ,
Di nu-ţ taţi laea-ţ gurâ?
Naca yinu tr-a noastri ńeali,
Trâ caleşili ca steali,
I yinu, poati, si-ńi mi leagâ,
Sclavu s-mi ţânâ veara ntreagâ?
Cara s-yinâ maşi trâ mini,
Bucăţ fă-ńi-ti, scumpă, tini,
S-nu-ńi mi-acaţâ câpitanlu,
Dona, gionili-aţelu duşmanlu,
Ţe-ńi mi-avinâ si-ńi mi-acaţâ,
Si-ńi l’ea banâ ş-tinireaţâ!…
Nu-apucă tra s-ḑâcâ grailu
Noti-arusu ş-muşatu ca Mailu,
Când unu pliumbu ndrept tu cheptu
L’i-yini-a celniclui aleptu:
Pliumbu greu, pliumbu di moarti,
Pitricutu di-ahânt diparti…
Câḑu Noti, lailu,-mpadi,
Ca fidanea cându cadi,
Ş-Polca, corba, dipriunâ
Alâtra di doru pi lunâ,
Câ muri maratlu gioni
Vâtâmatu di furlu Doni.
Când hâbarea-agiumsi-n hoarâ,
Vińi nveasta-alu Noti truoarâ,
Nveasta-l’i scumpâ şi muşatâ,
Cu cundil’ilu canda-adratâ;
Şi-acâţă si-şi zmulgâ perlu,
Di plânḑea di ńilâ ş-ţerlu.
Vińi ş-sora-alu Noti – cruna –
Deaspirâ di ş-plâmsi ş-luna.
Dauli plângu ca birbil’i,
Câ lâ-armânu-mpadi hil’i;
Plâng, ca ţerli tru tuchitâ,
Ş-plângu ńira loru lâitâ!...
O lai Done, câpitane,
Ţi-adâraşi, tini, curbani?
Virsaşi sânḑi tra s-bea loclu –
Si-ńi ti-ardâ sfulgulu şi foclu!
Vâtâmaşi Noti – dal’eanlu –,
Stingâ-ţ ḑuua iataganlu!
L-vâtâmaşi di trâ ʼnâ picâ,
Di niveasta-l’i va s-s-dińicâ,
Ş-corba-l’i sorâ va s-s-dirinâ –
Di la Dumniḑău s-ţâ yinâ!