Tik at obi egelo vexadom
From Wikisource
Pelovepolöl in Volapük se nugänapük fa Madarassy Pál ed epuböl in “Volabled” de Napoli.
Tik at obi egelo vexadom:
Das deil in bed obi orivom!
Deiläfön as flol, nevifiko,
Keli vum betuetom kläniko;
Äs litot kel nevifiko finöl,
Stanom in cem vagik e pelüvöl.
No givolös, O God obik!
Obe, vö! deili somik!
Binobös bim, dub kel lelit gonom,
U keli vienatep sävulom;
Binobös klif geilik, keli de bel
Töt dalemuföl tömetom in nebel . . .
If füdo slafapops valik,
Petusatöl fa yoks omsik,
Ko logods peledöl okis odatovoms,
E ko stäns ledik, vienöl, omalekoms,
Stäns at ab olaböl
Völapüked[1] suköl:
“Volalib sanik!”
Ed in vol lölik
Pops atosi de lefüd otopetoms
Jüs vesüd, lusöl okomipom ko oms:
Us ofälobös!
Su komipaplad!
Us blud yunik oseflumös se lad obik,
Ed if lips vokoms gälaluvoki lätik:
Täno feslugomsös osi dülinas
Böset, toen topetas e töt känas
Ed ov' fun obik
Jevals komipik
Tepomsös mofo al vikod pedalöpöl,
E letomsös usit[2] obi peditlidöl -
- Us okosükonös bomemi obik,
If onakömom sepüba del gletik,
Kü lä lügamusiga zelik toens
E pakopanöl fa mödiks lügastäns,
Jameps polovegivoms sepe tugedik,
Kels edeiloms plo ol: Volalib sanik!
-
-
(Poedot at binom blesen plöfetik. Petöfy ilautom oti in yel 1846, ed äfälom in yel 1849, in pug de Segasvàr, pekomipöl ta rusänans, modo pebisesagöl fa om it.)
-
NOETS. (Vükifonät)
Se Kosmopolan 1891, Nüm: 1, Pad: 6.
(Rigiko se „Löfamagabs“ ela Petőfi, petradutöl fa Madarassy Pál.)
