Suvok

Mob ola, fomön sogi u klubi bevünetik deseinü lefulön, menodön e pakön vpi, etuvön leki bevü vpans tala. Egetob penedis e potakadis mödik, me kels vpans ebeloboms mobi et e begoms obi, fomön klubi somik.

Vemo emeditob dö din at e dö stad lügik anuik vpa ed esuadobok umo ed umo, das te me klub somik kanobs rivön zeili subimik datuvala pailöföl obas. Ab zesüdos, das in klub at binoms vpans paletas bofik; - - e dem atos zesüdos, das vpans paleta datuvalik finoms lenlogön züpanis paleta votik as taels u as neflens. Vpans paleta votik dunomsös eitosi. Denunob nu atosi, kelosi ya mödikna esagob, das in palet et sibinoms vpans mödik vemo plobiks. Binoms ba taels datuvala, ab no binoms neflens oma.

If sikodo mojedobs feitis smalälik valik ed if flens snatik valiks vpa ofomoms klubi bevünetik, no kanos padotön, das omekobs gudikosi mödik plo din subimik obas.

Sikodo vüdob e suvokob vpanis e jivpanis valik nütlidön ini klub at e maniföfön läsevi e ladetis okas in Vpagased valemik söla Kniele. Leigüpo begob vpagasedes valik tala posbükön suvoki at oba.

Beyrut in Sürän, 1893, telul 14id.

Bernhaupt Yosef.

Se Nuns blefik se Volapükavol 1893, Nüm: 1, Pad: 4.