Stansos a l'hurouso memorio d'Henric le Gran, inbincible rey de Franço é de Nabarro
A l'hurouso memorio d'Henric le Gran, inbincible rey de Franço é de Nabarro
Stansos
Jantis Pastourelets, que dejouts las oumbretos
Sentéts apazima le calimas del jour,
Tant que les Auzelets, per saluda l'Amour,
Uflon le gargaillol de milo cansounetos,
Petits Rius, doun l'argen beziadomen gourrino,
Pradets, oun le plaze nous embesco les éls,
Quand la joüeno sasou bous cargo de raméls,
Augéts coussi se plaing uno Nympho Moundino.
Quand del coumu malhur uno niboul escuro
Entrumic la clartat de mon Astre plus bél,
Yeu disi quant la Mort dan le tail d'un coutel
Crouzéc Le Grand HENRIC sul Libre de Naturo;
De roumécs de doulou mon armo randurado,
Fugic del gran Soulel la pamparrugo d'or,
Per ana dins un roc ploura d'él é de cor
Del Partérro Frances la bélo Flou toumbado.
Ouéy tourni prene bent per ufla ma Museto
Quel del Rey ta plangut entoune uno cansou:
Sur le brabe LOÜIS regitara le sou;
Car al rasin reben l'aunou de la souqueto.
Que nou nous bengon plus brounzi per les aureillos,
Ni Cesar, ni le Grec que mouric pel talou.
Per dessus le boulum des Princes de balou
Un HENRIC a claufit le Mounde de merbeillos.
Les fourtunables Reys doun le Mounde fa fésto
Soun coumo de roubis pausats en roso d'or,
Oun le balent HENRIC, tout brasses é tout cor,
Éro le diaman qu'oundrao tout le résto.
La Térro en tremoulan al brut de sas armados
Li dounao la bouts per soun prumié Seignou:
Tabe per le plassa dins le Temple d'Aunou,
Le Cél l'abio fourmat à bertuts rapourtados.
O flourisso la Pats, ô touquésso l'alarmo,
La Justecio, la Fe, la Forço, la Bountat,
É tout ço que le Cél douno per raretat,
Coumo l'aygo à la mar se randion à soun armo.
Taléu que sur soun froun se pauséc la Couroune,
L'englazi se neguéc al Riu del Debrembié,
La Pats y ba beni, que de soun Oulibié,
Y féc un bél empéut sul Laurié de Bellouno.
De sas milo bertuts la preciuso richesso
Croumpao d'un cadun le cor é l'affecciu;
Soun Cos se fasio beze un Cél de perfecciu,
Al lum de soun Esprit, Esclaire de sagesso.
Aco's el que sul fi remetio la balanço
Taléu que la Rasou se plaignio d'un afroun:
Aco's el que prenio la Fourtuno pel froun,
Que clabelao péy sul Scéptre de la Franço.
A la fiéro des trucs el caillo qu'on le bisso,
Dan le foulse del bras esclafa le fer blanc,
Foulze que fasio courre un labassi de sang
É regita de caps uno grossa granisso.
D'Enemis animats un mondè se bandao
Par fa rebés del dret, que de dret li benio;
Més el éro l'Atlas que tout au sustenio
É peyssoun l'Herculet que tout au englandao.
Coumo s'enbalauzis la bicho pel bouscatge,
Quand le sou del cournet dins l'aureillo li bat,
Al Nom del grand HENRIC l'Enemic eyssourbat,
Fugio, marrit de poou é beouze de courage.
L'un sentio d'un estoc desclaba las coustélos,
Per oun s'estourissio le sang à bel rajol;
L'autre, que milo pics aloungaon pel sol,
Besio son paure cos despartit en estélos.
Atal dedins un Parc le Lion se boulégo
Al mitan des moustis, del Pastre, é deys aignéls;
A tal à cops de dens, de coüo, d'urpos é d'éls,
Les espauris, esquisso, endoulomo, mousségo.
Hurous le que labets éro à la picouréo,
O que s'éro mudat dan las armos à bas;
Per bieure nou caillô que cambos sense mas,
É se monstra puléu Cérbi que Briaréo.
Jamay cap d'autre Rey nou féc talo soulado
De cosses de Souldats esquitats an la Mort,
É Carôun jamay plus nou troubéc à son Port
D'Esperits desoussats ta rabento menado.
Dounc, ô Tygre cruel, piri que l'Ours salbatge,
Pla t'abion poussedit las Feramios d'Ifér,
Quand ta scarioto ma s'anéc arma de fér,
(Seignour Dieu) countr'un Rey que daurao nostr'atge.
Qui te piegec le bras de tant d'asseguranço,
Que nou fiblesso pas jouts l'ourrou d'un tal cop,
Sampa l'Esprit de néyt, que li trigao trop
Que bisso reboundut le Soulel de la Franço.
De l'auratge emmalit d'uno guérro coumuno
Tu bouillos treboula le calme de la Pats,
Més tous cops en nourre foureguen dissipats
Taléu que d'un Dalphi Diu fazec un Neptuno.
Abalisco le Gus; de qui la ma prouphano
Ben de rounça pel sol l'Auta de la bertut:
Son cop passo le cop d'aquel autre perdut
Que féc un fougayrou del Temple de Diano.
Escantit es le lum, usat es le bel moble
De qui la térro féc l'aunou de soun houstal,
La descarado Mort un cop tout à bel tal,
Endrom dedins le clot le Pages é le Noble.
Le Mounde es uno mar, oun coumo jouts de belos,
L'Home sent quado joun qualque bent d'afflicciu;
Més nostre Rey, coumoul de touto perfecciu,
Hurous Hoste del Cél, trepejo las estelos.