ᎯᎠ ᎾᏍᎩ ᏄᎬᏫᏳᏌᏕᎩ ᎧᏁᎹᏉᎬᏉ ᎨᏎ ᎤᏢᎬᎢ, ᎠᎴ ᏂᏚᎩᏨᏂᏒᏉ ᎠᏩᎾᎦᎶᎨᎢ, ᎠᎴ ᎧᏁᏉᏥᏎᏉ ᏚᎦᏓᏁᎲ ᏂᎪᎯᎸᎾᏉ ᎤᏲᎱᎯᏍᏗᏱ. ᎠᏲᎱᎯᏍᏗᏃ ᎨᏒ ᎠᎴ ᏐᎢᏱ ᏗᎨᏒ ᏗᎪᎯᎸ ᏩᏕᏗ ᎨᏒ ᎿᏉ ᎾᎥᏂᏳ ᎨᏒ ᎠᏓᏅᏛᎵ, ᎤᏣᏘ ᎤᏪᎵᎯᏍᏗ ᎠᏓᏅᏖᏗᏍᎬᎢ. ᎤᏣᏘ ᎠᏍᎦᎾᎯᏳ ᎨᏎᎢ, ᎠᎴ ᎾᏍᏉ ᎾᏍᎩ ᎢᎦᎦᏛ ᎾᎦᏔᎿᎥᎾ ᎨᏎᎢ. ᎠᏧᏣ ᎨᏒ ᏅᏓᎬᏩᏓᎴᏅᏛ ᎤᏣᏘ ᎠᏂᏍᎦᎾ ᏥᏳ ᏗᏂᏂᏙᎯ ᎠᏁᏙᎲᎢ ᎤᏪᎳᏗᏙᎸᎯ ᎨᏎᎢ, ᎠᎴ ᎾᏍᎩ ᏧᏕᎶᏆᎡᎸᎯ ᎨᏎ ᏂᎦᎥ ᎤᏲᎢ, ᎾᏍᎩᏯ ᎠᎴ ᎾᎾᏛᏁᎲ ᎾᏛᏁᎮᎢ, ᎠᎴ ᎦᏂᏆᏘᎯ ᎨᏎ ᎠᏥᎬᏍᎪᎸᎥᏍᎬᎢ. ᏥᏳ ᎤᏛᏅ ᏓᎾᎵᎲ ᎤᎾᏦᏗ, ᎤᏦᏔᏅᎯ ᎨᏎᎢ, ᎠᎴ ᎾᎿ ᎤᏍᏆᏛᎯ ᎨᏎ ᎠᏕᎶᏆᎥᎲᏍᎬᎢ. ᎪᎯᏗᏳ ᏥᏳ ᎤᏪᏂᏙᎸ ᎪᎱᏍᏗ ᎤᏐᏅ ᏄᎵᏍᏓᏁᎸᎾ ᎨᏒᎢ, ᎾᏍᎩ ᎤᏟ ᎢᎦᎢ ᎠᏍᏓᏱᏳ ᏄᏩᏁᎮ ᎤᏓᏅᏛᎢ---ᎾᏍᎩᏃ ᎾᏍᏉ ᏂᎬᏂᏏᏍᎨ ᎥᏝ ᏰᎭ ᎤᏁᎳᏅᎯ ᎬᏩᏛᏗ ᎨᏎᎢ, ᎠᎴ ᏕᎤᎸᏫᏍᏓᏁᎲ ᎾᎿ ᎬᏂᎨᏒᎢᏳ ᏂᎦᎵᏍᏗᏍᎨ ᎤᏬᎯᏳᏒ ᎤᏙᎯᏳᎯ ᎤᏁᎳᏅᎯ ᏁᎲᎾ ᎨᏒᎢ. ᎠᏲᎱᎯᏍᏗ ᎨᏒ ᎦᎾᏰᏍᎬᎢ, ᎠᎴ ᎾᎦᏔᎲᎾ ᎨᏒ ᎾᎿ ᎦᏴᏓᏗᏍᏕᎸᏗ ᎨᏒᎢ, ᎠᎴ ᎤᏓᏅᏛ ᎿᏉ ᎾᏍᏉ ᎬᏂᎨᏒ ᏄᏩᏁᎲ ᎠᏍᎦᎾᎯᏳ ᎨᏒᎢ, ᎾᏍᎩ ᏅᏧᎵᏍᏙᏔᏁ ᏌᏉ ᏄᎵᏍᏔᏁ ᎤᏪᎷᏁᎢ, ᏑᎾᎴ ᎩᎳᎢ ᎦᎶᎯᏍᏗᏱ ᎠᏍᏚᎢᏍᎨ ᎳᏫᏅ, ᎤᏛᏛᏁᏃ ᎳᏫᏅ ᎯᎠ ᏄᏪᏎᎴᎢ, “ᏍᎩᎾᏝᎢ, ᎦᏙ ᎤᏍᏗ ᎪᎯ ᏑᎾᎴᎢ”—“ᏔᏫᏅ, ᎤᏣᏔᏉ ᎠᎩᏢᎦ—ᏥᏰᎸ ᎧᏁᏉᏥᏉ ᎠᏩᎾᏚᎶᎬᎢ; ᎠᏎᏃ ᎥᏝ Ꮀ ᏱᎦᎦ-
