gin tij mīkij-vujm i čoltnij-vujm, mū vaᵢltem bajas; juᵢkke pejv tijji-vujm ārrum mon, vuopestemen cerkvest, i tij jēppeẟ valtlam mū.
56. Tāt-že puk leaj, što šɵndɵčiš prōrokit kirji. Tanna puk vuopnattij kuᵢddiš sū i uᵢrčiš.
57. A Isus vaᵢltij vīkkiš sū Kajjafe, šoᵢrmus pāppe, koz čoñkdɵttiš kirj-kīd’ i parrsamuz.
58. 'Piedar-že vaᵢnʒelij sū mielt kuᵢkeldagɵᵢst, šoᵢrmus pāp dvor rajja; i čāññɵlij siz ištij pākaldɵzɵ-vujm, što ujnɵčij kieǯe.
59. Šoᵢrmus pāp i parr’samuz i puk sinedrion oᵢcciš kielles-sāgɵᵢt Isus vuosta, su sarma ɵᵢntem bajas;
60. I jet kavnmańč: i, χoᵢt jennɵj kielles-sarnɵjit puotliš, jet kavnmańč. No majimuᵢsse puᵢtteš koχt kielles-sarnɵj.
61. I cilkiš: Son sarnɵj: vajjam muᵢrted Jummel cerkov, i kolmɵᵢn pejvest tujjed sū.
62. I čuńčdɵdij šoᵢrmus pāp i cilkij suᵢnne: mɵn-det ik sarn ni mɵn? mɵjt sij tū vuosta sarnadet?
63. Isus arij inta. I šoᵢrmus pāp cilkij suᵢnne: pākam tuᵢnne jillij Jummelin, celk mijjit, ton leak, jik Xristos, Jummel ɵᵢlk?
64. Isus sarnɵj suᵢnne: ton cilkik; ja sarnam tijjit: anjeńč rajest ujnvette olmu ɵᵢlk ištmen vuoᵢlles-bielt vig’, i puoᵢtmen ɵᵢlm pɵlvɵ ɵᵢln.
65. Tanna šoᵢrmus pāp keštkij īǯes asjit, i cilkij: Son Jummel χavk; mɵz mijjit veal sāg-olmɵt? kič aᵢn tij kullɵᵢn sū Jummel-χavkmuš.
66. Maχt tijji mielt lī? Sij-že cilkiš vuosta: sɵrma lī vier.
67. Tanna čolkuš suᵢnne muod vuosta, i pel͘-mantɵje takkuš: a muottam peakkɵstɵš su kajbɵ vuosta,
68. I sarnuš: aᵢrved mijjit, Xristos, kī tāklij tū?
69. Piedar-že ārij olgɵᵢlt dvōrest; i pūdij suᵢnne oχt ńēzan-pākaldas, i cilkij: i ton lejik Isusɵᵢn Galilejlańǯin.
70. No son pācdɵdɵj pūkɵᵢd pūt, cilkij: jim tied, mɵjt ton sarnak.
71. Ko s-že son vuᵢlgeškūdij uvzɵ tokka; ujnistij sū nump, i sarn tomb ārrijit: i tat leaj Isusɵᵢn Nazorejin.
72. I son das pācdɵdɵj boᵢždɵtmɵᵢn, što ij tied tan olmɵ.
73. Ij jennɵj maᵢnlakɵᵢst puotliš, kok tomb čuńčiš, i cilkiš Piedre: vujkest i ton sist; tɵn-det što i tū sarnam-naᵢl čojat tū.