sona
anu[1] suli pi ma Tosi
jan Alonola
tenpo pini lili la, jan pi ma Tosi li ken anu e kulupu lawa ona. kulupu ni pi nasin jan li lon:
- kulupu “CDU/CSU” anu “Union”. ona li kulupu pi nasin lawa awen. tenpo pini la, ona li kulupu nanpa wan.
- kulupu “SPD”. ona li kulupu pi nasin lawa kulupu. ona li wile e ni: jan ale li jo e lon pona. ona li wile pana
e mani tawa jan pi mani lili. ona li lawa e ma Tosi lon poka pi kulupu “CDU/CSU”.
- kulupu “AfD”. ona li kulupu pi nasin lawa ma. ma Tosi li pona tawa ona. ken la, ona li olin e ona. ona li pona kin tawa kulupu esun. ona li wile e ni: ma en jan lawa en jan utala en jan pi awen lawa li suli li jo e wawa mute. ona li ike tawa jan pi ma ante.
- kulupu “FDP”. ona li kulupu pi nasin lawa ken. ona li wile e ni: lawa pi tenpo ni la, kulupu li kama jo ala e ijo mani mute, li kama jo e ijo mani lili. lawa ona li pona tawa kulupu esun.
- kulupu “Bündnis 90/Die Grünen”. ona li kulupu nasin pi pona ma. ona li wile e ni: ma li pilin pona. ona li wile pana e mani mute tawa pona ma, tawa pona soweli, tawa pona kasi. kin la, ona li wile e ni: ona li wile pana e mani tawa jan pi mani lili.
- kulupu “Die Linke”. ona li kulupu nasin pi sama jan. ona li wile e ni: mani li suli ala tawa kulupu. kulupu ante ni la, ona li wile pana e mani mute mute tawa jan pi mani lili. ona li wile e ni: jan ale li ken moku, li jo e tomo, li jo e lon pona.
kulupu ante mute li lon, taso kulupu ni taso li lon tomo lawa pi ma Tosi lon tenpo ni.
ni la, kulupu nasin seme li nanpa wan:
kulupu “SPD” 25.7%
kulupu “CDU” 18.9% (o lukin kin e "CSU")
kulupu “Bündnis 90/Die Grünen" 14.8%
kulupu “FDP” 11.5%
kulupu “AfD” 10.3%
kulupu “CSU” 5.3%
kulupu “Die Linke” 4.9%
kin la, kulupu lili “SSW” li lon tomo lawa pi ma Tosi lon tenpo kama!
jan mute (25.7%) li anu e kulupu nasin “SPD”. ona li nanpa wan! taso, ona taso li ken ala lawa. ken suli la, ona en kulupu ante tu li kama e kulupu suli la, ona li ken lawa.
- ↑ sina “anu” e ijo la, sina wile jo e ijo ni, li wile ala jo e ijo ante. sina pali e ni la, ni li anu.
