nimi pi jan kule
jan Kapesi Pake
kulupu pi toki pona li jo e jan pi kon olin mute. mije pi olin mije li lon. meli pi olin meli li lon kin. jan ni li jo e nimi pi kon olin ona. ona li nimi “mijomi” (tan “mije olin mije”) li nimi “melome” (tan nimi “meli olin meli”). taso, nimi ni li pu ala li ku ala.
kulupu pi toki pona li jo kin e jan pi olin meli pi olin mije, taso jan ni li jo ala e nimi pi kon olin ona. ni li ike ala ike? ken la, nimi pu en nimi ku li suli. nimi pi pu ala en nimi pi ku ala li suli ala. taso, nimi pi kon olin li pu ala li ku ala tan seme?
kulupu nimi li sama nimi wan tawa kon olin la, ken la, jan kule mute li wile ala kepeken nimi sin ni. taso, jan kule li jo e jan ante kin. jan li ken mije li ken meli. tan ni la, jan li ken tonsi kin. jan tonsi li mije ala li meli ala, anu ona li mije tawa meli anu meli tawa mije. nimi “tonsi” li pu ala, taso ona li ku.
nimi “tonsi” li ku, taso nimi ante pi jan kule li ku ala tan seme? mi sona ala. ken la, ona li nasa lili. nasin pi nimi mute li pona tawa mi. tan ni la, jan li wile kepeken nimi “tonsi” la, ni li pona tawa mi. suli la, mi pilin kin e ni: nimi pi mije pi olin mije en nimi pi meli pi olin meli li lon la, nimi pi jan pi olin meli pi olin mije o lon.
waleja[1] la, jan pi toki pona li ken kepeken nimi “jan kule” sama nimi “LGBT” lon toki Inli. tenpo ni la, jan wan li pali e nimi sin tan ni: ona li sama nimi “jan kule.” ona li nimi “kese.” jan lili li kepeken nimi “kese,” taso nimi “kese” li nimi ilo tawa ona.
pini la, ni li kon olin sin tu. jan mute li pilin e ni: jan ali li wile e olin tan jan ante. taso, jan pi nanpa lili li wile ala e olin ni. ona li jan pi wile olin ala. ken la, ona li pilin pona tawa olin tan jan ante, taso ona li jo ala e olin ni. kin la, jan mute li pilin e ni: jan ali li jo e wile unpa. taso, jan pi nanpa lili li jo ala e wile ni. ona li jan pi wile unpa ala. ken la, ona li unpa. ken la, ona li pilin pona tawa nasin unpa. taso, ona li wile ala e unpa. kon olin tu ni o jo e nimi sin? mi sona ala. ken la, jan li pali e ona.
jan pi lili mute li toki e ni: jan pi wile olin ala en jan pi wile unpa ala li jan kule ala. ni li lon ala lon? mi pilin sama ala. kon olin ona li nasa tawa kulupu suli. jan mute pi kulupu suli li pilin ike tawa ona. taso, pilin ni li suli ala. kon pi jan ali li pona.
- ↑ nimi “waleja” li sama nimi “sona suli”
