...Вачода шись пэерць ломатнень эса мезь ланкска изь ван...
Кулось Тюлэйнь аляц, кулось и мамац. Лиссь сон сисем нежеса нежетьф куднястонза, да тусь велетнень ланга шотонц каннема...
Сембэ козэ шиц соннь тэни — алянц шумбзон[1] кедняста стаф так‘яц[2] и атянц (деданц) шнаса арнофт ташта каренза...
Якась Тюлэй велетнень ланга, да кочкась сускомнят прянь трямос.
Лангозонза щаф тафшта суманнэ — эхэрь панкс лоскоцта ащи — аш фкавок кемэ сюренэ эсонза. Пильксонза атянц карьнза, прясна — кода шура сюфтепт, а кувалмосна сюмашкат. Курксна келихть, лебонь пингста пэшкодихть, нльнэ аф канневихть. Щамоц ланксонза содпотмоса, нльни пиндолды — станэ вадямсь сотты. Шэерец ащи стяда, кода щетона. Пряц кунара ни апак пест. Ситнэ прясонза лакайхть тов и сей, кода унжат.
Лоткась марямода ёжоц ситнень эзда. Машць ёжоц прэ кеденц: аф марясы ни, кода ситнэ сускихть эсонза. Шамац содпотмоса, а сельмонянза, кода пачк няи ожнат пиндолдыхть.
Пачкоць Пичелой велети. Лоткась кить кучкась, кеподезя соду кэдац шёвонезнза и ангордазэ шёвонь лотконянц.
