Nunod dö kongef kilid volapükanas belgänik

Balüdelo, zülul 20^id.

Düp 10 ¹/₂ gödela ezitom in Gent lasam manifölik vpanas (zi 50) se plovins difik läna e pösods (no volapükans) zi 80, bevü kels läds anik - läsoms lasami.

Söl De Hoon, bisiedel vpa-kluba de Gent edamanifom kongefi e vekömom kongefalis valik e lepato vpanis foginik.

Söl Rosseau de Gent pükom nedäniko, lonedo e kleiliko dö füdet nitedik Vpa. Täno bisiedel egivom vödi söle Brees de Antwerpen, kel elilädom poedoti lejönik pepoedöl fa om ä penemöl « Stryderslied »'(Komipelas kanit) in kel balom Flanäna e Walänans^[1] (pops tel Belgäna) dub Volapük.

Pozendelo, düp 3^id lasam nemamiföfik ezitom. Söl Renier, cif vpa-kluba de Antwerpen, bisiedom lasami e givom nunodi dö muf vpa in Belgän e dö stad käda komitefa zenodik. Statuds valemik pebepükoms lonedo e pemenodoms. Volapükans mödik pükoms dö meds al pakön e födön vpi - Söl De Hoon efomom ployegi givön tidüpis maniföfik e glatik in Bruxelles, al fünön us volapükaklubi - söl votik penom in pened alik al selän spodales okik sepeti sembal i volapüko, al nitedön in pük at spodali omik - söl votik oletom bükön canadiseini e komedami i volapüko - söl nog votik oletom bükön su kalots omik ed i su zülags omik das spodom volapüko, e l.

Okongef ozitom oyelo in Bruxelles glezif Belgäna.

NOETS. (Vükifonät)

1. Bükapök; pla: Flanänanis e Walänanis.

Se Nunal nulik 1891, Nüm: 4, Pad: 20.