Men
Nol nulik, penemöl Morfologia valemik, tidom das sibinom te lesamäl bal plo ked lölik binelas; golöl sis men al nimafs votik, sis ats al böds, sis ats al sneks, sis ats al vums, lesamäl ot sibinom lai. Kop valikas labom löpo virabomis e kapabomi. Täno, mödiküns laboms zu limis tel petanöl stame, e nogo votikis tel petanöl basinabome. Also, tefü bomem, men binom nim äs lep, gil e frog.
Binos otos tefü nogans votik: rüd stomägamik binom sümik lä men e nims; stomäg mena, stomäg doga citoms feleigöl omis; lad bofikas pafomom dub ninvagugs fol dunöl sümo; lueg mena binom äs ut cuka u smakuna; fino nevamid jevala, xola, doga u mena binom vivot sümik.
Blud menik e ut virabomela votik difoms nemödiküno: bofiks laboms glöbilis ledik svimöl in serum nemödo kölik ko fom e kosiadam sümik sodas men sembal, ti deilöl lenu odenulifom me ninjedam in veins okik sa blud jipa u smakuna.
Blefo, boms, lab, luegs, foab, stomäg, nevamids, nevs, glans, blud, e. l. sümoms plo ked lölik nimas. Yed, dif bevü men e klokod binom gletikum ka ut bevü men e dog; ab dif binom smalikum bevü men e klokod ka ut bevü klokod e pab.
Kludo, sibinels valik fomoms kuladiko keti nebevüspadik, keli nenol obas dö foms penösöl u edepuböl nedalom pakapälön fa obs.
Fälo, miädam bevü regam nimavik, e ut glofavik binom vemo smalik e bo nonik, as sam; mikrobs picedoms jünu as nimils; ab, segun teor nulik söla Pasteur, paleodoms anu fa nolal mäkabik at in regam glofas, do binoms levemo mufik e jinöl senik.
Liedö! Men lifom e deilom äs nims votik, e vedom poso funulüd vumas patik, pemotöl se nögs sökas patik onögöl ovü sep mena äso ovü sebam jevala eslidöl.
Eko tikads lügik, ab kelis no kanon vitön!
Men difom ye de nims votik tefü zebüm omik vätikum e liegikum dubü ziflekams dibik, mödik e kompligik ka ut nima sembal; ab natavel cedom atosi nesätik, do lesagom das men lebalik labom kapäli, sieni südlik e lisäli, nevilom täno dalön kladami dö “ Regam menik „. - Ibo, ifi men mekom fili, vivom klotis, kötom stonis e boadi, kipom vafis, nafom su mel ed in lut, e plagm klubami, blibom deno nim, ab ko kapäl löpik: No li-tuvon lä fums noganami bolitik nepesevik foätikes Patagonäna? Fälo, in ked lölik menas tuvon lüenis valik kapäla menik. - Kalad patikÜn menade binom Pük, danü kel, kanobs lovegivön ciles obsik mostepis pebefulöl fa obs, fomön dölis valikodik; sükön kodis dinas, meditön valikosi zümöl obis, fino kludön tikavo ss pesevikos jü inü nepesevikos: eko dub kis men pejafom löpikün nimas; votiks at kanoms manifädön gäli, döli, zuni, nesufadi, dledi e löfi te me tons neflegik, e dunoms, sa mostepi nonik, lai sümiko segun bid alik omas. - Zu, stud pükas blöfom das kapäl menik binom leveliko lefulämik, e das zivet paimafom dub xäm vödabukas liegik e nomas benotonik gudikün lä alim popas. - Li-zesüdos sagön das ülpük menik edifom de luvoks nimas? - Obs, Yulopels, kels elapinobs balvoto al fomön pükis lomik obas, klödobs fikulo das Hindustänapük, Malayopük u Malagasipük binoms pÜks nolik; e deno benoton kiom a. s. ko pük Madegajänik in Madagaskarän! - Mosteps valnik nolas eigivoms motöfi vödes nulik meköl zesüdik püki bal bevünetik, äso Descartes e Leibnitz ilevipoms: pük glikik eblünom jÜnu läpoli bundanik. Anu, läbö! Nolal, söl J. M. Schleyer, in Konstanz lenlak, efulom gäpi. - Datuval, lemasel e cifal obas, egivom Volapüki omik al baladön kapälis valik su tal!
Kludob das Men evedom jafad balid binelas vola.
Me volapük Menad oixänom!
- La Rochelle (Flent).
Se Volapükabled Tälik 1888, Nüm: 8, Pads: 63-64, Nüm: 9, Pad: 72.