Libro de Mormon - Mormon - Capitulo 4
Le guerra e le massacro continua - le iniques castiga le iniques - prevale un perversitate plus grande que antea in tote Israel – feminas e infantes es sacrificate al idolos - le Lamanitas comencia a exterminar le Nephitas. Circa 363-375 d.C.
Mormon 4:1 e adveniva in le tres centesimo sexantesimo-tertie anno que le Nephitas sortiva del pais de Desolation pro vader a combatter contra le Lamanitas.
Mormon 4:2 E adveniva que le armeas nephite esseva repellite retro verso le pais de Desolation. E dum illes esseva ancora fatigate, un armea fresc de Lamanitas les attaccava; e habeva un violente battalia, de modo que le Lamanitas prendeva possession del citate de Desolation, e illes occideva multe Nephitas e illes faceva multe prisioneros.
Mormon 4:3 E le restantes fugiva e se univa al habitantes del citate de Teancum. Ora, le citate de Teancum esseva situate supra le confines, juxta le costa; e esseva anque vicin al citate de Desolation.
Mormon 4:4 E le Nephitas comenciava a esser battite perque illes habeva marchate contra le Lamanitas; perque, si non esseva per isto, le Lamanitas non haberea habite necun poter super illes.
Mormon 4:5 Ma le judicios de Deo veniva supra le perverses; e es per medio del iniques que le iniques es castigate, perque es le iniques que incita le corde del filios del homines a disperger sanguine.
Mormon 4:6 e adveniva que le Lamanitas faceva preparativos pro venir contra le citate de Teancum.
Mormon 4:7 E adveniva que, in le tres centesimo sexantesimo-quarte anno, le Lamanitas marchava contra le citate de Teancum, pro poter prender possession anque del citate de Teancum.
Mormon 4:8 E adveniva que illes esseva repellite e expellite per le Nephitas. E quando le Nephitas videva de haber expellite le Lamanitas, illes se vantava de nove de lor proprie fortia; e con lor fortias illes avantiava e reprendeva possession del citate de Desolation.
Mormon 4:9 e ora tote iste cosas eveniva, e habeva milles de mortos de ambe le partes, sia inter le Nephitas que inter le Lamanitas.
Mormon 4:10 E adveniva que habeva passate le tres centesimo sexantesimo-sexte anno, e le Lamanitas veniva de nove a combatter contra le Nephitas; e totevia le Nephitas non se repentiva del mal que illes habeva facite, ma illes persisteva continuemente in lor perversitate.
Mormon 4:11 e es impossibile al lingua describer, o per le homine scriber un perfecte description del horribile scena de sanguine e de carnage que habeva inter le populo, sia inter le Nephitas que inter le Lamanitas; e omne corde esseva indurate, e illes se delectava in disperger continuemente le sanguine.
Mormon 4:12 E non habeva jammais habite un perversitate assi grande inter tote le filios de Lehi, ni inter tote le casa de Israel, secundo le parolas del Senior, como eveniva inter iste populo.
Mormon 4:13 e adveniva que le Lamanitas prendeva possession del citate de Desolation, e isto perque lor numero superava le numero del Nephitas.
Mormon 4:14 E le Lamanitas marchava anque contra le citate de Teancum, e illes expelleva le habitantes, e prendeva multe prisioneros, sia feminas que infantes; e les offereva como sacrificio a lor idolos.
Mormon 4:15 E adveniva que in le tres centesimo sexantesimo-septime anno le Nephitas, essente incholerisate perque le Lamanitas habeva sacrificate lor feminas e lor infantes, vadeva contra le Lamanitas con immense ira, de modo que illes batteva de nove le Lamanitas e les expelleva foras de lor terras.
Mormon 4:16 E le Lamanitas non veniva de nove contra le Nephitas usque al tres centesimo septantesimo-quinte anno.
Mormon 4:17 E in celle anno illes descendeva contra le Nephitas con tote lor fortias e illes non se poteva contar, a causa del grande numero.
Mormon 4:18 E de celle tempore in avante le Nephitas non obteneva plus poter supra le Lamanitas, ma illes comenciava a esser eliminate per le Lamanitas como le rore ante le sol.
Mormon 4:19 E adveniva que le Lamanitas descendeva contra le citate de Desolation; e un battalia violentissime esseva combattite in le pais de Desolation, in lo qual le Nephitas esseva vincite.
Mormon 4:20 e le Nephitas fugiva de nove ante le inimico e illes veniva al citate de Boaz; e ibi illes resisteva contra le Lamanitas con immense corage, de modo que le Lamanitas non les vinceva usque illes veniva ancora per le secunde vice.
Mormon 4:21 E quando le Lamanitas veniva per le secunde vice le Nephitas esseva expellite e massacrate con un immense carnage; e lor feminas e lor infantes esseva de nove sacrificate al idolos.
Mormon 4:22 E adveniva que le Nephitas fugiva de nove, prendente con se tote le habitantes, sia del citate que del burgos.
Mormon 4:23 Alora io, Mormon, al vider que le Lamanitas stava pro subjugar tote le pais, io vadeva dunque al collina de Shim e prendeva tote le registros que Ammaron habeva occultate pro le Senior.
Capitulos:
Libros:
Intro 1Nephi 2Nephi Jacob Enos Jarom Omni Parolas Mosiah Alma Helaman 3Nephi 4Nephi Mormon Ether Moroni