Libre de Memorias/1385
| ← 1384 | 1385 Libre de Memorias |
1386 → |
L'an MCCCLXXXV foron Cossols,
- Mesie Ramon Seguie, avocat, per Taulas.
- Maystre Peyre Fabre, per Notaris.
- Senhor Brenguie Andrau, per Mazeliers.
- Senhor Ramon Emenc, per Monies.
- Senhor Jacme Lombes, per Orgies.
Foron Clavaris.
- Maystre Pons Trebes, per Notaris.
- Senhor Daude Creysieu, per Fabres.
Feron de talha aquel an un denier per lbr.
Item per testa dome, IIII gros.
Pus per testa de dona e denfan pupil, II gros.
Pus una autra talha per lbr., II deniers.
Pus per testa, aysi coma dessus.
Foron levayres de Bans.
- Pons Floyra, per Taulas.
- Guilhem Rigaut per Mazel.
- Johan Campanha, per Monies.
Foron Carrayries.
- Ymbert Aynart, per Taulas.
- Guilhem Miquel, per Orgies.
- Maystre Olivie Paulinha, per Notaris.
- Esteve Gautie, per Molinies.
Foron Caritadies.
- Maystre Sicart Boquas, per Notaris.
- Pons Videl, per Mazelies.
- Symon de Gaholhiac, per Orgies.
Maystre Peyre Fabre moric estan Cossol per Notaris.
Lan dessus dig, mossenhor lo duc de Berry, que era adonx en la viela de Bezes, va mandar en un rotlle alcus rix homes de la dicha viela, que li prestesso IIII melia franx: et aquels rix homes sen van anar al cossolat, et van ordenar que tot home que pogues prestar, que prestes, et presteron li los IIII melia franx.
Pus donero los sobre ditz senhors Cossols de Bezes, a mossenhor de Berry II concas dargent, que avian dample, II palmps e mieg, fachas an formas de damas.
Item may, li doneron e li presteron los ditz senhors Cossols II potz dargent dauratz grantz, an dos brotz, e portavo davan un escut, fach a las armas de mossenhor lo duc.
Et peset tot LXXX marx dargent, de que paguet la viela de Bezes mil franx en Avinho.
Aquel an mezeis dessus dig, se bayla a pres fach la fon del mercat de la mayo del tor, entro lo portal de las sors Menos, a frayre B. Maystre, de lordre des Prezicados del coven de Clarmon, que pres de CCCLXX franx. Mays non feron lur pro, que tot quan fec, no valc res. Pres ne carta maystre R. Peno.
Lan dessus dig, se trenquet et cancelet la carta de lobliganssa, que era entre los senhors Cossols, e frayre B. Maystre. Quar avie adobat la fon del mercat; mais foron ne ben enganatz, que valgra mais non y aguesso toquat.
Lan dessus escrig, MCCCLXXXV a XXIII dabriel, se sagret la ymagina de la Mayre de Dieu, que es en lordre dels Carmes de Bezes, e sagret la lavesque dAlboreya [1] ques presicador.
Pus lan sobre dig, se gitet e se fec lo sen de Santa Maria Madalena de Bezes, dijous a IX de novembre.
Pus aquel an et al mes dessus dig de novembre, que era dilus XIII, se batezet lo dig sen, et batezet lo maystre Johan de Betizac, et foron aquel an obriers de la Glieya de Santa Madalena, lo senhor Peyre Fons, el senhor Johan Barrieyra, sabatie, et Johan Thomas, cordie, et Bernat ¿? del Thel, losquals feron far aquesta bona hobra.
- ↑ El bisbe d'Arborie a Sardenya.