Libre de Memorias/1364
| ← 1363 | 1364 Libre de Memorias |
1365 → |
L'an MCCCLXIIII foron Cossols
- Senhor Jacme Boto, per Taulas.
- Senhor Jacme Lombart, per Mercadies.
- Senhor Ramon Fromit, per Parayres.
- Senhor Maystre Johan de Fontaynas, per Notaris.
- Senhor Bernat Fromit, per Coyraties.
- Senhor Ramo de Puzac, per Pelicies.
- Senhor Johan Pastre, per Fusties.
Foron Clavaris.
- Senhor Peyre Vilar, per Taulas.
- Senhor Jacme Genestas, per Parayres.
- Senhor Pons Laurens, per Fusties.
Feron de talha aquel an per denier I flori e mieg.
Foron levayres de Bans.
- Senhor Andrieu Amielh, per Mercadies.
- Maystre Guilhem Boquie, per Notaris.
- Senhor Peyre Gavasto, per Coyraties.
- Senhor Bertran Pratz, per Pelicies.
Foron Carrayries.
- Guilhem Cotelier, per Taules.
- Guilhem Carle, per Mercadies.
- Ramon Sabatié, per Parayres.
- Arnaut Fromit, per Coyraties.
- Bernat Porquie, per Fusties.
Foron Caritadies.
- Mesie Esteve Ortz, per Taulas.
- Jacme Emengau.
- Maystre Berthomieu Saynier, per Notaris.
- Johan Rial, per Pelicies.
L'an sobredich fec ta gran freg, que totz los olivies moriron, ny non se troba ges de cauls, e vendie se la lieura dels cauls XV deniers.
Item l'an dessus dig fou pres lou luoc de Bederieus per alcus Engles.
Et aquel an fouc pres lo luoc de Peyriac.
Item aquel an meteis a XVI de may fouc mes seti per davan lo dich luoc de Peyriac.
An apres l'an dessus dich MCCCLXIII, fouc donada la crozada per nostre senhor lo Papa Urba contra aquels que tenian et occupavan lo dich luoc de Peyriac, et generalment contra totz aquels que raubavan, pilhavan et desapavan lo reyalme de Fransa, dont non triguet gayres de temps que totz ho la maior partida foron mortz e destrutz a mala mort.
Es a saber que l'an dessus escrig MCCCLXIIII avie en la senescalcia de Carcassona CIIII milia fuox.
Item avie en la senescalcia de Berlcayre LXX milia fuox.
Pus avie en la senescalcia de Tholosa L milia fuox.
Somma las tres senescalcias CC.XXIIII millia fuox.
L'an dessus MCCCLXIIII, mossen Guilhem Arnaut, morgue de Sant Gili, prior de Malza de lavescat d'Uzes, vendet tot quant avie a Bezes ni en lo termenal de la dicha viela, soes a saber, totz los bes que eron estats de mossen Bertran de Montpezat cavalier, a nostre senhor lo Papa Urba, adops del monestier de Sant Girina de Monpeylier, et ayso per pres de M.CCCC.llr.