La .alis. cizra je cinri zukte vi le selmacygu'e/vomo'o

by Lewis Caroll

←cimo'o

la .alis. cizra je cinri zukte vi le selmacygu'e by Lewis Caroll, translated by la .lojbangirz. vomo'o la ractu cu benji lo cmalu me la bil

mumo'o→

i me la blabi ractu noi masno bajra xruti gi'e xanka ke sruri catlu ca le nu klama kei tai le nu ry da pu cirko i abu tirna le nu ry lauble sezysku lu oi la noltroni'u i oi la noltroni'u doi dirba xance be mi doi skapi be mi doi zbikre be mi zo'u ny da mi ba catrymi'e ju'osai ijo ro mabrnfuru cu mabrnfuru i mi ko'a ma falcru li'u i la alis zi smadi le du'u ry sisku le bifpra e le blabi ke kanba gluta remei i abu noi xendo cu co'a sisku ko'a i ku'i ko'a na se viska i roda simlu le ka ba'o cenba kei ba le nu abu limna le lalxu i le barda kumfa poi vasru le blaci jubme e le cmalu vorme cu ba'o mulno canci

i baziku la ractu cu sanji la alis noi ru'u sisku ku'o gi'e fengu kixsku fi abu fe lu ue doi meri,An do ma zukte bu'u le bartu i ko ca bajra klama le zdani gi'e bevri lo gluta remei e lo bifpra mi i ko sutra li'u i la alis cu tai terpa ja'e le nu abu zi bajra fa'a le farna poi ry jarco ku'o gi'e na troci le nu ciksi le se srera be ry

i lu tu ba se spaji le nu facki le du'u mi makau du i ku'i e'e mi bevri le bifpra e lei gluta tu y va'o le nu da'i mi tolcri li'u i abu ca le nu cusku di'u cu penmi lo cnici ke cmalu zdani noi le ke'a vrogai cu se dandu lo carmi lastu tapla noi le cmene po'u lu blabi ractu li'u ba'o se ciska fi ke'a i abu nerkla secau le nu vrodarxi kei gi'e sutra le nu serti cpare kei gi'e terpa le nu penmi le ca'a me la meri,An gi'e gau barkla le zdani pu le nu tolcri le bifpra e lei gluta

i lu ua cizra sei la alis sezysku fa le nu mi selfu lo ractu i ru'a za'umai la dinas mi ba minde li'u i abu co'a se xanri loi klesi be lei cuntu be'o poi da'i fasnu i lu doi nix alis ko ca klama ti gi'e bredi le nu cadzu li'u i lu mi bazi klama doi kurji i ku'i ei mi jundi le vi kevna gi'e fanta le nu le smacu cu barkla li'u i lu ku'i ianai curmi sei la alis di'a co'e le nu la dinas cu stali le zdani va'o le nu dy co'a tai minde lei prenu li'u

i caku abu zvati lo cnici ke cmalu kumfa noi lo jubme cu lamji le canko be ke'a gi'e se cpana to du'i le abu se pacna toi lo bifpra e ji'ici cmatce ke blabi ke kanba gluta remei i abu lebna le bifpra e pa le gluta remei gi'e pu'o cliva le kumfa ca le nu catlu fa'a lo cmalu botpi noi sanli le jibni be le minra i ca le ca krefu noda by tcita fi'o jufra lu ko mi pinxe li'u i ku'i abu gacri vimcu gi'e punji by le abu ctebi i lu ju'o ca ro nu mi pinxe ja citka da kei sei abu sezysku ba'e de poi cinri cu fasnu iseki'ubo mi ba zgana le nu le vi botpi makau gasnu i a'o ti gasnu le nu mi za'ure'u banro lo barda i mi mutce le ka tatpi le nu tai cmatce li'u

i ja'a ca'a gasnu la'e di'u i go'i pu le se pacna be abu i pu le nu abu mo'u pinxe le xadba be le se botpi kei le abu stedu ca'o catke le drudi i abu bilga le nu korcu kei le nu marbi le cnebo le nu porpi i abu sutra le nu punji le botpi kei gi'e sezysku lu banzu i a'o mi co'u banro i caku mi ka'enai pagre le vorme i au mi na pu pinxe lo tai mutce li'u

i oi dukse le ka lerci kei fa le nu djica la'e di'u i abu banro gi'e za'o banro gi'e bazi bilga le nu sanli le loldi lei cidni ibazibo le canlu na banzu la'e di'u ji'asai i abu troci le nu vreta gi'e punji nu'ige lo cidni le lamji be le vorme gi le drata birka le sruri be le stedu i ku'i abu za'o banro i uo abu tolse'a lo birka pa'o le canko gi'e setca lo jamfu le danmo tubnu gi'e sezysku lu uo mi ka'enai gasnu lo bancu i mi ma ba lifri li'u

i zanfu'a la alis fa le nu le cmalu ke makfa botpi ca mulno le ka ce'u makau rinka i abu ca na banro lo bramau gi'e ku'i mutce le ka tolkufra i za'a na cumki fa le nu abuboi za'ure'u bartu le kumfa iseki'ubo abu tolgei uenai

i lu le mi zdani ti mutce zmadu le ka pluka sei la alis uu pensi i bu'u zy genai roroi zenba joi jdika ginai roroi se minde loi smacu e loi ractu i aunairu'e mi na klama fo le ractu kevna i ku'i i ku'i cizra fa le tai nu jmive i mi ja'a kucli le du'u mi makau ca'a lifri i mi ca le nu tcidu loi crida lisri cu krici le du'u lo'e tai cuntu noroi fasnu i caku mi cy midju i ei da finti lo cukta mi i ie ei go'i i ai mi ca le nu ba'o banro cu finti i ku'i mi ca ba'o banro sei abu badri jmina i ba'unai le bu'u canlu na banzu le nu banro lo bancu li'u

i lu ku'i ja'o sei la alis pensi mi ba noroi zenba le ka tolcitno i la'e di'u pluka i mi noroi tolcitno ninmu i ku'i mi roroi cilre da ei i oi aunai go'i li'u

i lu oi doi alis noi bebna sei abu sezyspuda ta'i ma do da bu'u ka'e cilre i ue le canlu ja'aru'e banzu tu'a do i noda bu'u canlu lei ve cilre cukta li'u

i abu ca'o co'e i pamai darlu lo mlana gi'e remai darlu le drata gi'e zbasu lo vajni nuncasnu le romei i ku'i ba lo mentu be li so'o abu tirna lo voksa noi bartu ku'o gi'e sisti tezu'e le nu tinzga

i lu doi meri,An doi meri,An sei le voksa cu cusku ko bevri lei mi gluta mi caku li'u ibabo tirna lo nu cmalu ke jamfu stapa lei serti i la alis djuno le du'u la ractu cu klama tezu'e le nu sisku abu i abu desku ja'e le nu le zdani cu desku i abu tolmorji le nu ge abu ca kilto la ractu le ka barda giseki'ubo noda krinu le nu terpa ry

i caku la ractu cu tolcliva le vorme gi'e troci le nu kargau vy i ku'i ki'u le nu ge ei le vrogai fa'ane'i karbi'o gi le cidni be la alis cu catke vy kei le se troci cu se fliba i la alis tirna le nu ry sezysku lu ai mi srukla gi'e nerkla fo le canko li'u

i lu na ba go'i sei la alis pensi li'u i abu denpa le nu krici le du'u tirna le nu la ractu cu cnita le canko ibazi abu jai suksa fai le nu pejgau le xance gi'e jgari le vacri i abu kavbu noda gi'eku'i tirna lo cmalu se krixa e lo nu farlu e lo porpi blaci sance gi'e nibji'i la'e di'u le du'u cumki fa le nu ry farlu lo guzme tanxe a lo simsa

ibabo lo fengu voksa to be la ractu toi co'e lu ju'i pat ju'i pat do ma zvati li'u ibabo lo voksa noi abu ke'a na pu tirna ku'o lu ju'o mi ti zvati i mi kakpa sisku lo'e plise doi banli li'u

i lu o'onai kakpa sisku lo'e plise sei la ractu cu fengu cusku i ko mi klama gi'e sidju le nu mi ba'e ti bartu li'u to sance loi drata ke porpi blaci toi

i lu pau re'i pat ta poi zvati le canko cu mo li'u

i lu ju'o ta birka doi banli li'u to py bacru zoi zoi birrrka zoi toi

i lu birka doi bebna i ma pu viska lo birka poi tai barda i ta se tisna piro le canko li'u

i lu ju'o go'i doi banli i ku'i ta ca'a birka li'u

i lu iseju noda va cuntu ta i ko ta vimcu li'u

ibabo ze'u smaji i la alis so'uroi tirna loi lauble selsku no'u mu'a lu ju'o mi na nelci doi banli i nasai go'i li'u e lu ko zukte tai le mi te minde doi tolvri li'u i uo abu rere'u pejgau le xance gi'e rere'u jgari le vacri i caku tirna re cmalu se krixa e lo porpi blaci sance drata i lu ue xokau guzme tanxe cu zvati sei la alis pensi i a'u ma bazi se zukte i le nu lacpu mi pa'o le canko zo'u au kakne i ju'o mi na djica le nu za'o stali ti li'u

i abu ze'a denpa gi'e tirna no lo za'umoi i romai tirna lo sance be lo cmalu carce xislu e so'isai voksa noi tavla kansi'u i abu snada le nu jimpe tu'a lei valsi i lu le drata serti ma zvati i ua ei mi bevri le pamei i la bil cu co'e le drata i ju'i bil ko ta ti bevri doi citno i ko ta punji le vi kojna i na go'i i puku ko ta jonsimgau i ta za'o na preja lo galtu banzu i ju'o ta ba xamgu banzu i ko na tcila jundi i ju'i bil ko jgari le vi skori i xu le drudi ba sarji i ko jundi le va kluza tapla i oi ta ca'o farlu ju'i cnita tosa'a cladu popsna toi i ma ta gasnu i ru'a la bil i ma ba cnita klama fo le danmo tubnu i mi na.e ko go'i i ai mi na go'i i la bil ba go'i i ju'i bil le selse'u do minde le nu do cnita klama fo le danmo tubnu li'u

i lu a'a eipei la bil cnita klama fo le danmo tubnu sei la alis sezysku i su'a la bil bilga le nu zukte roda i mi na basti la bil gi'u te pleji lo mutce i le vi fagzda ja'a jarki i ku'i pe'i mi ka'e tikpa milxe li'u

i abu tolse'a le jamfu le tubnu sela'u le kakne traji gi'e denpa le nu tirna lo cmalu danlu to abu na smadi le du'u danlu makau toi noi sraku je srukla ne'i le tubnu ga'une'a abu ibazi abu ca le nu sezysku lu ti me la bil li'u cu paroi kinli tikpa gi'e denpa le nu zgana le nu makau ba fasnu

i pamai abu tirna lo voksa so'imei pe lu ta mo'i me la bil li'u i remai go'i le ractu voksa pe lu ko ta jgari doi le lamji be le spati jimte i cimai go'i lo smaji i vomai go'i lo drata ke voksa kalsa pe lu ko sarju le stedu be ta i gau ko ta pinxe lo jikru i ko ta na vaxydicra i ma mo doi pendo i do ma pu lifri i ko mi'a jungau la'e di'u li'u

i romai go'i lo cmalu je ruble je lauble voksa to lu ta me la bil sei la alis pensi li'u toi pe lu mi ja'aru'e djuno i banzu ki'e i mi ca kufra iku'i mi dukse le ka jenca kei le nu jungau i mi djuno le po'o du'u da mi catke tai lo danre selkei plipe i mi tolfa'u tai tu'a lo'e tsani jakne li'u

i lu ie do ca'a go'i doi pendo sei lei drata cu cusku li'u

i lu ei mi'o jelgau le zdani sei la ractu voksa cu cusku li'u i la alis krixa serai le ka cladu kei lu ganai go'i gi mi ba je'icru la dinas do li'u

i zi smaji mulno i la alis pensi lu a'u ta ma ba zukte i ei va'o le nu prije cu vimcu le drudi li'u i bazi lo mentu be li ji'ire co'a za'ure'u ru'u muvdu i la alis tirna le nu la ractu cu cusku lu pa carcylai cu banzu le nu co'a co'e li'u

i lu pa carcylai no'u ba'e ma sei la alis pensi li'u i ku'i abu ze'u na senpi ibazi so'i cmalu bidju cu carvi pa'o le canko i su'oboi by darxi abu fo le flira i lu mi ti ba tolcfagau sei abu sezysku li'u i abu krixa lu le'o ko na za'ure'u co'e li'u i la'edi'u cupra lo drata ke smaji mulno

i la alis se spaji sanji le nu ro le bidju cu binxo lo cmalu nanba ca le nu vreta le loldi i lo carmi co'a sidbo fi le abu menli i lu le nu mi citka pa le nanba kei sei abu pensi ba ju'o rinka le nu mi cenba le ka barda i ka'enaisai brazengau mi i ja'o ju'o pe'i cmazengau mi li'u

i seki'ubo abu tunlo pa le nanba gi'e gleki le nu facki le du'u ca co'a cmaze'a i abu ca le nu cmalu banzu le nu pagre le vorme cu bajra klama le bartu be le zdani gi'e penmi lo so'imei be loi cmalu danlu joi cipni be'o noi denpa i le cmalu rebyrespa uu no'u la bil midju le romei gi'e se sarju re smacrkobaiu noi dunda lo se botpi i roda sutra fa'a la alis ca le nu abu tolcanci i ku'i abu to'o bajra serai le ka sutra kei gi'ebazi snura zvati lo denmi ricmei

i lu ei pamai sei la alis ca le nu ru'u cadzu bu'u le ricmei cu sezysku mi za'ure'u banro le mi barda i ei remai mi tolcri le melbi purdi i pe'i la'edi'u cu xagrai selpla li'u

i ju'o xamgu selpla i cnici je sampu i papo'o nabmi zo'u abu te sidbo le nu co'a co'e kei naku le cmarai ji'asai i ca le nu abu xanka catlu ru'u lei tricu kei lo cmalu ke kinli se bacru noi vi gapru le abu stedu cu gasnu le nu abu fa'aga'u sutra catlu

i lo bratce gerpanzi fa'ani'a catlu abu sepi'o loi barda je cukla kanla gi'e ruble tengau lo xance gi'e troci le nu pencu abu i lu uu doi dirba li'u se cusku la alis sepi'o lo xlura tonga i abu mutce le ka troci le nu siclu i ku'i mutce terpa le si'o gy xagji noi la'a nibli le nu gy citka abu mu'inai le nu abu xlura

i abu ja'aru'e sanji le nu abu lo cmalu grana cu lafti gi'e jarco le gerpanzi ija'ebo le gerpanzi cu plipe le vacri ro le jamfu gi'e se pluka cmoni gi'e sezre'o le garna gi'e gasnu le nu simlu le ka gunta ri ibabo la alis rivbi le nu janli kei le nu muvdu le trixe be lo barda cpinyspa i ca le nu abu tolcanci le drata mlana kei le gerpanzi za'ure'u sezre'o le grana gi'e gunro farlu seja'e le nu sutra troci le nu jgari gy ibabo la alis noi jinvi le du'u simsa lo'e nu kelci lo braxirma zi'e noi terpa lo'e nu se stapa fi le gy jamfu cu za'ure'u bajra fa'ati'a le cpinyspa i le gerpanzi co'a so'oroi ze'i gunta le grana gi'e ve'ifa'a je ve'uto'o bajra gi'e roroi rufsu bacru gi'e romai vu zutse gi'e ta'irva'u gi'e se tance le dandu be le moklu gi'e se kanla lei xadba ganlo

i le cabna cu simlu fi la alis fe le ka xamgu mapti le nu cliva iseki'ubo abu zi co'a co'e gi'e bajra co'u le nu mutce tatpi gi'e vasxu claxu e le nu le se bacru be le gerpanzi vu se sance lo ruble mutce

i lu ku'i dirba ke cmalu gerpanzi sei la alis noi surla le nu vreta lo matnyxrula kei gi'e pilno lo my pezli le nu cupra lo brife cu cusku i mi mutce nelci le nu ctuca tu loi seltra va'oda'i le nu mi mapti fi le ka barda i oi mi jibni tolmorji le nu ei mi za'ure'u banro i a'a ei mi ma zukte i ru'a ei mi citka ja pinxe da i ku'i le banli preti zo'u go'i ma li'u

i ju'o le banli preti cu me zo ma i la alis fa'aru'u catlu lei xrula e lei srasu gi'e ku'i viska noda poi simlu le ka mapti lo'e se citka ja pinxe i lo barda mledi cu zvati lo jibni be abu gi'e simsa abu le ka galtu i abu ca le nu ba'o catlu le cnita e le re mlana e le trixe be my kei cu te sidbo fi le du'u e'e catlu gi'e viska le nu makau cpana my

i abu tcena ji'u lei jamfu jipno gi'e catlu le bancu be le korbi be le mledi i lei abu kanla cu penmi lei kanla be lo barda ciftoldi noi zutse le cpana zi'e noi lei ke'a birka cu se polje zi'e noi smaji damva'u sepi'o lo clani nargile zi'e noi jundi genai abu gi no drata