La .alis. cizra je cinri zukte vi le selmacygu'e/pamo'o
| ←la .alis. cizra je cinri zukte vi le selmacygu'e | la .alis. cizra je cinri zukte vi le selmacygu'e by , translated by la .lojbangirz. pamo'o mo'ini'a le ractu kevna |
remo'o→ |
no'i la alis co'a tatpi le nu zutse le rirxe korbi re'o le mensi gi'e
zukte fi noda i abuboi so'uroi sutra zgana le cukta poi le mensi cu
tcidu i ku'i cy vasru no pixra ja nuncasnu i lu ji'a ma prali sei la
alis pensi fi lo cukta poi vasru no pixra ja nuncasnu li'u
i abu ca'o menli jdice to sekai le xagrai selka'e pe
va'o le nu le glare djedi cu rinka le nu abu lifri le nu sipydji je
bebna toi le du'u xukau le nu pluka fa le nu zbasu lo xrula linsi cu se
vamji le raktu poi nu sa'irbi'o gi'e crepu loi xrula icabo suksa fa
le nu lo blabi ractu poi xunblabi se kanla cu bajra zo'a abu
i la'e di'u no'e ba'e mutce le ka cizra ijenaiji'a la alis
jinvi le du'u ba'e mutce le ka nalfadni kei fa le nu tirna le nu
le ractu cu sezysku lu oiro'a oiro'a mi lerci li'u to baku ca le nu
abu pensi la'e di'u kei abu ri te sidbo le du'u ei ri abu cizra
i ku'i caku piro ri simlu le ka rarna toi i ku'i ca le nu le ractu
ca'a lebna lo junla le kosta daski gi'e catlu jy gi'e di'a sutra kei
la alis spaji sa'irbi'o ki'u le nu lindi pagre le abu menli fa le
si'o abu pu noroi viska lo ractu poi ponse lo kosta daski a lo junla
poi ry ke'a dy ka'e lebna i bai le nu kucli kei abu bajra pagre le foldi
gi'e jersi ry gi'e u'adai viska le nu ry canci mo'ine'i lo barda ke ractu
kevna noi cnita le spabi'u
i baziku la alis mo'ine'i jersi ry gi'e noroi pensi le du'u ta'i
ba'e makau abu ba za'ure'u bartu
i le ractu kevna cu ve'a tubnu sirji gi'e suksa nitsalpo li sono i
tai suksa ja'e le nu la alis na zifre le nu ze'iji'asai pensi le nu
sezydicra kei pu le nu abu ca'o farlu fo lo condi mutce jintyke'a
i ga le jintyke'a cu mutce le ka condi gi abu mutce le ka masno le nu farlu
i ni'ibo le temci cu mutce banzu ca le nu farlu kei le nu catlu le sruri
gi'e kucli le du'u makau bazi fasnu i pamai abu troci le nu catlu le
cnita gi'e facki le du'u abu makau klama i ku'i dukse le ka manku kei
le nu ka'e viska i remai abu catlu lei mlana be le jintyke'a gi'e facki le
du'u my culno loi se kajna tanxe ku joi loi cukta kajna i abu viska loi
cartu ku joi loi pixra vu'o noi dandu loi genxu i abu lebna lo botpi
pa le kajna ca le nu lampagre i by se tcita lu najnimre tityjdu li'u
gi'e ku'i u'anaidai kunti i abu na'e djica le nu falcru le botpi kei mu'i le
nu terpa le nu catra da iseki'ubo abu suksa le nu punji by pa le se kajna
tanxe ca le nu abu ty farlu lampagre
i lu uo sei la alis pensi mi ba lo nu farlu tai ti cu ba na'e xanka le
nu farlu fo le serti i lu ua virnu sei le lanzu tu'a mi ba jinvi li'u
i u'o mi noda cusku va'o ji'asai le nu mi farlu fi le drudi be le zdani
tosa'a la'e di'u la'a jetnu toi li'u
i mo'ini'a mo'ini'a mo'ini'a i xu le nu farlu cu noroi mulno i lu mi
kucli le du'u mi ca minli li xokau le ni farlu sei abu cladu cusku i
ia mi pu'o jibni le midju be le terdi i ka'u minli li voki'o le ni
cnita tosa'a la alis pu cilre so'o da la'e di'u le ckule i zu'u le
cabna na matrai le nu jarco le ka djuno kei kei ki'u le nu noda abu
tirna i zu'unai le nu rapsku cu xamgu abu le nu crebi'o toi i iese'i
le se minli cu jibni drani i ku'i mi kucli le du'u makau ti
stuzrlatitudi gi'e stuzrlongitudi li'u i to la alis nasai djuno le
du'u makau smuni ga zo stuzrlatitudi gi zo stuzrlongitudi i ku'i abu
jinvi le du'u melbi je banli valsi toi
i caku abuboi za'ure'u co'a co'e i lu mi kucli le du'u xukau mi ba farlu ba'e pagre le terdi i u'isai tolcanci le jbini be lei prenu poi cadzu fau le nu le stedu cu cnita i pe'i bu'u le smudukti tosa'a caku abu gleki le nu noda tirna kei ki'u le nu le valsi nasai drani sance toi i ku'i ei mi te preti le gugde le du'u makau cmene i lu pe'u doi ninmu ti nuzlo gi'i sralo tosa'a abu troci le nu krorinsa kei ca le nu tavla i ko se xanri le nu krorinsa ca le nu farlu i pe'ipei do ka'e snada toi i ny ba jinvi le du'u mi toldjuno ke cmalu nixli kei fo le nu mi te preti i ei mi na te preti i ju'ocu'i mi viska le nu ba'o ciska le cmene da li'u
i mo'ini'a mo'ini'a mo'ini'a i ka'e zukte no drata be la'e di'e iseki'ubo la alis za'ure'u co'a tavla i lu ju'o la dinas ba mutce le ka se claxu mi kei ca le cabnicte tosa'a la dinas cu mlatu toi i a'o da ba morji tu'a le dy ladru palta ca le sanmi tcika i doi dinas noi dirba mi do'u au do mi kansa le cnita i u'u no smacu cu zvati le vacri i ku'i do ka'e kavbu lo volratcu noi ka'u mutce le ka simsa lo'e smacu i ku'i a'u xu lo'e mlatu cu citka lo'e volratcu li'u i caku la alis co'a sipydji lifri gi'e di'a senva sezysku lu xu lo'e mlatu cu citka lo'e volratcu i xu lo'e mlatu cu citka lo'e volratcu li'u esu'oroibo lu xu lo'e volratcu cu citka lo'e mlatu li'u iseja'ebo na vajni mutce fa le du'u porsi makau ki'u le nu abu ka'e spuda no le re preti i abu lifri le nu pu'o sipna kei gi'e puzi co'a senva le nu abu xanjaisi'u cadzu kansa la dinas gi'e cusku lu ju'i doi dinas ko mi jungau le jetnu i xu do su'oroi citka lo volratcu li'u ca le nu suksa fa le nu abu le cpana be lo derxi be loi grana ku joi loi sudga pezli mo'u farlu
i la alis nasai se xrani gi'e zi sanli fi le jamfu gi'e catlu le gapru
noi ku'i manku mulno i crane abu fa lo drata ke clani vorme i la blabi
ractu cu za'o se viska gi'e sutra le nu litru vy i ei la alis na denpa
i abu klama tai tu'a le brife gi'e ja'aru'e snada le nu tirna le nu ry
cusku lu oi doi le mi kerlo joi zbikre do'u ca'o co'a lerci li'u i
abu jibni trixe ry ca le nu pagre le kojna iku'i ry ca na za'o se viska
i abu facki le du'u abu zvati lo clani je dziseldru kumfa noi se gusni
fi lo se linji noi dandu le drudi
i so'i vorme cu sruri le kumfa i ku'i ro vy cu stela ganlo i ca le nu
la alis ba'o litru le pamoi mlana e le drata gi'e troci tu'a ro vorme
kei abu badri cadzu bu'u le midju gi'e kucli le du'u ta'i makau abu
ba za'ure'u bartu
ibaziku abu penmi lo cmalu ke cibyseltuple jubme be lo sligu blaci i
cpana jy fa po'o lo cmatce ke solji ckiku i abuboi pamoi jinvi
le du'u cy ckiku pa le stela be lo kumfa vorme i ku'i uinaidai ga le
stela cu dukse le ka barda gi le ckiku cu dukse le ka cmalu iseju
cy ka'e kargau noboi sy i ku'i ca le remoi abu penmi lo dizlo murta noi
abu na pu sanji ke'a i my murta lo cmalu vorme noi mitre li ji'ipivo i
abu troci le nu co'e le cmalu ke solji ckiku le stela i uisaidai mapti
i la alis kargau le vrogai gi'e facki le du'u vy se jersi lo cmalu vorme noi na bramau lo ratcu kevna i abu cidni sanli gi'e catlu le se vorme noi traji le ka melbi kei lei purdi poi su'oroi se viska i a'osaidai abu barkla le manku kumfa gi'e cadzu jbini lei va zdani be loi carmi xrula be'o ku joi lei va lenku jinto i ku'i abu na ka'e gregau le ji'asai stedu le vorme i lu va'o ji'asai le nu le mi stedu ka'e pagre kei sei la alis uu pensi sy tolmutce le ka se pilno secau lei mi janco i au mi ka'e se polje tai tu'a lo'e darvistci i pe'i mi ka'e go'i va'o le nu mi djuno le du'u mi co'a go'i ta'i makau li'u i lei puzi nalfadni fasnu tai so'imei ja'e le nu la alis co'a jinvi le du'u so'usai da ca'a nalcumki
i ru'adai na prali fa le nu denpa fi tu'a le cmalu vorme iseki'ubo abu xruti le jubme gi'e xadba pacna le nu facki le du'u lo drata ckiku jy cpana kei a do'anai tu'a lo cukta co javni be le nu ta'i makau polje lo prenu tai tu'a lo'e darvistci i ca le ca krefu abu facki le du'u cpana jy fa lo cmalu botpi to lu noi ju'o pu na zvati ti sei la alis cusku li'u toi i sruri le botpi cnebo fa lo pelji tcita noi lei valsi po'u lu ko mi pinxe li'u cu melbi prina ke'a sepi'o loi barda lerfu
i o'ocu'i xamgu fa le nu cusku lu ko mi pinxe li'u i ku'i la alis noi prije cu na bazi zukte la'e di'u i lu na go'i i pamai mi catlu sei abu cusku gi'e facki le du'u xukau da sinxa zo vindu li'u i abu pu tcidu so'o melbi ke cmalu lisri be loi verba poi jelca se xrani gi'e se citka loi cilce danlu gi'e lifri loi drata tolpluka ki'u le nu na morji lo'e sampu javni poi lei pendo cu ctuca ku'o no'u mu'a le nu lo'e xunre glare tunta cu jelca xrani lo'e za'o jgari be ty zi'e no'u mu'a le nu va'o lo'e nu condi mutce sraku le degji sepi'o lo dakfu kei dy ta'e ciblu cirko i abuboi noroi tolmorji le du'u le nu da dukse le ka pinxe lo se botpi be le se tcita be zo vindu cu bazi ja bazu fanza da
i ku'i le vi botpi na se tcita zo vindu iseki'ubo la alis darsi le nu vu'irga'e le selvau kei gi'e facki le nu sy pluka to je'u sy vrusi lo mixre be lo'e rutrceraso tisna ku joi lo'e sovykruji ku joi lo'e bromeli kujoi lo'e seljukpa xukre'u ku joi lo'e satmatne ku joi lo'e glare ke matne jelnanba toi i abu zi mo'u pinxe
* * * * * * *
* * * * * *
* * * * * * *
i lu ue cizra selga'e sei la alis cusku i ru'a ju'o mi se polje tai
tu'a lo'e darvistci li'u
i ca'a co'e i caku abu cenmitre li so'u remu i le abu flira cu cambi'o
seja'e le nu pensi le nu caku abu mapti le cmalu vorme le ka pagre
fi le melbi purdi i ku'i pamai abu denpa le nu zgana le du'u xukau
abu za'o brajdika i abu milxe le ka xanka la'e di'u i lu cumki fa le
nu se fanmo sei la alis sezysku le nu mi mo'u canci tai tu'a lo'e
lakyga'a fagri i mi kucli le du'u mi makau simsa va'o da'i la'e di'u
li'u i abu troci le nu se xanri le du'u lo'e lakyga'a fagri makau simsa
ba le nu le lakyga'a cu se gusydicra i abu ka'enai morji lo nu viska
lo'e tai dacti
i bazaku abu ca le nu facki le du'u no drata cu fasnu cu jdice le nu
zi klama le purdi i ku'i la alis uu ca le nu tolcliva le vorme cu facki
le du'u abu tolmorji tu'a le cmalu ke solji ckiku i ca le nu ba'o xruti
le jubme tezu'e le nu cpacu cy cu facki le du'u le ni abu galtu cu na banzu
le nu cpacu cy i abu traji troci le nu cpare pa le tuple be le jubme i
ku'i ty dukse le ka se sakli i abu uu ca le nu tatpi le nu troci cu
zutse gi'e klaku
i lu e'e noda do prali le nu tai klaku sei la alis kinli sezysku i e'u
ko cazi sisti li'u i abu ta'e sezystidi lo'e xamgu mutce to ku'i ta'enai
mapti zukte toi gi'e su'oroi tai junri sezytolzarsku ja'e lo'e nu gasnu le
nu le se klaku cu zvati le kanla i abu morji le nu paroi troci le nu darxi
le abu kerlo kei mu'i le nu abu tcica abu ca lo nu abu fapro abu le nu
kelcrkroke i le vi cizra verba cu mutce le ka nelci le nu sruma le du'u
du re prenu i lu ku'i noda mi ca prali sei la alis uu pensi le nu sruma
le du'u mi du re prenu i oi le mi ve vimcu na banzu le nu marji fi ba'e
pa se sinma prenu li'u
i bazi lo nu abu catlu cu se farna lo cmalu ke blaci tanxe noi cnita
le jubme i abu kargau ty gi'e facki lo du'u nenri ty fa lo cmalu mutce
titnanba noi bu'u ke'a lo valsi po'u lu ko mi citka li'u se morna
lo sudgrute i lu ai mi ti citka sei la alis cusku i mi va'o lo nu da'i
gau ti mi braze'a cu snada lo nu cpacu le ckiku i mi va'o lo nu da'i
gau ti mi cmaze'a cu kakne lo nu reskla ni'a le vrogai i seki'ubo mi
va'o ro fasnu cu kakne lo nu klama le purdi i mi na se vajni lo du'u
le mokau ca'a fasnu li'u
i abu citka lo spisa gi'e xanka sezysku lu fa'a ma i fa'a ma li'u gi'e
punji le xance le cpana be le stedu tezu'e le nu ganse le nu sy banro
fa'a makau i abu mutce le ka spaji le nu facki le du'u abu stali le nu
barda mintu i li'a la'edi'u ta'e fasnu ca lo'e nu citka lo titnanba i ku'i
la alis tai se tcaci le nu ba'a no na'e tolfadni cu fasnu kei ja'e
le nu simlu le ka tolzdile gi'e bebna kei fa le nu le nunjmive cu ca'o
fadni
i abu co'a co'e gi'e bazi mo'u citka le titnanba
* * * * * * *
* * * * * *
* * * * * * *