kalama sin #7
ma pi lipu Tun
tan jan Tepo
o kama pona tawa kalama sin. mi jan Tepo. tenpo kalama ni la mi kama wile e ijo tan lipu Tun. jan Pan Epe li pali e lipu ni lon tenpo sike pini mute. ona li pali e lipu la lon la ona li pali e ma, e mun, li toki e ken pi tenpo kama. tenpo kama suli la seme li lon? ken la jan li tawa mun ante kepeken tomo tawa mun lon tenpo kama suli. ni la ma seme li lon lipu ni? kulupu jan seme li lon ma lon tenpo? lipu li toki mute e ma. jan kin li lon ma, tenpo la lipu li toki e pali pi jan ni. taso ni li musi mute ala tawa mi. musi pi lipu ni li ni: ma li seme li nasa seme li pona seme li wawa seme li musi seme? seme li lon ma? ni la kalama ni la mi wile toki e ma Tun, e ma pi lipu Tun.
ni la seme li lon ma pi lipu Tun? ma ni li tenpo kama suli. kin la suli la ona li ma wan taso ala. ni li tenpo kama suli la jan li ken tawa mun ante la ma mute li lon. jan li lon mun ante la ni li ma ante. ma wan ni li ma Tun, nimi lipu li tan ni. taso ma mute ante kin li lon.
ijo mute li ante lon tenpo kama suli. mi wile toki e ni lon nanpa wan: nasin utala li sin. tenpo mute la ilo utala sin li sin e nasin utala, ni li musi tawa mi. ma pi lipu Tun la jan li kama sona pali e ilo awen. ilo awen li pali seme? ona li pana e selo sin tawa sina.. ilo moli mute li kepeken kiwen lili. utala la ona li pana e kiwen lili tawa sina kepeken wawa mute kepeken tenpo lili. jan utala li ken lon weka li ken pana e kiwen tan weka. taso selo awen li lon la jan li kepeken ilo moli ni tawa sina la kiwen lili ni li kama tawa selo awen kepeken wawa la, selo li pini e tawa ijo. kiwen li ken ala ike e sina. ni li pona. selo awen li pali sama ni: ijo li tawa kepeken wawa kepeken tenpo lili la ona li ken ala tawa insa selo li ken ala ike. ken la sina pilin e ni: ijo li tawa kepeken wawa suli suli a la ona li ken pakala e selo awen. taso ni li ken ala. selo li ken weka e ijo pi wawa ale. ijo pi wawa lili taso li ken tawa insa selo. ni la jan li wile ike e sina la kiwen utala o tawa kepeken tenpo suli. jan o tawa poka sina o kepeken ilo kipisi lili. ona li kama lon poka sina la ona li tawa e ilo kepeken tenpo suli kepeken wawa lili la ona li ken tawa insa selo li ken ike e sina. ni li nasin utala sin! ni li musi. lipu ante pi tenpo kama la ilo moli li pana e ijo utala tan weka tawa jan. ni la jan utala li ken lon weka. ona li lon poka ala. taso lipu ni la jan utala o poka o utala kepeken luka.
lon la ilo utala weka sin li lon kin. ona li pana e linja suno. linja suno sama li lon lon lon. ona li ken tan palisa lili, sina luka e palisa la linja suno li kama tan ona. linja li tawa sinpin la ona li kama sike loje lon sinpin. ken la sina toki tawa kulupu. sina pana e sitelen e nimi tawa sinpin. sina ken kepeken linja suno lon luka li ken suno e ijo e nimi lon sitelen. linja ni li ken musi a tawa soweli. ilo utala ni li sama, li linja suno sama. taso ona li wawa mute. linja suno li tawa ijo la ona li seli mute e ijo li pakala mute e ijo. ona li wawa. taso, taso. jan li kepeken selo awen la linja suno li tawa selo awen la pakala suli pi seli suli pi wawa suli li kama li moli e sina e jan ale poka. jan li kepeken linja suno, jan ni li moli. jan li kepeken selo awen, jan ni li moli. jan ale poka kin li moli. ni la jan ala li kepeken linja suno ni. a a a. utala mute la ilo ni li lon ala. ni li musi tawa mi. nasin utala li sin.
ijo ante namako pi ma ni li ni: tenpo pini suli la n n. ma ni li lon tenpo kama suli. taso, tenpo pini tawa tenpo kama suli ni, la, jan li kama pali e ilo sona pi wawa mute. ilo li ken pali sama jan. lawa ona li ken pali sama jan, li ken sona sona sama jan. ona li pali e ilo tan ni: ona li wile ala pali e ijo la ilo li ken pali e ijo. ilo li pali e wile jan. taso ilo li wawa li sona mute la wawa ilo li suli tawa wawa jan. tenpo kama la ilo li kama wile anpa e jan. jan li kama pali e wile ilo. a a a. ni li ante. ni li kama la kulupu lili li kama weka tan lawa ilo li kulupu li kama utala wawa e ilo jan ale li kama moli e ilo. jan li sewi sin. ni li pini la ona li toki wawa e wile ni: ilo jan o lon ala. o pali ala e ilo sama jan. ni la ilo ale li weka. jan ala li pali e ilo jan lon tenpo kama. ilo mute li ilo jan ala, taso ona li pali nanpa wawa la ona li sama lili tawa ilo jan la ona kin li weka. ken la sina wile sona e ni: jan utala li toki e wile pi weka ilo, taso ken la tenpo kama la jan ni li moli, wile ona li kama weka, tan tawa tenpo. tan seme la jan li awen pali ala e ilo lon tenpo kama? ni li tan ni: jan utala ni li toki e ni: utala ni li sewi. mi utala tan wile sewi. sewi li wile e weka ilo. ni la tenpo kama la sewi li lon tawa sina la sina o pali ala e ilo. ni li nasa. lon la wile li kama tan sewi ala. sewi li lon ala lon lipu. tenpo ala la sewi li kama li kama toki e ijo. taso jan mute a li pilin e ni: sewi li lon, li wile wawa e ijo. tenpo mute la wile ni li tan jan wawa tan jan suli tan jan mani tan sewi ala a. ni li nasin.
ni la, tan weka ilo la, jan o wawa. tenpo suli la jan li wile ala pali e ijo la, ilo li pali e ni. taso ilo li kama weka la ni li kama ken ala. jan li wawa ala. pali wawa ale li tan ilo la jan li ken ala pali e ijo wawa. ni la ilo li weka la jan o kama wawa. ni la nasin mute pi jan wawa li kama lon. kulupu wan li pali e nasin Menta. nasin ni la jan li ken pali wawa kepeken nanpa, li ken pali nanpa mute kepeken lawa taso, li ken pali sama kepeken sona mute. ona li ken wan e sona lili mute li ken sona e ijo suli tan sona ni. ni li wawa mute. kepeken ni la ona li ken toki e ni: tenpo kama la ni li kama. sona ante mi li lon la ijo ni li kama lon lon tenpo kama.
ni li kulupu wan. mi wile toki e kulupu ante: ona li kulupu pi tawa mun, li lawa e tomo tawa mun. tomo tawa mun li kepeken nasin seme? lon la mi sona ala. lipu li toki mute ala e ni. taso ona li toki e ni: lon la tomo tawa mun li tawa ala. ona li awen lon ma wan, lon sewi mun, li ante e lon. kepeken ni la tomo tawa suli li tawa tan ma wan tawa ma ante kepeken tenpo ala. taso tawa ni li wile e pali nanpa mute a. sina wile tawa nasa ala, li wile tawa mun wan, la ilo pi ante lon li wile e nanpa pona. ilo jan li weka la ona li ken ala pali e ni, la jan o kama o ken pali e pali nanpa ni. jan pi nasin Menta li wawa, taso ona li wawa ni ala. pali ni li wile e wawa mute A.
ni la seme li lawa e tomo tawa mun? jan ni li lon kulupu pi tawa mun. ona li wawa kepeken nasin nasa: ona li moku e ko wawa nasa. ko li tawa lawa ona li wawa e pali ona. mi o toki suli e ko ni. nimi ona li "namako". ona li suli mute tawa ma tawa lipu. taso ni li nasa: jan li sona ala pali e ona. nasin wan taso la jan li ken jo e ona: ona li alasa e ona lon ma Tun. ma Tun taso la namako li lon. ona li lon ma ante ala.
sina moku e ko nasa ni la ona li wawa e sina. taso sina moku mute lon tenpo suli, li pini moku, la sina moli. ko nasa lon li sama, sina moku e ona la ona li ken pana e pilin pona tawa sina. ona li pana ala e wawa lon tenpo mute. taso sama la sina moku pi mute ike li pini moku la sina moli. namako pi ma Tun la sina moku e ni la ni li wawa e jan. jan li jo e mani mute la tenpo mute la ona li wile moku lili e namako. ona li moku lili la namako li wawa e sijelo ona. ona li ken awen lon tenpo sike ale ale ale. lon tenpo suli sama ni. ni li pona tawa ona. jan mani li wile e ni. kulupu pi tawa mun la, jan ni li moku mute a e namako. ni li wawa mute e lawa ona la ona li ken pali nanpa wawa li ken tawa mun. nasin ni taso la jan li ken tawa mun. namako li lon ala la jan li ken ala tawa mun ante. ni li nasa a. tan ni la namako li suli mute a tawa ma tawa lipu. ma Tun kin li suli mute, li nimi lipu.
mi wile toki e kulupu ante pi jan wawa. ni li kulupu Pene Sesewi. ona li kulupu li kepeken nasin Pene Sesewi. nasin la ona ale li meli. tan seme? mi sona pona ala. taso ona ale li meli. ilo li weka la ona li kama kulupu li kama wile wawa mute e sijelo ona e lawa ona. lawa ona li ken lawa pi pona mute e sijelo. o lukin e luka sina. palisa luka li lon luka. sina tawa e palisa nanpa luka la, ken suli la palisa ante poka li tawa kin. taso jan pi nasin Pene Sesewi la, ona li ken lawa pi pona mute e sijelo li ken tawa e palisa luka wan taso. mi lukin e palisa luka ni mi la, kipisi tu wan li lon ona. mi ken ala tawa e kipisi wan taso. taso jan pi nasin Pene Sesewi li ken lawa pona e sijelo li ken pali e ni. ona li wawa mute.
kin la lukin ona li wawa. kute ona li wawa. ona li lukin e jan la tenpo mute la kepeken lukin wawa la ona li ken sona e ni: jan ni li pilin e seme? jan ni li toki insa e seme? jan li toki la ona li ken sona e ni: jan ni li toki ala toki e lon? toki ona li lon ala lon? kepeken lukin wawa kepeken kute wawa kepeken sijelo wawa la uta kin li ken wawa mute, sama ni: ona li toki e wile kepeken uta kepeken wawa uta la jan kute li ken ala pali ala e wile ona. ona li toki e wile kepeken wawa uta la jan kute li pali e wile ni kepeken lawa ala. ona li kute li pali taso.
wawa ante kin la ona li ken utala pi pona mute kepeken wawa sijelo ona. ken la mi kama utala e jan pi nasin ni. mi kama pana e luka mi tawa ona tan utala la sijelo ona li pilin e ni li utala e mi li ken moli e mi kepeken tenpo ala, kepeken lawa ala. sijelo taso li sona e utala kama li ken pali tan ni. ona li wawa mute. kin la ona li ken pali wawa kepeken lawa kepeken sona lon lawa. ni li sama nasin Menta. sama lili. ni kin li wawa ona. pali sona ona li pona mute ala tawa nasin Menta. taso ona li pona mute. taso wawa ale ni li suli mute ala tawa wawa ni: ona li moku mute e namako la ni li wawa e ken ona li pana e ken sin ni: ona li ken lukin e tenpo pini. tenpo pini ale ala. taso ona li ken lukin e ni: mama ona li pali e seme lon tenpo pini. mama mama li pali e seme. mama mama mama li pali e seme. ona li ken sona e pali mama ale tan tenpo suli pini. ni li kepeken namaka la ona li wile mute e namako. kin la ona li ken pana e sona mama ale tawa jan ante pi nasin Pene Sesewi. ni kin li kepeken namako. nasin seme la ona li pana? mi sona pona ala. taso ona li ken pana e sona mama ale tawa jan ante kulupu. ni la jan ale kulupu li sona mama sama li sona e ale tan tenpo pini tan mama ale pi jan kulupu ale. kepeken sona ni la ona li ken sona e ni: nasin seme li pona tawa ijo lon tenpo pini? nasin seme li ike? kepeken sona ni la ona li ken pali pona lon tenpo lon. ni li wawa suli ona.
mi toki e kulupu suli. mi o kama toki e ma Tun. namako li tan seme a? lipu la jan mute li sona ala e ni. namako li tan ma Tun, taso ona li sona ala e ni: ona li tan seme pi ma Tun? seme li lon ma Tun li pali e ni? ona li kama taso lon selo ma. jan li alasa e namako lon ma. ni li nasa mute. mi toki ala e ni lon tenpo pini: ma Tun la telo ala a li lon. n telo li ala ala, taso telo li weka mute lon ma mute. ale pi ma Tun la telo lili taso li lon. tan weka telo la, selo ale pi ma Tun li ko, sama ma pi telo ala pi ma mi. ma li ko jelo pi telo ala. jan li wile awen mute e telo ona. nasin li sama ni: jan li pana e telo tan sijelo lon tenpo mute. ona li seli la ona li pana e telo telo ni li lete e ona. sina wile moli ala lon ma Tun la len ilo li lon. sijelo li pana e telo la len li moku e telo, li pona e telo li weka e jaki, li pana sin e telo tawa uta sina. ni la sina moku e telo sina lon tenpo ale. telo li awen lon sina li weka ala. nasin ni la sina ken moli ala.
kin la, akesi suli li lon. akesi li n sama lili tawa pipi linja. taso pipi li lili. akesi li suli mute a. tawa jan la ona li suli. tawa tomo la ona li suli mute kin. ona li suli a. akesi li tawa lon anpa ko, lon anpa ma, lon tenpo suli, taso ilo li kama alasa e namako—ilo seme? jan li alasa e namako kepeken ilo. ona li lukin e namako lon ma la ona li pana e ilo. ilo li moku e ko mute tan ma li weka e ko li jo e namako tan ni. tenpo ale la akesi li kute e ilo ni li tawa ni li wile moku e ilo. ona li suli mute li ken moku e ilo. ni li kama la, tomo tawa waso li kama li jo e ilo li sewi e ilo li pana e ona tawa awen. ni la ilo li weka ala tawa insa akesi. ni li nasin pi alasa namako. ona li nasa a. nasin li pali suli la namako li mani mute a. a a a. jan pi mani mute taso li ken jo e ni.
awen la jan mute li sona ala e ni: namako li tan seme. taso o sona e ni. kulupu Pemen li lon ma Tun. ona li lon tenpo suli a, la ona li sona e nasin ma. ona li sona e ni: namako li tan seme? taso kulupu ni li len. kulupu li awen lon anpa ma. jan lawa li sona ala e ni: kulupu Pemen li suli li wawa. ona li awen taso lon anpa ma. lawa li ike mute tawa kulupu, jan lawa suli li wile e mani taso e namako taso. ike a.
sina lukin e lipu la tenpo la sina kama sona e nasin namako, e nasin ma. taso mi wile ala toki e ni lon kalama ni. sina lukin ala e lipu li wile lukin e lipu lon tenpo kama la, sina ken kama sona e nasin tan lipu. mi wile ala e ni: mi pana e sona lon kalama la lipu li kama musi ala. ni la mi o pini e toki lon tenpo ni. tenpo ni la sina sona e ijo suli pi ma Tun. sina sona e ijo suli tan ma pi lipu Tun.
ni la,,tenpo toki ni li pini. mi toki mute ala e jan. mi toki mute e ma, e kulupu, taso mi toki ala e ni: jan li pali e seme, tan ma, lon ma, lon lipu. ken la kalama kama la mi kama toki e ni. ken la ni li kama ala, taso, n. ni li kamala pona lon tenpo lon. ken la sina kute e kalama ni la sina kama wile lukin e lipu. ni li pona tawa mi. mi la lipu li pona. lipu li toki mute e nasin jan e nasin ma e nasin. tenpo mute la ona li toki e nasin ike e ike nasin. ona li toki ala toki e nasin pona? ken la ala. ken la ona li toki e nasin ike taso. tan ni la sina ken kama sona e ni: nasin ni li ike. o kepeken ala. o pali ala e ni. a a a. ni la lipu li pona.
ni la pilin mi la tenpo kalama ni li pini. sina kute la sina pona.a. o awen pona.
