kalama sin #12
ike li ken ike ala
tan monsuta pi soweli mun
toki, jan ale pi toki pona o! mi monsuta pi soweli mun lon kalama sin! a!
taso, o awen. ken la kalama ni li monsuta e sina. tenpo kama lili la mi pana e pilin mi tawa sina. ni li len ala. ni li nasin mi. kepeken ona la mi utala pona e pilin ike ale. o awen anu o weka tan ni: mi wile ala anpa e sina.
[toki ala lili]
a! sina awen! pona. nasin en toki mi li ni: ike li ken ike ala. a! sina ken toki e ni: sina nasa, monsuta pi soweli mun o! taso, o kute: ken la sina kalama e pilin ike sina li ken weka e ona. kin la ni ken misikeke e sina. sina awen e pilin ike insa sina la pilin li kama suli! pilin li suli mute la utala pilin li pali pi suli mute.
pilin ike li ken kama tan nasin mute. ken la sina jo ala e jan pona lon poka sina tan ni: ona li weka e sina. ona li pakala e sina. ona li toki ala tawa sina. tenpo li tawa la jan li ante. pilin ni li ken anpa e jan ale. ken la jan olin sina li ante kin. kin la jan mama sina. kin la jan poka sina ale. ni li ike. ni li pakala suli e pilin sina. sina wile tawa tenpo pini. lon li ni: sina ken ala.
tenpo pimeja la sina pana e telo tan oko sina. sina len kepeken len lape sina lon tomo lape. sina wile weka e pilin ike la sina lukin e sitelen tawa lon ilo Jutu. sina sitelen e ijo. sina kama sona e toki e nasin nanpa e pali. taso, pilin li weka ala lon tenpo ale. apeja en monsuta li lon insa lawa sina. tan ni la, sina ken ala lape.
pilin sina la sina pakala e ale. lawa sina en sike walo pipi li kama sama. sina weka e nasin sina. sina toki tawa sina e ni: "a! lawa en sona mi li wawa ala! lawa mi li pakala ala pakala? mi jan ike anu seme? mi ken ala pali e ijo mute. mi pali e ijo la mi pakala e ona! mi wawa ala lon tomo pi kama sona. mi wawa ala tawa jan ante! suli la mi wawa ala tawa mi".
lon. sona ni li ken lon. pilin ni li seli li pakala e kon e lawa sina. o pilin e pilin ale. ni li pona. ona li ken wawa e sina tan ni: tenpo ni la sina sona e jaki sina. tan sona la sina ante li kama wawa li kama kiwen. tan ni la, ike li ken ike ala. taso, o awen ala pilin e ona taso! o kama wawa! sina jan taso la sina taso ken kama wawa. pali nanpa wan li ni: o pona e lawa e kon e pilin sina. o kepeken e misikeke pilin. misikeke ni li olin. li olin sina tawa sina. tenpo kama la sina ken jo e jan pona e jan olin e soweli suwi e pali esun. tenpo ni la ni li suli ala. sina suli. sina suli tawa sina. o awen ala. o pali e ale. o utala wawa e pilin ike. o sona e ni: sina lon anpa la sina ken pilin e sewi lon tenpo kama! pilin li awen lon tenpo ale ala. o kute e ni: ante lili li lili. taso ante lili mute li kama e ante suli.
wawa o tawa sina.
