Jv/Alkitab/Lukas

꧁ ꧋ꦆꦚ꧀ꦗꦶꦭ꧀꧂ 

ꦩꦶꦠꦸꦫꦸꦠ꧀ꦱꦏꦥꦔꦁ​ꦒꦶꦠ꧀ꦠꦺ ꦭꦸꦏꦱ꧀

Bab 1 2 3 4 5 6 7 8 9 10 11 12 13 14 15 16 17 18 19 20 21 22 23 24

Bab 1.

1 ꦱꦺꦢꦸꦭꦸꦂꦏꦸ​ꦡꦺꦪꦺꦴꦥ꦳ꦶꦭꦸꦱ꧀​ꦱꦶꦁ​ꦠꦏ꧀​ꦲꦗꦺꦤꦶ꧈​ꦲꦶꦏꦶ​ꦭꦪꦁ​ꦱꦁꦏ​ꦔ꧀ꦒꦺꦴꦤ꧀ꦏꦸ꧈​ꦭꦸꦏꦱ꧀꧉​ꦥꦤ꧀ꦕꦺꦤ꧀​ꦪ​ꦮꦶꦱ꧀​ꦲꦺꦤꦺꦁ​ꦮꦺꦴꦁ​ꦥꦶꦫꦁꧏ​ꦱꦶꦁ​ꦤꦸꦭꦶꦱ꧀​ꦧꦧ꧀​ꦊꦭꦏꦺꦴꦤ꧀ꧏ​ꦱꦶꦁ​ꦏꦼꦢꦢꦺꦪꦤ꧀​ꦤꦁ​ꦠꦼꦔꦲꦺ​ꦲꦮꦏꦺ​ꦢꦺꦮꦺ꧉

2 ꦏꦸꦮꦶ​ꦩꦮꦸ​ꦏꦧꦺꦃ​ꦩꦶꦠꦸꦫꦸꦠ꧀​ꦲꦺꦴꦩꦺꦴꦔꦤ꧀ꦤꦺ​ꦮꦺꦴꦁꧏ​ꦱꦶꦁ​ꦥꦢ​ꦮꦼꦫꦸꦃ​ꦢꦺꦮꦺ​ꦏꦮꦶꦠ꧀​ꦮꦶꦮꦶꦠꦤ꧀ꦤꦺ꧈​ꦠꦼꦫꦸꦱ꧀​ꦥꦢ​ꦔ꧀ꦒꦼꦭꦂꦏꦺ​ꦏꦧꦂ​ꦏꦧꦸꦔꦲꦤ꧀​ꦏꦸꦮꦶ꧉

3 ꦩꦸꦭꦤꦺ​ꦲꦏꦸ​ꦢꦺꦮꦺ​ꦪ​ꦠꦼꦫꦸꦱ꧀​ꦩꦶꦏꦶꦂ​ꦤꦸꦭꦶꦱ꧀​ꦧꦧ꧀​ꦥꦽꦏꦫ​ꦲꦶꦏꦶ​ꦏꦔ꧀ꦒꦺꦴ​ꦏꦺꦴꦮꦺ꧉​ꦱꦏ꧀ꦢꦸꦫꦸꦁꦔꦺ​ꦠꦏ꧀​ꦠꦸꦭꦶꦱ꧀꧈​ꦊꦭꦏꦺꦴꦤ꧀ꧏ​ꦩꦮꦸ​ꦏꦧꦺꦃ​ꦠꦏ꧀​ꦠꦶꦠꦶꦥꦿꦶꦏ꧀ꦱ​ꦤ꧀ꦢꦶꦱꦶꦏ꧀꧈​ꦠꦼꦫꦸꦱ꧀​ꦠꦏ꧀​ꦠꦠ꧉

4 ꦢꦢꦶꦤꦺ​ꦏꦼꦤꦺꦁ​ꦢꦶꦠꦶꦠꦺꦤ꧀ꦤꦶ​ꦢꦺꦮꦺ​ꦤꦺꦏ꧀​ꦥꦶꦠꦸꦠꦸꦂ​ꦱꦶꦁ​ꦢꦶꦮꦸꦭꦁꦏꦺ​ꦩꦫꦁ​ꦱꦼꦢꦸꦭꦸꦂ​ꦡꦺꦪꦺꦴꦥ꦳ꦶꦭꦸꦱ꧀​ꦏꦸꦮꦶ​ꦏꦼꦤꦺꦁ​ꦢꦶꦥꦽꦕꦪ​ꦏꦧꦺꦃ꧉

5 ꦢꦺꦴꦁꦔꦺ​ꦲꦺꦫꦺꦴꦢꦺꦱ꧀​ꦲꦶꦗꦶꦏ꧀​ꦢꦢꦶ​ꦫꦠꦸ​ꦤꦁ​ꦢꦶꦱ꧀ꦠꦿꦶꦏ꧀​ꦪꦸꦢꦺꦪ꧈​ꦌꦤꦺꦁ​ꦱꦏ꧀ꦮꦶꦗꦶꦤꦺ​ꦲꦶꦩꦩ꧀​ꦱꦶꦁ​ꦗꦼꦤꦼꦁꦔꦺ​ꦯꦏꦫꦶꦪꦱ꧀꧈​ꦱꦁꦏ​ꦒꦺꦴꦭꦺꦴꦁꦔꦤ꧀ꦤꦺ​ꦲꦶꦩꦩ꧀​ꦄꦧꦶꦪ꧉​ꦨꦺꦴꦗꦺꦴꦤꦺ​ꦲꦶꦩꦩ꧀​ꦯꦏꦫꦶꦪꦱ꧀​ꦗꦼꦤꦼꦁꦔꦺ​ꦌꦭꦶꦱꦧꦺꦠ꧀꧉​ꦲꦶꦧꦸ​ꦌꦭꦶꦱꦧꦺꦠ꧀​ꦲꦶꦏꦶ​ꦠꦸꦫꦸꦤꦤ꧀ꦤꦺ​ꦲꦶꦩꦩ꧀​ꦄꦫꦺꦴꦤ꧀꧉

6 ꦮꦺꦴꦁ​ꦭꦺꦴꦫꦺꦴ​ꦲꦶꦏꦶ​ꦠꦼꦩꦼꦤ꧀​ꦲꦼꦔ꧀ꦒꦺꦴꦤ꧀ꦤꦺ​ꦤꦸꦫꦸꦠꦶ​ꦏꦼꦏꦉꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ꧈​ꦲꦮꦶꦠ꧀​ꦥꦢ​ꦠꦼꦩꦼꦤ꧀​ꦔ꧀ꦭꦏꦺꦴꦤꦶ​ꦲꦔ꧀ꦒꦼꦂꧏ​ꦭꦤ꧀​ꦥꦼꦂꦤꦠꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦏ꧀​ꦏꦧꦺꦃꦲꦺ꧉

7 ꦲꦶꦩꦩ꧀​ꦯꦏꦫꦶꦪꦱ꧀​ꦭꦤ꧀​ꦲꦶꦧꦸ​ꦌꦭꦶꦱꦧꦺꦠ꧀​ꦲꦺꦴꦫ​ꦤ꧀ꦢꦸꦮꦺ​ꦲꦤꦏ꧀꧈​ꦲꦮꦶꦠ꧀​ꦲꦶꦧꦸ​ꦌꦭꦶꦱꦧꦺꦠ꧀​ꦲꦺꦴꦫ​ꦧꦶꦱ​ꦤ꧀ꦢꦸꦮꦺ​ꦲꦤꦏ꧀꧉​ꦑꦫꦺꦴꦩꦼꦤꦺꦃ​ꦮꦺꦴꦁ​ꦭꦺꦴꦫꦺꦴ​ꦲꦶꦏꦶ​ꦪ​ꦮꦶꦱ꧀​ꦠꦸꦮ​ꦧꦔꦼꦠ꧀꧉

8 ꦲꦶꦁ​ꦱꦏ꧀ꦮꦶꦗꦶꦤꦺ​ꦢꦶꦤ​ꦲꦶꦩꦩ꧀​ꦯꦏꦫꦶꦪꦱ꧀​ꦔ꧀ꦭꦏꦺꦴꦤꦶ​ꦏꦼꦂꦗꦤꦤꦺ​ꦤꦁ​ꦒꦿꦺꦗ​ꦒꦼꦢꦺ​ꦏꦺꦴꦤꦺꦴ꧈​ꦲꦮꦶꦠ꧀​ꦮꦶꦱ꧀​ꦠꦶꦧ​ꦮꦤ꧀ꦕꦶꦤꦺ​ꦒꦺꦴꦭꦺꦴꦁꦔꦤꦺ​ꦢꦺꦏ꧀ꦤꦺ꧉​

9 ꦭꦃ​ꦱꦍꦏꦶ​ꦲꦶꦩꦩ꧀​ꦯꦏꦫꦶꦪꦱ꧀​ꦱꦶꦁ​ꦏꦸꦢꦸ​ꦩ꧀ꦭꦼꦧꦸ​ꦤꦁ​ꦥꦔ꧀ꦒꦺꦴꦤ꧀ꦤꦤ꧀​ꦱꦸꦕꦶ꧈​ꦏꦸꦢꦸ​ꦔꦺꦴꦧꦺꦴꦁ​ꦩꦼꦚꦤ꧀꧉​ꦏꦸꦮꦶ​ꦱꦶꦁ​ꦔꦫꦤꦶ​ꦔꦔ꧀ꦒꦺꦴ​ꦭꦺꦴꦠꦿꦺ꧉

10 ꦲꦶꦁ​ꦮꦤ꧀ꦕꦶ​ꦏꦸꦮꦶ꧈​ꦢꦺꦴꦔꦺ​ꦩꦼꦚꦤ꧀ꦤꦺ​ꦢꦶꦲꦺꦴꦧꦺꦴꦁ꧈​ꦤꦁ​ꦤ꧀ꦗꦧ​ꦌꦤꦺꦁ​ꦮꦺꦴꦁ​ꦥꦶꦫꦁꧏ​ꦥꦢ​ꦤ꧀ꦢꦼꦢꦺꦴꦔ꧉​

11 ꦭꦃ​ꦢꦢꦏ꧀ꦏꦤ꧀​ꦮꦲꦺ​ꦏꦺꦴꦏ꧀​ꦠꦼꦫꦸꦱ꧀​ꦲꦺꦤꦺꦁ​ꦩꦸꦭꦺꦏꦠ꧀​ꦔꦺꦠꦺꦴꦏ꧀​ꦩꦫꦁ​ꦲꦶꦩꦩ꧀​ꦯꦏꦫꦶꦪꦱ꧀꧉​ꦩꦸꦭꦺꦏꦠ꧀ꦠꦺ​ꦔꦢꦼꦏ꧀​ꦤꦁ​ꦱꦼꦧꦼꦭꦃ​ꦠꦼꦔꦼꦤ꧀ꦤꦺ​ꦲꦭ꧀ꦠꦂ​ꦱꦶꦁ​ꦢꦶꦲꦼꦔ꧀ꦒꦺꦴ​ꦔꦺꦴꦧꦺꦴꦁ​ꦩꦼꦚꦤ꧀꧉

12 ​ꦲꦶꦩꦩ꧀​ꦯꦏꦫꦶꦪꦱ꧀​ꦮꦼꦫꦸꦃ​ꦩꦸꦭꦺꦏꦠ꧀ꦠꦺ​ꦠꦼꦫꦸꦱ꧀​ꦏꦒꦺꦠ꧀​ꦭꦤ꧀​ꦮꦼꦢꦶ​ꦧꦔꦼꦠ꧀꧉​

13 ꦤꦔꦶꦁ​ꦩꦸꦭꦺꦏꦠ꧀ꦠꦺ​ꦔꦺꦴꦩꦺꦴꦁ:​"ꦲꦗ​ꦮꦼꦢꦶ꧈​ꦯꦏꦫꦶꦪꦱ꧀!​ꦥꦤ꧀ꦢꦺꦴꦔꦩꦸ​ꦮꦶꦱ꧀​ꦏꦼꦠꦩ꧀ꦥ​ꦭꦤ꧀​ꦌꦭꦶꦱꦧꦺꦠ꧀꧈​ꦧꦺꦴꦗꦺꦴꦩꦸ꧈​ꦧꦏꦭ꧀​ꦩ꧀ꦧꦪꦶ​ꦲꦤꦏ꧀​ꦭꦤꦁ꧉​ꦧꦺꦴꦕꦃꦲꦺ​ꦏꦸꦢꦸ​ꦩ꧀ꦧꦺꦴꦏ꧀​ꦗꦼꦤꦼꦁꦏꦺ​ꦪꦺꦴꦲꦤꦼꦱ꧀꧉

14 ꦏꦺꦴꦮꦺ​ꦧꦏꦭ꧀​ꦧꦸꦔꦃ​ꦧꦔꦼꦠ꧀​ꦭꦤ꧀​ꦮꦺꦴꦁ​ꦲꦺꦴꦏꦺꦃ​ꦧꦏꦭ꧀​ꦧꦸꦔꦃ​ꦤꦺꦏ꧀​ꦧꦺꦴꦕꦃ​ꦲꦶꦏꦶ​ꦭꦲꦶꦂ꧉

15 ​ꦧꦺꦴꦕꦃ​ꦲꦶꦏꦶ​ꦧꦏꦭ꧀​ꦢꦢꦶ​ꦮꦺꦴꦁ​ꦱꦶꦁ​ꦒꦼꦢꦺ​ꦲꦗꦶꦤꦺ​ꦏꦔ꧀ꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ꧈​ꦩꦸꦭꦤꦺ​ꦢꦺꦏ꧀ꦤꦺ​ꦲꦺꦴꦫ​ꦏꦼꦤꦺꦁ​ꦔꦺꦴꦩ꧀ꦧꦺ​ꦲꦔ꧀ꦒꦸꦂ​ꦲꦥ​ꦲꦺꦴꦩ꧀ꦧꦺꦤ꧀​ꦭꦶꦪꦤꦺ​ꦱꦶꦁ​ꦩꦫꦏ꧀ꦏꦺ​ꦩꦼꦤ꧀ꦢꦼꦩ꧀꧉​ꦮꦶꦮꦶꦠ꧀​ꦱꦁꦏ​ꦮꦼꦠꦼꦁꦔꦺ​ꦲꦶꦧꦸꦤꦺ​ꦧꦺꦴꦕꦃ​ꦲꦶꦏꦶ​ꦧꦏꦭ꧀​ꦏꦼꦧꦼꦏ꧀​ꦏꦫꦺꦴ​ꦫꦺꦴꦃ​ꦱꦸꦕꦶ꧉​

16​ ꦩ꧀ꦧꦺꦱꦸꦏ꧀​ꦢꦺꦏ꧀ꦤꦺ​ꦧꦏꦭ꧀​ꦤꦸꦤ꧀ꦠꦸꦤ꧀​ꦮꦺꦴꦁ​ꦆꦱꦿꦲꦺꦭ꧀꧈​ꦱꦸꦥꦪ​ꦥꦢ​ꦩꦤꦸꦠ꧀​ꦩꦼꦤꦺꦃ​ꦩꦫꦁ​ꦒꦸꦱ꧀ꦠꦶ​ꦄꦭꦲ꧀ꦲꦺ꧉

17 ꦲꦤꦏ꧀ꦩꦸ​ꦲꦶꦏꦸ​ꦧꦏꦭ꧀​ꦢꦢꦶ​ꦏꦺꦴꦁꦏꦺꦴꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀​ꦲꦶꦁ​ꦫꦺꦴꦃ​ꦭꦤ꧀​ꦥꦔ꧀ꦮꦱ​ꦢꦺꦏ꧀ꦤꦺ​ꦠꦸꦔ꧀ꦒꦭ​ꦮꦲꦺ​ꦏꦫꦺꦴ​ꦤꦧꦶ​ꦌꦭꦶꦪ꧉​ꦣꦺꦏ꧀ꦤꦺ​ꦧꦏꦭ꧀​ꦔꦿꦸꦏꦸꦤ꧀ꦏꦺ​ꦧꦥꦏ꧀​ꦏꦫꦺꦴ​ꦲꦤꦏꦺ​ꦭꦤ꧀​ꦮꦺꦴꦁ​ꦱꦶꦁ​ꦲꦺꦴꦫ​ꦩꦤꦸꦠ꧀​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀​ꦏꦠꦸꦤ꧀ꦠꦸꦤ꧀​ꦩꦭꦶꦃ​ꦩꦤꦸꦠ꧀꧉​ꦢꦢꦶꦤꦺ​ꦢꦺꦏ꧀ꦤꦺ​ꦧꦶꦱ​ꦚꦮꦶꦱ꧀ꦏꦺ​ꦲꦸꦩꦠ꧀​ꦱꦶꦁ​ꦥꦤ꧀ꦠꦼꦱ꧀​ꦏꦔ꧀ꦒꦺꦴ​ꦒꦸꦱ꧀ꦠꦶ꧉"

18 ​ꦲꦶꦩꦩ꧀​ꦯꦏꦫꦶꦪꦱ꧀​ꦠꦼꦫꦸꦱ꧀​ꦱꦼꦩꦮꦸꦂ:​"ꦑꦼꦥꦿꦶꦪꦺ​ꦲꦏꦸ​ꦧꦶꦱꦤꦺ​ꦔꦼꦂꦠꦶ​ꦤꦺꦏ꧀​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦏꦸꦮꦶ​ꦧꦏꦭ꧀​ꦏ꧀ꦭꦏꦺꦴꦤ꧀​ꦠꦼꦤꦤ꧀꧈​ꦲꦮꦶꦠ꧀​ꦲꦏꦸ​ꦢꦺꦮꦺ​ꦮꦶꦱ꧀​ꦠꦸꦮ꧈​ꦱꦼꦩꦺꦴꦤꦺꦴ​ꦲꦸꦒ​ꦧꦺꦴꦗꦺꦴꦏꦸ?"​

19 ​ꦩꦸꦭꦺꦏꦠ꧀ꦠꦺ​ꦠꦼꦫꦸꦱ꧀​ꦔꦺꦴꦩꦺꦴꦁ:​"ꦲꦏꦸ​ꦲꦶꦏꦶ​ꦓꦧꦿꦶꦪꦺꦭ꧀​ꦱꦶꦁ​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁ​ꦔꦉꦥ꧀ꦥꦺ꧉​ꦲꦏꦸ​ꦢꦶꦏꦺꦴꦁꦏꦺꦴꦤ꧀​ꦔ꧀ꦒꦮ​ꦏꦧꦂ​ꦏꦧꦸꦔꦲꦤ꧀​ꦲꦶꦏꦶ​ꦩꦫꦁ​ꦏꦺꦴꦮꦺ꧉

20 ꦲꦥ​ꦱꦶꦁ​ꦠꦏ꧀​ꦲꦺꦴꦩꦺꦴꦁ​ꦲꦶꦏꦶ​ꦩꦼꦱ꧀ꦠꦶ​ꦧꦏꦭ꧀​ꦏ꧀ꦭꦏꦺꦴꦤ꧀​ꦲꦶꦁ​ꦮꦏ꧀ꦠꦸ​ꦱꦶꦁ​ꦮꦶꦱ꧀​ꦢꦶꦠꦼꦔꦼꦂꦫꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ꧉​ꦟꦔꦶꦁ​ꦏꦺꦴꦮꦺ​ꦧꦏꦭ꧀​ꦢꦢꦶ​ꦧꦶꦱꦸ​ꦠꦼꦏꦤ꧀​ꦮꦏ꧀ꦠꦸ​ꦏꦸꦮꦶ꧈​ꦲꦮꦶꦠ꧀​ꦏꦺꦴꦮꦺ​ꦲꦺꦴꦫ​ꦔꦤ꧀ꦢꦼꦭ꧀​ꦩꦫꦁ​ꦠꦼꦩ꧀ꦧꦸꦁꦏꦸ꧉"

21 ​ꦮꦺꦴꦁꧏ​ꦱꦶꦁ​ꦔꦼꦤ꧀ꦠꦺꦤ꧀ꦤꦶ​ꦤꦁ​ꦤ꧀ꦗꦧ​ꦥꦢ​ꦔ꧀ꦒꦸꦩꦸꦤ꧀​ꦲꦶꦩꦩ꧀​ꦯꦏꦫꦶꦪꦱ꧀​ꦏꦺꦴꦏ꧀​ꦱꦸꦮꦶ​ꦠꦼꦩꦼꦤ꧀​ꦤꦁ​ꦤ꧀ꦗꦼꦫꦺꦴ​ꦥꦔ꧀ꦒꦺꦴꦤꦤ꧀​ꦱꦸꦕꦶ​ꦏꦺꦴꦤꦺꦴ꧉

22 ꦏꦢꦸꦁ​ꦩꦼꦠꦸ꧈​ꦲꦶꦩꦩ꧀​ꦯꦏꦫꦶꦪꦱ꧀​ꦲꦺꦴꦫ​ꦧꦶꦱ​ꦔꦺꦴꦩꦺꦴꦁ​ꦲꦥꧏ꧈​ꦤꦩꦸꦁ​ꦤ꧀ꦗꦗꦭ꧀​ꦤ꧀ꦢꦸꦤꦸꦁꧏ​ꦔꦔ꧀ꦒꦺꦴ​ꦠꦔꦤꦺ꧉​ꦮꦺꦴꦁꧏ​ꦠꦼꦫꦸꦱ꧀​ꦔꦼꦂꦠꦶ​ꦤꦺꦏ꧀​ꦲꦶꦩꦩ꧀​ꦯꦏꦫꦶꦪꦱ꧀​ꦲꦼꦤ꧀ꦠꦱ꧀​ꦢꦶꦏꦺꦠꦺꦴꦏ꧀ꦏꦶ​ꦲꦶꦁ​ꦤ꧀ꦗꦼꦫꦺꦴ​ꦥꦔ꧀ꦒꦺꦴꦤꦤ꧀​ꦱꦸꦕꦶ​ꦏꦺꦴꦤꦺꦴ꧉​ꦢꦺꦏ꧀ꦤꦺ​ꦪ​ꦧꦶꦱꦸ​ꦠꦼꦫꦸꦱ꧀꧉

23 ꦱꦏ꧀ꦮꦶꦱꦺ​ꦫꦩ꧀ꦥꦸꦁ​ꦲꦼꦔ꧀ꦒꦺꦴꦤ꧀ꦤꦺ​ꦔ꧀ꦭꦏꦺꦴꦤ꧀ꦤꦶ​ꦏꦼꦂꦗꦤꦤ꧀ꦤꦺ​ꦤꦁ​ꦒꦿꦺꦗ​ꦒꦼꦢꦺ​ꦲꦶꦁ​ꦩꦶꦔ꧀ꦒꦸ​ꦏꦸꦮꦶ꧈​ꦲꦶꦩꦩ꧀​ꦯꦏꦫꦶꦪꦱ꧀​ꦠꦼꦫꦸꦱ꧀​ꦩꦸꦭꦶꦃ꧉​

24 ​ꦲꦺꦴꦫ​ꦊꦠ꧀​ꦱꦸꦮꦶ​ꦲꦶꦧꦸ​ꦌꦭꦶꦱꦧꦺꦠ꧀꧈​ꦧꦺꦴꦗꦺꦴꦤꦺ꧈​ꦠꦼꦫꦸꦱ꧀​ꦩꦼꦠꦼꦁ꧉​ꦭꦶꦩꦁ​ꦱꦱꦶ​ꦱꦸꦮꦺꦤꦺ​ꦲꦶꦧꦸ​ꦌꦭꦶꦱꦧꦺꦠ꧀​ꦲꦺꦴꦫ​ꦩꦼꦠꦸ​ꦱꦁꦏ​ꦲꦺꦴꦩꦃꦲꦺ꧉

25 ꦢꦺꦏ꧀ꦤꦺ​ꦔꦺꦴꦩꦺꦴꦁ:​"ꦱꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦸꦭꦸꦁ​ꦲꦏꦸ​ꦠꦼꦤꦤ꧀꧉​ꦱꦲꦶꦏꦶ​ꦣꦺꦏ꧀ꦤꦺ​ꦮꦶꦱ꧀​ꦔꦶꦭꦁꦏꦺ​ꦲꦶꦱꦶꦤ꧀ꦏꦸ꧈​ꦲꦏꦸ​ꦮꦶꦱ꧀​ꦲꦺꦴꦫ​ꦲꦸꦱꦃ​ꦲꦶꦱꦶꦤ꧀​ꦩꦼꦤꦺꦃ​ꦩꦫꦁ​ꦮꦺꦴꦁꧏ꧉"

26 ꦏꦢꦸꦁ​ꦲꦶꦧꦸ​ꦌꦭꦶꦱꦧꦺꦠ꧀​ꦮꦶꦱ꧀​ꦩꦼꦠꦼꦁ​ꦤꦼꦩ꧀​ꦱꦱꦶ꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦫꦸꦱ꧀​ꦔꦺꦴꦁꦏꦺꦴꦤ꧀​ꦩꦸꦭꦺꦏꦠ꧀​ꦓꦧꦿꦶꦪꦺꦭ꧀​ꦠꦼꦏ​ꦤꦁ​ꦏꦸꦠ​ꦟꦱꦫꦺꦠ꧀​ꦤꦁ​ꦢꦶꦱ꧀ꦠꦿꦶꦏ꧀​ꦓꦭꦶꦭꦺꦪ꧉​

27 ​ꦩꦸꦭꦺꦏꦠ꧀​ꦓꦧꦿꦭ꧀​ꦢꦶꦏꦺꦴꦁꦏꦺꦴꦤ꧀​ꦩꦼꦠꦸꦏ꧀ꦏꦶ​ꦱꦏ꧀ꦮꦶꦗꦶꦤꦺ​ꦥꦿꦮꦤ꧀​ꦱꦶꦁ​ꦗꦼꦤꦼꦁꦔꦺ​ꦩꦫꦶꦪ꧉​ꦩꦫꦶꦪ​ꦲꦶꦏꦶ​ꦥꦕꦔꦤ꧀ꦤꦺ​ꦪꦺꦴꦱꦺꦥ꦳꧀꧈​ꦠꦸꦫꦸꦤꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀꧉

28 ꦏꦢꦸꦁ​ꦓꦧꦿꦶꦪꦺꦭ꧀​ꦮꦶꦱ꧀​ꦤꦼꦩꦸ​ꦩꦫꦶꦪ꧈​ꦢꦺꦏ꧀ꦤꦺ​ꦔꦺꦴꦩꦺꦴꦁ​ꦔꦺꦤꦺ:​"ꦩꦫꦶꦪ꧈​ꦏꦺꦴꦮꦺ​ꦥꦤ꧀ꦕꦺꦤ꧀​ꦢꦶꦧꦼꦂꦏꦃꦲꦶ​ꦠꦼꦤꦤ꧀​ꦏꦫꦺꦴ​ꦒꦸꦱ꧀ꦠꦶ꧈​ꦲꦮꦶꦠ꧀​ꦣꦺꦏ꧀ꦤꦺ​ꦩꦶꦗꦶ​ꦏꦺꦴꦮꦺ꧉"

29 ꦏꦿꦸꦔꦸ​ꦠꦼꦩ꧀ꦧꦸꦁꦔꦺ​ꦩꦸꦭꦺꦏꦠ꧀​ꦏꦸꦮꦶ​ꦩꦮꦸ​ꦩꦫꦶꦪ​ꦏꦒꦺꦠ꧀​ꦧꦔꦼꦠ꧀꧈​ꦠꦼꦫꦸꦱ꧀​ꦩꦶꦏꦶꦂ​ꦲꦶꦁ​ꦲꦠꦶ:​"ꦄꦥ​ꦠ​ꦠꦼꦒꦼꦱꦺ​ꦠꦼꦩ꧀ꦧꦸꦁ​ꦏꦸꦮꦶ?"​

30 ​ꦩꦸꦭꦺꦏꦠ꧀ꦠꦺ​ꦠꦼꦫꦸꦱ꧀​ꦔꦺꦴꦩꦺꦴꦁ:​"ꦩꦫꦶꦪ꧈​ꦲꦗ​ꦮꦼꦢꦶ!​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦠꦺꦴꦏ꧀ꦏꦺ​ꦏꦧꦼꦕꦶꦏ꧀ꦏꦤ꧀ꦤꦺ​ꦩꦫꦁ​ꦏꦺꦴꦮꦺ꧉

31 ꦏꦺꦴꦮꦺ​ꦧꦏꦭ꧀​ꦩꦼꦠꦼꦁ​ꦭꦤ꧀​ꦔ꧀ꦭꦲꦶꦂꦏꦺ​ꦲꦤꦏ꧀​ꦭꦤꦁ꧉​ꦧꦺꦴꦕꦲꦺ​ꦏꦸꦢꦸ​ꦩ꧀ꦧꦺꦴꦏ꧀​ꦗꦼꦤꦼꦁꦏꦺ​ꦪꦺꦱꦸꦱ꧀꧉​

32 ​ꦢꦺꦏ꧀ꦤꦺ​ꦧꦏꦭ꧀​ꦢꦢꦶ​ꦮꦺꦴꦁ​ꦱꦶꦁ​ꦥꦶꦤꦸꦤ꧀ꦗꦸꦭ꧀​ꦭꦤ꧀​ꦧꦏꦭ꧀​ꦢꦶꦕꦼꦭꦸꦏ꧀​ꦲꦤꦏꦺ​ꦱꦶꦁ​ꦭꦸꦲꦸꦂ​ꦢꦺꦮꦺ꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀​ꦤ꧀ꦢꦢꦺꦏ꧀ꦏꦺ​ꦣꦺꦏ꧀ꦤꦺ​ꦢꦢꦶ​ꦫꦠꦸ꧈​ꦤꦸꦫꦸꦠ꧀​ꦧꦥꦏ꧀​ꦧꦥꦏ꧀ꦏꦤ꧀ꦤꦺ​ꦩ꧀ꦧꦶꦪꦺꦤ꧀꧈​ꦪꦏꦸꦮꦶ​ꦫꦠꦸ​ꦣꦮ꦳ꦼꦢ꧀꧉​

33 ​ꦢꦺꦏ꧀ꦤꦺ​ꦧꦏꦭ꧀​ꦢꦢꦶ​ꦫꦠꦸꦤꦺ​ꦠꦸꦫꦸꦤ꧀​ꦠꦸꦫꦸꦤꦤ꧀ꦤꦺ​ꦧꦥ​ꦪꦏꦸꦧ꧀​ꦱ꧀ꦭꦮꦱ꧀​ꦭꦮꦱ꧀ꦱꦺ​ꦭꦤ꧀​ꦲꦼꦔ꧀ꦒꦺꦴꦤ꧀ꦤꦺ​ꦣꦺꦏ꧀ꦤꦺ​ꦧꦏꦭ꧀​ꦢꦢꦶ​ꦫꦠꦸ​ꦲꦺꦴꦫ​ꦧꦏꦭ꧀​ꦲꦺꦤꦺꦁ​ꦭꦺꦫꦺꦤ꧀ꦤꦺ꧉"​

34 ​ꦩꦫꦶꦪ​ꦠꦼꦫꦸꦱ꧀​ꦠꦏꦺꦴꦤ꧀​ꦩꦫꦁ​ꦩꦸꦭꦺꦏꦠ꧀ꦠꦺ:​"ꦑꦼꦥꦿꦶꦪꦺ​ꦏꦸꦮꦶ​ꦩꦮꦸ​ꦏꦧꦺꦃ​ꦧꦏꦭ꧀​ꦭꦺ​ꦏ꧀ꦭꦏꦺꦴꦤ꧀꧈​ꦲꦮꦶꦠ꧀​ꦲꦏꦸ​ꦢꦸꦫꦸꦁ​ꦤ꧀ꦢꦸꦮꦺ​ꦧꦺꦴꦗꦺꦴ?"​

35 ​ꦩꦸꦭꦺꦏꦠ꧀ꦠꦺ​ꦱꦼꦩꦮꦸꦂ:​"ꦬꦺꦴꦃ​ꦯꦸꦕꦶ​ꦧꦏꦭ꧀​ꦚꦼꦢꦼꦏ꧀ꦏꦶ​ꦏꦺꦴꦮꦺ​ꦭꦤ꧀​ꦏ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀​ꦤꦸꦠꦸꦥꦶ​ꦏꦺꦴꦮꦺ꧉​ꦩꦸꦭꦤꦺ​ꦲꦤꦏ꧀​ꦱꦶꦁ​ꦭꦲꦶꦂ​ꦏꦸꦮꦶ​ꦱꦸꦕꦶ​ꦭꦤ꧀​ꦧꦏꦭ꧀​ꦢꦶꦕꦼꦭꦸꦏ꧀​ꦲꦤꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ꧉​

36 ​ꦭꦤ꧀​ꦔꦼꦂꦠꦶꦪ​ꦤꦺꦏ꧀​ꦲꦸꦒ​ꦲꦶꦧꦸ​ꦌꦭꦶꦱꦧꦺꦠ꧀꧈​ꦱꦼꦢꦸꦭꦸꦂꦩꦸ​ꦱꦶꦁ​ꦮꦶꦱ꧀​ꦠꦸꦮ​ꦭꦤ꧀​ꦱꦶꦁ​ꦗꦫꦺꦤꦺ​ꦲꦺꦴꦫ​ꦧꦶꦱ​ꦤ꧀ꦢꦸꦮꦺ​ꦲꦤꦏ꧀꧈​ꦱꦲꦶꦏꦶ​ꦮꦶꦱ꧀​ꦩꦼꦠꦼꦁ​ꦤꦼꦩ꧀​ꦱꦱꦶ꧉​

37 ​ꦲꦮꦶꦠ꧀​ꦏꦔ꧀ꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦲꦺꦤꦺꦁ​ꦥꦽꦏꦫ​ꦱꦶꦁ​ꦩꦺꦴꦏꦭ꧀꧉"​

38 ​ꦩꦫꦶꦪ​ꦠꦼꦫꦸꦱ꧀​ꦔꦺꦴꦩꦺꦴꦁ:​"ꦄꦏꦸ​ꦲꦶꦏꦶ​ꦥꦼꦭꦢꦺꦤ꧀ꦤꦺ​ꦒꦸꦱ꧀ꦠꦶ꧉​ꦯꦼꦩ꧀ꦧꦫꦁ​ꦏꦸꦮꦶ​ꦩꦮꦸ​ꦏꦧꦺꦃ​ꦧꦏꦭ꧀​ꦏ꧀ꦭꦏꦺꦴꦤ꧀​ꦏꦫꦺꦴ​ꦲꦏꦸ​ꦏꦪ​ꦱꦶꦁ​ꦩ꧀ꦧꦺꦴꦏ꧀​ꦲꦺꦴꦩꦺꦴꦁ​ꦏꦸꦮꦶ꧉"​ꦯꦏ꧀ꦮꦶꦱꦺ​ꦏꦸꦮꦶ​ꦩꦸꦭꦺꦏꦠ꧀ꦠꦺ​ꦠꦼꦫꦸꦱ꧀​ꦭꦸꦔ꧉​

39 ​ꦲꦺꦴꦫ​ꦊꦠ꧀​ꦱꦸꦮꦶ​ꦩꦫꦶꦪ​ꦠꦼꦫꦸꦱ꧀​ꦧꦸꦢꦭ꧀​ꦤꦁ​ꦏꦸꦠ​ꦤꦁ​ꦒꦸꦤꦸꦔꦤ꧀ꦤꦺ​ꦧꦮꦃ​ꦪꦸꦢꦺꦪ꧉​

40 ​ꦩꦫꦶꦪ​ꦤ꧀ꦗꦸꦗꦸꦏ꧀​ꦤꦁ​ꦲꦺꦴꦩꦲꦺ​ꦲꦶꦩꦩ꧀​ꦯꦏꦫꦶꦪꦱ꧀꧈​ꦠꦼꦫꦸꦱ꧀​ꦩ꧀ꦊꦧꦸ​ꦩ꧀ꦧꦒꦺꦏ꧀ꦏꦺ​ꦲꦶꦧꦸ​ꦌꦭꦶꦱꦧꦺꦠ꧀꧉

41 ​ꦢꦺꦴꦔꦺ​ꦲꦶꦧꦸ​ꦌꦭꦶꦱꦧꦺꦠ꧀​ꦏꦿꦸꦔꦸ​ꦱ꧀ꦮꦫꦤꦺ​ꦩꦫꦶꦪ꧈​ꦧꦪꦶ​ꦱꦶꦔ꧀​ꦤꦁ​ꦮꦼꦠꦼꦔ꧀ꦔꦺ​ꦠꦼꦫꦸꦱ꧀​ꦔ꧀ꦒꦿꦺꦴꦤ꧀ꦗꦭ꧀꧉​ꦲꦶꦧꦸ​ꦌꦭꦶꦱꦧꦺꦠ꧀​ꦠꦼꦫꦸꦱ꧀​ꦢꦶꦏ꧀ꦮꦱꦤꦶ​ꦏꦫꦺꦴ​ꦬꦺꦴꦃ​ꦯꦸꦕꦶ꧉​

42 ꦩꦸꦭꦤꦺ​ꦢꦺꦏ꧀ꦤꦺ​ꦠꦼꦫꦸꦱ꧀​ꦔꦺꦴꦩꦺꦴꦁ​ꦏꦫꦺꦴ​ꦱ꧀ꦮꦫ​ꦧꦤ꧀ꦠꦼꦂ:​"ꦩꦫꦶꦪ꧈​ꦏꦺꦴꦮꦺ​ꦥꦤ꧀ꦕꦺꦤ꧀​ꦮꦺꦴꦔ꧀​ꦮꦺꦢꦺꦴꦏ꧀​ꦱꦶꦁ​ꦤꦩ꧀ꦥ​ꦧꦼꦂꦏꦃ​ꦱꦶꦔ꧀​ꦒꦼꦢꦺ​ꦢꦺꦮꦺ​ꦲꦶꦁ​ꦱꦏ꧀​ꦠꦼꦔꦲ꧀ꦲꦺ​ꦮꦺꦴꦔ꧀​ꦮꦺꦢꦺꦴꦏ꧀​ꦏꦧꦺꦃ꧉​ꦱꦼꦩꦺꦴꦤꦺꦴ​ꦲꦸꦒ​ꦧꦪꦶ​ꦱꦶꦁ​ꦤꦔ꧀​ꦮꦼꦠꦼꦁꦩꦸ꧈​ꦏꦸꦮꦶ​ꦧꦪꦶ​ꦱꦶꦔ꧀​ꦒꦼꦢꦺ​ꦢꦺꦮꦺ​ꦧꦼꦂꦏꦲ꧀ꦲꦺ꧉​

43 ​ꦱꦥ​ꦠ​ꦲꦏꦸ​ꦲꦶꦏꦶ꧈​ꦏꦺꦴꦏ꧀​ꦱꦩ꧀ꦥꦺꦏ꧀​ꦢꦶꦠꦼꦏꦤꦶ​ꦏꦫꦺꦴ​ꦲꦶꦧꦸꦤꦺ​ꦓꦸꦱ꧀ꦠꦶꦏꦸ?​

44​ ​ꦲꦮꦶꦠ꧀​ꦢꦺꦴꦔꦺ​ꦏꦺꦴꦮꦺ​ꦩ꧀ꦧꦒꦺꦏ꧀ꦏꦺ​ꦲꦏꦸ꧈​ꦧꦪꦶ​ꦱꦶꦁ​ꦤꦔ꧀​ꦮꦼꦠꦼꦁꦏꦸ​ꦔ꧀ꦒꦿꦺꦴꦤ꧀ꦗꦭ꧀​ꦱꦔ꧀ꦏꦶꦁ​ꦧꦸꦔꦲ꧀ꦲꦺ꧉​

45​ ​ꦒꦼꦢꦺ​ꦠꦼꦤꦤ꧀​ꦧꦼꦂꦏꦲ꧀ꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦔ꧀​ꦏꦺꦴꦮꦺ꧈​ꦲꦮꦶꦠ꧀​ꦏꦺꦴꦮꦺ​ꦥꦽꦕꦪ​ꦤꦺꦏ꧀​ꦱꦼꦩ꧀ꦧꦫꦁ​ꦱꦶꦔ꧀​ꦢꦶꦲꦺꦴꦩꦺꦴꦁ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦔ꧀​ꦏꦺꦴꦮꦺ​ꦧꦏꦭ꧀​ꦏ꧀ꦭꦏꦺꦴꦤ꧀꧉"​

46​ ​ꦩꦫꦶꦪ​ꦠꦼꦫꦸꦱ꧀​ꦔꦺꦴꦩꦺꦴꦁ:​"ꦚꦮꦏꦸ​ꦔ꧀ꦭꦸꦲꦸꦂꦏꦺ​ꦒꦸꦱ꧀ꦠꦶ!​

47​ ​ꦒꦸꦱ꧀ꦠꦶ​ꦄꦭ꧀ꦭꦃ꧈​ꦙꦸꦫꦸ​ꦯ꧀ꦭꦩꦼꦠ꧀ꦏꦸ꧈​ꦩꦫꦏ꧀ꦏꦺ​ꦲꦠꦶꦏꦸ​ꦧꦸꦔꦃ꧉​

48​ ​ꦢꦺꦏ꧀ꦤꦺ​ꦔ꧀ꦒꦠꦺꦏ꧀ꦏꦺ​ꦩꦫꦔ꧀​ꦲꦏꦸ​ꦲꦶꦏꦶ꧈​ꦥꦼꦭꦢꦺꦤ꧀​ꦱꦶꦁ​ꦕꦶꦭꦶꦏ꧀​ꦢꦺꦮꦺ꧉​ꦮꦶꦮꦶꦠ꧀​ꦱꦲꦶꦏꦶ​ꦏꦧꦺꦃ​ꦮꦺꦴꦔ꧀​ꦧꦏꦭ꧀​ꦔꦺꦴꦩꦺꦴꦁ​ꦤꦺꦏ꧀​ꦲꦏꦸ​ꦲꦶꦏꦶ​ꦮꦺꦴꦔ꧀​ꦱꦶꦁ​ꦒꦼꦢꦺ​ꦧꦼꦂꦏꦲ꧀ꦲꦺ꧉​

49​ ​ꦲꦮꦶꦠ꧀​ꦒꦸꦱ꧀ꦠꦶ​ꦄꦭ꧀ꦭꦃ꧈​ꦱꦶꦔ꧀​ꦒꦼꦢꦺ​ꦢꦺꦮꦺ​ꦏ꧀ꦮꦱꦤꦺ꧈​ꦮꦶꦱ꧀​ꦤꦶꦤ꧀ꦢꦏ꧀ꦏꦺ​ꦧꦫꦁ​ꦱꦶꦔ꧀​ꦒꦼꦢꦺ​ꦧꦔꦼꦠ꧀​ꦲꦶꦁ​ꦲꦸꦫꦶꦥ꧀ꦏꦸ꧉​ꦥꦤ꧀ꦕꦺꦤ꧀​ꦱꦸꦕꦶ​ꦠꦼꦤꦤ꧀​ꦗꦼꦤꦼꦔ꧀ꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ꧉​

50​ ​ꦒꦸꦱ꧀ꦠꦶ​ꦔꦺꦠꦺꦴꦏ꧀ꦏꦺ​ꦏꦮꦼꦭꦱꦤ꧀ꦤꦺ​ꦩꦫꦁ​ꦮꦺꦴꦔ꧀​ꦱꦶꦁ​ꦔꦗꦺꦤ꧀ꦤꦶ​ꦩꦫꦔ꧀​ꦣꦺꦏ꧀ꦤꦺ꧈​ꦒꦸꦱ꧀ꦠꦶ​ꦩꦼꦭꦱꦶ​ꦠꦸꦫꦸꦤ꧀​ꦠꦸꦫꦸꦤ꧀ꦤꦤ꧀ꦤꦺ꧉​

51​ ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦠꦺꦴꦏ꧀ꦏꦺ​ꦥꦔ꧀ꦮꦱꦤꦺ​ꦭꦤ꧀​ꦮꦺꦴꦁꧏ​ꦱꦶꦔ꧀​ꦒꦼꦩꦸꦔ꧀ꦒꦸꦁ​ꦲꦶꦔ꧀​ꦲꦠꦶꦤꦺ​ꦢꦶꦧꦸꦪꦂꦏꦺ​ꦏꦧꦺꦃ꧉​ꦫꦤ꧀ꦕꦩꦤꦺ​ꦢꦶꦲꦺꦴꦫꦠ꧀​ꦲꦫꦶꦠ꧀꧉​

52​ ​ꦒꦸꦱ꧀ꦠꦶ​ꦄꦭ꧀ꦭꦃ​ꦔ꧀ꦭꦺꦴꦫꦺꦴꦠ꧀ꦏꦺ​ꦥꦫ​ꦥꦔ꧀ꦮꦱ​ꦱꦁꦏ​ꦗꦒꦺꦴꦔꦤ꧀ꦤꦺ꧈​ꦩꦭꦃ​ꦱꦶꦔ꧀​ꦕꦶꦭꦶꦏ꧀​ꦢꦶꦲꦸꦔ꧀ꦒꦃꦏꦺ꧉​

53​ ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶ​ꦩꦔꦤ꧀​ꦩꦫꦁ​ꦮꦺꦴꦔ꧀​ꦱꦶꦁ​ꦔꦼꦭꦶꦃ꧈​ꦩꦭꦃ​ꦢꦶꦲꦸꦢꦤꦶ​ꦏꦫꦺꦴ​ꦱꦼꦩ꧀ꦧꦫꦔ꧀​ꦱꦶꦁ​ꦧꦼꦕꦶꦏ꧀꧈​ꦤꦔꦶꦔ꧀​ꦮꦺꦴꦁ​ꦱꦶꦔ꧀​ꦱꦸꦒꦶꦃ​ꦢꦶꦏꦺꦴꦁꦏꦺꦴꦤ꧀​ꦭꦸꦔ꧈​ꦲꦺꦴꦫ​ꦢꦶꦏꦺꦏ꧀ꦏꦶ​ꦲꦥꧏ꧉​

54​ ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦸꦭꦸꦔꦶ​ꦆꦱꦿꦲꦺꦭ꧀꧈​ꦥꦼꦭꦢꦺꦤ꧀ꦤꦺ꧈​ꦲꦮꦶꦠ꧀​ꦣꦺꦏ꧀ꦤꦺ​ꦲꦉꦥ꧀​ꦤꦼꦠꦼꦥ꧀ꦥꦶ​ꦥꦽꦗꦤ꧀ꦗꦶꦪꦤ꧀ꦤꦺ​ꦩꦫꦔ꧀​ꦥꦫ​ꦩ꧀ꦧꦃ​ꦩ꧀ꦧꦲ꧀ꦲꦤ꧀ꦤꦺ꧉​

55​ ​ꦲꦮꦶꦠ꧀​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀​ꦗꦤ꧀ꦗꦶ​ꦤꦺꦏ꧀​ꦧꦏꦭ꧀​ꦩ꧀ꦧꦼꦂꦏꦲ꧀ꦲꦶ​ꦧꦥ​ꦄꦨꦿꦲꦩ꧀​ꦭꦤ꧀​ꦠꦸꦫꦸꦤ꧀​ꦠꦸꦫꦸꦤ꧀ꦤꦤ꧀ꦤꦺ​ꦏꦧꦺꦃ꧈​ꦱ꧀ꦭꦮꦱ꧀​ꦭꦮꦱ꧀ꦱꦺ꧉"​

56​ ​ꦩꦫꦶꦪ​ꦠꦼꦫꦸꦱ꧀​ꦠꦼꦭꦸꦁ​ꦱꦱꦶ​ꦱꦸꦮꦺꦤꦺ​ꦤꦔ꧀​ꦔ꧀ꦒꦺꦴꦤ꧀ꦤꦺ​ꦲꦶꦧꦸ​ꦌꦭꦶꦱꦧꦺꦠ꧀꧉​ꦱꦏ꧀ꦮꦶꦱꦺ​ꦠꦼꦭꦸꦁ​ꦱꦱꦶ​ꦏꦸꦮꦶ​ꦢꦺꦏ꧀ꦤꦺ​ꦠꦼꦫꦸꦱ꧀​ꦩꦸꦭꦶꦃ꧉​

57​ ​ꦏꦢꦸꦔ꧀​ꦮꦶꦱ꧀​ꦠꦼꦏꦤ꧀​ꦮꦪꦲ꧀ꦲꦺ꧈​ꦲꦶꦧꦸ​ꦌꦭꦶꦱꦧꦺꦠ꧀​ꦩ꧀ꦧꦪꦶ​ꦲꦤꦏ꧀​ꦭꦤꦁ꧉​

58​ ​ꦠꦔ꧀ꦒ​ꦠꦼꦥꦫꦺꦴ​ꦭꦤ꧀​ꦱꦤꦏ꧀​ꦱꦼꦢꦸꦭꦸꦫ꧀ꦫꦺ​ꦥꦢ​ꦏꦿꦸꦔꦸ​ꦧꦧ꧀​ꦒꦼꦢꦺꦤꦺ​ꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦩꦫꦔ꧀​ꦲꦶꦧꦸ​ꦌꦭꦶꦱꦧꦺꦠ꧀꧉​ꦮꦺꦴꦁꧏ​ꦲꦶꦏꦶ​ꦏꦧꦺꦃ​ꦥꦢ​ꦩꦺꦭꦸ​ꦧꦸꦔꦃ​ꦧꦔꦼꦠ꧀꧉​

59 ​ꦏꦢꦸꦔ꧀​ꦧꦪꦶꦤꦺ​ꦮꦶꦱ꧀​ꦤ꧀ꦢꦸꦮꦺ​ꦲꦸꦩꦸꦂ​ꦮꦺꦴꦭꦸꦁ​ꦢꦶꦤ꧈​ꦠꦔ꧀ꦒ​ꦠꦼꦥꦫꦺꦴ​ꦭꦤ꧀​ꦱꦤꦏ꧀​ꦱꦼꦢꦸꦭꦸꦫ꧀ꦫꦺ​ꦩꦻꦴ​ꦏꦧꦺꦃ​ꦥꦢ​ꦠꦼꦏ꧈​ꦲꦮꦶꦠ꧀​ꦧꦪꦶꦤꦺ​ꦲꦉꦥ꧀​ꦢꦶꦱꦸꦤꦠ꧀ꦠꦶ꧉​ꦑꦉꦥ꧀ꦥꦺ​ꦮꦺꦴꦔ꧀ꧏ​ꦧꦺꦴꦕꦲ꧀ꦲꦺ​ꦲꦉꦥ꧀​ꦢꦶꦗꦼꦤꦼꦁꦏꦺ​ꦯꦏꦫꦶꦪꦱ꧀꧈​ꦏꦪ​ꦧꦥꦏ꧀ꦏꦺ꧉​

60 ​ꦤꦔꦶꦔ꧀​ꦲꦶꦧꦸꦤꦺ​ꦔꦺꦴꦩꦺꦴꦁ:​"ꦲꦺꦴꦫ꧈​ꦧꦺꦴꦕꦃ​ꦲꦶꦏꦶ​ꦏꦸꦢꦸ​ꦢꦶꦗꦼꦤꦼꦔ꧀ꦏꦺ​ꦪꦺꦴꦲꦟꦼꦱ꧀!"​

61 ​ꦮꦺꦴꦁꧏ​ꦠꦼꦫꦸꦱ꧀​ꦠꦏꦺꦴꦤ꧀:​"ꦭꦺꦴ꧈​ꦤꦔ꧀​ꦠꦼꦔꦲ꧀ꦲꦺ​ꦱꦤꦏ꧀​ꦱꦼꦢꦸꦭꦸꦂꦩꦸ​ꦲꦥ​ꦲꦺꦤꦺꦁ​ꦱꦶꦔ꧀​ꦗꦼꦤꦼꦁꦔꦺ​ꦪꦺꦴꦲꦟꦼꦱ꧀?"​

62 ​ꦮꦺꦴꦔ꧀ꧏ​ꦠꦼꦫꦸꦱ꧀​ꦠꦏꦺꦴꦤ꧀​ꦩꦫꦁ​ꦲꦶꦩꦩ꧀​ꦯꦏꦫꦶꦪꦱ꧀​ꦔꦔ꧀ꦒꦺꦴ​ꦠꦔꦤ꧀ꦤꦺ꧈​ꦧꦺꦴꦕꦲ꧀ꦲꦺ​ꦏꦸꦢꦸ​ꦢꦶꦗꦼꦤꦼꦔ꧀ꦏꦺ​ꦱꦥ꧉​

63 ​ꦲꦶꦩꦩ꧀​ꦯꦏꦫꦶꦪꦱ꧀​ꦠꦼꦫꦸꦱ꧀​ꦤ꧀ꦗꦭꦸꦏ꧀​ꦭꦺꦲꦶ​ꦢꦶꦲꦼꦔ꧀ꦒꦺꦴ​ꦤꦸꦭꦶꦱ꧀꧉​ꦏꦢꦸꦁ​ꦮꦶꦱ꧀​ꦲꦺꦤ꧀ꦠꦸꦏ꧀​ꦢꦺꦏ꧀ꦤꦺ​ꦠꦼꦫꦸꦱ꧀​ꦤꦸꦭꦶꦱ꧀:​"ꦗꦼꦤꦼꦔ꧀ꦔꦺ​ꦪꦺꦴꦲꦟꦼꦱ꧀!"​ꦮꦺꦴꦁꧏ​ꦔ꧀ꦒꦸꦩꦸꦤ꧀​ꦏꦧꦺꦃ꧉​

64 ​ꦱꦏ꧀ꦮꦠ꧀​ꦲꦶꦩꦩ꧀​ꦯꦏꦫꦶꦪꦱ꧀​ꦠꦼꦫꦸꦱ꧀​ꦧꦶꦱ​ꦔꦺꦴꦩꦺꦴꦔ꧀​ꦩꦼꦤꦺꦃ​ꦭꦤ꧀​ꦢꦺꦏ꧀ꦤꦺ​ꦠꦼꦫꦸꦱ꧀​ꦔ꧀ꦭꦸꦲꦸꦂꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ꧉​

65 ​ꦠꦔ꧀ꦒ​ꦠꦼꦥꦫꦺꦴꦤꦺ​ꦏꦧꦺꦃ​ꦥꦢ​ꦮꦼꦢꦶ​ꦭꦤ꧀​ꦏꦧꦂ​ꦩꦻꦴ​ꦠꦼꦫꦸꦱ꧀​ꦩꦿꦺꦩꦺꦤ꧀ꧏ​ꦤꦁ​ꦧꦮꦃ​ꦥꦼꦒꦸꦤꦸꦔ꧀ꦔꦤ꧀​ꦤꦁ​ꦪꦸꦢꦺꦪ​ꦏꦧꦺꦃ꧉​

66 ​ꦮꦺꦴꦔ꧀​ꦏꦧꦺꦃ​ꦱꦶꦁ​ꦏꦿꦸꦔꦸ​ꦧꦧ꧀​ꦊꦭꦏꦺꦴꦤ꧀​ꦏꦸꦮꦶ​ꦠꦼꦫꦸꦱ꧀​ꦥꦢ​ꦔ꧀ꦒꦠꦺꦏ꧀ꦏꦺ​ꦠꦼꦤꦤ꧀​ꦲꦶꦔ꧀​ꦲꦠꦶꦤꦺ​ꦭꦤ꧀​ꦥꦢ​ꦩꦶꦏꦶꦂ:​"ꦧꦺꦴꦕꦃ​ꦲꦶꦏꦶ​ꦩ꧀ꦧꦺꦱꦸꦏ꧀​ꦧꦏꦭ꧀​ꦢꦢꦶ​ꦲꦥ​ꦪ?"​ꦲꦮꦶꦠ꧀​ꦏꦼꦠꦫ​ꦠꦼꦤꦤ꧀​ꦤꦺꦏ꧀​ꦥꦔ꧀ꦮꦱꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦤ​ꦲꦶꦁ​ꦧꦺꦴꦕꦃ​ꦲꦶꦏꦶ꧉​

67 ​ꦲꦶꦩꦩ꧀​ꦯꦏꦫꦶꦪꦱ꧀꧈​ꦧꦥꦏꦺ​ꦧꦪꦶ​ꦩꦻꦴ꧈​ꦠꦼꦫꦸꦱ꧀​ꦢꦶꦏ꧀ꦮꦱꦤꦶ​ꦏꦫꦺꦴ​ꦬꦺꦴꦃ​ꦯꦸꦕꦶ​ꦭꦤ꧀​ꦔꦼꦠꦺꦴꦏ꧀ꦏꦺ​ꦠꦼꦩ꧀ꦧꦸꦔ꧀​ꦔꦺꦤꦺ:​

68 ​"ꦲꦪꦸꦏ꧀​ꦥꦢ​ꦩꦼꦩꦸꦗꦶ​ꦩꦫꦁ​ꦒꦸꦱ꧀ꦠꦶ꧈​ꦒꦸꦱ꧀ꦠꦶ​ꦄꦭꦲ꧀ꦲꦺ​ꦧꦔ꧀ꦱ​ꦆꦱꦿꦲꦺꦭ꧀!​ꦲꦮꦶꦠ꧀​ꦣꦺꦏ꧀ꦤꦺ​ꦮꦶꦱ꧀​ꦔ꧀ꦒꦠꦺꦏ꧀ꦏꦺ​ꦩꦫꦁ​ꦲꦸꦩꦠ꧀ꦠꦺ​ꦭꦤ꧀​ꦥꦢ​ꦢꦶꦭꦸꦮꦫꦶ꧉​

69 ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶ​ꦙꦸꦫꦸ​ꦯ꧀ꦭꦩꦼꦠ꧀​ꦱꦶꦔ꧀​ꦏ꧀ꦮꦱ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦪꦏꦸꦮꦶ​ꦠꦸꦫꦸꦤꦤꦺ​ꦫꦠꦸ​ꦣꦮ꦳ꦼꦢ꧀꧈​ꦥꦼꦭꦢꦺꦤ꧀ꦤꦺ꧉​

70 ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦏ꧀​ꦩ꧀ꦧꦶꦪꦺꦤ꧀​ꦮꦶꦱ꧀​ꦗꦤ꧀ꦗꦶ​ꦭꦶꦮꦠ꧀​ꦥꦫ​ꦤꦧꦶꦤꦺ​ꦱꦶꦔ꧀​ꦱꦸꦕꦶ꧉​

71 ​ꦢꦺꦏ꧀ꦤꦺ​ꦧꦏꦭ꧀​ꦔ꧀ꦭꦸꦮꦫ꧀ꦫꦶ​ꦲꦮꦏ꧀ꦏꦺ​ꦢꦺꦮꦺ​ꦱꦁꦏ​ꦥꦔ꧀ꦮꦱꦤ꧀ꦤꦺ​ꦩꦸꦔ꧀ꦱꦸꦃꧏ​ꦭꦤ꧀​ꦮꦺꦴꦁꧏ​ꦱꦶꦔ꧀​ꦱꦼꦔꦶꦠ꧀​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​

72 ​ꦩꦼꦔ꧀ꦏꦺꦴꦤꦺꦴ​ꦏꦸꦮꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦠꦺꦴꦏ꧀ꦏꦺ​ꦏꦧꦼꦕꦶꦏ꧀ꦏꦤ꧀ꦤꦺ​ꦩꦫꦁ​ꦩ꧀ꦧꦃ​ꦩ꧀ꦧꦲ꧀ꦲꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺ​ꦭꦤ꧀​ꦤꦼꦠꦼꦥꦶ​ꦥꦽꦗꦤ꧀ꦗꦶꦪꦤ꧀ꦤꦺ​ꦱꦶꦔ꧀​ꦱꦸꦕꦶ꧉​

73 ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀​ꦱꦸꦩ꧀ꦥꦃ​ꦩꦫꦁ​ꦧꦥ​ꦄꦨꦿꦲꦩ꧀꧈​ꦩ꧀ꦧꦃ​ꦩ꧀ꦧꦲ꧀ꦲꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺ​

74 ​ꦭꦤ꧀​ꦣꦺꦏ꧀ꦤꦺ​ꦮꦶꦱ꧀​ꦗꦤ꧀ꦗꦶ​ꦤꦺꦏ꧀​ꦧꦏꦭ꧀​ꦔ꧀ꦭꦸꦮꦫ꧀ꦫꦶ​ꦲꦮꦏ꧀ꦏꦺ​ꦢꦺꦮꦺ​ꦱꦔ꧀ꦏ​ꦩꦸꦁꦱꦸꦲ꧀ꦲꦺ​ꦲꦮꦏ꧀ꦏꦺ​ꦢꦺꦮꦺ꧉​

75 ​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺ​ꦧꦶꦱ​ꦔꦧꦼꦏ꧀ꦠꦶ​ꦩꦫꦔ꧀​ꦣꦺꦏ꧀ꦤꦺ​ꦠꦤ꧀ꦥ​ꦫꦱ​ꦮꦼꦢꦶ꧈​ꦔꦔ꧀ꦒꦺꦴ​ꦲꦠꦶ​ꦱꦶꦁ​ꦱꦸꦕꦶ​ꦭꦤ꧀​ꦗꦸꦗꦸꦂ​ꦤꦔ꧀​ꦔꦉꦥ꧀ꦥꦺ​ꦒꦸꦱ꧀ꦠꦶ꧈​ꦱ꧀ꦭꦮꦱ꧀ꦱꦺ​ꦲꦸꦫꦶꦥ꧀꧉​

76 ​ꦭꦃ​ꦏꦺꦴꦮꦺ​ꦲꦤꦏ꧀ꦏꦸ꧈​ꦏꦺꦴꦮꦺ​ꦧꦏꦭ꧀​ꦢꦶꦪꦫꦤ꧀ꦤꦶ​ꦤꦧꦶꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦒꦼꦢꦺ​ꦢꦺꦮꦺ​ꦏ꧀ꦮꦱꦤꦺ꧉​ꦏꦺꦴꦮꦺ​ꦢꦶꦏꦺꦴꦔ꧀ꦏꦺꦴꦤ꧀​ꦠꦼꦏ​ꦤ꧀ꦢꦶꦱꦶꦏ꧀꧈​ꦱꦸꦥꦪ​ꦔ꧀ꦒꦮꦺꦏ꧀ꦏꦺ​ꦢꦭꦤ꧀​ꦏꦔ꧀ꦒꦺꦴ​ꦒꦸꦱ꧀ꦠꦶ꧉​

77 ​ꦏꦺꦴꦮꦺ​ꦏꦸꦢꦸ​ꦤ꧀ꦢꦸꦤꦸꦁꦏꦺ​ꦩꦫꦔ꧀​ꦲꦸꦩꦠ꧀ꦠꦺ꧈​ꦤꦺꦏ꧀​ꦧꦏꦭ꧀​ꦢꦶꦱ꧀ꦭꦩꦼꦠ꧀ꦏꦺ꧈​ꦲꦮꦶꦠ꧀​ꦧꦏꦭ꧀​ꦢꦶꦔꦥꦸꦫ​ꦢꦺꦴꦱ​ꦢꦺꦴꦱꦤꦺ꧉​

78 ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦏꦸ​ꦒꦼꦢꦺ​ꦏꦮꦼꦭꦱꦤ꧀ꦤꦺ꧉​ꦣꦺꦏ꧀ꦤꦺ​ꦧꦏꦭ꧀​ꦠꦼꦏ​ꦔ꧀ꦭꦸꦮꦫ꧀ꦫꦶ​ꦲꦮꦏ꧀ꦏꦺ​ꦢꦺꦮꦺ꧉​

79 ​ꦏꦪ​ꦱꦽꦔꦺꦔꦺ​ꦩ꧀ꦊꦠꦺꦏ꧀​ꦲꦶꦁ​ꦮꦪꦃ​ꦲꦺꦱꦸꦏ꧀꧈​ꦩꦼꦔ꧀ꦏꦺꦴꦤꦺꦴ​ꦒꦸꦱ꧀ꦠꦶ​ꦧꦏꦭ꧀​ꦩꦢꦁꦔꦶ​ꦏꦧꦺꦃ​ꦮꦺꦴꦔ꧀​ꦱꦶꦁ​ꦲꦤ​ꦲꦶꦔ꧀​ꦥꦼꦥꦼꦠꦼꦁ​ꦭꦤ꧀​ꦱꦶꦔ꧀​ꦠꦤ꧀ꦱꦃ​ꦏꦿꦱ​ꦮꦼꦢꦶ꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦸꦤ꧀ꦠꦸꦤ꧀​ꦲꦮꦏ꧀ꦏꦺ​ꦢꦺꦮꦺ​ꦩꦫꦁ​ꦢꦭꦤ꧀​ꦏꦠꦼꦤ꧀ꦠꦽꦩ꧀ꦩꦤ꧀꧉"​

80 ​ꦧꦺꦴꦕꦃ​ꦩꦻꦴ​ꦠꦼꦫꦸꦱ꧀​ꦩꦸꦤ꧀ꦢꦏ꧀​ꦒꦼꦢꦺ​ꦭꦤ꧀​ꦠꦩ꧀ꦧꦃ​ꦲꦶꦔ꧀​ꦏꦼꦏꦸꦮꦠꦤ꧀ꦤꦺ​ꦬꦺꦴꦃ​ꦯꦸꦕꦶ꧉​ꦢꦺꦏ꧀ꦤꦺ​ꦩꦔ꧀ꦒꦺꦴꦤ꧀ꦤꦺ​ꦤꦁ​ꦥꦔ꧀ꦒꦺꦴꦤꦤ꧀ꧏ​ꦱꦶꦔ꧀​ꦲꦺꦴꦫ​ꦏꦔ꧀ꦒꦺꦴꦤ꧀ꦤꦤ꧀​ꦮꦺꦴꦁ꧈​ꦔꦤ꧀ꦠꦶ​ꦠꦼꦏꦤ꧀​ꦮꦪꦲꦺ​ꦢꦺꦏ꧀ꦤꦺ​ꦔꦺꦠꦺꦴꦏ꧀​ꦩꦫꦔ꧀​ꦧꦁꦱ​ꦆꦱꦿꦲꦺꦭ꧀꧉

Bab 2.

1 ​ꦲꦶꦔ꧀​ꦮꦏ꧀ꦠꦸ​ꦏꦸꦮꦶ​ꦫꦠꦸ​ꦄꦒꦸꦱ꧀ꦠꦸꦱ꧀​ꦔꦼꦠꦺꦴꦏ꧀ꦏꦺ​ꦠꦼꦩ꧀ꦧꦸꦁ​ꦤꦺꦏ꧀​ꦏꦧꦺꦃ​ꦮꦺꦴꦔ꧀​ꦱꦶꦁ​ꦩꦔ꧀ꦒꦺꦴꦤ꧀​ꦤꦔ꧀​ꦤꦼꦒꦫꧏ​​ꦱꦶꦁ​ꦲꦤ​ꦲꦶꦔ꧀​ꦥꦔ꧀ꦮꦱꦤ꧀ꦤꦺ​ꦏꦿꦠꦺꦴꦤ꧀​ꦬꦸꦩ꧀​ꦏꦸꦢꦸ​ꦚꦠꦼꦠ꧀ꦏꦺ​ꦗꦼꦤꦼꦁꦔꦺ​ꦭꦤ꧀​ꦏꦲꦶꦠꦸꦔ꧀​ꦏꦧꦺꦃ꧉​

2 ​ꦲꦶꦠꦸꦁ​ꦲꦶꦠꦸꦔ꧀ꦔꦤ꧀​ꦮꦺꦴꦁ​ꦱꦶꦔ꧀​ꦱꦼꦥꦶꦱꦤ꧀ꦤꦤ꧀​ꦏꦸꦮꦶ​ꦢꦶꦲꦤꦏ꧀ꦏꦺ​ꦢꦺꦴꦁꦔꦺ​ꦑꦶꦫꦺꦤꦶꦪꦸꦱ꧀​ꦢꦢꦶ​ꦒꦿꦩꦔ꧀​ꦤꦁ​ꦧꦮꦃ​ꦯꦶꦫꦶꦪ꧉​

3 ​ꦮꦺꦴꦔ꧀​ꦏꦧꦺꦃ​ꦠꦼꦫꦸꦱ꧀​ꦥꦢ​ꦧꦸꦢꦭ꧀​ꦚꦠꦼꦠ꧀ꦏꦺ​ꦗꦼꦤꦼꦁꦔꦺ​ꦤꦔ꧀​ꦏꦸꦠꦤꦺ​ꦩ꧀ꦧꦃꧏ​​ꦩ꧀ꦧꦶꦪꦺꦤ꧀꧉​

4 ​ꦭꦤ꧀​ꦗꦭꦫꦤ꧀​ꦪꦺꦴꦯꦺꦥ꦳꧀​ꦏꦸꦮꦶ​ꦠꦸꦫꦸꦤꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀꧈​ꦩꦸꦭꦤꦺ​ꦢꦺꦏ꧀ꦤꦺ​ꦪ​ꦠꦼꦫꦸꦱ꧀​ꦧꦸꦢꦭ꧀​ꦱꦁꦏ​ꦏꦸꦠ​ꦟꦱꦫꦺꦠ꧀​ꦤꦔ꧀​ꦢꦶꦱ꧀ꦠꦿꦶꦏ꧀​ꦓꦭꦶꦭꦺꦪ꧈​ꦭꦸꦔ​ꦤꦁ​ꦏꦸꦠ​ꦨꦺꦠ꧀ꦊꦲꦺꦩ꧀​ꦤꦔ꧀​ꦢꦶꦱ꧀ꦠꦿꦶꦏ꧀​ꦪꦸꦢꦺꦪ꧉​ꦨꦺꦠ꧀ꦊꦲꦺꦩ꧀​ꦏꦸꦮꦶ​ꦏꦸꦠ​ꦭꦲꦶꦫꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀꧉​

5 ​ꦪꦺꦴꦯꦺꦥ꦳꧀​ꦭꦸꦔ​ꦔ꧀ꦒꦮ​ꦩꦬꦶꦪ꧈​ꦥꦱꦔꦤ꧀ꦤꦺ​ꦱꦶꦁ​ꦩꦼꦠꦼꦔ꧀꧉​

6 ​ꦢꦺꦴꦁꦔꦺ​ꦮꦺꦴꦔ꧀​ꦭꦺꦴꦫꦺꦴ​ꦩꦲꦸ​ꦠꦼꦏ​ꦤꦁ​ꦏꦸꦠ​ꦨꦺꦠ꧀ꦊꦲꦺꦩ꧀​ꦮꦶꦱ꧀​ꦮꦪꦲ꧀ꦲꦺ​ꦩꦬꦶꦪ​ꦏꦸꦢꦸ​ꦩ꧀ꦧꦪꦶ꧉​

7 ​ꦩꦬꦶꦪ​ꦪ​ꦠꦼꦫꦸꦱ꧀​ꦩ꧀ꦧꦪꦶ​ꦲꦤꦏ꧀​ꦭꦤꦔ꧀​ꦱꦶꦁ​ꦩ꧀ꦧꦉꦥ꧀꧉​ꦨꦪꦶꦤꦺ​ꦠꦼꦫꦸꦱ꧀​ꦢꦶꦒꦼꦢꦺꦴꦔ꧀​ꦭꦤ꧀​ꦢꦶꦱꦺꦭꦺꦃꦏꦺ​ꦤꦁ​ꦮꦢꦃ​ꦥꦏꦤ꧀​ꦏꦺꦮꦤ꧀꧈​ꦲꦮꦶꦠ꧀​ꦪꦺꦴꦯꦺꦥ꦳꧀​ꦭꦤ꧀​ꦩꦬꦶꦪ​ꦮꦶꦱ꧀​ꦲꦺꦴꦫ​ꦧꦶꦱ​ꦤꦼꦩꦸ​ꦥꦔ꧀ꦒꦺꦴꦤ꧀ꦤꦤ꧀​ꦩꦼꦤꦺꦃ​ꦤꦔ꧀​ꦲꦺꦴꦩꦃ​ꦲꦶꦤꦼꦥ꧀ꦥꦤ꧀꧉​

8 ​ꦤꦁ​ꦧꦮꦃ​ꦏꦺꦴꦤꦺꦴ​ꦲꦶꦔ꧀​ꦮꦼꦔꦶ​ꦏꦸꦮꦶ​ꦲꦺꦤꦺꦁ​ꦥꦔꦺꦴꦤ꧀ꧏ​​ꦱꦶꦔ꧀​ꦲꦶꦗꦶꦏ꧀​ꦤ꧀ꦗꦒ​ꦮꦼꦢꦸꦱꦺ​ꦤꦁ​ꦏꦼꦧꦺꦴꦤ꧀꧉​

9 ​ꦢꦢꦏ꧀ꦏꦤ꧀​ꦮꦲ꧀ꦲꦺ​ꦠꦼꦫꦸꦱ꧀​ꦩꦸꦭꦺꦏꦠ꧀ꦠꦺ​ꦓꦸꦱ꧀ꦠꦶ​ꦔꦢꦼꦏ꧀​ꦤꦔ꧀​ꦔꦉꦥ꧀ꦥꦺ​ꦭꦤ꧀​ꦥꦔ꧀ꦮꦱꦤ꧀ꦤꦺ​ꦓꦸꦱ꧀ꦠꦶ​ꦄꦭ꧀ꦭꦃ​ꦩꦢꦔꦶ​ꦥꦫ​ꦥꦔꦺꦴꦤ꧀​ꦩꦲꦸ꧉​ꦮꦺꦴꦁꧏ​​ꦥꦢ​ꦮꦼꦢꦶ​ꦧꦔꦼꦠ꧀꧉​

10 ​ꦤꦔꦶꦔ꧀​ꦩꦸꦭꦺꦏꦠ꧀ꦠꦺ​ꦠꦼꦫꦸꦱ꧀​ꦔꦺꦴꦩꦺꦴꦁ:​"ꦄꦗ​ꦥꦢ​ꦮꦼꦢꦶ꧈​ꦲꦮꦶꦠ꧀​ꦲꦏꦸ​ꦠꦼꦏ​ꦔ꧀ꦒꦮ​ꦏꦧꦂ​ꦧꦼꦕꦶꦏ꧀​ꦏꦔ꧀ꦒꦺꦴ​ꦏꦺꦴꦮꦺ꧈​ꦏꦧꦂ​ꦱꦶꦔ꧀​ꦩ꧀ꦧꦸꦔꦃꦏꦺ​ꦲꦠꦶꦤꦺ​ꦮꦺꦴꦁ​ꦏꦧꦺꦃ꧉​

11 ​ꦲꦶꦔ꧀​ꦢꦶꦤ​ꦲꦶꦏꦶ​ꦙꦸꦫꦸ​ꦯ꧀ꦭꦩꦼꦠ꧀ꦩꦸ​ꦮꦶꦱ꧀​ꦭꦲꦶꦂ​ꦤꦁ​ꦏꦸꦠꦤꦺ​ꦫꦠꦸ​ꦣꦮ꦳ꦼꦢ꧀꧉​ꦣꦺꦏ꧀ꦤꦺ​ꦏꦸꦮꦶ​ꦑꦿꦶꦱ꧀ꦠꦸꦱ꧀꧈​ꦓꦸꦱ꧀ꦠꦶ꧉​

12 ​ꦲꦶꦏꦶ​ꦠꦼꦔꦼꦫ꧀ꦫꦺ:​ꦏꦺꦴꦮꦺ​ꦧꦏꦭ꧀​ꦤꦼꦩꦸ​ꦧꦪꦶ​ꦢꦶꦒꦼꦢꦺꦴꦔ꧀​ꦭꦤ꧀​ꦢꦶꦱꦺꦭꦺꦃꦏꦺ​ꦤꦁ​ꦮꦢꦃ​ꦥꦏꦤ꧀​ꦏꦺꦮꦤ꧀!"​

13 ​ꦠꦼꦫꦸꦱ꧀​ꦢꦢꦏ꧀ꦏꦤ꧀​ꦮꦲ꧀ꦲꦺ​ꦲꦺꦤꦺꦔ꧀​ꦩꦸꦭꦺꦏꦠ꧀​ꦥꦶꦫꦁꧏ​​ꦥꦢ​ꦔꦤ꧀ꦕꦤꦶ​ꦩꦸꦭꦺꦏꦠ꧀​ꦩꦲꦸ​ꦭꦤ꧀​ꦧꦼꦧꦉꦔ꧀ꦔꦤ꧀​ꦠꦼꦫꦸꦱ꧀​ꦥꦢ​ꦩꦼꦩꦸꦗꦶ​ꦓꦸꦱ꧀ꦠꦶ​ꦄꦭ꧀ꦭꦃ꧉​

14 ​ꦠꦼꦩ꧀ꦧꦸꦁꦔꦺ​ꦔꦺꦤꦺ:​"ꦦꦸꦗꦶꦪ​ꦓꦸꦱ꧀ꦠꦶ​ꦄꦭ꧀ꦭꦃ​ꦱꦶꦔ꧀​ꦤꦁ​ꦤ꧀ꦢꦸꦮꦸꦂ​ꦭꦤ꧀​ꦠꦼꦤ꧀ꦠꦽꦩ꧀​ꦲꦪꦼꦩ꧀​ꦤꦔ꧀​ꦧꦸꦩꦶ꧈​ꦲꦮꦶꦠ꧀​ꦓꦸꦱ꧀ꦠꦶ​ꦄꦭ꧀ꦭꦃ​ꦔꦺꦠꦺꦴꦏ꧀ꦏꦺ​ꦏꦧꦼꦕꦶꦏ꧀ꦏꦤ꧀ꦤꦺ​ꦩꦫꦁ​ꦩꦤꦸꦔ꧀ꦱ꧉"​

15 ​ꦏꦢꦸꦁ​ꦥꦫ​ꦩꦸꦭꦺꦏꦠ꧀​ꦩꦲꦸ​ꦮꦶꦱ꧀​ꦭꦸꦔ​ꦤꦔ꧀​ꦱ꧀ꦮꦂꦒ꧈​ꦥꦫ​ꦥꦔꦺꦴꦤ꧀​ꦠꦼꦫꦸꦱ꧀​ꦔꦺꦴꦩꦺꦴꦁ​ꦩꦫꦔ꧀​ꦱꦏ꧀ꦥꦢ​ꦥꦢ:​"ꦲꦪꦸꦏ꧀​ꦥꦢ​ꦧꦸꦢꦭ꧀​ꦤꦁ​ꦏꦸꦠ​ꦨꦺꦠ꧀ꦊꦲꦺꦩ꧀꧉​ꦓꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀​ꦔꦺꦴꦩꦺꦴꦔꦶ​ꦲꦮꦏꦺ​ꦢꦺꦮꦺ​ꦧꦧ꧀​ꦱꦶꦔ꧀​ꦏ꧀ꦭꦏꦺꦴꦤ꧀​ꦤꦁ​ꦏꦤ꧉​ꦲꦪꦸꦏ꧀​ꦥꦢ​ꦤ꧀ꦢꦼꦭꦺꦴꦏ꧀!"​

16 ​ꦥꦫ​ꦥꦔꦺꦴꦤ꧀​ꦩꦲꦸ​ꦠꦼꦫꦸꦱ꧀​ꦒꦼꦭꦶꦱ꧀ꧏ​​ꦧꦸꦢꦭ꧀꧈​ꦠꦼꦫꦸꦱ꧀​ꦤꦼꦩꦸ​ꦩꦬꦶꦪ​ꦭꦤ꧀​ꦪꦺꦴꦯꦺꦥ꦳꧀​ꦭꦤ꧀​ꦨꦪꦶꦤꦺ​ꦱꦶꦔ꧀​ꦢꦶꦱꦺꦭꦺꦃꦏꦺ​ꦤꦁ​ꦮꦢꦃ​ꦥꦏꦤ꧀​ꦏꦺꦮꦤ꧀꧉​

17 ​ꦏꦢꦸꦔ꧀​ꦮꦶꦱ꧀​ꦮꦼꦫꦸꦃ​ꦨꦪꦶꦤꦺ꧈​ꦥꦫ​ꦥꦔꦺꦴꦤ꧀​ꦠꦼꦫꦸꦱ꧀​ꦔꦧꦂ​ꦔꦧꦂꦏꦺ​ꦧꦧ꧀​ꦲꦥ​ꦱꦶꦁ​ꦢꦩꦺꦴꦔ꧀​ꦏꦫꦺꦴ​ꦩꦸꦭꦺꦏꦠ꧀ꦠꦺ​ꦧꦧ꧀​ꦨꦪꦶꦤꦺ꧉​

18 ​ꦏꦧꦺꦃ​ꦮꦺꦴꦁ​ꦱꦶꦔ꧀​ꦏꦿꦸꦔꦸ​ꦏꦧꦫ꧀ꦫꦺ​ꦥꦫ​ꦥꦔꦺꦴꦤ꧀​ꦩꦲꦸ​ꦥꦢ​ꦔ꧀ꦒꦸꦩꦸꦤ꧀​ꦧꦔꦼꦠ꧀꧉​

19 ​ꦤꦔꦶꦁ​ꦩꦬꦶꦪ​ꦚꦶꦩ꧀ꦥꦼꦤ꧀​ꦊꦭꦏꦺꦴꦤ꧀ꧏ​​ꦏꦸꦮꦶ​ꦩꦲꦸ​ꦏꦧꦺꦃ​ꦲꦶꦔ꧀​ꦲꦠꦶꦤꦺ​ꦭꦤ꧀​ꦢꦶꦒꦒꦱ꧀​ꦲꦥ​ꦠꦼꦒꦼꦱꦺ꧉​

20 ​ꦥꦫ​ꦥꦔꦺꦴꦤ꧀​ꦠꦼꦫꦸꦱ꧀​ꦧꦭꦶꦏ꧀​ꦩꦼꦤꦺꦃ​ꦤꦁ​ꦏꦼꦧꦺꦴꦤ꧀​ꦏꦫꦺꦴ​ꦩꦼꦩꦸꦗꦶ​ꦭꦤ꧀​ꦔ꧀ꦭꦸꦲꦸꦂꦏꦺ​ꦓꦸꦱ꧀ꦠꦶ​ꦄꦭ꧀ꦭꦃ꧈​ꦲꦮꦶꦠ꧀​ꦏꦧꦺꦃ​ꦱꦶꦔ꧀​ꦢꦶꦫꦸꦔꦸ​ꦭꦤ꧀​ꦱꦶꦁ​ꦢꦶꦱꦼꦏ꧀ꦱꦺꦤꦶ​ꦥꦤ꧀ꦕꦺꦤ꧀​ꦕꦺꦴꦕꦺꦴꦏ꧀​ꦏꦫꦺꦴ​ꦱꦶꦔ꧀​ꦢꦩꦺꦴꦁ​ꦏꦫꦺꦴ​ꦩꦸꦭꦺꦏꦠ꧀ꦠꦺ꧉​

21 ​ꦏꦢꦸꦔ꧀​ꦲꦸꦩꦸꦫ꧀ꦫꦺ​ꦮꦶꦱ꧀​ꦮꦺꦴꦭꦸꦁ​ꦢꦶꦤ꧈​ꦨꦪꦶꦤꦺ​ꦠꦼꦫꦸꦱ꧀​ꦢꦶꦱꦸꦤꦠꦶ​ꦭꦤ꧀​ꦢꦶꦏꦺꦏ꧀ꦏꦶ​ꦗꦼꦤꦼꦔ꧀꧉​ꦗꦼꦤꦼꦁꦔꦺ​ꦪꦺꦯꦸꦱ꧀꧈​ꦲꦮꦶꦠ꧀​ꦩꦸꦭꦺꦏꦠ꧀ꦠꦺ​ꦔꦼꦏꦺꦏ꧀ꦏꦶ​ꦗꦼꦤꦼꦔ꧀​ꦏꦸꦮꦶ​ꦩꦫꦁ​ꦩꦬꦶꦪ꧈​ꦱꦏ꧀ꦢꦸꦫꦸꦔ꧀ꦔꦺ​ꦢꦺꦏ꧀ꦤꦺ​ꦩꦼꦠꦼꦁ꧉​

22 ​ꦩꦶꦠꦸꦫꦸꦠ꧀​ꦮꦺꦠ꧀ꦠꦺ​ꦤꦧꦶ​ꦩꦺꦴꦱꦼꦱ꧀​ꦩꦬꦶꦪ​ꦢꦶꦲꦔ꧀ꦒꦼꦥ꧀​ꦉꦱꦶꦏ꧀​ꦩꦼꦤꦺꦃ​ꦤꦺꦏ꧀​ꦮꦶꦱ꧀​ꦏ꧀ꦭꦶꦮꦠ꧀​ꦥꦠꦔ꧀​ꦥꦸꦭꦸꦃ​ꦢꦶꦤ​ꦱꦏ꧀ꦮꦶꦱꦺ​ꦩ꧀ꦧꦪꦶ꧉​ꦑꦢꦸꦁ​ꦮꦶꦱ꧀​ꦠꦼꦏꦤ꧀​ꦮꦪꦲ꧀ꦲꦺ꧈​ꦩꦬꦶꦪ​ꦭꦤ꧀​ꦪꦺꦴꦯꦺꦥ꦳꧀​ꦠꦼꦫꦸꦱ꧀​ꦧꦸꦢꦭ꧀​ꦤꦔ꧀​ꦏꦸꦠ​ꦪꦺꦫꦸꦯꦭꦺꦩ꧀​ꦲꦉꦥ꧀​ꦩꦱꦿꦃꦏꦺ​ꦨꦪꦶꦤꦺ​ꦩꦫꦁ​ꦓꦸꦱ꧀ꦠꦶ꧉​

23 ​ꦲꦮꦶꦠ꧀​ꦤꦔ꧀​ꦑꦶꦠꦧ꧀​ꦏꦼꦠꦸꦭꦶꦱ꧀​ꦔꦺꦤꦺ:​"ꦱꦧꦼꦤ꧀​ꦲꦤꦏ꧀​ꦩ꧀ꦧꦉꦥ꧀​ꦱꦶꦁ​ꦭꦤꦔ꧀​ꦏꦸꦢꦸ​ꦢꦶꦥꦱꦿꦃꦏꦺ​ꦩꦫꦁ​ꦓꦸꦱ꧀ꦠꦶ꧉"​

24 ​ꦩꦬꦶꦪ​ꦭꦤ꧀​ꦪꦺꦴꦯꦺꦥ꦳꧀​ꦧꦸꦢꦭ꧀​ꦤꦔ꧀​ꦏꦸꦠ​ꦪꦺꦫꦸꦯꦭꦺꦩ꧀​ꦏꦸꦮꦶ​ꦲꦸꦒ​ꦲꦉꦥ꧀​ꦔ꧀ꦒꦮ​ꦏꦸꦂꦧꦤ꧀​ꦩꦶꦠꦸꦫꦸꦠ꧀​ꦮꦺꦠ꧀ꦠꦺ​ꦓꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏꦼꦠꦸꦭꦶꦱ꧀​ꦤꦔ꧀​ꦑꦶꦠꦧ꧀꧉​ꦑꦸꦂꦧꦤ꧀ꦤꦺ​ꦪꦏꦸꦮꦶ:​ꦩꦤꦸꦏ꧀​ꦢꦫ​ꦱꦏ꧀​ꦗꦺꦴꦢꦺꦴ​ꦲꦥ​ꦩꦤꦸꦏ꧀​ꦢꦫ​ꦕꦶꦭꦶꦏ꧀​ꦭꦺꦴꦫꦺꦴ꧉​

25 ​ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦤꦔ꧀​ꦏꦸꦠ​ꦪꦺꦫꦸꦯꦭꦺꦩ꧀​ꦏꦺꦴꦤꦺꦴ​ꦲꦺꦤꦺꦁ​ꦮꦺꦴꦔ꧀​ꦱꦶꦁ​ꦗꦼꦤꦼꦔ꧀ꦔꦺ​ꦯꦶꦩꦺꦪꦺꦴꦤ꧀꧉​ꦯꦶꦩꦺꦪꦺꦴꦤ꧀​ꦲꦶꦏꦶ​ꦱꦏ꧀ꦮꦶꦗꦶꦤꦺ​ꦮꦺꦴꦁ​ꦱꦶꦔ꧀​ꦤꦸꦫꦸꦠꦶ​ꦏꦼꦏꦉꦥꦤ꧀ꦤꦺ​ꦓꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀​ꦔꦧꦼꦏ꧀ꦠꦶ​ꦩꦫꦁ​ꦓꦸꦱ꧀ꦠꦶ​ꦄꦭ꧀ꦭꦃ꧉​ꦢꦺꦏ꧀ꦤꦺ​ꦔꦉꦥ꧀​ꦲꦉꦥ꧀​ꦏꦥꦤ꧀​ꦓꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀​ꦤꦼꦏꦏ꧀ꦏꦺ​ꦏꦼꦱ꧀ꦭꦩꦼꦠꦤ꧀​ꦩꦫꦔ꧀​ꦧꦁꦱ​ꦆꦱꦿꦌꦭ꧀꧉​ꦯꦶꦩꦺꦪꦺꦴꦤ꧀​ꦲꦶꦏꦶ​ꦏꦼꦧꦼꦏ꧀​ꦏꦫꦺꦴ​ꦬꦺꦴꦃ​ꦯꦸꦕꦶ꧉​

26 ​ꦬꦺꦴꦃ​ꦯꦸꦕꦶ​ꦢꦺꦮꦺ​ꦱꦶꦔ꧀​ꦔꦺꦴꦩꦺꦴꦁ​ꦩꦫꦔ꧀​ꦢꦺꦏ꧀ꦤꦺ​ꦤꦺꦏ꧀​ꦢꦺꦏ꧀ꦤꦺ​ꦲꦺꦴꦫ​ꦧꦏꦭ꧀​ꦩꦠꦶ​ꦱꦏ꧀ꦢꦸꦫꦸꦁꦔꦺ​ꦮꦼꦫꦸꦃ​ꦙꦸꦫꦸ​ꦯ꧀ꦭꦩꦼꦠ꧀ꦠꦺ​ꦩꦤꦸꦔ꧀ꦱ꧈​ꦱꦶꦁ​ꦮꦶꦱ꧀​ꦢꦶꦗꦤ꧀ꦗꦶ​ꦏꦫꦺꦴ​ꦓꦸꦱ꧀ꦠꦶ​ꦄꦭ꧀ꦭꦃ꧉​

27 ​ꦏꦠꦸꦤ꧀ꦠꦸꦤ꧀​ꦬꦺꦴꦃ​ꦯꦸꦕꦶ​ꦯꦶꦩꦺꦪꦺꦴꦤ꧀​ꦠꦼꦫꦸꦱ꧀​ꦩ꧀ꦊꦧꦸ​ꦤꦔ꧀​ꦓꦿꦺꦗ​ꦓꦼꦢꦺ꧉​ꦩꦬꦶꦪ​ꦭꦤ꧀​ꦪꦺꦴꦯꦺꦥ꦳꧀​ꦲꦸꦒ​ꦩ꧀ꦊꦧꦸ​ꦤꦁ​ꦓꦿꦺꦗ​ꦓꦼꦢꦺ​ꦔ꧀ꦒꦮ​ꦨꦪꦶꦤꦺ​ꦲꦉꦥ꧀​ꦢꦶꦥꦱꦿꦃꦏꦺ​ꦩꦫꦔ꧀​ꦓꦸꦱ꧀ꦠꦶ​ꦄꦭ꧀ꦭꦃ꧈​ꦩꦶꦠꦸꦫꦸꦠ꧀​ꦥꦼꦂꦤꦠꦤꦺ​ꦲꦒꦩ꧉​

28 ​ꦯꦶꦩꦺꦪꦺꦴꦤ꧀​ꦠꦼꦫꦸꦱ꧀​ꦚꦼꦏꦼꦭ꧀​ꦨꦪꦶꦤꦺ꧈​ꦠꦼꦫꦸꦱ꧀​ꦢꦶꦧꦺꦴꦥꦺꦴꦁ​ꦏꦫꦺꦴ​ꦩꦼꦩꦸꦗꦶ​ꦓꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦔ꧀:​

29 ​"ꦢꦸꦃ​ꦓꦸꦱ꧀ꦠꦶ꧈​ꦑꦺꦴꦮꦺ​ꦤꦼꦠꦼꦥꦶ​ꦗꦤ꧀ꦗꦶꦩꦸ​ꦩꦫꦁ​ꦥꦼꦭꦢꦺꦤ꧀ꦩꦸ꧉​ꦱꦲꦶꦏꦶ​ꦲꦏꦸ​ꦮꦶꦱ꧀​ꦧꦶꦱ​ꦤꦶꦔ꧀ꦒꦭ꧀​ꦏꦫꦺꦴ​ꦲꦪꦼꦩ꧀꧉​

30 ​ꦲꦮꦶꦠ꧀​ꦩꦿꦶꦥꦠ꧀ꦏꦸ​ꦮꦶꦱ꧀​ꦮꦼꦫꦸꦃ​ꦙꦸꦫꦸ​ꦯ꧀ꦭꦩꦼꦠ꧀​ꦑꦺꦴꦔ꧀ꦏꦺꦴꦤꦤ꧀ꦩꦸ꧉​

31 ​ꦢꦺꦏ꧀ꦤꦺ​ꦱꦶꦁ​ꦩ꧀ꦧꦺꦴꦏ꧀​ꦕꦮꦶꦱ꧀ꦏꦺ​ꦏꦔ꧀ꦒꦺꦴ​ꦚ꧀ꦭꦩꦼꦠ꧀ꦏꦺ​ꦏꦧꦺꦃ​ꦧꦔ꧀ꦱ꧈​

32 ​ꦏꦪ​ꦥꦼꦥꦢꦁ​ꦱꦶꦔ꧀​ꦩꦢꦔꦶ​ꦢꦭꦤ꧀ꦤꦺ​ꦮꦺꦴꦁ​ꦱꦶꦔ꧀​ꦲꦺꦴꦫ​ꦥꦽꦕꦪ꧈​ꦱꦸꦥꦪ​ꦥꦢ​ꦩꦫ​ꦤꦁ​ꦔ꧀ꦒꦺꦴꦤ꧀ꦩꦸ꧉​ꦢꦢꦶꦤꦺ​ꦲꦸꦩꦠ꧀ꦩꦸ꧈​ꦧꦔ꧀ꦱ​ꦆꦱꦿꦌꦭ꧀꧈​ꦤꦩ꧀ꦥ​ꦥꦼꦔꦊꦩꦤ꧀​ꦱꦁꦏ​ꦭꦶꦪꧏ​​ꦧꦔ꧀ꦱ꧉"​

33 ​ꦪꦺꦴꦯꦺꦥ꦳꧀​ꦭꦤ꧀​ꦩꦬꦶꦪ​ꦥꦢ​ꦔ꧀ꦒꦸꦩꦸꦤ꧀​ꦏꦿꦸꦔꦸ​ꦠꦼꦩ꧀ꦧꦸꦁꦔꦺ​ꦯꦶꦩꦺꦪꦺꦴꦤ꧀​ꦱꦶꦔ꧀​ꦔꦺꦴꦩꦺꦴꦁꦏꦺ​ꦧꦧ꧀​ꦲꦤꦏꦺ​ꦩꦲꦸ꧉​

34 ​ꦯꦶꦩꦺꦪꦺꦴꦤ꧀​ꦠꦼꦫꦸꦱ꧀​ꦩ꧀ꦧꦼꦂꦏꦲꦶ​ꦪꦺꦴꦯꦺꦥ꦳꧀꧈​ꦩꦬꦶꦪ​ꦭꦤ꧀​ꦨꦪꦶꦤꦺ꧈​ꦠꦼꦫꦸꦱ꧀​ꦔꦺꦴꦩꦺꦴꦔ꧀​ꦩꦫꦁ​ꦩꦬꦶꦪ:​"ꦨꦺꦴꦕꦃ​ꦲꦶꦏꦶ​ꦮꦶꦱ꧀​ꦢꦶꦏꦉꦥ꧀ꦏꦺ​ꦏꦫꦺꦴ​ꦓꦸꦱ꧀ꦠꦶ​ꦄꦭ꧀ꦭꦃ​ꦢꦢꦶ​ꦗꦭꦫꦤ꧀ꦤꦺ​ꦠꦶꦧ​ꦭꦤ꧀​ꦠꦔꦶꦤꦺ​ꦮꦺꦴꦔ꧀​ꦲꦺꦴꦏꦺꦃ​ꦤꦁ​ꦆꦱꦿꦌꦭ꧀꧉​ꦣꦺꦏ꧀ꦤꦺ​ꦧꦏꦭ꧀​ꦢꦢꦶ​ꦠꦤ꧀ꦢ​ꦱꦔ꧀ꦏ​ꦓꦸꦱ꧀ꦠꦶ​ꦄꦭ꧀ꦭꦃ꧈​ꦱꦶꦁ​ꦧꦏꦭ꧀​ꦢꦶꦧꦤ꧀ꦠꦃ​ꦏꦫꦺꦴ​ꦮꦺꦴꦔ꧀​ꦲꦺꦴꦏꦺꦃ꧉​

35 ​ꦩꦼꦁꦏꦺꦴꦤꦺꦴ​ꦏꦸꦮꦶ​ꦲꦔꦼꦤ꧀ꧏ​​ꦱꦶꦔ꧀​ꦏꦱꦶꦩ꧀ꦥꦼꦤ꧀​ꦲꦶꦁ​ꦲꦠꦶꦤꦺ​ꦮꦺꦴꦔ꧀​ꦲꦺꦴꦏꦺꦃ​ꦧꦏꦭ꧀​ꦏꦼꦧꦸꦏꦏ꧀꧉​ꦏꦺꦴꦮꦺ​ꦢꦺꦮꦺ​ꦩꦬꦶꦪ꧈​ꦧꦏꦭ꧀​ꦔꦿꦱꦏ꧀ꦏꦺ​ꦱꦼꦢꦶ꧈​ꦲꦠꦶꦩꦸ​ꦫꦱꦤꦺ​ꦏꦪ​ꦢꦶꦱꦸꦮꦺꦏ꧀​ꦏꦫꦺꦴ​ꦥꦼꦢꦁ​ꦱꦶꦔ꧀​ꦭꦤ꧀ꦢꦼꦥ꧀​ꦏꦲꦺ꧉"​

36 ​ꦤꦁ​ꦏꦺꦴꦤꦺꦴ​ꦲꦸꦒ​ꦲꦺꦤꦺꦔ꧀​ꦤꦧꦶ​ꦮꦺꦢꦺꦴꦏ꧀​ꦱꦶꦁ​ꦮꦶꦱ꧀​ꦠꦸꦮ​ꦧꦔꦼꦠ꧀꧈​ꦗꦼꦤꦼꦔ꧀ꦁꦔꦺ​ꦲꦟꦃ꧈​ꦲꦤꦏꦺ​ꦥ꦳ꦤꦸꦮꦺꦭ꧀​ꦱꦔ꧀ꦏ​ꦠꦸꦫꦸꦤꦤ꧀ꦤꦺ​ꦄꦱꦼꦂ꧉​ꦤꦧꦶ​ꦲꦟꦃ​ꦱꦏ꧀ꦮꦶꦱꦺ​ꦏꦮꦶꦤ꧀​ꦥꦶꦠꦸꦁ​ꦠꦲꦸꦤ꧀​ꦱꦸꦮꦺꦤꦺ​ꦠꦼꦫꦸꦱ꧀​ꦢꦶꦠꦶꦔ꧀ꦒꦭ꧀​ꦩꦠꦶ​ꦧꦺꦴꦗꦺꦴꦤꦺ꧉​

37 ​ꦢꦢꦶꦤꦺ​ꦢꦺꦏ꧀ꦤꦺ​ꦱꦲꦶꦏꦶ​ꦫꦤ꧀ꦢ꧈​ꦲꦸꦩꦸꦫ꧀ꦫꦺ​ꦮꦶꦱ꧀​ꦮꦺꦴꦭꦸꦔ꧀​ꦥꦸꦭꦸꦃ​ꦥꦥꦠ꧀​ꦠꦲꦸꦤ꧀꧉​ꦤꦧꦶ​ꦲꦟꦃ​ꦏꦸꦮꦶ​ꦱꦱꦠ꧀ꦠꦺ​ꦲꦮꦤ꧀​ꦮꦼꦔꦶ​ꦤꦁ​ꦓꦿꦺꦗ​ꦓꦼꦢꦺ​ꦔꦧꦼꦏ꧀ꦠꦶ​ꦩꦫꦔ꧀​ꦓꦸꦱ꧀ꦠꦶ​ꦄꦭ꧀ꦭꦃ​ꦔꦔ꧀ꦒꦺꦴ​ꦥꦤ꧀ꦢꦺꦴꦔ​ꦭꦤ꧀​ꦥꦱ꧉​

38 ​ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦪ​ꦢꦺꦴꦔ꧀ꦔꦺ​ꦤꦧꦶ​ꦲꦤꦃ​ꦲꦸꦒ​ꦠꦼꦏ​ꦤꦁ​ꦓꦿꦺꦗ​ꦓꦼꦢꦺ꧉​ꦢꦺꦏ꧀ꦤꦺ​ꦠꦼꦫꦸꦱ꧀​ꦩꦼꦩꦸꦗꦶ​ꦓꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀​ꦔꦺꦴꦩꦺꦴꦔ꧀ꦏꦺ​ꦧꦧ꧀​ꦨꦺꦴꦕꦃ​ꦨꦪꦶ​ꦩꦲꦸ​ꦩꦫꦁ​ꦮꦺꦴꦔ꧀​ꦏꦧꦺꦃ​ꦱꦶꦁ​ꦥꦢ​ꦔꦉꦥ꧀​ꦲꦉꦥ꧀​ꦏꦥꦤ꧀​ꦓꦸꦱ꧀ꦠꦶ​ꦄꦭ꧀ꦭꦃ​ꦼ꧀ꦔ꧀ꦒꦺꦴꦤ꧀ꦤꦺ​ꦔ꧀ꦭꦸꦮꦫꦶ​ꦏꦸꦠ​ꦪꦺꦫꦸꦱꦭꦺꦩ꧀꧉​

39 ​ꦱꦏ꧀ꦮꦶꦱꦺ​ꦫꦩ꧀ꦥꦸꦔ꧀​ꦼ꧀ꦔ꧀ꦒꦺꦴꦤ꧀ꦤꦺ​ꦥꦢ​ꦤꦼꦠꦼꦥꦶ​ꦥꦼꦂꦤꦠꦤꦺ​ꦓꦸꦱ꧀ꦠꦶ​ꦄꦭ꧀ꦭꦃ​ꦏꦧꦺꦃ꧈​ꦪꦺꦴꦯꦺꦥ꦳꧀​ꦭꦤ꧀​ꦩꦬꦶꦪ​ꦠꦼꦫꦸꦱ꧀​ꦥꦢ​ꦩꦸꦭꦶꦃ​ꦤꦁ​ꦏꦸꦠ​ꦟꦱꦫꦺꦠ꧀​ꦤꦔ꧀​ꦢꦶꦱ꧀ꦠꦿꦶꦏ꧀​ꦓꦭꦶꦭꦺꦪ꧉​

40 ​ꦧꦺꦴꦕꦃ​ꦨꦪꦶ​ꦩꦲꦸ​ꦠꦼꦫꦸꦱ꧀​ꦩꦸꦤ꧀ꦢꦏ꧀​ꦒꦼꦢꦺ​ꦭꦤ꧀​ꦫꦺꦴꦱ꧈​ꦢꦢꦶ​ꦧꦺꦴꦕꦃ​ꦱꦶꦁ​ꦗꦼꦩ꧀ꦧꦂ​ꦏꦮꦼꦫꦸꦲ꧀ꦲꦺ​ꦭꦤ꧀​ꦓꦸꦱ꧀ꦠꦶ​ꦄꦭ꧀ꦭꦃ​ꦪ​ꦩ꧀ꦧꦼꦂꦏꦲꦶ​ꦣꦺꦏ꧀ꦤꦺ꧉​

41 ​ꦱꦧꦼꦤ꧀​ꦠꦲꦸꦤ꧀​ꦮꦺꦴꦔ꧀​ꦠꦸꦮꦤꦺ​ꦓꦸꦱ꧀ꦠꦶ​ꦪꦺꦱꦸꦱ꧀​ꦧꦸꦢꦭ꧀​ꦤꦁ​ꦏꦸꦠ​ꦪꦺꦫꦸꦱꦭꦺꦩ꧀​ꦩꦺꦭꦸ​ꦔꦸꦂꦩꦠ꧀​ꦫꦶꦪꦪ​ꦦꦱ꧀ꦏꦃ꧉​

42 ​ꦏꦢꦸꦔ꧀​ꦓꦸꦱ꧀ꦠꦶ​ꦪꦺꦱꦸꦱ꧀​ꦮꦶꦱ꧀​ꦤ꧀ꦢꦸꦮꦺ​ꦲꦸꦩꦸꦂ​ꦫꦺꦴꦭꦱ꧀​ꦠꦲꦸꦤ꧀꧈​ꦣꦺꦏ꧀ꦤꦺ​ꦲꦸꦒ​ꦢꦗꦺꦏ꧀​ꦤꦁ​ꦪꦺꦫꦸꦱꦭꦺꦩ꧀꧉​

43 ​ꦱꦏ꧀ꦮꦶꦱꦺ​ꦫꦩ꧀ꦥꦸꦔ꧀​ꦏꦫꦺꦴ​ꦫꦶꦪꦪ​ꦦꦱ꧀ꦏꦃ​ꦪꦺꦴꦯꦺꦥ꦳꧀​ꦭꦤ꧀​ꦩꦬꦶꦪ​ꦠꦼꦫꦸꦱ꧀​ꦥꦢ​ꦩꦸꦭꦶꦃ꧈​ꦤꦔꦶꦁ​ꦓꦸꦱ꧀ꦠꦶ​ꦪꦺꦱꦸꦱ꧀​ꦲꦶꦗꦶꦏ꧀​ꦏꦺꦫꦶ​ꦤꦔ꧀​ꦪꦺꦫꦸꦱꦭꦺꦩ꧀꧉​ꦮꦺꦴꦁ​ꦠꦸꦮꦤꦺ​ꦩꦭꦃ​ꦲꦺꦴꦫ​ꦔꦼꦂꦠꦶ​

44 ​ꦤ꧀ꦢꦫꦤꦶ​ꦓꦸꦱ꧀ꦠꦶ​ꦪꦺꦱꦸꦱ꧀​ꦮꦶꦱ꧀​ꦤ꧀ꦢꦶꦱꦶꦏ꧀ꦏꦶ​ꦩꦸꦭꦶꦃ꧈​ꦧꦉꦔ꧀​ꦏꦫꦺꦴ​ꦮꦺꦴꦁꧏ​꧉​ꦏꦢꦸꦔ꧀​ꦮꦶꦱ꧀​ꦩ꧀ꦭꦏꦸ​ꦱꦼꦢꦶꦤ​ꦩꦸꦥꦸꦠ꧀꧈​ꦪꦺꦴꦯꦺꦥ꦳꧀​ꦭꦤ꧀​ꦩꦬꦶꦪ​ꦠꦼꦫꦸꦱ꧀​ꦔ꧀ꦒꦺꦴꦭꦺꦏ꧀ꦏꦶ​ꦓꦸꦱ꧀ꦠꦶ​ꦪꦺꦱꦸꦱ꧀​ꦤꦁ​ꦔ꧀ꦒꦺꦴꦤ꧀ꦤꦺ​ꦱꦼꦢꦸꦭꦸꦂ​ꦱꦼꦢꦸꦭꦸꦫ꧀ꦫꦺ​ꦭꦤ꧀​ꦏꦼꦤꦭ꧀​ꦏꦼꦤꦭꦤ꧀ꦤꦺ꧉​

45 ​ꦤꦔꦶꦔ꧀​ꦲꦺꦴꦫ​ꦧꦶꦱ​ꦏꦼꦠꦼꦩꦸ꧈​ꦩꦸꦭꦤꦺ​ꦠꦼꦫꦸꦱ꧀​ꦥꦢ​ꦧꦭꦶꦏ꧀​ꦩꦼꦤꦺꦃ​ꦤꦁ​ꦏꦸꦠ​ꦪꦺꦫꦸꦱꦭꦺꦩ꧀꧉​

46 ​ꦱꦏ꧀ꦮꦶꦱꦺ​ꦔ꧀ꦒꦺꦴꦭꦺꦏ꧀ꦏꦶ​ꦠꦼꦭꦸꦔ꧀​ꦢꦶꦤ​ꦱꦸꦮꦺꦤꦺ꧈​ꦪꦺꦴꦯꦺꦥ꦳꧀​ꦭꦤ꧀​ꦩꦬꦶꦪ​ꦧꦶꦱ​ꦤꦼꦩꦸ​ꦄꦤꦏꦺ​ꦤꦁ​ꦓꦿꦺꦗ​ꦓꦼꦢꦺ꧉​ꦣꦺꦏ꧀ꦤꦺ​ꦲꦶꦗꦶꦏ꧀​ꦤ꧀ꦗꦒꦺꦴꦔ꧀​ꦲꦶꦁ​ꦱꦏ꧀​ꦠꦼꦔꦲ꧀ꦲꦺ​ꦥꦫ​ꦒꦸꦫꦸ꧉​ꦓꦸꦱ꧀ꦠꦶ​ꦪꦺꦱꦸꦱ꧀​ꦔꦿꦸꦔꦺꦴꦏ꧀ꦏꦺ​ꦥꦶꦮꦸꦭꦔ꧀ꦔꦺ​ꦥꦫ​ꦒꦸꦫꦸ​ꦩꦲꦸ​ꦭꦤ꧀​ꦣꦺꦏ꧀ꦤꦺ​ꦲꦸꦒ​ꦔꦼꦠꦺꦴꦏ꧀ꦏꦺ​ꦮꦼꦂꦤꧏ​​ꦥꦶꦠꦏꦺꦴꦤ꧀ꦤꦤ꧀꧉​

47 ​ꦏꦧꦺꦃ​ꦮꦺꦴꦁ​ꦱꦶꦔ꧀​ꦏꦿꦸꦔꦸ​ꦠꦼꦩ꧀ꦧꦸꦁꦔꦺ​ꦓꦸꦱ꧀ꦠꦶ​ꦪꦺꦱꦸꦱ꧀​ꦥꦢ​ꦔ꧀ꦒꦸꦩꦸꦤ꧀​ꦧꦧ꧀​ꦏꦥꦶꦤ꧀ꦠꦼꦫꦤ꧀ꦤꦺ​ꦼ꧀ꦔ꧀ꦒꦺꦴꦤ꧀ꦤꦺ​ꦩꦔ꧀ꦱꦸꦭꦶ​ꦥꦫ​ꦒꦸꦫꦸ​ꦩꦲꦸ꧉​

48 ​ꦧꦥꦏꦺ​ꦭꦤ꧀​ꦲꦶꦧꦸꦤꦺ​ꦲꦸꦒ​ꦔ꧀ꦒꦸꦩꦸꦤ꧀​ꦧꦔꦼꦠ꧀꧉​ꦩꦬꦶꦪ​ꦔꦺꦴꦩꦺꦴꦁ:​"ꦭꦶꦏ꧀꧈​ꦏꦼꦤꦺꦔ꧀​ꦲꦥ​ꦏꦺꦴꦮꦺ​ꦏꦺꦴꦏ꧀​ꦔ꧀ꦒꦮꦺ​ꦧꦶꦔꦸꦁꦔꦺ​ꦧꦥꦏ꧀​ꦭꦤ꧀​ꦲꦶꦧꦸꦩꦸ?​ꦄꦮꦏꦺ​ꦢꦺꦮꦺ​ꦔ꧀ꦒꦺꦴꦭꦺꦏ꧀ꦏꦶ​ꦏꦺꦴꦮꦺ​ꦱꦩ꧀ꦥꦺꦏ꧀​ꦱꦸꦱꦃ꧉"​

49 ​ꦓꦸꦱ꧀ꦠꦶ​ꦪꦺꦱꦸꦱ꧀​ꦱꦼꦩꦲꦸꦂ​ꦔꦺꦤꦺ:​"ꦏꦼꦤꦺꦔ꧀​ꦲꦥ​ꦏꦺꦴꦮꦺ​ꦏꦺꦴꦏ꧀​ꦥꦢ​ꦔ꧀ꦒꦺꦴꦭꦺꦏ꧀ꦏꦶ​ꦄꦏꦸ?​ꦲꦥ​ꦏꦺꦴꦮꦺ​ꦲꦺꦴꦫ​ꦥꦢ​ꦔꦼꦂꦠꦶ​ꦤꦺꦏ꧀​ꦄꦏꦸ​ꦏꦸꦢꦸ​ꦤꦁ​ꦲꦺꦴꦩꦲ꧀ꦲꦺ​ꦨꦥꦏ꧀ꦏꦸ?"​

50 ​ꦪꦺꦴꦯꦺꦥ꦳꧀​ꦭꦤ꧀​ꦩꦬꦶꦪ​ꦲꦺꦴꦫ​ꦢꦸꦤꦸꦔ꧀​ꦩꦫꦁ​ꦠꦼꦩ꧀ꦧꦸꦔ꧀ꦔꦺ​ꦓꦸꦱ꧀ꦠꦶ​ꦪꦺꦱꦸꦱ꧀​ꦏꦸꦮꦶ꧉​

51 ​ꦱꦏ꧀ꦮꦶꦱꦺ​ꦏꦸꦮꦶ​ꦓꦸꦱ꧀ꦠꦶ​ꦪꦺꦱꦸꦱ꧀​ꦠꦼꦫꦸꦱ꧀​ꦩꦺꦭꦸ​ꦩꦸꦭꦶꦃ​ꦏꦫꦺꦴ​ꦮꦺꦴꦁ​ꦠꦸꦮꦤꦺ​ꦤꦔ꧀​ꦏꦸꦠ​ꦟꦱꦫꦺꦠ꧀꧉​ꦣꦺꦏ꧀ꦤꦺ​ꦠꦤ꧀ꦱꦃ​ꦩꦤꦸꦠ꧀​ꦩꦫꦁ​ꦠꦼꦩ꧀ꦧꦸꦔ꧀ꦔꦺ​ꦮꦺꦴꦁ​ꦠꦸꦮꦤꦺ꧉​ꦩꦬꦶꦪ​ꦩꦶꦏꦶꦂꦏꦺ​ꦥꦽꦏꦫꧏ​​ꦲꦶꦏꦶ​ꦏꦧꦺꦃ​ꦲꦶꦔ꧀​ꦲꦠꦶꦤꦺ꧉​

52 ​ꦒꦸꦱ꧀ꦠꦶ​ꦪꦺꦱꦸꦱ꧀​ꦠꦼꦫꦸꦱ꧀​ꦩꦸꦤ꧀ꦢꦏ꧀​ꦒꦼꦢꦺ​ꦭꦤ꧀​ꦩꦸꦤ꧀ꦢꦏ꧀​ꦏꦮꦼꦫꦸꦲ꧀ꦲꦺ꧉​ꦣꦺꦏ꧀ꦤꦺ​ꦲꦸꦒ​ꦩꦸꦤ꧀ꦢꦏ꧀​ꦢꦶꦠꦿꦺꦱ꧀ꦤꦤꦶ​ꦏꦫꦺꦴ​ꦓꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀​ꦩꦤꦸꦁꦱ꧉