Ili gözlär

by Magtymguly Pyragy

Ili gözlär by Magtymguly Pyragy

ILI GÖZLÄR

İlinden aýra düşen –
Ah urar, ili gözlär.
Ýolundan aýra düşen –
Jäht edip, ýoly gözlär.

Gökde pelek gerdandyr,
Halk ýerde sergerdandyr,
Ne bazygär jahandyr,
Göz açan maly gözlär.

Kimlerde altyn täçdir,
Kimler saýyl mätäçdir,
Kimler düýpden gallaçdyr,
Kim parça, haly gözlär.

Kim nan tapmaz iýmäge,
Kim ýer tapmaz goýmaga,
Kim don tapmaz geýmäge,
Kim tirme şaly gözlär.

Bu jahan bir puştadyr,
Kim zinde, kim küştedir,
Her bende bir işdedir,
Her kim bir haly gözlär.

Heňňam uzyn, ömür az,
Çahar pasla başdyr ýaz,
Gökde ganat ýaýan gaz –
Gözleri köli gözlär.

Magtymguly, huş eýläp,
Gezgin didäň ýaş eýläp,
Däli köňül joş eýläp,
Ýüz müň hyýaly gözlär.

---