HISTORIA CAN VIDA NIN SIETE INFANTES
NA MAGÑA AQUI NI Busto de Lara
PRIMERA PARTE
0
Caidtong panahon Españang banuaan
may dua catauo magtugang na mahal
si Rubio Velasquez sa lalaking gñaran
asin Doña Sancha an babae naman.
Idtong Doña Sancha napagñiagom sia
can aki ni señor Gonzalo de Lara
an apod can gñaran si Busto de Lara
nagñaki nin pito nagadan an ina.
Dorogñan, pig-aki an pitong lalaki
idtoñg magcarambal an sa libro sabi
asin ta paradis an gayon na labi
caya con apodon ay Siete Infante.
Idtong maaturegang Infantes de Lara
pararehong cosog, caisogan ninda
nabaretang hayag na catacataca
pinagcatacutan bilog na Morisma.
Si Rubio Velasquez Villarin na señor.
sa pitong sobrino tunay na amaon
napacasal gñani sa sarong magayon
na si Doña Lambra gñaran con apodon.
sabihon pa baga an ogmang totoo
pagcasal sainda can aldao na idto
ogmang gayagaya kinamtan na gayo
magña pananaohon grandes maguinoo.