Gospul ma ‚Ioannes‛

KAPIT: I

1. Primo vöd ädabinon, e vöd äbinon in God, e vöd äbinon God.
2. Si! vöd äbinon primao in God;
3. val edavedon dub on, e nen on nos edavedon uta, kel edavedon.
4. In on lif äbinon, e lif äbinon lit menas.
5. Lit stralon ini dag, e dag no elasumon oni.
6. Man äsüikom; pilesedom fa God; nem omik äbinom: ‚Ioannes‛.
7. Atan äkömom ad temunön; ad temunön tefü lit; dat valans ölekredons dub om.
8. Om it no äbinom lit, ab ämutom temunön tefü lit.
9. At binom lit veratik, kel, ini vol ekömöl, litükom meni alik.
10. Äbinom in vol, vol idavedon dub om, e vol no esevon omi.
11. Äkömom lü okikans, ed omikans no elasumons omi.
12. Ab valanes, kels elasumons omi, egivom nämädi ad vedön cils Goda, sevabo utanes, kels elekredons nämätü nem omik;
13. kels no pemotons sekü dabinäd menik, sekü desir mida, sekü vil mana, ab sekü God.
14. Vöd evedon binäd midik, (ed elödom bevü obs ed elogobs glori omik, asä glori Sona baliko pemotöla Fata) fulü benäd e verat.
15. ‚Ioannes‛ etemunom dö om, ed evokädom: «Om äbinom utan, tefü kel äsagob: Utan, kel kömom pos ob, esüikom bü ob; ibä ädabinom bü ob.
16. Ibä se ful oma obs valik egetobs, benädi bal tä votik;
17. ibä lonemi egetobs de ‚Moyses‛, benäd e verat edavedons dub Yesus Kristus.
18. Nek elogon föro Godi; Son baliko pemotöl, kel binom in vüm Fata, eplänom osi».
19. So temunod de ‚Ioannes‛ äbinon, ven yudans ilesedoms se ‚Hierusalem‛ kultanis e levitanis lü om ad säkön ome: «Kim binol-li»?
20. Ädasevom e no änoom; ädasevom: «No binob Kristus».
21. Pos atos äsäkoms ome: «Kis binol-li täno? Binol-li ‚Elias‛»? ägespikom: «Nö»! «Binol-li profetan»? Ed ägespikom: «Nö»!
22. Tän äsagoms ome: «Kis binol-li? Mutobs ga blinön gespiki lü utans, kels elesedoms obis: Kisi sagob-li dö ol it»?
23. Äsagom: «Binob vög utana, kel vokädom in däsärt: ‚Kamükolsöd vegi pro Söl‛! soäsä profetan: ‚Isaias‛ esagom».
24. Lesedäbs et nu äbinoms farisetans.
25. Ed äsäkoms ome: «Sekü kis blunedol-li üfo, if no binol Kristus, ni ‚Elias‛, ni profetan»?
26. ‚Ioannes‛ ägesagom omes: «Blunedob me vat, ab zänodü obs balan dabinom, keli no sevol,
27. balan, kel kömom pos ob, ab kel pesüikom bü ob, lo kel no digädob ad säsnalön jukaküiredi omik».
28. Atos äjenon in ‚Bethania‛ votaflanü ‚Iordanis‛, kö ‚Ioannes‛ äkösömom ad blunedön.
29. Ven tü del sököl äloegom kömön Yesusi lü ok, äsagom: «Ekö! jipül Goda, kel moükom sinodis vola.
30. Binom utan, dö kel esagob: Pos ob man kömom, kel pesüikom bü ob; ibä ädabinom büikumo ka ob.
31. I ob no äsevob omi; ab, dat pösevädükom Yisraelänanes, ekömob ad blunedön me vat».
32. E ‚Ioannes‛ ätemunom: «Eloegob donikön Lanali asä pijuni se sül, e blibön su om.
33. E no äsevob omi, ab utan, kel elesedom obi ad blunedön me vat, esagom obe: Om, sui kel loegol donikön Lanali, e su kel at blibon, binom utan, kel blunedom me Saludalanal.
34. Elogob osi, e temunob, das atan binom Son Goda».
35. Tü del sököl, ‚Ioannes‛ ästanom dönu us, ko tel tidäbas okik.
36. Ed älogölo lü Yesus, kel äbeigolom, äsagom: «Ekö! jipül Goda».
37. E ven tidäbs tel et älieloms omi sagön atosi, äsökoms Yesusi.
38. Ven Yesus nu ägüflekom oki, ed älogom, das äsökoms omi, äsagom omes:
39. «Kisi sukols-li»? äsagoms ome: «O Rabinan! (tradutod atosa binon: ‚O Mastan!‛) Kitopo lödol-li»?
40. Äsagom omes: «Kömolsöd e logolsöd»! äkömoms kluo, ed älogoms topi, kö älödom, ed äbliboms dü del et lä om. Äbinos zao düp degid.
41. Balan de tel, kels ililoms osi de ‚Ioannes‛, ed isökoms Yesusi, äbinom ‚Andreas‛: blod ela ‚Simon Petrus‛.
42. Ätuvom balido blodi okik: ‚Simon‛, ed äsagom ome: «Etuvobs Mäsiati». (kela tradutod binon: ‚Kristus‛).
43. Ädugom omi lü Yesus. Yesus älülogom omi, ed äsagom: «Binol ‚Simon‛: son ela ‚Ioannes‛; ponemol: ‚Cephas‛» (kel petradutöl binon: ‚Petrus‛).
44. Ven Yesus ävilom detevön tü del sököl lü Galileyän, äkolgolom eli ‚Philippus‛, ed äsagom ome: «Sökolöd obi»!
45. ‚Philippus‛ äbinom se ‚Bethsaida‛: zif elas ‚Andreas‛ e ‚Petrus‛.
46. ‚Philippus‛ ätuvom eli ‚Nathanael‛, ed äsagom ome: «Omi, dö kel ‚Moyses‛ in nomem e profetans epenoms, etuvobs, sevabo Yesusi: son ela ‚Ioseph‛ de ‚Nazareth‛».
47. ‚Nathanael‛ äsagom ome: «Bos gudik kanon-li kömön se ‚Nazareth‛»? ‚Philippus‛ äsagom ome: «Kömolöd e logolöd»!
48. Ven Yesus äloegom kömön lü ok eli ‚Nathanael‛, äsagom dö om: «Ekö! jenöfo binom Yisraelänan, in kel cüt no dabinon».
49. ‚Nathanael‛ äsagom ome: «Kiöpao sevol-li obi»? Yesus ägesagom ome: «Büä ‚Philippus‛ ävokom oli, elogob oli, ven äbinol dis figabim».
50. ‚Nathanael‛ ägesagom ome: «O Rabinan! binol Son Goda; binol hireg Yisraeläna».
51. Yesus ägesagom ome: «Evedol-li lekredan, bi äsagob ole, das elogob oli dis figabim? Ologol dinis gretikum».
52. Äsagom i lü om: «Vö! vö! sagob oles, denu oloegols maifikön süli, e donikön e löpikön silananis Goda sui Son mena».

KAPIT: II

1. Tü del kilid matikamazäl ädabinon tö ‚Cana‛ in Galileyän; mot Yesusa äkomof us.
2. I Yesus e tidäbs omik pivüdoms ad matikamazäl.
3. Ven vin ädefon, mot Yesusa äsagof ome: «No labons vini».
4. E Yesus äsagom ofe: «Sekü kis mutob-li jäfön me ob? o vom! Düp obik no nog ekömon».
5. Mot omik äsagof hidünanes: «Dunolsöd utosi, kelosi osagom oles»!
6. Nu ädabinons vatagefs bäsinik mäl, ma klinükamabüdüls yudanas us pipladöls, kelas al äninädon zao metretis tel u kil.
7. Yesus äsagom omes: «Fulükolsöd gefis me vat». Äfulükoms onis jüi siem.
8. Äsagom omes: «Kupolsöd nu oni, e blinolsöd oni lebötädale»! Ed äblinoms oni.
9. Ven nu lebötädal ägutom vati, kel ivedon vin, no äsevom, kiöpao ikömon, ab hidünans, kels ikupoms vati, äsevoms osi, ävokom higami,
10. ed äsagom ome: «Alan bötom balido vini gudikün, e ven brietons, vini läs gudiki; ab ol ekipedol gudiküni jünu».
11. Milagi balid at Yesus äduinom tö ‚Cana‛ in Galileyän, ed ädasevädükom so glori okik, e tidäbs äprimoms ad lekredön omi.
12. Pos atos ädegolom ko mot okik, blods okik e tidäbs okik lü ‚Capharnaum‛, kö ästebons dü dels anik.
13. Pajad yudanas äbinon nilik, e Yesus ätevom lü ‚Hierusalem‛.
14. Ven äloegom seadön in tem selanis bubas, jipas e pijunas, e monicänanis,
15. Ämekom de jains lebati, ed äsemofom omis valik, ko jips e bubs se tem, ämojedom moni monicänanas, ed ädojedom tabis omsik.
16. E pijuniselanes äsagom: «Moblinolsöd dinis et, e no vedükolsöd domi Fata obik leseladomi»!
17. Tän tidäbs ämemoms, das epenoy: ‚Zil pro dom olik luslugon obi‛.
18. Yudans ägesagoms täno ome: «Mali kinik jonol-li obes as blöf, das dalol dunön atosi»?
19. Yesus ägespikom omes: «Debreikolsöd temi at, ed olöbumob oni dönu ünü dels kil».
20. Yudans ägespikoms ome: «ünü yels foldegmäl ebumoy temi at, ed ol olöbumol-li oni ünü dels kil»?
21. Ab äspikom dö koap okik as tem.
22. Ven ilelifikom kluo se deadam, tidäbs ämemoms, das isagom atosi; ed älekredoms penädis bibik, e vödi, keli Yesus ispikom.
23. Ven äbinom in ‚Hierusalem‛ ün pajad pö zäl, mödikans ävedons lekrediks, bi älogons milagis, kelis äduinom.
24. Ab Yesus no älükonfidom oki ones, bi ädasevom onis valik;
25. ibä no äneodom, das ek ätemunon ome meni; om it vo äsevom utosi, kelos äbinon in men.

KAPIT: III

1. Farisetan seimik ädabinom, kela nem äbinon: ‚Nicodemus‛; äbinom löpal yudanas.
2. Atan äkömom neito lü om ed äsagom ome: «O Rabinan! sevobs, das ekömol demü God as tidan; ibä nek kanonöv duinön milagis, kelis eduinol, if God no binomöv ko on».
3. Yesus ägespikom ome: «Vö! vö! sagob ole, ek, pläsif pamotonöv dönu, no kanon logön regäni Goda».
4. ‚Nicodemus‛ äsagom ome: «Lio men kanon-li pamotön, ven labon ya bäldoti semik? No kanon ga gegolön dönu ini vüm mota okik, e täno pamotön»!
5. Yesus ägesagom: «Vö! vö! sagob ole, if ek no pamotonöv se vat e lanan, no kanon nügolön ini regän Goda.
6. Ut, kel pemoton se mid, binon mid: ed ut, kel pemoton se lanan, binon lanan.
7. No stunolöd, das esagob ole, mutols pamotön dönu!
8. Vien lebladon, kiöpio vilon; sio lilol toni onik, ab no sevol, kiöpao kömon, e kiöpio golon; so jenos pö alan, kel pemoton se lanan».
9. ‚Nicodemus‛ äsagom ome: «Lio atos kanon-li jenön»?
10. Yesus äsagom ome: «Binol tidal Yisraeläna, e no sevol-li atosi?
11. Vö! vö! sagob ole, kelosi sevobs, utosi spikobs, e kelosi elogobs, utosi temunobs, e temunodi obsik no lüsumols.
12. If no kredols dinis taledik, kelis lenunob oles, lio olekredols-li if lenunob oles dinis sülik?
13. Nek elöpiovegon lü sül, äsä utan, kel edoniovegom se sül, sevabo Son mena, kel binom in sül.
14. Leigoäsä ‚Moyses‛ elöpükom in däsärt sneki, so Son mena muton palöpükön,
15. dat alan, kel lekredon omi, no päridikonös, ab labonös lifi laidüpik!
16. Ibä so vemo God älöfom volanefi, das egivom Soni baliko pemotöli oka, dat alan, kel lekredon omi, no päridikonös, ab labonös lifi laidüpik!
17. Ibä God no älesedom Soni okik lü vol, ad cödön volanefi, ab, dat volanef pösavon fa om.
18. Utan, kel lekredon omi, no pacödon, ab utan, kel no lekredon, ya pemicödon, bi no elekredon nämätü Son baliko pemotöl Goda.
19. Ibä in atos cödot binon, das lit ekömon ini vol, e das mens ebuükons dagi; ibä vobods onsik äbinons badiks.
20. Ibä alutan, kel dunon badiko, heton liti, e no kömon ini lit, dat vobods onik no klülädons binön nenvöladiks.
21. Ab utan, kel dunon veratiko, kömon ini lit, dat sevädikos, das vobods onik pedunons baiädü vil Goda».
22. Pos atos Yesus e tidäbs omik ägoloms lü Yudän; ästebom us ko oms, ed äblunedom.
23. Ab i ‚Ioannes‛ äblunedom, in ‚Ainon‛ nilü ‚Salim‛; bi us vat mödik ädabinon. Äkömoy usio, e päblunedoy,
24. ibä ‚Ioannes‛ no nog pifanäböpom.
25. Nu bevü tidäbs anik ela ‚Ioannes‛ e yudans feit ädavedon tefü klinükam.
26. Äkömoms lü ‚Ioannes‛ ed äsagoms ome: «O rabinan! om, lä kel äbinol loveflanü el ‚Iordanis‛, dö kel etemunol, ekö! blunedom, e valans kömons lü om».
27. ‚Ioannes‛ ägespikom: «Men nonik kanon dagetön bosi, pläsif atos pegivon one se sül.
28. Ols it binols temunans obik, das esagob: Ob no binob Kristus, ab pelesedob bü om.
29. Utan, kel labom jigami binom higam; flen higama, kel stanom ad dalilön omi, fredom vemo ad lilön higami. Atos binon nu fred, me kel fulob.
30. Om mutom pluikön, ob läsikön.
31. Utan, kel kömom löpao, binom löpü valans; utan, kel licinom se taled, labom natäli taledik, e spikom ma mod taledik; ab om, kel kömom se sül, binom löpü valans.
32. Utosi, kelosi elogom ed elilom, temunom, e nek lüsumon temunodi omik.
33. Utan, kel lüsumon oni, lesion, das God binom veratik.
34. Ibä om, keli God elesedom, spikom vödis Goda; ibä givom Lanali no me maföm.
35. Fat löfom Soni okik, ed egivom vali ini nam omik.
36. Utan, kel lekredon Soni, labon lifi laidüpik, ed utan, kel no lekredon Soni, no ologon lifi, ab zun Goda oblibon su on».

KAPIT: IV

1. Ven Söl nu älelilom, das farisetans ililoms, das Yesus ävedükom tidäbis mödikum, ed äblunedom menis mödikum ka ‚Ioannes‛,
2. (do Yesus it no äblunedom, ab tidäbs omik),
3. Älüvom Yudäni, ed ägegolom lü Galileyän.
4. Demü atos ämutom tevön da Samaritän.
5. So äkömom lä zif ‚Sichar‛ pinemöl, nilü läned, keli ‚Iacob‛ ilegivom sone okik: ‚Ioseph‛.
6. Us fonäd di ‚Iacob‛ ädabinon. Yesus, kel ifenikom dub täv, äseidom oki nu lä fonäd. Äbinos zao düp mälid.
7. Usio vom se Samaritän äkömof ad kupön vati. Yesus äsagom ofe: «Givolös obe bosi ad drinön»!
8. Ibä tidäbs omik igoloms lü zif ad remön zibi.
9. Vom Samaritänik äsagof ome: «Lio-li? ol, kel binol yudan, begol-li obe: ji-Samaritänan bosi ad drinön»? (Ibä yudans no kosädons ko Samaritänans).
10. Yesus ägesagom ofe: «If äsevolöv givoti Goda, e kim utan binom, kel ebegom ole: Givolös obe bosi ad drinön, übegolöv ome vati liföl, ed ügivomöv oni ole».
11. Vom äsagof ome: «O Söl! no labol böketi, e fonäd binon dibik; kiöpao labol-li täno vati liföl?
12. Ga no binol gretikum ka fat obsik: ‚Iacob‛, kel egivom obes fonädi, e kel it edrinom se on, leigoäsä sons omik e veter omik»?
13. Yesus ägesagom ofe: «Alan, kel drinon de vat at, osoafon dönu;
14. ab utan, kel drinon de vat, keli ob givob one, laidüpio no plu osoafon, ab vat, keli givob one, ovedon in on fon vata, kel ofonon jü ini lif laidüpik».
15. Vom äsagof ome: «O Söl! givolös obe vati et! dat no plu osoafob, e no plu nedob kömön isio ad kupön».
16. Yesus äsagom ofe: «Gololöd ad vokön himatani olik, e kömolöd isio»!
17. Vom ägesagof ome: «No labob himatani». Yesus äsagom ofe: «Veräto esagol: no labob himatani,
18. ibä elabol himatanis lul, ed om, keli nu labol, no binom himatan olik; esagol verato atosi».
19. Vom äsagof ome: «O Söl! logob, das binol profetan.
20. Fats obsik eleplekoms Godi su bel at, ed ols: yudans sagols, das ‚Hierusalem‛ binon top, kö mutoy leplekön omi».
21. Yesus äsagom ofe: «O vom! kredolöd obi! düp okömon, kü ni su bel at, ni ün ‚Hierusalem‛ oleplekols Fati.
22. Leplekols utosi, kelosi no sevols; obs leplekobs utosi, kelosi sevobs; ibä leben binon se yudans.
23. Ab düp kömon, e nu binon, ün kel leplekans veratik oleplekons Fati me lan ed in verat. Ibä Fat sukom leplekanis somik.
24. God binom Lanal, ed utans, kels leplekons, mutons leplekön me lan ed in verat».
25. Vom äsagof ome: «Sevob, das Mäsiat, sevabo Kristus, okömom; ven ukömom, olenunom obes vali».
26. Yesus äsagom ofe: «Ob, kel spikob ko ol, binob utan».
27. Tü timül at tidäbs omik äkömoms, ed ästunoms, das äspikom ko vom. Nek äsagom ye: «Kisi desirol-li?» u «dö kis spikol-li ko of»?
28. Vom nu äleadof blibön böketi okik, ägolof lü zif, ed äsagof menes:
29. «Kömolsöd ad logön meni, kel esagom obe utosi valik, kelosi edunob! No binom-li bo Kristus»?
30. Äsegolons se zif, ed äkömons lü om.
31. Vüo tidäbs ävüdoms omi, ed äsagoms: «O Rabinan! Fidolös bosi»!
32. Ab äsagom omes: «Ob mutob fidön zibi, keli no sevols».
33. Tidäbs äsagoms täno odes: «Nek eblinon ga bosi ad fidön».
34. Yesus äsagom omes: «Zib obik binon ad fölön vili olesedana obik, e ad ledunön vobodi omik.
35. No sagols-li odulos nog dü muls fol, büä klopüp okömon? Ekö! sagob oles, lölogolsöd, logolsöd länedis, binons ya vietiks, blümons ad paklopön!
36. Fodan getom mesedi, e barakom greni pro lif laidüpik; dat e fodan e sovan fredoms kobo.
37. Ibä pö atos spiked binon veratik, utan kel sovom, binom votan, äsä utan, kel fodom.
38. Elesedob olis ad klopön utosi, pro kelos no etöbidols; votans etöbidons, ed ols edagetols prodi töbidas onsik».
39. Samaritänans mödik se zif et elekredons omi, nämätü sagod voma, kel ätemunof: «Esagom obe utosi valik, kelosi edunob».
40. E mens mödo mödikums älekredons omi nämätü sagod omik;
41. ed äsagons vome: «Lekredobs no plu nämätü sagod olik; ibä obs it elilobs osi, e sevobs, das atan binom verato Kristus: Sanal vola».
42. Pos dels tel ädetevom usao, ed ägolom lü Galileyän;
43. ibä Yesus it etemunom, das profetan no pastimom in lomän lönik oka.
44. Ven nu äkömom ini Galileyän, Galileyänans ägetedoms omi, bi ilogons vali, keli idunom in ‚Hierusalem‛ dü zäl; ibä i ons igolons lü zäl.
45. So äkömom dönu ini ‚Cana‛ in Galileyän, kö ivedükom vati ad vin. Nu in ‚Capharnaum‛ calan regik ädabinom, kela son äbinom malädik.
46. Ven älilom, das Yesus ikömom de Yudän lü Galileyän, ägolom lü om, ed äbegom ome ad doniokömön e sanön soni omik; ibä atan ägaonom.
47. Tän äsagom ome: «If no logols malis e milagis, no lekredols».
48. Calan äsagom ome: «O Söl! kömolös, büä cil obik deadom»!
49. Yesus äsagom ome: «Degololöd! son olik lifom». Man älekredom utosi, kelosi Yesus äsagom, ed ädegolom.
50. Ven nog äbinom su veg lü dom okik, hidünans omik äkosgoloms omi, ed änunoms: «Cil olik lifom».
51. Äsäkom nu omes, tü düp kinik isaunikom, ed äsagoms ome: «Ädelo tü düp velid fif elüvon omi».
52. Fat ädasevom, das Yesus isagom ome ün düp ebo ot: «Son olik lifom». Ed om e famül lölik omik ävedons lekrediks.
53. Milagi telid at Yesus dönu äduinom, ven de Yudän igolom lü Galileyän.

KAPIT: V

1. Pos atos zäl yudanas ädabinon, e Yesus ätevom lü ‚Hierusalem‛.
2. In ‚Hierusalem‛ nilü jipaleyan nu lulak ädabinon, kel panemon in hebrey: ‚Bethesda‛, labü leyals lul.
3. In ons lemödot malädanas äseatons: bleinans, boatans, lemikans (kels ästebedons mufikami vata.
4. Seimna silanan idonikom ini lulak, ed ämufükon vati; utan, kel nu pos mufikam vata äkömon balido ini on, äsaunikon, lindifo malädi kinik äsufon).
5. Ed us man ädabinom, kel äbinom malädik dü yels kildegjöl.
6. Ven Yesus äloegom seatön omi, ed äsevom, das iseatom so ya dü tim lunik, äsagom ome: «Vilol-li saunikön»?
7. Malädan ägesagom ome: «O Söl! labob neki, kel blinom obi ini lulak, ven vat mufikon, e du golob usio, votan donikon bü ob ini on».
8. Yesus äsagom ome: «Löädolöd, lasumolöd bedi olik e zigololöd»!
9. Sunädo äsaunikom, älasumom bedi okik, ed äzigolom. Äbinos nu tü del et jabat.
10. Yudans nu äsagoms utane, kel pisanom: «Binos jabat; no pedälos ole ad polön bedi olik».
11. Ägesagom omes: «Man, kel esanom obi, esagom obe: Lasumolöd bedi olik, e zigololöd»!
12. Äsäkoms nu ome: «Kim man binom-li, kel esagom ole: Lasumolöd bedi olik, e zigololöd»?
13. Pisanölan no äsevom, kim äbinom; ibä Yesus idegolom, du lemödot menas äbinon us.
14. Latikumo Yesus ätuvom omi in tem, ed äsagom ome: «Ekö! esaunikol; sinolöd no plu, dat no bos badikum drefonös oli»!
15. Tän man ägolom lü yudans ad nunön omes, das Yesus äbinom utan, kel isaunükom omi.
16. Sekü atos yudans äpöjutoms omi, bi äduinom dinis somik tü jabat.
17. Ab Yesus ägespikom omes «Fat obik ai vobom jünu, ed i ob vobob».
18. Sekü atos, yudans ästeifoms nog plüo ad deidön omi, bi no te äviodom jabati, ab i änemom Godi Fati lönik okik, e so äleigädom kluo oki Gode.
19. Yesus äsagom kluo omes: «Vö! vö! sagob oles: Son kanom dunön nosi itao, pläsif logom, das Fat dunom osi; ibä kelosi om dunom, utosi Son dunom leigo.
20. Ibä Fat löfom Soni, e jonom ome utosi valik, kelosi om it dunom, ed ojonom ome vobodis nog gretikumis; dat ostunols.
21. Leigoäsä Fat lelifükom e vedükom lifikis deadanis, so Son lelifükom utanis, kelis vilom lelifükön.
22. Si! Fat cödom igo neki, ab elovegivom cödi lölik Sone;
23. das valans stimonsös Soni, leigoäsä stimons Fati. Utan, kel no stimon Soni, no stimon Fati, kel elesedom omi.
24. Vö! vö! sagob oles: utan, kel lelilon vödi obik, e lekredon Lesedani oba, dalabon lifi laidüpik e no okömon lü cödetam lätik, ab ya eloveikon se deadam ini lif.
25. Vö! vö! sagob oles, düp kömon, e ya eprimon, ün kel deadans lelilons vögi Sona Goda, ed utans, kels lelilons oni, olifons.
26. Ibä leigoäsä Fat labom lifi in ok it, so i egivom Sone fägi ad labön lifi in ok it.
27. Ed ägivom ome gitodi ad gitädön, bi binom Son mena.
28. No stunolsöd! ibä düp kömon, ün kel valans, kels seatons in sepüls, olelilons vögi omik,
29. ed osegolons: utans, kels edunons gudi, lü loveikam ini lif; utans, kels edunons badi, lü loveikam ad micöd.
30. No kanob dunön bosi se ob it; cödob ma utos, kelosi lilob, e cödot obik binom gidik, bi no säkob utosi, kelosi ob vilob, ab utosi, kelosi Lesedan oba vilom.
31. If temunob obi it, tän temunod obik no binon konfidovik.
32. Binos Votan, kel temunom obi, e sevob, das temunod, keli gevom dö ob, binon veratik.
33. Elesedols manis lü ‚Ioannes‛, ed etemunom verati.
34. Ab no lüsumob temunodi mena, e sagob te atosi, dat padakipolsös!
35. Äbinom lampad filöl kleiliko stralöl, in lit kela evilols fredön dü brefüp.
36. Ab labob temunodi, kel völadon mödikumo, ka ut ela ‚Ioannes‛; ibä vobods, kelis Fat ebligädom obe ad dunön, vobods, kelis dunob, temunons tefü ob, das Fat elesedom obi.
37. E Fat, kel älesedom obi, etemunom obi. Vögi omik neai elilols, magedi omik neai elogols,
38. e vödi omik no labols ninälo asä dalaboti dulik, ibä no lekredols utani, keli elesedom.
39. Vestigols penädis, bi cedols ad labön in ons lifi laidüpik; e do temunons tefü ob,
40. no vilols kömön lü ob ad dalabön lifi.
41. No lüsumob stimi de mens,
42. ab tefü ols edasevob, das no labols ninälo löfi pro God.
43. Ekömob nemü Fat obik, e no lüsumols obi; if votan kömom nemü ok it, sio olüsumols omi.
44. Lio kanols-li lekredön, ven lüsumols de ods stimi; e no desirols stimi de God balik?
45. No niludolsöd, das okusadob olis Fate! kusadan olas ‚Moyses‛ binom, ad kel elonülols speli olsik.
46. If lekredolsöv eli ‚Moyses‛, lekredolsöv i obi; ibä epenom tefü ob.
47. Ab if no lekredols penädis omik, lio olekredolsöv-li vödis obik»?

KAPIT: VI

1. Pos atos Yesus ägolom lü votaflan laka Galileyäna, sevabo laka di ‚Tiberias‛.
2. Lemödot gretik menas äsökon omi, bi älogons milagis, kelis äduinom pö malädans.
3. Yesus äbexänom beli, ed äseidom oki us ko tidäbs okik.
4. Äbinos brefüp bü pajad: zäl yudanas.
5. Ven nu älöükom logis okik, ed älogom, das mödot gretik äkömon lü om, äsagom ele ‚Philippus‛ : «Kiöpo oremobs bodi, dat kanons fidön»?
6. Äsagom atosi ome, ad blufön omi; ibä äsevom utosi, kelosi ödunom.
7. ‚Philippus‛ ägesagom ome: «Bod tä denars teldeg no saidon, dat alan onas geton diledi smalik».
8. Tän balan tidäbas omik: ‚Andreas‛: blod ela ‚Simon Petrus‛ äsagom ome:
9. «Is hipul dabinom, kel labom hodabodedis lul e fitis tel. Ab kis ats binons-li pro mens so mödiks»?
10. Yesus äsagom: «Leadolsöd doseatön menis»! Yeb mödik ädabinon in top et. Mans ädoseatoms kluo; num omas äbinon zao lulmil.
11. Nu Yesus äsumom bodis, e posä idanom, äseagivom onis utanes, kels idoseatons; leigo i de fits somödikis, äsä ävilons.
12. Ven äsatons, äsagom tidäbes okik: «Konletolsöd brekotis eretöl, dat nos moikonös»!
13. Äkonletoms kluo brekotis, ed äfulükoms bäsetis degtel me brekots hodabodedas lul, kels piretükons fa zibäbs.
14. Ven mens älogons milagi, keli iduinom, äsagons: «Binom verato profetan, kel ökömom ini vol»!
15. Yesus, äsevöl, das ökömons ad vedükön omi mekädo regi, ävitom onis, ed äbexänoms go soeliko dönu beli.
16. Ven ivedos soar, tidäbs änexänoms lü lak,
17. Äboidoms oki ini naf, ed änafoms love lak lü ‚Capharnaum‛. Ivedos ga dagik, e Yesus no nog ikömom lä oms.
18. Lak äbinon mäpetik, bi ävienos vemo.
19. Ven inafoms zao mö staids teldeglul u kildeg, äloegoms golön Yesusi su lak, e nilikön lü naf. Ed ädredikoms vemo;
20. ab äsagom omes: «Binos ob; no dredolsöd»!
21. Ven äviloms lasumön omi ini naf, naf äbinon sunädo len jol, ebo us, kö äviloms golön.
22. Tü del sököl mödot menas, kel iblibon su votaflan laka, älogon, das naf votik no äbinon us, äsä ut, in kel Yesus no iboidom oki ko tidäbs okik, ab das tidäbs oma idenafoms soeliko.
23. (Vüo ye nafils se ‚Tiberias‛ äkömons nilü top, kö ifidons bodi, posä Söl idanom demü on).
24. Ven menamödot nu älogon, das ni Yesus, ni tidäbs omik äbinoms us, äboidons okis ini nafs ed änafons lü ‚Capharnaum‛ ad sukön Yesusi.
25. E ven ituvons omi tö votaflan laka, äsagons ome: «O Rabinan! kitimo ekömol-li is»?
26. Yesus ägesagom ones: «Vö! vö! sagob oles, sukols obi, no bi elogols milagis, ab bi efidols de bodeds, e pesatükols.
27. No jafidolsöd zibi nelaidik, ab zibi, kel laidon jü lif laidüpik, keli Son mena ogivom oles; ibä sui om God: Fat estäpedom snili okik»!
28. Äsagons täno ome: «Kisi mutobs-li dunön ad dunön vobodis pro God plitikis»?
29. Yesus ägesagom ones: «Atos binon vobod pro God plitik: ad lekredön omi, keli elesedom».
30. Äsagons ome: «Milagi kinik duinol-li üfo? dat logobsös oni, e lekredobsös oli! Vobodi kinik dunol-li?
31. Büröletans obsik efidons manadi in däsärt; soäsä pepenos: ‚Egivom ones ad fidön bodi se sül‛».
32. Tän Yesus äsagom ones: «Vö! vö! sagob oles, ‚Moyses‛ no egivom oles bodi se sül, ab Fat obik givom oles bodi veratik se sül.
33. Ibä bod Goda binon ut, kel donikon se sül, e givon vole lifi».
34. Tän äsagons ome: «O Söl! givolös obes ai bodi et»!
35. Yesus äsagom ones: «Ob binob bod lifa; utan, kel kömon lü ob, no plu ofaemon, ed utan, kel lekredon obi neföro plu osoafon.
36. Ab esagob ya oles: Elogols obi, e ga no lekredols.
37. Utos valik, kelosi Fat givom obe, okömon lü ob; ed utani, kel kömon lü ob, fümo no odeimob,
38. ibä no edonikob se sül, ad dunön vili obik, ab ad dunön vili utana, kel elesedom obi.
39. Ed atos binon vil Lesedana oba, das no perob bosi de utos, kelosi egivom obe, ab das olelifükobös osi tü del lätik»!
40. Ibä atos binon vil Fata obik, kel elesedom obi, das alan, kel logon Soni, e lekredon omi, labonös lifi laidüpik, ed olelifükob oni tü del lätik».
41. Tän yudans ämurons dö om, bi äsagom: «Binob bod, kel edonikob se sül,»
42. ed äsagons: «No binom-li Yesus: son ela ‚Ioseph‛, kela fati e moti sevobs? Lio kanom-li üfo sagön: Edonikob se sül»?
43. Yesus nu äsagom ones: «No murolsöd ko ods!
44. Nek kanon kömön lü ob, pläsif Fat, kel elesedom obi, tirom oni, ed ob olelifükob oni tü del lätik.
45. In penäds profetanas pepenos: ‚E valanes putidos fa God‛. Alan, kel lilon, kele petidos dö Fat, kömon lü ob.
46. Nek dabinon, kel elogon Fati, äsä utan, kel ekömom de God; te atan elogom Fati.
47. Vö! vö! sagob oles, utan, kel lekredon, labon lifi laidüpik.
48. Ob binob bod lifa.
49. Büröletans olsik äfidons in däsärt manadi, ed edeadons.
50. Atos binon bod, kel donikon se sül, dat fidoyös de at, e no deadoyös!
51. Ob binob bod liföl, kel edonikon se sül; if ek fidon de bod at, olifon laidüpo. E bodi, keli ogivob, binon mid obik, keli ogivob pro lif volanefa».
52. Nu yudans äfeitons bevü ods äsagölo: «Lio kanom-li givön obes ad fidön midi okik»?
53. Yesus äsagom ones: «Vö! vö! sagob oles, if no fidols midi Sona mena, e no drinols bludi omik, no labols ninälo lifi.
54. Utan, kel fidon midi oba e drinon bludi oba, labon lifi laidüpik, ed olelifükob oni tü del lätik.
55. Ibä mid oba binon verato zib, e blud oba binon verato drined.
56. Utan, kel fidon midi oba, blibon ninälü ob, ed ob blibob ninälü on.
57. Leigoäsä Fat lifik elesedom obi, ed ob lifob dub Fat, so i utan, kel fidon obi, olifon dub ob.
58. Atos binon bod, kel edonikon se sül, no äsä manad pö büröletans olsik, kels äfidons oni, ed ädeadons; utan, kel fidon bodi at, olifon laidüpio».
59. Atosi äsagom, ven ätidom in sünagog di ‚Capharnaum‛.
60. Ven äliloms atosi, mödikans tidäbas omik äsagoms: «Vöd at binon düfälik. Kin kanon-li lülilön oni»?
61. E Yesus, kel äsevom ninälo, das tidäbs ämuroms dö atos, äsagom omes: «Atos skänon-li olis?
62. Ab lio obinos-li, ven oloegols löpikön Soni mena utöpio, kö äbinom büikumo?
63. Lanöf binon ut, kel jafon lifi; mid binon vero nenfrutik. Vöds, kelis espikob lü ols, binons lanöf, binons lif.
64. Ab bevü ols mens binons, kels no lekredons». Ibä Yesus äsevom primao, kins äbinons utans, kels älekredons, e kim äbinom utan, kel öträtom omi.
65. Ed äsagom: «Sekü atos esagob oles, das nek okanon kömön lü ob, pläsif atos pekodon one fa Fat».
66. De ettim mödikans tidäbas omik ädeflekons okis de om, e no plu äsökons omi.
67. Tän Yesus äsagom degtelanes: «No i ols vilols-li mogolön»?
68. ‚Simon Petrus‛ ägesagom ome: «O Söl! lü kim golobsöv-li? Ol labol vödis lifa laidüpik,
69. ed obs lekredobs e dasevobs, das binol Kristus, Son Goda».
70. Yesus ägesagom omes: «No evälob-li olis degtel? e balan bevü ols binom diab».
71. Atosi äsagom demü ‚Iudas‛: son ela ‚Simon‛ di ‚Kariot‛; ibä atan, bal degtelanas, öträtom omi.

KAPIT: VII

1. Pos atos Yesus äzitevom in Galileyän; ibä no ävilom stebön in Yudän, bi yudans ästeifons ad deidön omi.
2. Tabärazäl: zäl yudanas nu änilikon,
3. e blods omik äsagoms ome: «Gololöd isao, e gololöd lü Yudän, dat i tidäbs olik logomsös vobodis, kelis dunol!
4. Ibä nek, kel steifon ad sevädön notidiko, dunon kläniko bosi. If dunol dinis at, dajonolöd oli volanefe»!
5. Ibä igo blods omik no älekredoms omi.
6. Yesus äsagom omes: «Tim obik no nog ekömon, tim olsik ai komon.
7. Volanef no kanon hetön olis, ab heton obi, bi temunob dö on, das vobods onik binons badiks.
8. Gololsöd ols lü zäl! Ob no nog golob lü zäl at; ibä tim oba no nog finon».
9. Posä isagom atosi omes, äblibom in Galileyän.
10. Ven ye blods omik idegoloms, i om ägolom lü zäl, no notidiko, ab kläniko.
11. Yudans äsukoms omi pö zäl, ed äsagoms: «Kiöpo binom-li»?
12. In menamödots ämuroy mödiko dö om. Anans äsagons: «Binom man gidik»; votans güo: «Nö! bätodom menamödoti».
13. Ab nek äspikon notidiko dö om, sekü dred pro yudans.
14. Ven laf zäla ya ipasetikon, Yesus ägolom lü tem ed ätidom us.
15. Yudans ästunoms, ed äsagoms: «Lio mögos-li, das nolom penädis, du no edagetom tidi»?
16. Yesus ägesagom omes: «Lejon obik no rigon de ob, ab de om, kel elesedom obi.
17. Alutan, kel klienon ad fölön vili omik, osevon, va lejon et binon se God, u va spikob se ob it.
18. Utan, kel spikon se ok it, besteifon stimi lönik okik; ab utan, kel besteifon stimi Lesedana okik, binon veratik, e negid no binon in on.
19. ‚Moyses‛ no egivom-li oles lonemi? E nek olas dunol ma lonem. Sekü kis steifols-li ad deidön obi»?
20. Menamödot ägesagon: «Diabäbol! Kin steifon-li ad deidön oli»?
21. Yesus ägesagom ones: «Te vobodi bal eduinob, ed ols valik stunols dö atos.
22. ‚Moyses‛ ebüdülom oles säprepüdami, (at ye no rigikon de ‚Moyses‛, ab de rufats), e säprepüdols meni tü jabat!
23. If ek pasäprepüdom tü jabat, dat lonem no paviodom, vio zunols-li dö ob, bi esanob meni lölik tü jabat?
24. No cödolsöd ma jin, ab cödolsöd gidiko»!
25. Tän anans elanas di ‚Hierusalem‛ äsagons: «Atan no binom-li man, kela deidi besteifoms?
26. Ed ekö! spikom notidiko, e no sagoms ome bosi. Löpals edasevoms-li bo mögiko, das binom jenöfo Kristus?
27. Ab de man at sevobs kiöpao kömom, e ven Kristus kömom, nek osevon, kiöpao kömom».
28. Yesus nu äpredom laodiko in tem: «Sevols obi, e sevols kiöpao ekömob, ab no kömob se vil oba it, ab utan, kel elesedom obi; binom veratik, ed omi no sevols.
29. Ob sevob omi, ibä kömob de om, ed om elesedom obi».
30. Tän ästeifoms ad fanön omi, ab nek ägleipom omi; ibä düp omik no nog ikömon.
31. Mödikans se menamödot älekredons omi, ed äsagons: «If Kristus okömomöv mögädo, no okanom ga duinön milagis mödikum, ka om eduinom».
32. Ven farisetans äliloms, das menamödot ämuron so dö om, farisetans e lekultans älesedoms hidünanis ad fanön omi.
33. Yesus äsagom täno: «Nog dü brefüp binob lä ols, tän golob lü utan, kel elesedom obi.
34. Osukols obi, e no otuvols obi, e lü utöp, kö obinob, no kanols golön».
35. Ad atos yudans äsagons odes: «Lü top kinik ogolom-li, kö no kanobs tuvön omi? Ovilom ga no golön lü Helänan spearik, e tidön Helänanes.
36. Kis utos sinifon-li, kelosi äsagom: Osukols obi, e no otuvols obi, e lü utöp, kö obinob, no kanols golön»?
37. Tü del lätik: del gretikün zäla, Yesus ästanom ed äsagom laodiko: «If ek soafon, on kömonös lü ob, e drinonös!
38. Dö utan, kel lekredon obi, penäd bibik sagon: ‚flums vata liföl oflumons se ninäl onik‛».
39. (Me atos ädiseinom Lanali, keli utan, kel lekredonöv omi, ögetonöv; ibä Saludalanal no nog ädabinon, bi Yesus no nog piglorükom).
40. Anans se menamödot äsagons, ven älilons atosi: «Atan binom verato profetan».
41. Votans äsagons: «Binom Kristus»; votans: «Kristus ga no kömom se Galileyän.
42. Penäd bibik no sagon-li, das Kristus okömom se posbinanef de ‚David‛, se ‚Bethlehem‛: top kö ‚David‛ älödom»?
43. So in menamödot teläl ädavedon dö om.
44. Anans se ons ävilons fanön omi, ab nek ägleipon omi.
45. E hidünans ägegoloms lü lekultans e farisetans, e ven atans äsäkoms omes: «Kikodo no ekeblinols-li omi»?
46. Hidünans ägesagoms: «Neföro man äspikom, soäsä atan äspikom».
47. Farisetans ägesagoms omes: «I ols ga no pebätodols!
48. Nek se cifodans ga elekredoms omi, ni bal farisetanas.
49. Ab pöp at, kel no nolon lonemi, pemalediton».
50. Tän äsagom omes ‚Nicodemus‛: bal omas, kel ikömom seimna ün neit lä Yesus:
51. «Lonem obsik micödeton ga neki, büä edasäkoy omi, e büä evestigoy utosi, kelosi dunom».
52. Ab ägesagoms ome: «Ol ga i no ekömol se Galileyän. Vestigolöd ed ologol, das neföro profetan esüikom in Galileyän».
53. (Tän alan ägolon lü dom okik.

KAPIT: VIII

1. Yesus ägolom lü Learabel.
2. Tü göd sököl äkömom dönu ini tem, e pöp lölik äkömon lü om; äseidom oki, ed ätidom onis.
3. Tän bibinolavans e farisetans äblinoms lü om vomi, kel ädulteröl piküpodof fa oms; äpladoms ofi zänü mens;
4. ed äsagoms ome: «O Mastan! vom et duni ädunöl peküpodof, ven ädulterof.
5. Nu ‚Moyses‛ ebüdülom obes in lonem ad stonön vomis somik. Kisi sagol-li dö atos»?
6. Äsagoms atosi ad blufön omi, ad labön kodi ad kusadön omi. Yesus äbiegädom, ed äpenom me doat ini glun.
7. Ven äfovoms ad säkön ome, älöädom ed äsagom omes: «Utan olas, kel binom nen sinods, jedonöd stoni balid sui of»!
8. E dönu äbiegädom, ed äpenom ini glun.
9. Ven äliloms atosi ämogoloms, balan pos votan, äprimölo de bäldikünan. Ed äretom soeliko ko vom, kel ästanof fo om.
10. Posä Yesus ilöädom, äsagom ofe: «O vom! Kitopo kusadans ola binoms-li? Nek emicödetom-li oli»?
11. Äsagof: «Nek, o Söl»! Tän Yesus äsagom ofe: «I ob no micödetob oli. Mogololöd, e sinolöd no plu»!)
12. Dönu Yesus äspikom lü ons: «Ob binob lit vola. Utan, kel sökon obi, no ogolon in dag, ab olabon liti lifa».
13. Tän farisetans äsagoms ome: «Temunol dö ol it. Temunod olik no binon veratik».
14. Yesus ägesagom omes: «Ven temunob dö ob it, temunod obik ga binon veratik, ibä sevob, kiöpao ekömob e kiöpio golob, ab ols no sevols, kiöpao ekömob, u kiöpio ogolob.
15. Cödols ma mid; ob cödob neki.
16. Ed if cödob obi, cödot obik binon veratik, ibä no binob soelik; utan, kel elesedom obi, binom ko ob.
17. I in lonem olsik pepenos: ‚Temunod menas tel binon lonöfik‛.
18. Ob binob utan, kel temunob dö ob it, e Fat, kel elesedom obi, temunom dö ob».
19. Äsagoms ome: «Kiöpo fat olik binom-li»? Yesus ägesagom: «Sevols ni obi, ni Fati obik; if sevolsöv obi, sevolsöv i Fati obik».
20. Atosi äspikom, ven ätidom in divöp tema; e nek ägleipom omi, ibä düp omik no nog ikömon.
21. Dönu Yesus äspikom lü ons: «Mogolob, osukols obi, ed odeadols in sinods olsik. Utöpo, kö lügolob, no kanols kömön».
22. Yudans äsagons täno: «Ga no odeidom oki it, bi sagom: Utöpo, kö lügolob, no kanols kömön».
23. Äsagom ones: «Binols de don, ed ob binob de löp; binols se vol at, ob no binob se vol at.
24. Sekü atos, äsagob oles, das odeadols in sinods olsik; ibä if no lekredols, das binob utan, tän odeadols in sinods olsik».
25. Äsagons lü om: «Kim binol-li»? Yesus äsagom ones: «Utan, keli primao esagob oles.
26. Binos mödik, kelosi mutob sagön e cödön tefü ols, ab utan, kel elesedom obi, binom veratik; ed utosi, kelosi lilob de om, sagob volanefe».
27. No äsuemons, das äspikom ones dö Fat.
28. Tän Yesus äsagom: «If ulöpükols Soni mena, odasevols, das binob utan, e das dunob nosi se ob it, ab das spikob, äsä Fat etidom obe.
29. Utan, kel elesedom obi, binom ko ob; no eletom obi soeliki; ibä dunob ai utosi, kelos pliton omi».
30. Ven äspikom so, mödikans älekredons omi.
31. Tän Yesus äsagom yudanes, kels älekredons omi: «If bleibols lekredön vödis obik, tän binols verato tidäbs obik;
32. odasevols verati, e verat ovedükon olis libikis».
33. Ägesagons ome: «Binobs posbinans ela ‚Abraham‛, ed edünobs neai eki; lio sagol-li üfo, das ovedobs libiks»!
34. Yesus ägesagom ones: «Vö! vö! sagob oles, alutan, kel sinon, binon slafan sina.
35. Slafan no blibon laidüpo in dom, ab son blibom us laidüpo.
36. If Son nu ovedükom olis libikis, tän obinols verato libiks.
37. Sevob, das binols posbinans ela ‚Abraham‛; ab steifols ad deidön obi, bi vöd obik no evogikon pö ols.
38. Utosi, kelosi elogob pö Fat obik, nunob oles; ols ga i dunols utosi, kelosi elilols de fats olsik».
39. Ägesagons ome: «Fat obsik ‚Abraham‛ binom». Yesus äsagom ones: «If binolsöv cils ela ‚Abraham‛, dunolsöv vobodis ela ‚Abraham‛;
40. nu steifols ad deidön obi: men, kel esagom oles verati, keli elilom de God. Atosi ‚Abraham‛ no ädunom.
41. Dunols vobodis fatas olsik». Äsagons ome: «No pefatobs in nepued; labobs Fati bal: God».
42. Tän Yesus äsagom ones: «If God binomöv Fat olas, löfolsöv obi; ibä egolob ed ekömob de God. Ibä no ekömob se ob it, ab om elesedom obi.
43. Sekü kod kinik no suemols-li sagodi obik? Bi no fägols ad dalilön vödi obik.
44. Binols se fat olsik, se diab, e vilols dunön ma desir fata olsik. Äbinom primao menisasenan, e verat no ädabinon in om. Ven sagom lugi, tän spikom se ok it; ibä binom lugan, e fat luga.
45. Ab obi, bi sagob verati, no lekredols.
46. Kin olas süadükon-li obi de sinod? If sagob verati, kikodo täno no lekredols-li obi?
47. Utan, kel binon se God, dalilon vödis Goda; sekü kod at no dalilols onis, bi no binols se God».
48. Yudans ägesagons ome: «No sagobs-li gideto, das binol Samaritänan e diabäbol»?
49. Yesus ägesagom: «No diabäbob, ab stimob Fati obik, ed ols sästimols obi.
50. No steifob ad pastimön; bal dabinom, kel flagom stimi, e kel cödom.
51. Vö! vö! sagob oles, if ek demon vödi obik, laidüpo no ologon deadi».
52. Yudans täno äsagons ome: «Nu sevobs, das diabäbol. ‚Abraham‛ edeadom, ed i profetans, e sagol: If ek demon vödi obik, laidüpo no ologon deadi.
53. Ol ga no binol mödikum, ka fat obsik ‚Abraham‛, kel edeadom; ed i profetans edeadoms. Kimi vedükol-li oli it»?
54. Yesus ägespikom: «If glorükob obi it, glor obik leno völadon; ab binos Fat obik, kel glorükom obi; om, keli nemols Godi olsik.
55. Ols ye no sevols omi; ob sevob omi. If sagoböv, das no sevob omi, binoböv leigo äsä ols, lugan. Ab sevob omi e demob vödi omik.
56. ‚Abraham‛: fat olsik äspetom yubölo ad logön deli obik; älogom oni ed äfredom».
57. Tän yudans äsagons ome: «Labol no nog lifayelis luldeg, ed elogol-li eli ‚Abraham‛»?
58. Yesus äsagom ones: «Vö! vö! sagob oles, büä ‚Abraham‛ pämotom, ob ädabinob».
59. Nu älasumons stonis, ad jedön onis sui om; ab Yesus äklänedom oki, ed ägolom zänodü mens se tem; e so äskeapom.

KAPIT: IX

1. Äbeigolölo älogom mani, kel äbleinom motedao.
2. Tidäbs omik äsäkoms ome: «O Rabinan! Kin esinon-li: om-li u pals-li omik, das pemotom bleiniko»?
3. Yesus ägesagom: «Ni om, ni pals omik esinons; ab atos ejenon, dat vobods Goda padasevädükonsös in om!
4. Mutob dunön vobodis utana, kel elesedom obi, dü tim, das binos del; neit okömon, tü kel nek okanon vobön.
5. Dü tim, ün kel binob in vol, ob binob lit vola».
6. Posä isagom atosi, äspukom sui glun, ämekom de spukot slämi, ed äseitom slämi sui logs bleinana,
7. ed äsagom ome: «Gololöd, ad lavön oli in lulak di ‚Siloe‛ (kel sinifon: lesedäb)! ädegolom, älavom oki, ed äzigolom logölo.
8. Nilädans omik, ed utans, kels ilogons omi as lubegan, äsagons: «Atan no binom-li man, kel äseatom ad lubegön»?
9. Anans äsagons: «Si! binos om; votans: «Nö! sümedom om». Om äsagom: «Binos ob it».
10. Äsagoms ome: «Lio üfo logs olik emaifikons-li»?
11. Ägesagom: «Man, kel panemom Yesus, ämekom slämi ed änüröbom logis obik me on; äsagom obe: Gololöd lü lulak di ‚Siloe‛, e lavolöd oli! Posä egolob usio, ed elavob obi, kanob logön».
12. Äsäkons ome: «Kiöpo binom-li»? äsagom: «No sevob osi».
13. Äblinons omi, sevabo utani, kel ibleinom, lü farisetans.
14. Nu del, kü Yesus imekom slämi ed imaifükom logis omik, äbinon jabatadel.
15. I farisetans älonüloms ome dönu säki ot, vio idagetom logamafägi. Äsagom omes: «Eseitom slämi sui logs obik, elavob obi, e fägob ad logön».
16. Anans farisetanas äsagoms: «Man at no kömom de God; ibä no demom jabati». Votans äsagoms: «Lio man sinik kanom-li duinön milagis somik»? E bevü oms teläl ädavedon.
17. Dönu äsagoms bleinane: «Kisi ol sagol-li dö om, bi emaifükom logis olik»? äsagom: «Binom profetan».
18. Yudans no äkredons ga tefü om, das ibleinom, ed idagetom logamafägi, büä ivokoms palis utana, kel ivedom logöl,
19. ed isäkoms ones: «Atan binom-li son olsik, dö kel sagols, das pemotom bleiniko? Lio kanom-li üfo logön nu»?
20. Pals omik ägesagons: «Sevobs, das atan binom son obsik, e das pemotom bleiniko;
21. vio kanom logön nu, no sevobs; e kin emaifükon logis omik, no sevobs. Binom daülik, säkolsöd ome; ospikom dö ok it»!
22. Atosi pals omik äsagons, bi ädredons demü oms; ibä yudans isludoms ya, das utan, kel ölekoefon, das om äbinom Kristus, pöxilülon se sünagog.
23. Sekü kod at, pals äsagons: «Binom daülik. Dasäkolsöd ols it omi»!
24. Ävokoms kluo dönu mani, kel äbleinom, ed äsagoms ome: «Givolöd stimi Gode! Sevobs, das man et binom sinan».
25. Ägesagom: «Va binom sinan, no sevob; dini bal sevob: das äbleinob, e das nu fägob ad logön».
26. Äsäkoms ome dönu: «Kisi edunom-li pö ol? Lio emaifükom-li logis olik»?
27. Ägespikom omes: «Esagob ya osi ole, ab no edalilols obi. Sekü kod kinik vilols-li lilön osi dönu? Vilols ga no vedön tidäbs omik».
28. Tän äzanädoms omi: «Binol tidäb omik! Obs binobs tidäbs ela ‚Moyses‛!
29. Sevobs, das God espikom lü ‚Moyses‛, ab tefü om, no sevobs, kiöpao binom».
30. Man ägespikom omes: «In atos bos bisarik binon, das no sevols, kiöpao binom, du emaifükom ga logis obik.
31. Sevobs, das God no dalilom sinanis, ab dalilom eki, if binom relöfik, e dunon ma vil omik.
32. Nog neföro eliloy, das ek emaifükon logis mena bleiniko pemotöla.
33. If no ikömomöv de God, no öfägomöv ad dunön bosi».
34. Ägesagoms ome: «Pemotol lölöfiko in sinods, ed ol vilol-li tidön obis»? ed äsejedoms omi.
35. Yesus älelilom, das isejedoms omi, e ven ätuvom omi, äsagom ome: «Lekredol-li Soni Goda»?
36. Ägesagom: «Kim binom-li utan? o Söl! tän olekredob omi».
37. Yesus äsagom ome: «Elogol omi; om, kel spikom ko ol, binom utan».
38. Äsagom: «Lekredob, o Söl»! ed ästimodom omi.
39. E Yesus äsagom: «Ekömob ini vol at ad cödön: De utans, kels bleinons, logs pamaifükons; ed utans, kels logons, vedons bleiniks».
40. Farisetans anik, kels äbinoms lä om, äliloms atosi, ed äsagoms ome: «I obs ga binobs no bleiniks».
41. Yesus äsagom omes: «If binolsöv bleiniks, no labolsöv sinodi; ab, bi sagols: logobs, sinod nu blibon pö ols».

KAPIT: X

1. Vö! vö! sagob oles: Kel no nügolom da yan ini lecek jipas, ab nüxänom votöpao, utan binom tifan e ravan;
2. kel ye nügolom da yan, utan binom galedan jipas.
3. Pro om yanan maifükom yani, e jips lilons vögi omik; vokom jipis lönik okik me nems onsik, e dugom onis plödio.
4. Ven esemofom jipis, kels dutons lü om, tän golom fo ons, e jips sökons omi, bi sevons vögi omik.
5. Foginani leno osökons, ab ofugons de om, bi no sevons vögi omik».
6. Parabi at Yesus äsagom ones, ab no äsuemons utosi, kelosi äsagom ones.
7. Tän Yesus äsagom dönu ones: «Vö! vö! sagob oles, das ob binob yan jipas.
8. Valans, kels ekömoms bü ob, binoms tifans e ravans, ab jips no edalilons omis.
9. Ob binob yan; if ek nügolon da ob, tän posavon, onügolon ed osegolon, ed otuvon bäläti.
10. Tifan kömom te ad tifön, ad deidön, ad rübükön; ob ekömob, dat olabonsöv lifi e bundani!
11. Binob galedan gudik. Galedan gudik gividom lifi okik pro jips.
12. Ab hüräb, kel no binom galedan, e lü kel jips no dutons, loegom kömön lupi, lüvom jipis e fugom, e lup gleipon jipis e spearükon onis.
13. Hüräb fugom, bi binom hüräb e no kälälom jipis.
14. Ob binob galedan gudik; sevob obikis ed obiks sevons obi.
15. Leigoäsä Fat sevom obi, sevob Fati, e gividob lifi obik pro jips.
16. Labob nog jipis votik, kels no binons de lecek at; i onis mutob dugön, olilons vögi obik; ed odavedons jep bal e galedan bal.
17. Sekü atos Fat löfom obi, bi gividob lifi obik, ad gesumön dönu oni.
18. Nek sumon oni de ob, ab ob it gividob oni; labob fägi ad gividön oni, e labob fägi ad gesumön dönu oni. Büdi at egetob de Fat obik».
19. Dönu teläl ädavedon pö yudans dub vöds at.
20. Mödans onas äsagons: «Diabäbom, spikom stupädo. Kikodo dalilols-li omi»?
21. Votans äsagons: «Ats no binons vöds diabäba. Diab fägom-li ad maifükön logis bleinanas»?
22. Täno in ‚Hierusalem‛ zäl saludükama tema äkömon. Äbinos nifüp,
23. e Yesus äzispatom in tem, in yal di ‚Salomon‛.
24. Us yudans äzüoms omi ed äsagoms ome: «Dü tim liomödik spetätükol-li obis? If binol Kristus, sagolöd üfo stedälo osi obes»!
25. Yesus ägesagom omes: «Esagob osi oles, e no elekredols osi. Vobods, kelis dunob nemü Fat obik, temunons pro ob.
26. Ab ols no lekredols, ibä no dutols lü jips obik. Äsä esagob oles,
27. jips obik dalilons vögi obik; sevob onis, sökons obi,
28. ed ob givob ones lifi laidüpik; neföro pofätükons, e nek odegleipon onis se nams obik.
29. Fat obik, kel egivom onis obe, binom nämädikum ka valans, e nek fägon ad degleipön onis se nams Fata obik.
30. Ob e Fat binobs dabinan bal».
31. Dönu yudans älasumoms stonis ad stonön omi.
32. Yesus ägespikom omes: «Vobodis gudik mödik nämätü Fat obik edajonob oles: demü kin vobodas et stonols-li obi»?
33. Yudans ägespikoms ome: «No vilobs stonön oli kodü vobod gudik, ab kodü blasfäm; bi ol, kel binol men, godol oli it».
34. Yesus ägesagom omes: «No pepenos-li in lonem olsik: ‚Esagob: Binols gods‛?
35. If nu nemon godis utanis, lü kels vöd Goda ekömon, e pepenölos, das no kanon pasälonöfükön,
36. sagols-li täno dö utan, keli Fat esaludükom ed elesedom ini vol: Blasfämol; bi esagob: Binob Son Goda?
37. If no dunob vobodis Fata obik, tän no lekredolsöd obi!
38. Ab if dunob onis, e no lekredols obi, lekredolsöd täno vobodis, dat dasevolsös e lekredolsös, das Fat binom in ob, ed ob binob in om»!
39. Nu ästeifoms dönu ad gleipön omi, ab äskeapom se nams omsik.
40. Ägegolom nu lü län votaflanü el ‚Iordanis‛, lü top, kö ‚Ioannes‛ ün tim büikum äblunedom; ed äblibom us.
41. Mödans äkömons lü om ed äsagons: «‚Ioannes‛ fe no eduinom milagis, ab val, keli ‚Ioannes‛ äsagom dö om, äbinon veratik».
42. E mödans äprimons ad lekredön omi.

KAPIT: XI

1. Nu man semik ämalädom: ‚Lazarus‛ de ‚Bethania‛ se vilag de ‚Maria‛ e sör ofik ‚Martha‛.
2. (‚Maria‛ äbinof jiutan, kel äleüledof Söli ko mir, ed äsäluimükof futis omik me hers okik, kela blod: «Lazarus‛ äbinom malädik).
3. Sörs äsedofs täno ome nuni: «O Söl! om, keli löfol, malädom».
4. Ven Yesus älilom atosi, äsagom: «Maläd at no kodon deadi, ab jonidon ad glorükön Godi; dat Son Goda paglorükomös dub on»!
5. Yesus nu älöfom eli ‚Martha‛, söri ofik, ed eli ‚Lazarus‛.
6. Posä nu ililom, das ämalädom, äblibom nog dü dels tel tö top, kö äbinom,
7. ed äsagom pos atos tidäbes okik: «Golobsöd dönu lü ‚Hierusalem‛»!
8. Tidäbs äsagoms ome: «O Rabinan! bü brefüp yudans ästeifoms ad stonön oli, e golol-li dönu usio»?
9. Yesus ägesagom: «Del no labon-li düpis degtel? If ek zigolon, ven binos del, no joikon oki, bi logon liti vola at.
10. Ab if ek zigolon dü neit, joikon oki, bi lit no binon in on».
11. Atosi äsagom, e poso äsagom omes: «Flen obsik: ‚Lazarus‛ eslipikom, ab golob ad galükön omi».
12. Tän tidäbs omik äsagoms: «O Söl! if slipom, osaunikom».
13. Ab Yesus ispikom dö deadam omik, ed oms äcedoms, das ispikom dö slipikam pö slip.
14. Tän Yesus äsagom omes stedälo: «‚Lazarus‛ edeadom».
15. E fredob demü ols dat kredolsös, das no ebinob us! Ab golobsöd lü om»!
16. Tän ‚Thomas‛, ‚Didymus‛ penemöl, äsagom ketidäbes okik: «Golobsöd i obs, dat deadobsöd ko om»!
17. Ven Yesus ilükömom, äküpom, das äseatom ya dü dels fol in sepül.
18. ‚Bethania‛ nu topon nilü ‚Hierusalem‛ zao mö staids deglul,
19. e yudans mödik ikömons lü ‚Martha‛ e ‚Maria‛ ad trodön ofis demü blod ofik.
20. Sosus ‚Martha‛ älelilof, das Yesus ilükömom, äkosgolof lü om, du ‚Maria‛ äblibof in dom.
21. ‚Martha‛ äsagof Yesuse: «O Söl! if ibinolöv is, blod obik no ideadomöv.
22. Ab i nu sevob, das God ogivom ole utosi valik, kelosi obegol ome».
23. Yesus äsagom ofe: «Blod olik olelifikom dönu».
24. ‚Martha‛ äsagof ome: «Sevob, das olelifikom pö lelifikam tü del lätik».
25. Yesus äsagom ofe: «Ob binob lelifikam e lif. Utan, kel lekredon obi olifon, ifi ideadonöv.
26. Ed alutan, kel lifon e lekredon obi, laidüpo no odeadon. Lekredol-li atosi»?
27. Äsagof ome: «Si! o Söl! elekredob, das binol Kristus: Son Goda, kel ökömom ini vol».
28. Posä isagof atosi, ädegolof ad vokön söri okik: ‚Maria‛ kläniko äsagölo: «Mastan ekömom e vokom oli».
29. Ven jiatan älilof atosi, älöädof spidiko ed ägolof lü om.
30. Yesus no nog ikömom ini vilag, ab äbinom nog su top kö ‚Martha‛ ikolkömof omi.
31. Ven yudans, kels äbinons in dom ela ‚Maria‛ ed ätrodons ofi, älogons, das älöädof spido ed äsegolof, äsökons ofi, äcedölo, das ägolof lü sepül ad drenön us.
32. Sosus ‚Maria‛ äkömof utöpo, kö Yesus äbinom, ed älogof omi, äfalof foi futs omik ed äsagof ome: «O Söl! if ibinolöv is, blod obik no ideadomöv».
33. Ven Yesus äloegom drenön ofi e yudanis, kels ikekömons ko of, äfavom ninälo ed äfäkikom;
34. ed äsagom: «Kiöpo eseitols-li omi»? äsagons ome: «O Söl! kömolös e logolös»!
35. Yesus ädrenom.
36. Tän yudans äsagons: «Logolsöd! vio löfom omi».
37. Semans onas äsagons: «Om, kel emaifükom logis bleinana, no ikanom-li kodön, das i atan no ödeadom»?
38. Yesus dönu äfavöl ninälo ägolom lü sepül. Äbinon kev, e ston piseiton sui on.
39. Yesus äsagom: «Moükolsöd stoni»! ‚Martha‛: sör edeadölana äsagof: «O Söl! ya mismelom. Binos üfo del folid»!
40. Yesus äsagom ofe: «No esagob-li ole, das if älekredol, ölogol glori Goda»?
41. Ämoükons täno stoni. Yesus nu älüodükom logis okik sülio ed äsagom: «O Fat! danob oli, das edalilol obi.
42. Äsevob ye, das dalilol ai obi, ab demü menamödot, kel züstanon, esagob atosi, dat lekredonös, das ol elesedol obi».
43. Posä isagom atosi, ävokädom ko vög mu laodik: «O ‚Lazarus‛! segololöd»!
44. Ed edeadölan äsegolom. Futs e nams omiks pivilupons me flabüls, e logod omik pivealon me särvätül. Yesus äsagom ones: «Säflabülolsöd omi! e leadolsöd degolön omi»!
45. Mödans yudanas, kels ikömons lü ‚Maria‛ ed älogons utosi, kelosi idunom, äprimons ad lekredön omi.
46. Semans onas ye ägolons lü farisetans, ed änunons omes utosi, kelosi Yesus idunom.
47. Tän lekultans e farisetans äkobükoms sanhedrini, ed äsagoms: «Kisi mutobs-li dunön? Ibä man et duinom milagis mödik.
48. If leadobs laidunön somo omi, valans olekredons omi, ed elans di ‚Roma‛ okömoms, ed omosumoms läni e pöpi».
49. Balan omas: ‚Caiphas‛, kel äbinom dü yel et dalekultan, äsagom omes: «Suemols nosi,
50. no betikols, das binos frutikum pro obs, das men bal deadon benü pöp, kas pöp lölik päridikon».
51. No äsagom okao atosi, ab bi äbinom dalekultan dü yel et, äprofetom, das Yesus ödeadom benü pöp,
52. e no teiko benü pöp, ab i, dat ökobükom cilis espeariköl Goda.
53. De del et ävätäloms ad deidön omi.
54. Yesus nu no plu äzigolom notidiko bevü yudans, ab ägolom usao lü län nilü däsärt, lü zif ‚Ephraim‛ panemöl, ed ästebom us ko tidäbs okik.
55. Pajad yudanas äbinon nilik, e mödikans se län ägolons bü pajad lü ‚Hierusalem‛ ad klinükön okis.
56. Äsukons Yesusi, ed äsagons odes, ven äbinons in tem: «Kisi cedol-li? No okömom-li bo pö zäl»?
57. Lekultans e farisetans nu inotükoms büdi, das, if ek ösevonöv topi, kö öbinom, ömutonöv nunädön atosi, dat ökanomsöv fanäbükön omi.

KAPIT: XII

1. Tü tim delas mäl bü pajad Yesus ägolom lü ‚Bethania‛, kö äbinom ‚Lazarus‛: ideadölan, keli ilelifükom se deadam.
2. Us äblümükons ome fidädi; ‚Martha‛ äbötof, e ‚Lazarus‛ äbinom balan utanas, kels älenseatons ko om.
3. ‚Maria‛ äsumof pauni nugveta narda rafinik jerabik, äleüledof futis Yesusa, ed äsäluimükof futis omik me hers okik. Dom äfulikon ko benosmel nugveta.
4. Nu balan tidäbas omik: ‚Iudas‛ di ‚Iscariot‛: son ela ‚Simon‛, kel öträtom omi, äsagom:
5. «Kikodo nugvet et no peselon-li tä denars kiltum, e mon pelegivon-li pöfanes»?
6. Äsagom atosi, no bi äkälälom pöfanis, ab bi äbinom tifan, ed äkibom kädi, ed äsumom uti, kel pistüredon ini on.
7. Ab Yesus äsagom: «No tupolöd ofi! Ekipedof oni pro del sepülama obik.
8. Ibä pöfanis labols ai lä ols, ab obi no labols ai».
9. Ven mödot gretik yudanas nu älilon, das Yesus äbinom us, äkömon, no teiko demü Yesus, abi ad logön eli ‚Lazarus‛, keli ilelifükom se deadam.
10. Lekultans ävätäloms täno ad deidön eli ‚Lazarus‛,
11. bi yudans mödik äkömons demü om, e täno älekredons Yesusi.
12. Menamödot gretik, kel ikömon demü zäl, älelilon, tü del fovik, das Yesus ökömom lü ‚Hierusalem‛,
13. Äsumons pamatuigis, äkosgolons omi, ed ävokädons: «‚Hosanna‛! pabenedomöd utan, kel kömom nemü Söl, Reg Yisraeläna»!
14. Yesus ätuvom cukili, ed äseidom oki sui on, äsä pepenos:
15. «No dredolöd! o daut ela ‚Sion‛! ekö! reg olik kömom seadölo su cukül».
16. Büiko tidäbs omik no äsuemoms atosi, ab ven Yesus piglorükom, ämemoms utosi, kelos pipenon tefü om, ed utosi, kelosi edunons pro om.
17. Menamödot, kel ädugädon omi, ätemunon, das ivokom eli ‚Lazarus‛ se sepül, ed ilelifükom omi se deadam.
18. Ebo demü atos menamödot ikosgolon omi, bi ilelilon, das iduinom milagi at.
19. Farisetans äsagoms täno odes: «Logols vo, das leno progedols. Ekö! volanef lölik golon po om».
20. Bevü utans, kels ikömons ad plekön pö zäl, Helänans anik äbinons.
21. Atans ägolons lü ‚Philippus‛ se ‚Bethsaida‛ in Galileyän, ed äbegoms ome: «O söl! vilobs logön Yesusi».
22. ‚Philippus‛ äsagom atosi ele ‚Andreas‛, e ‚Philippus‛ ed ‚Andreas‛ ägoloms täno ad sagön atosi Yesuse.
23. Yesus ägespikom omes: «Düp ekömon, ün kel Son mena paglorikom.
24. Vö! vö! sagob oles, if vuitagran no falon ini tail e deadon, tän blibon te; ab if deadon, tän prodon fluki mödik.
25. Utan, kel löfon lifi okik, operon oni, ed utan, kel heton lifi okik in vol at, okipon oni laidüpio.
26. If ek dünon obi, omuton sökön obi, e kö ob binob, utöpo i dünan obik obinon; if ek dünon obi, Fat ostimom oni.
27. Nu lan obik fäkon, e kisi osagob-li? O Fat, libükolös obi se düp et! Ab ebo kodü atos düp at ekömon lü ob.
28. O Fat! glorükolös nemi olik»! Tän vög se sül ätonon: «Eglorükob oni, ed oglorükob oni dönu».
29. Menamödot, kel äkomon us ed älilon oni, äsagon, das äbinos tonäratonät; votans äsagons: «Silanan espikom lü om».
30. Yesus ägespikom: «No pro ob vög etonon, ab pro ols.
31. Nu cödet dö vol at poledunon; nu löpal vola at posejedom plödio.
32. E ven polöpükob de taled, otirädob mödikanis lü ob».
33. Äsagom atosi ad malön, me deadam kinik ödeadom.
34. Menamödot ägesagon ome: «Elelilobs se lonem, das Kristus blibom laidüpio; lio kanol-li üfo sagön, das Son mena mutom palöpükön? Kim Son et mena binom-li»?
35. Yesus täno ägesagom ones: «Nog dü brefüp lit binon zänodü ols. Zigololsöd in lit, dü tim, das labols oni, dat dag no drefonös süpo olis! Utan, kel zigolon in dag, no sevon, kiöpio golon.
36. Lekredolsöd liti, dü tim, das labols oni! dat vedolsös cils lita»! Atosi Yesus äsagom ones, e ven imogolom, äklänedom oki demü ons.
37. Do iduinom milagis so gretikis lo ons, no älekredons omi;
38. dat vöd profetana: ‚Isaias‛ pöfölon: «O Söl! kin elekredon-li predi obsik, e kine brad Söla pedasevädükon-li»?
39. I sekü kod at no äkanons lekredön, äsä ‚Isaias‛ äsagom in top votik:
40. «Ebleinükom logis onsik, ed edüfälükom ladälis onsik, dat no ölogons me logs, e no ösuemons me ladäl, ed ölecenons, ed ob ösaunükob onis».
41. Atosi ‚Isaias‛ äsagom, ven älogom glori omik, ed äspikom dö om.
42. Too, i se cifodans mödikans älekredoms omi, ab sekü dred demü farisetans, no äkoefoms osi, dat no pöxilomsös se sünagogs!
43. ibä äbuükoms stimi menas bu stim Goda.
44. Yesus äpredom ko vög laodik: «Utan, kel lekredon obi, no lekredon obi, ab utani, kel elesedom obi,
45. ed utan, kel logon obi, logon elesedani oba.
46. Ob as lit ekömob ini vol, dat alan, kel lekredon obi, no blibonös in dag!
47. Ed if ek lilon vödis obik, e no kipedon onis, ob no cödob oni; ibä no ekömob ad cödön volanis, ab ad savön onis.
48. Utan, kel deimon obi, e no zepon vödis obik, labon utosi, kel cödon oni: vöd, keli ob espikob; at ocödeton oni tü del lätik.
49. Ibä no espikob se ob it, ab Fat, kel elesedom obi, ebüdülom obe utosi, kelosi mutob sagön e spikön.
50. E sevob, das büd omik binon lif laidüpik. Klu, kelosi sagob, utosi sagob, soäsä Fat ebüdom obe».

KAPIT: XIII

1. Äbinos del bü pajadazäl. Yesus äsevom, das pro om düp ekömon, das ölovegolom se vol at lü Fat, e soäsä ilöfom omikanis in vol at, älöfom onis jü fin.
2. Pö fided, ven diab ya islüdom eli ‚Iudas‛ di ‚Iscariot‛: son ela ‚Simon‛ ad trätön Yesusi,
3. e Yesus ädasevom, das Fat igevom vali ini nams omik, das isegolom de God, ed ögegolom lü God,
4. Älöädom de fided, ädeükom klotis okik, äsumom flabi, ed älenükom oni zü zekoap okik;
5. pos atos ägifom vati ini basin, ed äprimom ad lavön futis tidäbas okik ed ad säluimükön onis me flab, keli ilenükom zü zekoap okik.
6. Ven äkömom lä ‚Simon Petrus‛, atan äsagom ome: «O Söl! Ol vilol-li lavön futis obik»?
7. Yesus ägesagom ome: «Utosi, kelosi dunob, nu no nog suemol, ab osuemol latikumo».
8. ‚Petrus‛ äsagom ome: «Laidüpo no olavol futis obik». Yesus ägesagom ome: «If no lavob futis olik, no dilodol ko ob».
9. ‚Simon Petrus‛ äsagom ome: «O Söl! No te futis, abi namis e kapi oba»!
10. Yesus äsagom ome: «Utan, kel elavon oki, no nedon lavön oki plä futs; binon go klinik. Ed ols binols kliniks, ab no ols valik».
11. Ibä äsevom trätani omik. Sekü kod at äsagom, das no valikans äbinoms kliniks.
12. Ven ilavom futis omas, ilenükom klotis okik, ed älenseatom dönu, äsagom omes: «Suemols-li utosi, kelosi edunob oles?
13. Nemols obi Mastani e Söli, e sagols atis gidetiko, ibä binob atans.
14. Ven nu ob: Söl ä Mastan elavob futis olsik; i ols labols bligi ad lavön futis odas.
15. Ibä egivob oles sami, dat i ols dunols leigo utosi, kelosi edunob oles.
16. Vö! vö! sagob oles: Slafan no binom pluik ka mastan okik; lesedäb no pluik ka lesedan oka.
17. Ven sevols atosi, tän binols beatiks, if dunols osi.
18. Utos, kelosi sagob, no lonöfon pro ols valik; sevob utanis, kelis evälob; ab pepenölos muton pafölön: ‚Utan, kel fidom ko ob bodi, etovom hili okik ta ob‛.
19. Ya nu sagob osi oles, büä jenos, dat, ven jenos, sevolsös, das ob binob utan.
20. Vö! vö! sagob oles: utan, kel ogetedon utani, keli olesedob, getedon obi; ed utan, kel getedon obi, getedon omi, kel elesedom obi».
21. Ven Yesus isagom atosi, äfäkikom ninälo, ed ätemunom: «Vö! vö! sagob oles, balan olas oträtom obi».
22. Tidäbs älülogoms odis bluviko, no äsevölo, kimi ädiseinom.
23. Bal tidäbas, keli Yesus älöfom, älenseatom fo Yesus.
24. ‚Simon Petrus‛ ävinegom omi ad säkön, kim äbinom, keli ädiseinom.
25. Äblegikölo po loveo ta blöt Yesusa äsäkom ome: «O Söl! kimi diseinol-li»?
26. Yesus ägesagom: «Binom om utan, kele ogivob brekoti boda fa ob publunöli». Äblunom brekoti boda ed ägivom oni ele ‚Iudas‛: son ela ‚Simon‛ di ‚Iscariot‛.
27. E ko fidot diab äkömom ini om. Yesus äsagom ome: «Utosi, kelosi dunol, dunolöd suniko»!
28. Nek älenseatölanas äsuemom, diseinü kis äsagom ome atosi.
29. Ibä semans äcedoms, bi ‚Iudas‛ älabom kädi, das Yesus äsagom ome: «Remolöd uti, keli neodobs pro zäl»! u, das ämutom givön bosi pöfanes.
30. Posä ilüsumom fidoti, ägolom sunädo plödio. Äbinos neit.
31. Ven isegolom, Yesus äsagom: «Nu Son mena peglorükom, e God peglorükom in om.
32. Ven God peglorükom in om, i God oglorükom omi in ok, efe suniko.
33. O cils! Nog dü tim brefik binob lä ols. Osukols obi, e leigoäsä esagob yudanes: Utöpio, kö golob, no kanols golön; sagob nu i oles.
34. Gevob oles büdi nulik: Löfolsöd odis! äsä elöfob olis, i ols mutols löfön odis.
35. Dub atos valans osevons, das binols tidäbs obik, dubä labols löfi kol ods.
36. ‚Simon Petrus‛ äsagom ome: «O Söl! kiöpio golol-li»? Yesus ägesagom: «Utöpio, kö golob, nu no kanol sökön obi; latikumo ye osökol obi».
37. ‚Petrus‛ äsagom ome: O Söl! kikodo no kanob-li sökön oli? Vilob klemön lifi obik pro ol».
38. Yesus äsagom: «Vilol-li klemön lifi olik pro ob? Vö! vö! sagob ole, higok no okravom, büä unoädol kilna obi».

KAPIT: XIV

1. «Ladäl olsik no fäkikonös! Lekredolsöd Godi, e lekredolsöd obi!
2. In dom Fata obik löds mödik dabinons. If no binosöv soik, esagoböv osi oles. Degolob ad blümükön oles steböpi.
3. E ven udegolob ed ublümükob steböpi, ogekömob dönu ad lasumön olis lä ob, dat i ols binolsös utöpo, kö ob binob!
4. Utöpo, kö golob sevols, e sevols vegi lü top et».
5. ‚Thomas‛ äsagom ome: «O Söl! no sevobs, lü top kinik golol; lio sevobsöv-li vegi»?
6. Yesus äsagom ome: «Binob veg, e verat, e lif. Nek kömon lü Fat, äsä dub ob.
7. If isevolsöv obi, i isevolsöv Fati obik; denu ye sevols omi, ed elogols omi».
8. ‚Philippus‛ äsagom ome: «O Söl! jonolös obes Fati; atos saidon pro obs».
9. Yesus äsagom ome: «So lunüpo binob ko ols, e no nog sevol-li obi? o ‚Philippus‛! Utan, kel elogon obi, elogom Fati; lio kanol-li sagön: Jonolös obes Fati!
10. No lekredols-li, das ob binob in Fat, e das Fat binom in ob? Vödis, kelis spikob oles, no sagob se ob it. Fat, kel binom laiduliko in ob, dunom vobodis.
11. Lekredolsöd obi! binob in Fat, e Fat binom in ob; if no, lekredolsöd obi demü vobods et.
12. Vö! vö! sagob oles: Utan, kel lekredom obi, odunom i vobodis, kelis edunob, igo gretikumis odunom; ibä golob lü Fat obik,
13. ed utosi, kelosi desirols in nem obik, odunob, dat Fat paglorükomös in Son!
14. If desirols bosi in nem obik, odunob osi.
15. If löfols obi, demolsöd täno büdis obik!
16. Obegob Fate ad givön oles yufani votik, kel oblibon laidüpio ko ols,
17. veratäli, keli volanef no kanon dagetön, bi no logon oni, ni sevon oni; ab ols sevols oni, ibä obinon in ols e blibon in ols.
18. No oposbinükob olis asä nenpalanis. Kömob lü ols.
19. Ünü brefüp volanef no plu ologon obi, ab ols logols obi, bi ob lifob, ed ols olifols.
20. Ün dels et odasevols, das ob binob in Fat obik, ed ols in ob, ed ob in ols.
21. Kel labom büdis obik e demom onis, binom utan, kel löfom obi; ed utan, kel löfom obi, polöfom i fa Fat obik, ed ob olöfob omi, ed odasevädükob obi ome».
22. ‚Iudas‛, no elan di ‚Iscariot‛, äsagom ome: «O Söl! kis binon-li kod, das vilol dasevädükön oli obes, e no volanefe»?
23. Yesus ägesagom ome: «If ek löfon obi, tän odemon vödi obik, e Fat oba olöfom oni, ed obs okömobs ed olotädobs ini on.
24. Kel no löfon obi, utan no odemon vödis obik. Vöd, keli lilols, no binon de ob, ab de Fat, kel elesedom obi.
25. Atosi esagob oles, du binob lä ols.
26. Ab yufan: Saludalanal, keli Fat olesedom oles dub nem obik, otidon oles vali, ed olesevädükon oles utosi valik, keli esagob oles.
27. Posbinükob oles püdi, püdi obik givob oles; no givob, äsä volanef givon. Ladäl olsik no fäkikonöd, u dredikonöd!
28. Elilols utosi, kelosi esagob oles: Degolob, e gekömob lä ols. If löfols obi, fredolsöv, das golob lü Fat, ibä om binom mödikum ka ob.
29. E nu, büä atos ojenon, esagob osi oles, dat, ven atos jenon, olekredolsös!
30. No ospikob plu mödik osi ko ols: Cifod volädik kömon; ab in ob no labon bosi, kel duton lü on;
31. dat volanef ye sevonös, das löfob Fati, e dunob soäsä Fat ebüdom obe: Löädolsöd, degolobsöd isao»!

KAPIT: XV

1. «Binob vitid veratik, e Fat obik binom vitidagadan.
2. Tuigi alik len ob, kel no polon flukis, moükom, e tuigi alik, kel polon sio flukis, klinükom, dat polonös flukis mödikum!
3. Ya klinols sekü vöd, keli espikob lü ols.
4. Blibolsöd in ob, ed ob blibob in ols! äsä vitidatuig no kanon polön flukis okao, ab teiko if blibon len vitid, leigono ols, if no blibols in ob.
5. Ob binob vitid; ols binols tuigs vitida. Kel blibom in ob, du ob blibob in om, utan opolom flukis mödik; ibä nen ob, no kanols dunön bosi.
6. If ek no blibom in ob, tän pajedom plödio, äsä vitidatuig, e sigikon; kobükoy tuigis sigik et, e jedoy onis ini fil, ed ons fefilons.
7. If blibols in ob, e vöds obik blibons in ols, tän alutos, keli odesirols, pofölon.
8. In atos Fat obik peglorükom, das polols flukis mödik, e vedols züpans oba.
9. Leigoäsä Fat elöfom obi, i ob elöfob olis. Dakipolsöd löfi obik kol ols!
10. If fölols büdis obik, odakipols fovo löfi obik, leigoäsä ob efölob büdis Fata obik, e bleibob palöfön fa om.
11. Esagob atosi oles, dat kompenolsös in fred obik, e dat fred olsik nedöfikonös!
12. Atos büd obik binon: Löfolsöd odis, äsä elöfob olis!
13. Nek jonülon löfi gretikum, ka utan, kel klemon lifi okik pro flens okik.
14. Binols flens obik, if dunols utosi, kelosi büdob oles.
15. No nemob olis fovo dünanis; ibä dünan no sevom, kisi söl omik dunom; ab olis enemob flenis, bi enotükob oles utosi valik, keli elilob de Fat obik.
16. No ols evälols obi, ab ob evälob olis, ed ejonidükob olis ad segolön ed ad polön fluki; e fluk et muton binön dulöfik, dat givobös oles alutosi, keli obegols Fate nemü ob!
17. Atosi büdob oles: Löfolsöd odis!
18. If volanef heton oli, sevolsöd täno, das eheton obi büikumo ka olis!
19. If kompenolsöv pö dins volädik, volanef löfonöv dinis, kels pötons lü on, ab bi esevälob olis se voläd, volanef heton olis.
20. Betikolsöd utosi, kelosi esagob oles: Dünan no binom mödikum ka söl okik. Ven epöjutons obi, opöjutons i olis; if demons vödi obik, odemons i vödi olsik.
21. Ab dinis valik at odunons tefü ols, bi labols nemi obik, e no sevons omi, kel elesedom obi.
22. If no ikömoböv, e no ispikoböv oles, no sinonsöv, ab nu no labons kodüli pro midun oksik.
23. Utan, kel heton obi, heton i Fati obik.
24. If no idunoböv zänodü ons vobodis, kelis votan nonik edunon, no sinonsöv, ab nü i ons elogons onis, hetons ed obi e Fati obik.
25. Ab atos jenon, dat utos ojenonös, kelos pepenon in lonem onsik: ‚Ehetons obi nen kod‛.
26. Ab ven yufan: veratäl, keli osedob oles nämätü Fat, ukömon, tän on otemunon tefü ob.
27. I ols otemunols; ibä de prim ebinols lä ob».

KAPIT: XVI

1. «Atosi esagob oles, dat no skanolsös!
2. Ojedons olis se sünagogs; si! düp kömon, ün kel ek, kel deidon olis, ocedon, das ujonülon Gode düni.
3. Odunons atosi, bi esevons ni Fati ni obi.
4. Ab dinis at esagob oles, dat, ven düp ukömon, omemols utosi, kelosi esagob oles. Primao no esagob osi oles, bi äbinob lä ols.
5. Nu golob lü om, kel elesedom obi, e nek olas säkol obe: Kiöpio golol-li?
6. Ab, bi esagob oles atosi, lüg efulükon ladäli olsik.
7. Ab sagob oles verati: binos frutik pro ols, das mogolob. Ibä, if no mogoloböv, yufan no kömonöv lä ols. Ab, ven mogolob, osedob oni oles.
8. E, ven kömon, osüadükon volanefi tefü sinod, gid e cödet.
9. Tefü sinod, bi no elekredons obi.
10. Tefü gid, bi golob lü Fat, e no plu ologols obi.
11. Tefü cödet, bi löpan vola at pecödetom.
12. Nog dinis mödik mutob sagön oles, ab no nog kanols sufön nu onis.
13. Ven ukömon, sevabo veratäl, tän okompenükon olis ko verat lölöfik; ibä no ospikon okao, ab onotodon utosi valik, keli lilon, ed obüosagon oles dinis, kels okömons.
14. Oglorükon obi; bi osumon dinis de ob, ed onotükon onis oles.
15. Alutos, keli Fat labom, duton lü ob; sekü kod at, äsagob, das osumon dinis valik de ob, ed onotükon onis oles.
16. Pos brefüp no ologols obi, e dönu pos brefüp odönulogols obi, ibä odegolob lü Fat».
17. Nu anans tidäbas omik äsagons bevü ods: «Kis utos sinifon-li, kelosi sagom: Pos brefüp no ologols obi, e dönu pos brefüp odönulogols obi, ed i: Ibä odegolob lü Fat»!
18. Täno äsagoms: «Kisi diseinom-li me el pos brefüp? No suemobs, kisi sagom».
19. Yesus äsevom, kisi äviloms säkön ome, ed äsagom omes: «Bespikols-li ko ods osi, das esagob: Pos brefüp no ologols obi, e dönu pos brefüp odönulogols obi?
20. Vö! vö! sagob oles, odrenols ed oyamols, ab volanef ofredon; olabols doli, ab dol olsik ocenon ad fred.
21. Vom labof doli, ven motof, bi düp pötik ofik ekömon; ab ven cil pemoton, tän no plu betikof dränäli demü fred, das men ekömon ini vol.
22. Nu vo labols doli; ab odönulogob olis, e ladäl olsik ofredon, e nek omosumon fredi et de ols.
23. Ün del et no osäkols obe bosi. Vö! vö! sagob oles, if plekols bosi Fate nemü ob, ogivom osi oles.
24. Jünu no eplekols bosi nemü ob; plekolsöd, ed ogetols, dat fred olsik binonös lölöfik!
25. Atosi esagob oles in parabs, ab düp kömon, das no plu ospikob lü ols in parabs, ab das onotükob stedälo oles dö Fat.
26. Ün del et oplekols nemü ob, e no sagob oles, das oplekob lü Fat demü ols,
27. ibä Fat it löfom olis, bi elöfols obi, ed elekredols, das esegolob de Fat.
28. Esegolob de Fat, ed ekömob ini vol; nu lüvob voli e golob lü Fat».
29. Nu tidäbs omik äsagoms ome: «Ekö! nu spikol stedälo, e sagol parabi nonik.
30. Nu sevobs, das sevol vali, e das no neodol, das ek säkon ole bosi; sekü atos lekredobs, das esegolol de God».
31. Yesus ägesagom omes: «Lekredols-li nu?
32. Ekö! düp kömon, ed ekömon, das paspearükols, alan lü dom lönik okik, e das posbinükols obi soeliko. Ab no binob soelik; ibä Fat binom ko ob.
33. Esagob oles dinis at, dat labolsös püdi in ob! In vol labols dränäli; ab labolsöd kuradi gudik! Evikodob volanefi».

KAPIT: XVII

1. Atosi Yesus espikom, ed älüodükom logis okik sülio, ed äsagom: «O Fat! düp ekömon. Glorükolös Soni olik, dat Son glorükomös oli!
2. Baiädü nämäd, keli egevol ome tefü mid valik, ad gevön vale, keli egivol ome, lifi laidüpik.
3. Atos lif laidüpik binon, das sevons oli asä Godi balik veratik, ed omi, keli elesedol: Yesus Kristus.
4. Eglorükob oli su taled, eledunob vobodi, keli ebligädol obe ad dunön.
5. E nu glorükolös obi, o Fat! me glor, keli älabob lä ol, büä vol ädabinon!
6. Edasevädükob nemi olik menes, kelis egivol obe se volanef. Ädutoms lü ol, ed obe egivol omis, ed edakipoms vödi olik.
7. Nu edasevoms, das alutos, kelosi egivol obe, kömon de ol;
8. ibä vödis, kelis egivol obe, egivob omes; elüsumoms onis, ed edasevoms verato, das esegolob de ol, ed elekredoms, das elesedol obi.
9. Plekob pro oms; no plekob pro volanef, ab pro utans, kelis egivol obe; ibä dutoms lü ol;
10. ed alutos, kel duton lü ob, duton lü ol, ed olikos duton lü ob, ed ob peglorükob in oms.
11. Dü tim, das äbinob lä ons su taled, edakipob omis dub nem olik; utanis, kelis egivol obe, ekälälob, e nek epäridikom, pläamü son pärida, dat pepenölos pöfölon.
12. Nu golob lü ol, e sagob atosi in vol, dat labomsös lölöfiko fredi, keli labob.
13. Egivob omes vödi olik, e volädanef eheton omis; ibä no dutoms lü vol volädik, leigoäsä ob no binob se voläd.
14. No plekob ole, das desumolös omis se vol, ab das jelolös omis ta diab!
15. I oms no ekömoms se voläd, leigoäsä ob no ekömob se on.
16. Saludükolös omis me verat olik! vöd olik binon verat.
17. Leigoäsä ol elesedol obi ini volanef, ob elesedob omis ini volanef.
18. Saludükob obi pro oms, dat i oms pasaludükomsös dub verat!
19. Plekob no te pro oms, ab i pro utans, kels lekredons obi dub vöds omsik,
20. dat valans binonsös bal! leigoäsä ol, o Fat! in ob, ed ob in ol; dat i ons binonsös bal in obs! dat volanef lekredonös, das ol elesedol obi!
21. Egivob omes glori, keli egivol obe, dat binomsös bal, soäsä obs binobs bal!
22. ob in oms, ed ol in ob, dat binomsös lölöfiko bal, e dat volanef sevonös, das ol elesedol obi, ed elöfol omis, leigoäsä elöfol obi.
23. O Fat! viloböv, das utans, keli egivol obe, obinomsös lä ob utöpo, kö binob; dat logomsös glori obik, keli egivol obe, bi elöfol obi bü daved vola!
24. O Fat digik! volanef no esevon oli, ab ob esevob oli, ed atans edasevoms, das ol elesedol obi.
25. Esevädükob omes nemi olik, ed obleibob dunön atosi, dat löf, me kel elöfol obi, binonös in oms, ed i ob in oms»!

KAPIT: XVIII

1. Ven Yesus isagom atosi, ägolom ko tidäbs okik lü votaflan bluka: ‚Cedron‛, kö gad ädabinon. Om e tidäbs omik ägoloms ini on.
2. I ‚Iudas‛: trätan omik, äsevom topi et, bi Yesus ikobikom us suvo ko tidäbs okik.
3. ‚Iudas‛ nu äkesumom ko ok trupi soldatas, ed ananis lekultanas e farisetanas, ed äkömom usio ko flamots, lampads e vafs.
4. Yesus, kel äsevom utosi valik, kel ödrefon omi, ägolom plödio, ed äsagom omes: «Kimi sukols-li»?
5. Ägesagoms ome: «Yesusi: elan di ‚Nazareth‛». Yesus äsagom omes: «Ob binob utan». I ‚Iudas‛: trätan omik, äbinom lä oms.
6. Ven äsagom omes: «Ob binob utan», ägeyiloms ed äfaloms sui glun.
7. Dönu äsäkom omes: «Kimi sukols-li»? ed äsagoms: «Yesusi: elan di ‚Nazareth‛.
8. Yesus ägesagom: «Esagob oles, das ob binob utan. Ven nu sukols obi, koedolsöd mogolön täno omis»!
9. Atosi äsagom, dat pöfölon utos, kelosi isagom: ‚Se oms, kelis elesedol obe, eperob neki‛.
10. ‚Simon Petrus‛, kel älabom säbi, äsetirom oni, ädrefom hidünani dalekultana, ed ädecöpom ome lili detik omik. Nem dünana et äbinon: ‚Malchus‛.
11. Yesus äsagom ele ‚Petrus‛: «Steigolöd säbi ini vead! No mutob-li vagükön köpi, keli Fat egivom obe»?
12. Trup, kapiten e hidünans yudanas nu ägleipoms Yesusi ed äjänädoms omi.
13. Ädugoms omi balido lü ‚Annas‛; ibä äbinom lüfat ela ‚Caphas‛: dalekultan yela et.
14. ‚Caphas‛ äbinom man, kel ikonsälom yudanes, das plu äfrutos, das man bal ädeadom pro pöp.
15. ‚Simon Petrus‛ e tidäb votik nu äsökoms Yesusi. Tidäb at äbinom sevädik pö dalekultan, ed ägolom ko Yesus ini yad dalekultana,
16. du ‚Petrus‛ äbleibom stanön plödü yan. Tidäb votik, kel äbinom sevädik pö dalekultan, äkömom plödio, äspikom ko jiyanan, ed änüblinom eli ‚Petrus‛.
17. Täno jidünan: jiyanan äsagof lü ‚Petrus‛: «No binon-li i ol balan tidäbas mana et»? äsagom: «Nö»!
18. Dünans e calans ästanoms lä kolatafil fa oms pimeiköl, ibä äbinos koldik. ‚Petrus‛ äbinom bevü oms, ed ävamükom oki.
19. Dalekultan ädasäkom nu Yesusi dö tidäbs omik e dö lejon omik.
20. Yesus ägesagom ome: «Espikob stedälo lü volanef; etidob ai in sünagogs ed in tem, kö yudans valik kobikons; kläno esagob nosi.
21. Kikodo dasäkol-li obi? Dasäkolöd utanis, kels elilons utosi, kelosi espikob! Ekö! sevons utosi, kelosi esagob».
22. Ven äsagom atosi, balan hidünanas, kel ästanom nilo, ägivom Yesuse liliflapi, ed äsagom: «Gespikol-li somo dalekultane»?
23. Yesus ägesagom ome: «If esagob bosi badik, sagolöd üfo obe, kisi badik esagob! If esagob bosi gudik, kikodo üfo flapol-li obi»?
24. Tän ‚Annas‛ älesedom omi pejänädöl lü dalekultan: ‚Caphas‛.
25. ‚Simon Petrus‛ ästanom us ed ävamükom oki, ed äsagoy ome: «No binol-li i ol balan tidäbas omik»? änoom osi, ed äsagom: «Nö»!
26. Tän balan hidünanas dalekultana: röletan mana, kela lili ‚Petrus‛ idecöpom, äsagom: «No elogob-li in gad oli kobü om»?
27. Dönu ‚Petrus‛ änoom atosi, e sunädo higok äkravom.
28. Ädugoms nu Yesusi de ‚Caphas‛ lü cödöp; äbinos nog gölik. No änügoloms ini cödöp ad no neklinükön okis, dat dalomsös fidön pajadafidädi!
29. Sekü kod at ‚Pilatus‛ äkömom plödio lü oms ed äsagom: «Dö kis kusadols-li mani at»?
30. Ägesagoms ome: «If no binomöv midunan, no lovegivobsöv omi ole».
31. ‚Pilatus‛ äsagom omes: «Sumolsöd täno omi, e cödetolsöd omi ma lonem olsik»! Yudans äsagoms ome: «No pedälos obes ad deidön cödeto eki».
32. So äjenos, dat vöd Yesusa päfölon, ven äsagom me deadam kinik ödeadom.
33. ‚Pilatus‛ ägolom dönu ini cödöp, ävokom Yesusi lü ok, ed äsagom: «Binol-li reg yudanas»?
34. Yesus ägesagom: «Sagol-li atosi se ol it, u votans esagoms-li atosi ole»?
35. ‚Pilatus‛ ägesagom: «No binob ga yudan! Pöp olik e lekultans elovegivons oli obe. Kisi edunol-li»?
36. Yesus ägesagom: «Regän obik no duton lü vol at; if regän obik binonöv de vol at, hidünans obik ekomipomsöv, dat no pelovegivobös yudanes! Regän obik no binon de vol isik».
37. ‚Pilatus‛ äsagom ome: «No binol-li ga reg»? Yesus ägesagom: «Ol it sagol, das binob reg. Demü at pemotob, e demü at ekömob ini vol, ad temunön verati. Alan, kel löfon verati, lelilon vögi obik».
38. ‚Pilatus‛ äsagom ome: «Kis verat binon-li»/ Posä isagom atosi, ägolom dönu plödio lü yudans, ed äsagom omes: «Tuvob döboti nonik in om.
39. Ab kösömols, das stadükob libio balani pro ols pö pajad. Vilols-li, das stadükob libio pro ols regi yudanas»?
40. Oms valik nu ävokädoms dönu: «No omi, ab eli ‚Barabbas‛». ‚Barabbas‛ nu äbinom ravan.

KAPIT: XIX

1. Tän ‚Pilatus‛ äbüedom lebatön omi.
2. Soldats äflökoms kroni de spins, ed äpladoms oni sui kap omik; äjedoms züi om mänedi purpurik,
3. ed äsagoms: «Glidö! o reg yudanas! ed ägivoms ome liliflapis.
4. Tän ‚Pilatus‛ äkömom dönu plödio, ed äsagom omes: «Ekö! blinob omi lü ols, dat sevolsös, das no etuvob döboti in om»!
5. Yesus äkömom plödio, äpolölo spinakroni e mänedi purpurik. Ed äsagom omes: «Ekö! us men binom»!
6. Ven lekultans e hidünans älogoms omi, äluvokädoms: «Krodolöd omi! krodolöd omi»! ‚Pilatus‛ äsagom omes: «Sumolsöd ols it omi, e krodolsöd omi! ibä ob no tuvob döboti in om».
7. Ab yudans ägesagoms ome: «Labobs lonemi, e ma lonem mutom deadön; ibä evedükom oki it Soni Goda».
8. Ven ‚Pilatus‛ älilom atosi, ädredikom nog plu;
9. Änügolom dönu ini cödöp, ed äsagom lü Yesus: «Kiöpao binol-li»? Ab Yesus no ägevom ome gespiki.
10. Nu ‚Pilatus‛ äsagom ome: «No spikol-li lü ob? No sevol-li, das labob nämädi ad krodön oli, e nämädi ad stadükön libio oli»?
11. Yesus ägesagom: «No labolöv nämädi ta ob, if at no pigevonöv löpao ole. Sekü atos utan, kel elovegivom obi ole, edunom sinodi gretikum».
12. De timül at ‚Pilatus‛ ästeifom ad stadükön libio omi; ab yudans äluvokädoms: «If stadükolöv libio omi, no binol flen lampöra. Alan, kel vedükom oki it regi, volutom ta lampör».
13. Ven ‚Pilatus‛ älilom, kisi äsagoms, äblinom plödio Yesusi, ed äseidom oki sui cödalastul tö top, kel panemon: ‚lithostrotos‛, in hebrey: ‚gabbatha‛.
14. Äbinos preparamadel bü pajad, zao tü düp mälid. Äsagom lü yudans: «Ekö! is reg olsik binom».
15. Ab äluvokädoms: «Moö! moükolöd omi! krodolöd omi»! ‚Pilatus‛ äsagom omes: «Mutob-li krodön regi olsik»? Lekultans ägesagoms: «No labobs regi votik, äsä lampöri»!
16. Tän älovegivom omi omes, dat pökrodom. Äsumoms Yesusi, ed ämodugoms omi.
17. Ed äpolölo krodi ägolom lü kranatop sonemik, kel panemon in hebrey: ‚golgotha‛.
18. Us äkrodoms omi, e ko om votanis tel, balani tö flan alik, in zänod Yesusi.
19. ‚Pilatus‛ ilautom suspenädi, ed ifimükom oni leni krod; suspenäd ätonon: YESUS DI ‚NAZARETH‛: REG YUDANAS.
20. Yudans mödik nu äreidons suspenädi at, ibä top, kö Yesus pikrodom äbinon nilü zif, e suspenäd pipenon in hebrey, in Grikänapük, ed in latin.
21. Lekultans yudanas nu äsagoms ele ‚Pilatus‛: «No penolöd: Reg yudanas, ab das esagom: binob reg yudanas».
22. ‚Pilatus‛ ägesagom: «Kelosi epenob, utosi epenob».
23. Ven soldats ikrodoms Yesusi, äsumoms klotis omik, ed ädiloms onis ad dils fol, pro soldat alik dil bal, e plä ats nog mäned. Mäned äbinon nenyümetik. Löpao pivivon as lölot bal.
24. Äsagoms bevü ods: «No sleitobsöd oni, ab fätükobsöd, kim olabom oni»! Dat pöfölon pepenölos: ‚Ediloms klotis obik bevü ods, e demü klotem obik etiredoms‛. Klu soldats ädunoms atosi.
25. Nilü krod Yesusa ästanofs mot omik; sör mota omik: ‚Maria‛: jimatan ela ‚Clopas‛, e ‚Maria‛ di ‚Magdala‛.
26. Ven Yesus äloegom stanön moti okik, e tidäbi, keli älöfom, lä of, äsagom lü mot: «O vom! logolöd soni olik»!
27. Pos atos äsagom lü tidäb: «Logolöd moti olik»! E de timül at, tidäb älasumom ofi ini dom okik.
28. Pos atos Yesus, kel äsevom, das val nu piledunon, dat pepenölos pöfölon, äsagom: «Soafob».
29. Us nu gef ko vinig pifulüköl ädabinon; äblunoy spogi ini vinig, ävouloy oni me hüsop, ed äblinoy oni lü mud omik.
30. Posä Yesus isumom vinigi, äsagom: «Pefidunos». Äblegükom kapi okik ed ädeadom.
31. Dat koaps no öblibons len krods dü jabat, ibä äbinos preparamadel, e jabat et äbinon del mu saludik, yudans äbegoms ele ‚Pilatus‛ ad koedön breikön lögis omas, e desumön omis de krods.
32. Nu soldats äkömoms ed äbreikoms lögis balana e votana, kels pikrodoms ko om.
33. Ven ye äkömoms lä Yesus, ed älogoms, das ideadom, no äbreikoms lögis oma.
34. Ab bal soldatas ästeigom spedi okik ini flan, e sunädo blud e vat äseflumons.
35. Utan, kel elogom osi, etemunom osi; e temunod omik binon veratik. Sevom, das spikom verati, dat i ols lekredolsös!
36. Ibä atos ejenon, dat pepenölos pöfölon: ‚Bon nonik oma pobreikon‛.
37. E dönu in saitotaplad votik biba pepenos: ‚Ologoms sui om, keli esteigoms‛.
38. Pos atos ‚Ioseph‛ di ‚Arimathaea‛, kel äbinom tidäb Yesusa, kläno, bi ädredom tefü yudans, äsäkom ele ‚Pilatus‛, va ädalom desumön koapi Yesusa. ‚Pilatus‛ ädälom ome atosi. Tän ägolom ed ädesumom koapi Yesusa.
39. I ‚Nicodemus‛, kel primo ikömom ün neit lü Yesus, äkömom ko migot mira e laoäda zao mö pauns tum.
40. Ädesumoms koapi Yesusa, ed ävilupüloms oni ko pits raomik ini flabs, ma kösömot yudanas pö sepülam.
41. In top, kö pikrodom, gad ädabinon, ed in gad et sepül nulik, in kel nog neai ek piseiton.
42. Ini at äseitoms Yesusi, bi äbinos preparamadel ad pajad yudanas, e bi sepül äbinon nilik.

KAPIT: XX

1. Tü del balid viga ‚Maria‛ di ‚Magdala‛ ägolof ün göd gölik, ven äbinos nog dagik, lü sepül, ed älogof, das ston pimoükon de sepül.
2. Tän ägolof spidiko lü ‚Simon Petrus‛, e lü tidäb votik, kel pilöfom fa Yesus, ed äsagof omes: «Esumoms Söli se sepül, e no sevobs, tö top kinik eseitoms omi».
3. Tän ‚Petrus‛ e tidäb votik äsegoloms, ed äkömoms lä sepül.
4. Bofikans ägoloms kobo, ab tidäb votik ägolom vifikumo, ka ‚Petrus‛ ed äkömom as balidan lü sepül.
5. Äblegükölo oki fo loveo äloegom seatön flabis, ab no ägolom ini sepül.
6. E ‚Simon Petrus‛ älükömom po om, ed änügolom ini sepül; äloegom seatön flabis;
7. e särvätül, kel ibinon su kap omik, no äseaton lä flabs votik, ab äseaton pinürölölo su top votik.
8. Nu i tidäb votik, kel ikömom as balidan lü sepül, ägolom ninio; älogom onis, ed älekredom.
9. Ibä no nog äsevoms, das pipenos, das ömutom lelifikön se deadam.
10. Tän tidäbs ägegoloms dönu lomio.
11. ‚Maria‛ äbleibof stanön ädrenölo plödo lä sepül. Ven nu äblegükof ädrenölo oki love sepül,
12. Äloegof seadön silananis tel in klotem vietik, balani len kapofinot e balani len futofinot plada, kö koap Yesusa iseaton.
13. Atans äsagoms ofe: «O vom! kikodo drenol-li? äsagof omes: «Bi emosumons Söli obik, e no sevob, tö top kinik eseitons omi».
14. Posä isagof atosi, ägüflekof oki, ed äloegof stanön Yesusi, ab no äsevof, das utan äbinom Yesus.
15. Yesus äsagom ofe: «O vom! kikodo drenol-li? Kimi sukol-li? Of äniludölo, das utan äbinom gadan, äsagof: «O söl! if emosumol omi, sagolös obe, tö top kinik eseitol omi! tän omopolob omi».
16. Yesus äsagom ofe: «O ‚Maria‛! ägüflekof oki, ed äsagof ome: «Rabboni»! kelos sinifon: ‚O Mastan‛!
17. Yesus äsagom ofe: «No doatolöd obi! ibä no nog elöpiovegob lü Fat. Ab gololöd ad sagön hisvistes obik: Löpiovegob lü Fat obik äd olsik, lü God obik äd olsik».
18. ‚Maria‛ di ‚Magdala‛ ägolof ad nunön tidäbes, das ilogof Söli, e das isagom ofe etosi.
19. Ün soar latik dela balid ot viga, ini dom, kö tidäbs ädabinoms, e kela yans pifärmükons sekü dred pro yudans, Yesus äkömom, äpladom oki zänodü oms, ed äsagom omes: «Püd binonös lü ols»!
20. Posä isagom atosi, ädajonom omes namis e flani oka. Tidäbs äfredoms, ven älogoms Söli.
21. Dönu Yesus äsagom omes: «Püd binonös lü ols! Leigoäsä Fat elesedom obi, lesedob olis».
22. Posä isagom atosi, äbladom, ed äsagom omes: «Getolsöd Saludalanali!
23. If pardols eke sinodis omik, sinods papardons ome; if leadols dakipön eke sinodis, tän dakipon onis».
24. ‚Thomas‛: bal degtelanefa, ‚Didymus‛ penemöl, no äbinom lä oms, ven Yesus äkömom.
25. Tidäbs votik äsagoms ome: «Elogobs Söli». Ab äsagom omes: «If no logob in nams omik vunis klufas, e pladob doati obik ini vuns, e nami obik sui flan omik, no kredob osi».
26. Latikumo mö dels jöl, tidäbs äkoboms dönu in cem e ‚Thomas‛ äbinom lä oms. Du yans pifärmükons Yesus äkömom, ästanom zänodü oms, ed äsagom: «Püd binonös lü ols»!
27. Pos atos äsagom lü ‚Thomas‛: «Pladolöd doati olik isio, logolöd namis obik; pladolöd nami olik sui flan obik, e no binolöd nenlekredik, ab lekredan»!
28. ‚Thomas‛ ägespikom ome: «O Söl obik! O God»!
29. Yesus äsagom ome: «Bi elogol obi, evedol lekredik. Beatiks utans binons, kels lekredons, nes elogons».
30. Yesus eduinom sio nog milagis votik mödik lo tidäbs okik, kels no bepenons in buk at;
31. ab ats pebepenons, dat lekredolsös, das Yesus binom Kristus, Son Goda, e dat labolsös dub lekred et lifi in nem omik!

KAPIT: XXI

1. Pos atos Yesus ädasevädükom oki dönu tidäbes lä Lak di ‚Tiberias‛. Ädasevädükom oki so:
2. Ven ‚Simon Petrus‛, ‚Thomas‛ penemöl ‚Didymus‛, ‚Nathanael‛ di ‚Cana‛ in Galileyän, sons ela ‚Zebedaeus‛ e tidäbs votik tel äkoboms,
3. ‚Simon Petrus‛ äsagom omes: «Golob ad päskarön». Äsagoms ome: «Golobs ko ol». Äsegoloms ed äboidoms okis sunädo ini naf, ab äfanoms ün neit et nosi.
4. Ven göd ya äprimon, Yesus ästanom su jol; tidäbs ye no äsevoms, das äbinos Yesus.
5. Yesus äsagom omes: «O cils! no labols-li bosi ad fidön»? ägesagoms: «Nö!»
6. Äsagom omes: «Sejedolsöd filäti tö flan detik nafa! ed ofanols». Äsejedoms nu oni, e no äfägoms ad löpiotirön oni sekü lemödot fitas.
7. Nu tidäb, keli Yesus älöfom, äsagom ele ‚Petrus‛: «Binos Söl». Ven ‚Simon Petrus‛ älilom, das äbinos Söl, älenükom plökloti, ibä äbinom nüdik, ed äbunom ini lak.
8. Tidäbs votik äkömoms in naf, ibä no äbinoms fagiks de län, zao mö louns teltum, ed ätränoms filäti ko fits.
9. Ven ilükömoms sui jol, älogoms kolatafili, bosi fita, e bodi.
10. Yesus äsagom omes: «Blinolsöd bosi fitas, kelis efanols änu»!
11. ‚Simon Petrus‛ ägolom lü jol, ed ätirom filäti sui län; filät äfulon me fits gretik mö tumluldegkil. E to num gretik at, filät no äsleaton.
12. Yesus äsagom omes: «Kömolsöd ad janedön»! Nek tidäbas äkünom ad säkön ome: «Kim binol-li»? äsevoms sio, das äbinos Söl.
13. Yesus änilikom, äsumom bodi, ed ägivom oni omes, e leigo fitis.
14. Atos äbinon ya naed kilid, das Yesus ädasevädükom oki, posä ilelifikom se deadam.
15. Posä ijanedoms, Yesus äsagom lü ‚Simon Petrus‛: «O ‚Simon‛! son ela ‚Ioannes‛! löfol-li obi mödikumo, ka oms»? äsagom ome: «Si! o Söl! sevol, das löfob oli». Äsagom ome: «Bälätolöd jipülis obik»!
16. Telidnaedo äsagom ome: «O ‚Simon‛! son ela ‚Ioannes‛! löfol-li obi»? äsagom ome: «Si! o Söl! sevol, das löfob oli». Äsagom ome: «Galedolöd jipis obik»!
17. Kilidnaedo äsagom ome: «O ‚Simon‛! son ela ‚Ioannes‛! löfol-li obi»? ‚Petrus‛ ävedom lügik, bi äsagom kilidnaedo ome: «Löfol-li obi»? ed äsagom ome: «O Söl! Sevol vali; ol it sevol, das löfob oli». Yesus äsagom ome: «Bälätolöd jipis obik!
18. Vö! vö! sagob ole, ven äbinol yunikum, älenükol ol it ole zönüli, ed ägolol utöpio, kö ävilol; ven obinol bäldik, otenükol namis olik, e votan azönom oli, ed odugom oli utöpio, kö no vilol».
19. Me atos äjonom ome deadami, me kel öglorükom Godi. Posä isagom atosi, äsagom: «Sökolöd obi»!
20. Ven ‚Petrus‛ ägüflekom oki, älogom, das tidäb, keli Yesus älöfom, äsökom omis; otan, kel pö fided äjokom ta blöt omik, ed isäkom: «Kim binom-li utan, kel oträtom oli»?
21. ‚Petrus‛, älogölo omi, äsäkom Yesuse: «O Söl! Lio fät omik obinon-li»?
22. Yesus äsagom ome: «If viloböv, das bleibomöv lifön, jüs okömob, kisi atos tefon-li ole? Sökolöd obi»!
23. Dub atos sagäd äspearikon bevü svists, das tidäb et no ödeadom; ab Yesus no isagom, das no ödeadom, ab: «If viloböv, das bleibomöv lifön, jüs okömob, kisi atos tefon-li ole»?
24. Atan binom tidäb, kel etemunom dinis valik at, ed epenetom onis; e sevobs, das temunod omik binon veratik.
25. Yesus eduinom nog dinis votik so mödikis, das, if pipenetonsöv, igo vol lölik, cedü ob, no kanonöv ninädön bukis, in kels pipenetonsöv.

---------- oOo ----------

Ninädalised