Desiderio
From Wikisource
| Desiderio de Attilio Sarfatti XIX secolo |
| Informassion su la proveniensa del testo |
Dise Kardèc che, morti, i nostri spiriti
Va in alto, in basso, note e dì a torsion.
I supia, i bate, i parla, i toca, i fùrega,
I basa, i ride, e tuto de scondon.
Ah, signorina mia, se fusse vero!
Vorave andar stanote in çimitero,
Vorave morir subito anca mi,
Per viver sempre libero co' ti.
