Como chi intradu est su carrasegare
Como chi intradu est su carrasegare,
cun sa sua armonia, a passos lentos,
s’intendet sonos e divertimentos
in dogni logu chi si det passare;
ca veramente si devet istare
allegros divertende cun amore;
ispecialmente po su balladore
est tempus de si poder disvagare,
como chi intradu est su carrasegare.
Seneghe, ti divertes ca ses mere
de sas tua gioiosas allegrias,
sos abitantes sonos e armonias
intonan tuttus e ne an piaghere,
e i sa paghe chi at su podere
pustis de tantos annos est torrada.
Senza pensare a s’epoca passada
torramos a sonare e a cantare,
como torradu est su carrasegare.
Girat in tundu e su ballu s’affollat
tottus si mustran cun lestresa e coidu:
unu chi iscudet cun su pea in boidu,
unu chi tirat e s’attiru chi mollat;
isgangheradu che corvu si ch’imbollat
candu faghinde est su passu ‘e tres,
e faccia a terra e abbaidende a pes
chi poted calchi cosa cumbinare
como chi est intradu su carrasegare.
B’at baianeddas puru arringhi tostas
E bi nd’at lestras e ponen in mente
cando lis toccat sa tira insistente,
e sa guida lis movet sas costas.
Copias fora de passu e iscumpostas,
notande, chi nd’at semper calchi una,
ma como chi amos tentu sa fortuna
allegramente devimus ballare,
como chi intradu est su carrasegare.
Pustis de tantos tribaglios e fatigas
Totu su carrasegare divertende,
martis danzande s’istat isettende
sa die de sas riccas corcorigas,
e de cantu tribagliu chi ti pigas
pustis est unu fruttu isciupittadu,
cun su sudore chi ti es costadu
no ndi ‘alet mancu a mandigare,
como chi intradu est su carrasegare.