[ 20 ]
Du foginel us äspatom
Kö Carthago vön äbinom,
Omi äkoskömom telid,
Kofatänel, sevik dub glid.
—
Siedomsok e lesuno
Tävakonam lesumiko
Omis us musamom; alik
Konom zidis oka difik,
Jüs A. sagom: “Nim ledrolik
“In län isik binom lomlik;
“Ti lagata fömi labom;
“Balsdil meta loned binom
“Göba; lineg binom vifik;
“Fino nog köl.... leyulibik!„
—
“Sevob nimi,„ B. gepükom;
“Ab flen, no yulibik binom.
“Cenat painemom; sägo
“Is pätuvom nog bletimo
“Fa ob in jad fota gletik,
“Ab köl oma binom glünik!„
—
“Äloegob bimi nonik,
“Ven ätuvob nimi obik
“Ämufomok su klif; lölo
“Fa sol päbelitom, kludo
“Pölub nonik binom mögik;
“Vo! köl binom leyulibik!„
—
“Glünik! glünik!„ — “No, yulibik!„
— “Glünik!„ So luvokoms. Gletik
Binom dikod, e sun flenüg
Ya pevotom in neflenüg
—
[ 21 ]
Spatel kilid nu äkömom,
Kel dikodi ya älilom.
Päkom: “Te stilols-öd zuni,
“Nonik olas labom giti!
“Aneito, söls, äfanob
“Nimi, dö kel is älilob
“Zanön, e in klöf at omi
“Polob, sun ojonob nimi.
“Elogedob dini hetik
“Legudiko, binom blägik.
“if no binom blägik, täno
“Vilol fidön omi lölo!„
—
So lesagom, e plad blägik
Nim jonomok nu.... vietik.
—
Cenaf te äpükom poso,
Vön äkanom pükön läbo,
E “Mens gudik„, äbeginom,
“Giti e negiti labom
“Alim olas, bi köl oba
“Aicenom a del mälna.
—
“Nu dalols-ös obe libi,
“Tän ogivob nog konsäli:
“If votikes jinos gitik
“Kelos jinos oles klugik,
“Sikod non nemols-öd deno
“Omis stupik so foviko.„