Biblia/Nove Testamento/Luca/Luca 2

←Luca 1

Le Biblia in Interlingua Luca

Luca 3→

Luca

2

Nascentia de Jesus

¹In ille tempore esseva publicate un edicto de Cesar Augusto ordinante un censimento de tote le imperio.^[1]. ²Iste censimento esseva le prime a esser organisate desde Quirino esseva governator de Syria. ³Omnes debeva inscriber se in le urbe de origine de lor proprie familia. ⁴Assi, etiam Joseph ascendeva ab le urbe de Nazareth in Galilea a Bethlehem, urbe de David, quia ille pertineva al casa e familia de David. ⁵Joseph debeva inscriber se ibi insimul a Maria, qui le esseva promittite in maritage e qui esseva gestante^[2]. ⁶Durante que illes esseva ibi, se compliva pro illa le tempore de parer, ⁷e illa parturiva su filio primogenite. Illa le inveloppava con fasces de panno e le deponeva in un mangiatoria, quia in le albergo il non habeva plus un loco pro illes.

Le visita del pastores

⁸In ille mesme region il habeva pastores qui viveva al campo e qui, de nocte, vigilava e custodiava lor greges. ⁹E ecce, un angelo del Senior appareva juxta illes e le gloria del Senior fulgeva circa illes. A causa de isto, illes se espaventava multo, ¹⁰ma le angelo les diceva: “Non time: io annuncia vos un bon nova que portara al populo grande gaudio, ¹¹quia hodie, in le urbe de David, pro vos ha nascite un Salvator, qui es le Messia^[3], le Senior. ¹²Isto servira pro vos de signo de recognoscimento: vos trovara un infante inveloppate con fasces de pannos e deponite in un mangiatoria. ¹³E subito se jungeva al angelo un multitude de angelos^[4] qui laudava Deo e cantava^[5]: ¹⁴“Gloria a Deo in le excelse celos, e pace al homines del quales Deo se complace!^[6]”.

¹⁵Quando le angelos les quitava pro retornar al celo, le pastores se diceva le unes le alteres: “Vamos usque a Bethlehem pro vider lo que occurreva e que le Senior faceva nos saper”. ¹⁶Assi illes vadeva ibi in haste e trovava Maria e Joseph, con le infante deponite in le mangiatoria. ¹⁷Postquam haber le vidite, illes contava a omnes lo que les habeva essite annunciate re ille infante. ¹⁸Omnes qui lo audiva remaneva meraviliate de lo que le pastores les diceva. ¹⁹Maria, tamen, conservava tote iste parolas in su corde, ponderante re lor signification. ²⁰Assi le pastores retornava, glorificante e laudante Deo pro tote lo que illes habeva audite e vidite: illes habeva trovate toto sicut les habeva essite annunciate.

²¹Al termino de octo dies, quando ille esseva circumcidite, le infante esseva appellate Jesus; illo esseva le nomine ipse que le angelo habeva indicate ante su concipimento^[7].

Le presentation de Jesus in le templo

²²Quando se compliva le dies de lor purification secundo le Lege de Moses^[8], Joseph e Maria portava Jesus a Jerusalem pro presentar le al Senior ²³(justo sicut lo que es scribite in le Lege de Moses: “Omne masculo primogenite essera consecrate al Senior^[9]”), ²⁴e pro offerer un sacrificio secundo lo que es commandate in le Lege del Senior^[10], illo es un par de turturas o duo juvene pipiones^[11].

Le prophetia de Simeon

²⁵Il habeva tunc in Jerusalem un homine cuje nomine esseva Simeon. Ille esseva un homine juste e devote. Ille expectava le consolation de Israel^[12] e le Spirito Sancte esseva super ille^[13]. ²⁶In un revelation, le Spirito Sancte le habeva facite saper que ille non haberea morite nisi haber vidite le Messia del Senior. ²⁷Assi Simeon, guidate per le Spirito, veniva in le cortes del templo, e quando le genitores de Jesus entrava con le puero pro facer pro ille lo que esseva costumari secundo le Lege, ²⁸Simeon le prendeva in su brachios e benediceva Deo dicente:

²⁹“Nunc dimitte in pace tu serviente, Senior, secundo tu parola^{[14] 30}quia mi oculos videva le Salvator^[15], ³¹que tu preparava pro presentar le a tote le populos, ³²un lumine que se revelara al nationes^[16], e pro le gloria de tu populo Israel”.

³³Assi, le patre e le matre del infante esseva stupite de lo que esseva dicite de ille. ³⁴Inde, Simeon les benediceva e diceva a Maria, su matre: “Iste infante essera le causa del cadita^[17] e del suscitation^[18] de multes in Israel e un signo que essera recusate^[19]. ³⁵A te ipse un gladio te transfigera le anima^[20]. Assi se revelara le cogitationes^[21] celate in le cordes de multes^[22]”.

Le testimonio de Anna

³⁶Il habeva ibi etiam un prophetessa, Anna, filia de Phanuel, del tribo de Aser. Illa esseva multo vetule. Illa habeva essite maritate durante septe annos^{[23] 37}ma illa habeva remanite vidua e nunc habeva octanta-quatro annos. Illa nunquam quitava le templo e ibi coleva Deo die e nocte con jejunes e precarias. ³⁸In le mesme momento^[24] illa superveniva, les incontrava e comenciava render gratias a Deo e parlar re le infante a tote les qui expectava le redemption de Jerusalem.

Crescimento de Jesus

³⁹Postquam complite omne cosas secundo le Lege del senior, Joseph e Maria retornava a Nazareth de Galilea, lor citate, ⁴⁰ubi le puero cresceva e se fortificava. Ille esseva plen de sapientia e gaudeva del favor^[25] de Deo.

Le puero Jesus in le templo

⁴¹Le genitores de Jesus vadeva cata anno a Jerusalem in occasion del Pascha. ⁴²Al etate de dece-duo annos illes ascendeva ibi pro celebrar le festa secundo lor costume. ⁴³Ma, al termino del festa^[26], durante que illes retornava a casa, le puero Jesus remaneva in Jerusalem sin que illes lo remarcava^[27]. ⁴⁴Credente que ille esseva in un altere loco del mesme caravana, illes habeva facite un jornata de cammino ante comenciar cercar le inter lor parentes e cognoscentias. ⁴⁵Non trovante le, illes retornava a Jerusalem pro cercar le. ⁴⁶Post tres dies, illes le trovava in le templo, sedite in le medio del maestros del Lege: ille les audiva e les interrogava. ⁴⁷Tote illes qui le audiva esseva stupite de su intelligentia e de su responsas. ⁴⁸In vider le ibi, su genitores esseva multo surprendite e su matre le diceva: “Filio mie, proque tu faceva isto a nos? Tu patre e io te cercava e esseva multo angustiate”. ⁴⁹Ma ille les respondeva: “Proque vos me cercava? Esque vos non sapeva que il es necesse que io me occupa del cosas de mi Patre^[28]?” ⁵⁰Illes, tamen, non comprendeva le senso de un tal responsa. ⁵¹Inde, Jesus descendeva con illes a Nazareth e esseva in submission a illes. Su matre servava le memoria de iste evenimentos^[29] in su corde.

⁵²Jesus continuava crescer in sapientia e in statura gaudente del favor^[25] de Deo e del homines.

Notas

1. Litt. “de tote le mundo habitate”: un maniera de referer se al imperio roman e con proposito de administrar le impostos.
2. O “esseva gravide”, “pregnante”, “expectava un filio”.
3. O “le Christo”.
4. O "militia celeste".
5. Le laude del angelos explica le beneficios del nascentia de Jesus. In prime loco illes ascribe le gloria a Deo in celo, ubi ille demora. Deo revelava su gloria per mandar Su Filio: Inde il es appropriate ascriber gloria o laude a Deo. Le effecto super le humanitate del advento de Jesus es pace. Le concepto biblic de pace, radicate in le shalom hebraic, include le summa del benedictiones de Deo, non solmente le cessation de hostilitate.
6. O “que ille agrada”, “que ille ama”, traditionalmente, ma non bastante bon “de bon voluntate”.
7. Litt. “ante que ille esseva concipite in le utero de su matre”.
8. Secundo Levitico, le femina que parturi un masculo debe substar a un periodo de purification ritual de 40 dies: “Parla al Israelitas e dice les assi: ‘Si un femina deveni gestante e parturi un masculo, illa essera immunde per septe dies, illa essera impur como in le dies de su menstruationes. In le octave die se circumcidera le carne del preputio del infante. Pois illa remanera ancora trenta tres dies a purificar se del sanguine; illa non tangera alicun cosa sancte e non entrera in le sanctuario donec sia complite le dies de su purification’” (Levitico 12:2-4). Le texto, tamen, include le purification alsi de Joseph. Esque ille alsi sentiva de dover se purificar proque ille adjutava in le parto?
9. Exodo 13:2,12,15.
10. Le offerta de familias paupere que non poteva tolerar le expensa de un agno.
11. Un citation de Levitico 12:8; 5:11 (LXX).
12. Le advento del Messia, qui haberea consolate Israel per le restabilimento del nation (cfr. Isaia 40:1; 49:13; 51:3; 57:18; 61:2).
13. Isto le dava le dono prophetic cfr. Zacaria 1:67, Luca 1:41).
14. O “como tu le habeva promittite”.
15. Litt. “tu salvation”.
16. O “Gentiles”.
17. O “ruina”.
18. O “resurrection”. Alcunes cadera, altere essera suscitate.
19. O “un signo de contradiction”.
20. Le grande dolores del corde de Maria su matre non solmente ante le crucifixion de Jesus, ma tote le dolor causate del integre ministerio de Jesus, includite le evenimentos sequente de Luca 2:41-52.
21. O “pensamentos”.
22. Le maniera in le qual le personas responde a Jesus indica ubi lor cordes realmente es ante a Deo.
23. Orig. “desde su virginitate” (e non se maritava plus).
24. O “hora”.
25. O “gratia”.
26. Litt. “del dies del festa”.
27. O “sapeva”.
28. O “Que io debe esser in le domo de mi Patre?”.
29. O “tote iste cosas”.