Atılma dilindän halkım

Todur Zanet
Atılma dilindän halkım

Atılma dilindän halkım
Bän diz çöküp ta yalvarerım.
Oollarına da ver akıl…
Buna deyni dua ederim
Atılma dilindän halkım!

Bakında gör: dolay aydın,
ANA DİLİ erdä yaşeer.
İnan, salt o varer yardım
Açan seni zorba enseer
Atılma dilindän halkım!

Dil varken - doyma var adın,
Salt ozaman seni sayerlar
Hem da açan uşakların
Anaylan bobayı sesleerlär.
Atılma dilindän halkım!

Sular gider, gider altın…
Bu toprakta salt dil kaler!
Zerä dilin- senin kanın,
O yaşamda kuvet varer.
Atılma dilindän halkım!

Atılma dilindän halkım!
Bitki sözü sana söleerim,
Oollarına da ver akıl
Bän diz çöküp ta yalvarerım:
Atılma dilindän halkım!