AN
KONSTITUSYON
KAN
REPUBLIKA KAN PILIPINAS
K A P I N O' N A N
Kami, an soberanong syudadanong Pilipino, na minahagad nin tabang sa Kagurangnan Diyos, tanganing maghimo nin sarong makahustisya asin makatawong sosyedad sagkod mag-establisar nin sarong Gobyernon na madara kan samong mga kamawotan asin aspirasyon, matawan nin kaginhawahan an kagabsan, maataman asin mapakarhay an patrimonyo, asin mapaseguro para sa satuya asin satong posteridad an mga biyaya kan independensya asin demokrasya sa irarom kan ley asin rehimen nin kahustuhan, hustisya, libertad, pagkamoot, igwaldad asin katoninongan, minapirma asin minapromulgar kaining Konstitusyon.
ARTIKULO I
TERITORYO NASYONAL
An teritoryo nasyonal sinasakop an arkipelagong Pilipinas, kairiba an gabos na isla asin dagat na yaon duman, asin gabos na iba pang teritoryo na nasa kapangyarihan o hurisdiksyon kan Pilipinas na kairiba an kadagaan, katubigan, sagkod kahiwasan sa kaitaasan, an dagat teritoryal, an kairaruman kan daga, an kagapuan kan mga isla, asin an iba pang lugar submarina kaini. An kadagatan na palibot, napatahaw, asin nagkokonektar sa mga isla kan arkipelago, maging ano man an kahiwasan asin mga sukol, iyo an nagpoporma sa irarom kan kadagatan kan Pilipinas.
ARTIKULO II
DEKLARASYON KAN MGA PRINSIPYO
ASIN PALAKAW KAN ESTADO
Seksyon 1. An Pilipinas sarong estadong demokratiko asin republikano. An soberanya na syudadano asin an gabos na awtoridad kan gobyerno naghahale sa sainda.