Ⲟⲛⲛⲟⲫⲣⲓⲟⲥ

   Ⲡⲃⲓⲟⲥ ⲁⲩⲱ ⲧⲡⲟⲗⲓⲧⲓⲁ ⲙ̅ⲡⲛ̅ⲡⲉⲧⲟⲩⲁⲁⲃ ⲛ̅ⲉⲓⲱⲧ ⲉⲧⲧⲁⲓⲏⲩ ⲕⲁⲧⲁ ⲥⲙⲟⲧ ⲛⲓⲙ ⲁⲡⲁ Ⲟⲛⲛⲟⲫⲣⲓⲟⲥ ⲡⲁⲛⲁⲭⲱⲣⲓⲧⲏⲥ ⲛ̅ⲧⲁϥϫⲱⲕ ⲉⲃⲟⲗ ⲙ̅ⲉⲡϥⲃⲓⲟⲥ ⲛ̅ⲥⲟⲩ ⲙⲛ̅ⲧⲁⲥⲉ ⲙ̅ⲡⲓⲉⲃⲟⲧ Ⲡⲁⲱⲛⲉ ϩⲛ̅ ⲟⲩⲉⲓⲣⲏⲛⲏ ⲛ̅ⲧⲉ ⲡⲛⲟⲩⲧⲉ. ⲥⲙⲟⲩ ⲉⲣⲟⲛ. ϩⲁⲙⲏⲛ

   Ⲁⲩⲥⲟⲛ ⲛ̅ⲁⲛⲁⲭⲱⲣⲓⲧⲏⲥ ⲉⲡϥ̅ⲣⲁⲛ ⲡⲉ ⲁⲡⲁ Ⲡⲁⲡⲛⲟⲩⲧⲉ ⲉⲝⲏⲅⲓ̀ⲑⲁⲓ ⲉϩⲉⲛⲥⲛⲏⲩ ⲙ̅ⲙⲁⲓⲛⲟⲩⲧⲉ. ⲛⲁⲓ ⲇⲉ ⲛⲉ ⲛ̅ϣⲁϫⲉ ⲛ̅ⲧⲁϥϫⲟⲟⲩ ϫⲉ ⲁⲛⲟⲕ ⲡⲥⲟⲛ ⲁⲓⲙⲉⲉⲩⲉ ⲛ̅ⲟⲩϩⲟⲟⲩ ⲉⲧⲣⲁⲃⲱⲕ ⲉϩⲟⲩⲛ ⲉⲡϫⲁⲓⲉ̀ ⲉⲧϩⲓ ϩⲟⲩⲛ ⲉⲧⲣⲁⲛⲁⲩ ϫⲉ ⲟⲩⲛ ⲥⲟⲛ ⲙ̅ⲙⲟⲛⲟⲭⲟⲥ ⲙ̅ⲡⲁϩⲟⲩ. ⲁⲓⲙⲟⲟϣⲉ ⲇⲉ ⲛ̅ϥⲧⲟⲟⲩ ⲛ̅ⲉϩⲟⲟⲩ ⲙⲛ̅ ϥⲧⲟⲉ ⲛ̅ⲟⲩϣⲏ ⲙ̅ⲡⲉⲓⲟⲩⲉⲙ ⲟⲉⲓⲕ ⲟⲩⲇⲉ ⲙ̅ⲡⲉⲓⲥⲉ ⲙⲟⲟⲩ ⲉⲓⲙⲟⲟϣⲉ ϩⲓ ⲡⲓϫⲁⲓⲉ̀ ⲉⲧϩⲓ ϩⲟⲩⲛ.

   Ϩⲣⲁⲓ ⲇⲉ ϩⲙ̅ ⲡϩⲁⲉ ⲛ̅ϩⲟⲟⲩ ⲁⲓⲉⲓ ⲉϫⲛ̅ ⲟⲩⲥⲡⲏⲗⲁⲓⲟⲛ ⲁⲩⲱ ⲛ̅ⲧⲉⲣⲓϩⲱⲛ ⲉϩⲟⲩⲛ ⲉⲣⲟϥ. ⲁⲓⲕⲱⲗϩ̅ ⲉⲡⲣⲟ ⲛⲁⲡϣⲉ ⲛ̅ⲟⲩⲡⲁϣⲉ ⲛ̅ϩⲟⲟⲩ ⲁⲩⲱ ⲙ̅ⲡⲉⲗⲁⲁⲩ ⲣ̅ ⲟⲩⲱ ⲛⲁⲓ. ⲁⲓⲙⲉⲉⲩⲉ ⲇⲉ ϩⲙ̅ ⲡⲁϩⲏⲧ ϫⲉ ⲙⲛ̅ ⲥⲟⲛ ⲙ̅ⲡⲉⲓⲙⲁ. ⲁⲛⲟⲕ ⲇⲉ ⲁⲓⲛⲁⲩ ⲉⲩⲥⲟⲛ ⲉϥϩⲙⲟⲟⲥ ⲉϩⲣⲁⲓ ⲉϥⲕⲱ ⲛ̅ⲣⲱϥ. ⲁⲓⲙⲁϩⲧⲉ ⲇⲉ ⲙ̅ⲡⲉϥϭⲃⲟⲓ ⲁⲩⲱ ⲁⲡⲉϥϭⲃⲟⲓ ⲃⲱⲗ ⲉⲃⲟⲗ ϩⲛ̅ ⲛⲁϭⲓϫ ⲁϥⲣ̅ⲑⲣⲉ ⲛ̅ⲛⲉⲓⲥⲗⲏⲥ ⲛ̅ⲕⲁϩ ⲁⲓϭⲙ̅ ⲉⲡϥ̅ⲥⲱⲙⲁ ⲧⲏⲣϥⲭⲁⲓϩⲉ ⲉⲣⲟϥ ⲉⲁϥⲟⲩⲱ ⲉϥⲙⲟⲩ ⲉⲣⲉⲡϩⲱⲃ ⲟⲥⲕ ⲁⲓϭⲱϣⲧ̅ ⲇⲉ ⲁⲓⲛⲁⲑ ⲉⲩⲕⲟⲗⲟⲃⲓⲟⲛ ⲉϥⲁ̀ϣⲉ ⲉϩⲣⲁⲓ. ⲁⲩⲱ ⲛ̅ⲧⲉⲣⲉⲓϭⲟⲙϭⲙ̅ ⲉⲡⲉⲓⲕⲉⲧ. ⲁϥⲃⲱⲗ ⲉⲃⲟⲗ ⲁϥⲣ̅ ⲕⲁϩ. ⲁⲛⲟⲕ ⲇⲉ ⲁⲓⲁϩⲉⲣⲁⲧ ⲁⲓϣⲗⲏⲗ ⲁⲩⲱ ⲁⲓϥⲓ ⲛ̅ⲧⲁⲥⲧⲟⲗⲏ ⲁⲓⲥⲟⲩⲉⲗⲟⲩⲱⲥ̅ ⲉⲣⲟϥ. ⲁⲓϭⲱϫⲉ ⲛ̅ⲛⲁϭⲓϫ ϩⲙ̅ ⲡⲕⲁϩ ⲁⲓⲧⲱⲙⲥϥ̅ ⲁⲩⲱ ⲁⲓⲉⲓ ⲉⲃⲟⲗ ϩⲙ̅ ⲡⲙⲁ ⲉⲧⲙ̅ⲁⲁⲩ.

   Ⲁⲓⲙⲟⲟϣⲉ ⲇⲉ ⲉϩⲟⲩⲛ ϩⲛ̅ ⲧⲉⲣⲏⲙⲟⲥ ⲁⲓϭⲛⲉ ⲛ̅ⲕⲉⲥⲡⲏⲗⲁⲓⲟⲛ. ⲁⲡⲁϩⲏⲧ ⲉⲓ ⲉⲣⲟⲓ ⲁⲧⲱϩⲙ̅ ⲉϩⲟⲩⲛ ⲉⲡⲣⲟ ⲁⲩⲱ ⲙ̅ⲡⲉⲗⲁⲁⲩ ⲣ̅ ⲟⲩⲱ ⲛⲁⲓ. ⲁⲓⲃⲱⲕ ⲉϩⲟⲩⲛ ⲙ̅ⲡⲉⲓϩⲉ ⲉⲣⲱⲙⲉ ⲁⲓⲉⲓ ⲉⲃⲟⲗ ⲉⲓϫⲱ ⲙ̅ⲙⲟⲥ ϫⲉ ⲡⲙⲁ ⲉⲧⲉⲣⲡϩⲙ̅ϩⲁⲗ ⲙ̅ⲡⲛⲟⲩⲧⲉ ⲛ̅ϩⲏⲧϥ ϥⲛⲁϫⲡⲉ ⲉⲓ ⲉⲡⲉⲓⲙⲁ. ⲁⲛⲟⲕ ⲇⲉ ⲁⲓϭⲱ ϩⲙ̅ ⲡⲙⲁ ⲉⲧⲙ̅ⲁⲁⲩ ⲉⲓϣⲗⲏⲗ ϣⲁⲛⲧⲉⲡⲉϩⲟⲟⲩ ⲡⲣⲟⲕⲡⲧⲉⲓ ⲁⲩⲱ ⲛⲉⲓⲧⲁⲩⲟ ⲡⲉ ⲛ̅ⲛⲁⲡⲟⲥⲧⲏⲑⲟⲥ.

   Ⲙⲛ̅ⲛⲥⲱⲥ ⲇⲉ ⲉⲣⲉⲡⲣⲏ ⲛⲁϩⲱⲧⲡ̅ ⲁⲓϭⲱϣⲧ ⲁⲓⲛⲁⲩ ⲉⲩⲁⲅⲉⲗⲉⲓ ⲛ̅ϣⲟϣ ⲉⲁⲥⲉⲓ ⲙ̅ⲡⲟⲩⲉ ⲉⲣⲉⲡⲥⲟⲛ ⲉⲧⲙ̅ⲁⲁⲩ ϩⲛ̅ ⲧⲉⲩⲙⲏⲧⲉ. ⲛ̅ⲧⲉⲣϥ̅ϩⲱⲛ ⲇⲉ ⲉϩⲟⲩⲛ ⲉⲣⲟⲓ. ⲛϥ̀ⲕⲏⲕ ⲁϩⲏⲩ ⲡⲉ ⲁⲩⲱ ⲉⲣⲉⲡⲉϥⲃⲱ ϩⲱⲃⲥ ⲛ̅ⲧϥ̅ⲁⲥⲭⲏⲙⲟⲥⲩⲛⲏ ⲁⲩⲱ ⲉϥⲟ ⲛ̅ϩⲃ̅ⲥⲱ ⲉϥϭⲟⲟⲗⲉ ⲙ̅ⲙⲟϥ. ⲛ̀ⲧⲉⲣⲉϥⲡⲱϩ ⲉⲣⲟⲓ ⲁϥⲣ̅ϩⲟⲧⲉ ⲉⲙⲁⲧⲉ ⲉϥⲙⲉⲉⲩⲉ ϫⲉ ⲁⲛⲅ̅ ⲟⲩⲡ̅ⲛ̅ⲁ̅. ⲁϥⲁⲉϩⲣⲁⲧϥ̅ ⲁϥϣⲗⲏⲗ. ⲕⲁⲓ ⲅⲁⲣ ⲁϩⲁ ⲙ̅ⲡ̅ⲛ̅ⲁ̅ⲡⲓ̀ⲣⲁⲍⲉ ⲙ̅ⲙⲟϥ ⲕⲁⲧⲁ ⲑⲉ ⲛ̅ⲧⲁϥϫⲟⲟⲥ ⲉⲡϩⲁⲏ. ⲁⲛⲟⲕ ⲇⲉ ⲁⲓⲁⲥⲑⲉ ϫⲉ ⲁϥⲣ̅ ϩⲟⲧⲉ ⲁⲓⲙⲟⲟϣⲉ ⲉⲣⲟϥ ⲡⲉϫⲁⲓ ⲛⲁϥ ϫⲉ ⲁϩⲣⲟⲕ ⲉⲕⲣ̅ ϩⲟⲧⲉ ⲱ ⲡϩⲙ̅ϩⲁⲗ ⲙ̀ⲡⲛⲟⲩⲧⲉ. ϭⲱϣⲧ̅ ⲛ̅ⲅⲛⲁⲩ ⲉⲛⲁⲧⲁϭⲥⲉ ϫⲉ ⲁⲛⲅ̅ ⲟⲩⲣⲱⲙⲉ ⲁⲩⲱ ⲛ̅ⲅϭⲟⲙϭⲙ̅ ⲉⲣⲟⲓ ϫⲉ ⲁⲛⲅ ⲟⲩⲥⲁⲣⲝ ϩⲓ ⲥⲛⲟϥ. ⲁϥⲧⲁⲩⲟ ⲙ̅ⲡⲉϣⲗⲏⲗ ⲙ̅ⲡⲉⲩⲁⲅⲅⲉⲗⲓⲟⲛ.

   Ⲁⲛⲟⲕ ⲇⲉ ⲁⲓϭⲱⲣϣ̅ ⲉⲣⲟϥ ⲉⲧⲣϥ̅ϫⲓⲧ ⲉⲡⲉⲥⲏⲧ ⲉⲡⲉⲡⲏⲗⲁⲓⲟⲛ. ⲁϥϫⲙⲟⲩⲓ ϫⲉ ⲛ̅ⲧⲁⲕⲉⲓ ⲉⲡⲉⲓⲙⲁ ⲛ̅ⲁϣ ⲛ̅ϩⲉ. ⲁⲛⲟⲕ ⲇⲉ ⲡⲉϫⲁⲓ ϫⲉ ⲛ̅ⲧⲁⲓⲉⲓ ⲉⲡⲉⲓⲙⲁ ⲉⲓⲟⲩⲉϣ ⲛⲁⲩ ⲛ̅ϩⲙ̅ϩⲁⲗ ⲙ̅ⲡⲛⲟⲩⲧⲉ ⲉⲧϣⲟⲟⲡ ϩⲙ̅ ⲉⲡⲓϫⲁⲓⲉ̀ ⲁⲩⲱ ⲙ̅ⲡⲉⲡⲛⲟⲩⲧⲉ ϥⲟϭⲧ̅ ⲙ̅ⲡⲉϯϣⲓⲛⲉ ⲛ̅ⲥⲱϥ.