ჯვეში დრო
| ჯვეში დრო by |
| მაკარ ხუბუა. მეგრული ტექსტები. ტფილისი 1937. |
რუსი ხენწჷფეში დროსჷ ყაზაყი რდჷ დასაჯული.
სუმოშ წანას არსებენდჷ თი კანონი უბედური.
პომეშჩიკები თის ჸუნდუ, თავად-ჟინოსქუა ჯგირი.
უბედური ყაზაყეფსჷ სუსტი აფუდჷ კჷდირი.
საწყალ მუშა ყაზაყეფი გერდესჷ დო ხაჩქუნდეს.
თავადი დო ჟინოსქუა ოროს გითიქვაჩუდეს.
გაჭირებული ყაზაყენს მართახეფით ლახუნდეს.
ვარა მუთუნ ქოთქუკონი, ჩხვინს გამწუკვათუნდეს.
ჯვეშ თავადეფს ყაზაყეფი ირო აფუდეს ფორილი,
ყაზაყიშო ჯგჷრ დო ფური დღას ვარდჷ გჷშაგორილი.
შამფური უკინებუდეს, წვანდი წჷმოთოლირი.
ირგჷდჷნ ფერი ყაზაყი თით ორდჷ ჭყოლირი.
ყაზაყ შურო ქირგჷდჷდა, ხათე მონჩალჷნდეს.
დობორკჷნდეს ყაზაყის, უღუს ქჷგედგჷნდეს.
შინაყვათ ყაზაყეფი თინენს ეკოჸუნდეს.
ვითი, ვითოხუთი კოჩი აბჟანდის ოსხუპუდეს.
ფერ ყაზაყი შურო ვარდჷ თი დროს სიტყვას თქუანდჷნი.
ის დუცჷ კვათჷნდეს, თავადის ვე ფუჩუანდჷნი.
საჩილო რდჷ ყაზაყი დო ბარგის ვემკაქუნანდჷნი.
თავადიში რდჷ პირველ სერი, ოსურს ქიმიჸუნანდჷნი.
თაში ორდჷ დასაჯული ყაზაყეფი ეთი დროს.
თავადი დო ჟინოსქუა მიკოჯანჷდეს სტოლს.
ღვინს გიოშუანდეს ორქოშ ჭირქასჷ დო ბროლს.
თექ ყაზაყიქ მინილჷკონ, გემწუჸოთანდეს თოლს.
თი დროს ორდეს ყაზაყეფი უჩა დღალენს გერინელი.
თეგვარ უჩა სამართალი თი დროსჷ დჷ გორჩქინელი.
სინანდულე თაშირენ დო მუშა ფთქუა მოძინელი?
თქვა ვარეთ, მაჸალეფი, თი სარკეს გეჯინელი.
შეილებუნა მუზეჲმიშა მინორთე დო ქოძირენი.
Liმუზეჲმისი რე იძირენ ეთი დროში მაგალითი.
მუდა ნერს ძირჷნქჷნი, ვე მიჩინე ანგარიში.
ტყები არძო თექ მიკობუ რუსი, ქორთუ, მარგალიში.
საერთოთ არძო ვარი, ყაზაყობა დაბალიში.
მუზჷმა რე ჩქინი სარკე სახეშ მაძირაფალი.
არძო თექი მიკოხანტუ, ჩქინი მადინაფალი.
ჩქჷნ ზჷსხჷრიშ მაშუმალი დო გურიში მარგილაფარი.
სინანდულე თინეფიში ათენა რე თაშ მართალი.
თავადეფიშ ისტორია რსულას მოკო ქოფთქუე.
შერსულებას ვოვედრუქ, მუთ ძალას ქოფთხუე.
ძალამს მოხიოლჷდეს სითავისუფლექ მორთუე.
დო ჩქჷნი მამონებელენქ შხვა ფერადო გორთუე.
ჩქჷნი მამონებელი ორდჷ ჯვეში თავად-ჟინოსქუა.
ყაზაყეფიშ მაბორკალ დღას ვა ჸოფე ინეფჯგუა.
ნება ვა მიღუდეს ვარა, ითამს მორკუდესო ჭკუა?
თინეფი ორდჷ ცხოვრებას მაჸვილარი ჩქჷნი ჭუა,
თავადი დო ჟინოსქუა ჩქჷ პატონო პუნდეს.
ჩქჷნი ხორცის ჭკუმუნდეს, ზჷსხჷრს ქოხუპუნდეს.
თავადებიშ სქუალეფი პუხუთ გილაპუნდეს,
ვარია ვა მათქუედეს, თეშ ქჷმორულეს.
თავადეფი, პატჷნეფი ართი დიხას ზოჯჷნდეს.
ინეფიში მორდილობა ჩქჷ მუსჷ რდჷ მორგჷდეს?
თითეული ყაზაყის ჟი-ჟირი ნარდი ქოპუნდეს.
კოჩო გუვოჩქვანდითი დო ღალატის გოპუნდეს.
ჩქჷ ვორდით ინეფწკჷმა ნანდულ საიმედო ჯიხა.
ართი თავადის ქოუღუდჷ ანთას დესეტინა დიხა.
კვაჯი, ბერზუხ, მურზაყანი, კოწია, ლევანი დო მიხა:
არძო ჩქჷნი ნაგვანეფი, ჩუჩუბამი, ქვარა ფიხა.
მარა დირთჷ ჰავაქჷ დო თავადენს ვორჯგინით.
უკუმელა ჩქჷნი თოლით სარკეს ქიგვოჯინით.
მი მუსუდჷ მორთჷდესჷ, ჩქინი თოლით ქობძირით.
ჩქჷნი ხორციშ მაჭკომალი ბრელი ვიშო მიფცილით.
მუშა ორდჷ ჯვეში დროს დასაჯული, მონებული.
დღასჷთ ვა რდუ მუშაწკჷმა საქმე გიშახწორებული.
ჯვეშ ხენწჷფეს თაშ აფუდჷ კანონ გჷმოგონებული.
ასე ჯვეში კანონეფი ქჷმაფუნა შორებული.
ჯვეშ კანონეფქ დემეთხიის, ახალი რე დოჭყაფილი.
ჩქჷნი საუჯგუშო ბედი ბუნებაში დოჭყაფილი.
ჩქინი ხორციშ მაჭკუმალი არძო ვიშო გოჭყვადილი.
ინეფიშ მანგარი ხინჯი ასე ორე გოტახილი.
ხომ ქორშჷნა, ამხანაგეფ, მიფშით ზჷსხჷრიში ღვარს?
მუჭო რდჷ მაწვალენდესჷნი მუშა ყაზაყიში გვარს.
გივერი̄თ უმუშელას, ასე ინეფი გილენგარს.
ვა რდას ჩქჷნი მაჭკუმალი დო გაუმარჯოს კომუნას.
ტარას ჯაბუა