წიგნი ტარიელიში, ჸოროფებულს პასუხო

503.მევჭარი: ბჟა, სქან ჩხორიაშ სინთექ, სკანდედ მუნარჩეფი,
გურს ქუმკმარჩუ, გილამილუ ქომოლობა, სიმარჯვეფი,
შერქუ სქანი გაგმიბცადი თი სიმშვენე, სინაზეფი,
შურიშ გამა ნინალუა მუთი, მუჭო ივგამეფი?

504.ვაჩამთხინე შურს გვალონი, მუკომიტე თინწკუმანი,
ეთი ბორჯის ქოვუგურე ბორჯ ამდღარი მობორჯნანი,
საკილე სქანქ ქუმმაკათუ, კილეს გალე გიმობდანი,
ეხიოლი ფხვადუდუნი, მუთ გევხარკო მა თიზმანი?

505.ორიდენი მოლვოჯღონი, თხუალა სი ალამჸუჯე,
გოღალირი კაბაც თეცალ, ვავძირ, ვავორდ მა უგურჯე,
გურწულირი ვადმოჸოთა, მერგი, მორთი, ქუგომბურჯე,
ქიანაში მარენჯეფშა უსქანესუ ვემმახუჯე.

506.ქიდიმჯირი, ვლურსუ ჰამოთ, ძღაბ, იქ, ადრე გემეყარუ,
მანგარ გუვოლ მა თიშ გამოთ, ჸოროფილქუ მესისმარუ,
გობკურცხინი, ვანკმეკარუ, შურდგუმლობაქ გემენწარუ,
სერ გობტახი, საჩქილოშა თიში ხუმაქ ვალმაჭურუ.