წარწერა წიგნზე
Jump to navigation
Jump to search
| წარწერა წიგნზე ავტორი: ლადო ასათიანი |
| 1941 წელი |
ნ. აგიაშვილს
შენ წინათ ცაში დაჰქროდი,
ესიტყვებოდი ვარსკვლავებს,
და დედამიწის წალკოტი,
არარაობად ჩასთვალე.
შენ მაშინ გულთამხილველად
მეტყოდი მშობლის კილოზე:
„ყრმაო, ყველაზე პირველად
სამშობლოსათვის ილოცე“.
შენ წინათ ცაში დაჰქროდი
და წმინდა სულებს თან ახლდი,
ახლა კი მიკვირს, იმგვარი
აგრე ვით დაჩაჩანაკდი?!
ცხოვრების ორომტრიალში
უპირველესი ყოვლისა –
შენ ხმა დაჰკარგე წინაპრის,
მამაცი მეციხოვნისა!
მე გავაცოცხლე ხმა იგი
და მინდა ყურში ჩაგძახო:
„ადექ, მგლის მუხლი მაიბი,
რამ წაგახდინა ყაზახო!“
შენი პირველი ოცნების
და პირველ სიტყვის დამჯერემ
სამშობლოსადმი ლოცვები
ამ ცისფერ წიგნში ჩავწერე.
ტავად დავუდექ თამადად
გარდასულ ხმათა ღრეობას,
წაიკითხე და პაპათა
დაგიბრუნდება მხნეობა!