ცას მიკოკირ ჩქიმი შური
Jump to navigation
Jump to search
ცას მიკოკირ ჩქიმი შური,
ხასლას ალაცხვანტალ თუთა.
თუდო გირძას გილაჯან დო
ელმოყვიყვინანს ჟი ურთა…
გივოჯინექ გიმე დიხას,
დიხას ველდა ჯგირობუას…
შურს მაჭვემერ ჭუაქ გიღას,
უკულ ფთქუა- თექ ქოპუას!..
თანდუ. ჩხანა ეშმეკერკელ.
მუშ ეღებშა მიშმურს მესი…
გურქ დომიღურ, გინმართ მერკეთ,
კოჩის ტყვია ქაჸათესი…
ვარ, ვაღირუ გიმე ულა!
მარა გურშა გაზოჯენო?!
შარა მუდგა ვარდას ღულა,
ჸუჩა მეჸუნქ- ვაიკვენო?
ორტვინს ხანდენს სქვამი ცირა,
გიოთასანს ქინძისუნი,
დახე ვარა გეგმობლ გიმე -
გოკარკაცუ, გიძიცუნი…
ზუღა კინმირცხონანს რეღმას,
თიშ კიროკილ თუმას გუნი.
მუ რე გურზუ ჭუას თეზმას,
გურიშ ჯერღვი დუმასქუნი…
ვარ, ვაღირუ გიმე ულა!
მარა გურშა გაზოჯენო?
ორტვინს ისქვამაჭუქ ცირან-
შური ოკო ამბორჯენო?!