ჩქი ჯინჯეფით არძა ართ ვორეთ
ჩქი ჯინჯეფით არძა ართ ვორეთ.
ხვალე ჸალეფით გიშებგორუთ ართიანშე.
ჯინჯეფით გუთმუაკირუთ ართიანც,
არძა მუმალს ჸალეფით ზას ვუბორკუნთ.
ოწონდე ჩქინ მარდუალ რე,
ლურენჯო შეულებჷ ჩქინ ჯოხო დომიძახანინ.
ლერსიქ თექ გორჩქინდჷ,
სოდეთ მუთუნ ვა დოჭყაფენი.
ჩქინ ოთანჯე სოთინ ვარე,
ჩქინ დანჯირალ სოთინ ვარე.
ღურუს გიწმულუანთ
რინა აწოჯუმალირო.
ჭუმანერ დღა გოღანერ ნაშუმა წყარც
მეჸუნც,
ამდღანერ ბორია შუშელ ჭვემას გუთმაქუნანც
დაჭყაფუს დო დათებუს.
იასუმიშ თუთა უგურჩქინუშ ნაფუცქინაშორო
ჭვიტაანც.
იბდათ თიშა, შოლირი ჸოროფა,
ნორღვა ბორიათ გუოსქირუათ.
ცაშ მინდორც ჩანარცალო ეშულირეფქ
შურუბუმობაშ ნოთე გევორზათ
მურიცხეფიშ თოლეფც.
გოკურცხუ ზიტყვა არზიშ ქვარას ჭახანიშ უკულ დო
ქოდირულუანც
ოსინთეშ ხოლოს.
ოსინთეშე ვარა ბჟა დო ვარა თუთა
ირო განმიჯინე.
ირფელ ჩქინო ვარე,
ჩქი ვორეთ ირფელშო.
არძა შხვადოშხვა მარქვალეფშე ვორეთ ეშნაველი,
ჭარა მარქვალიშ ჸორადილ გურ რე.
ვარე თუთა, ვართ ბჟა რე,
ჩქინ უმოღე დო უბადო ნაფირქებუში
მუკორთინაფილი, სისმარ მეტებული
ცხადიშ ნარზა რე, სოდეთ კინე ჩქინ დუს ვონირზუთუნი.
ჩქინ ან დო განც გირთაანც ირფელი,
მუსუთ ვა დურთაფუნი.
ჩქი ეფურინუაშა მიარეშა ვორეთ ეზიმილი
შარდენიშ ფსუათ.
ჩიტეფი ვა რდასუნ, შხვა მუდგარენეფ იჸუაფუდჷ,
პეულიშ ხეშქაგურც გეჭარჷ ჩქინ რინა,
ღოზეფი იძირე,
ჩქი ირო შემილებუნა ჩქინ ფერეფი ქაშუძინათ
დო კინე ქუგუჸუნუათ შხვა ღოზეფინ.
ნაჭკირაშა გენოფრთით-და, წყარმალუშ ნადუს
მივოგორუანთ.